TIMOTEOJA ISHU PABLORA QUIRICA CUADISHA BETA ISHU CUADISHACUAREQUE
2 TIMOTEO
Riyaque quirica ri Pablora Timoteoja cuadisha beta ishu cuadishacuareque. Riyaque hueneya patyatu Pablo amena maju japadama cabaticuare. Riyaque quirica eque rejari casaturacuare dutya tuja casa tsehue tuja Yusu merejaca ishu ama. Cuejacuare tuja tuque, arepa Cristoja inime canerecatiya ama bucha, tuque casada juishu. Cuejacuaretu ecuita cuana terehuie eje bucha judadibuqueque. Umae versículo cuana cabahuityati ishu jidaque ri: 1.7, 12; 2.1-6, 15; 3.12, 16-17; 4.7-8.
1
Pablora Timoteo isaracuareque
1 Riya micue quirica cuadishanucaya, Timoteo. Ique Pablo. Jesucristoja yana atsaquique ique, Yusuja jadya inime juya tibu. Turatu Jesús queja ecatyati cuanaque tuaqueja judirusha ana ahua, tuque jacanuca ishu ama. Turadya ique cuejamerehua riyaque quisarati.
2 Miquemi ecue ebacua buchique, Timoteo. Dyaque iyuhuedaque mique ecue. Yusu ecuanaja Etatara, tumebaedya Ecuana Cuatsashaqui Jesucristora jida tsehue narucue tatseja quiyuhuebati tsehue. Tatseja miatsehue canerecabati paani. Tatsera inime tsapema anishacue.
Pablora Yusu yusurupai acuareque Timoteo
Jesús queja catyatihuaju
3 Mique adebatsu tuque Yusu yusurupai aya. Huecada tupu, meta tupu Yusu tsehue quisaratiya micue ishu. Riyaque Yusudyari era mereya, tura cuatsashaya eque aniya tibu. Adebayadya tuque era ique tuja biji eque anicara juhuaque, ecue baba cuana anihua bucha.
4 Eje buchadya banucacara ebari jadya mique aya. Adebayadya tuque era, mira ique sareya iyuhueda jadya bayaque. Era shanayajumi pacuare. Tudya tuque ecue nime aputataquima ishu. Eatsehue cabatinucatsumi dyaque pureama ejuu.
5 Adebayadya tuque era, mique Jesús queja nimeedya jutidya juajeyaque. “Jesús jaque ique” jadya camadya amami quisaratiya; yuneridyami tujaque. Nanada equedyami micue anu Loidara, micue cuaa Eunicera jadya cuejahua Yusu Neri aniyaque. Jesúsja quisarati bacatsu tatse tuaqueja catyatihua. Tuequedyami tatse catyatihua baedya catyatinucahua. Ecue inime ni mi riya tuaqueja catyatijacamadya.
6 Jadya tibudya mique cuejaya riyaque. Icuene tuque ecue emetucu micue iyucaju iyahua, Yusurami tuque merequi mepehua jadique mique caadebati ishu. Era jadya ayaju tuque micue Yusura tuja Espíritu cuadishahua, micue tuque mere ishu casa ani ishu. Nime aputaume riyaque. Yusu merejaca ishu ama cacasatiajecuedya jutidya.
7 Espíritu ecuanaja ishu Yusura cuadishahuara ecuana bajida ama amereya. Tura ecuana casaturaya ecuana jidama inime cuanaju nubitsu ecanimehuallatiuju. Tura ecuana peya cuana iyuhueda bamereya. Turadya ecuana jida inime tupumereya ecuanaja ecuanara jida adebayaque aishu, jidama adebayaque aishu ama.
8 Bisu adebama cueja acue Yatse Cuatsashaquija quisarati. Arepa ique etare apudaju netiyaju baya ama bucha, bisuume ique jadya baatsu. Ique rehua erisi netiya Jesúsja quisarati era peya cuana cuejaya tibu. Mique ni mi tumebaedya nerecada atadadibuque. Iducue canimehuallatima Yusuja quisarati mira cuejaya baatsu tunara eje bucha aya cuanaque. Yusura mique casa tyahua tsehue iducue dutya.
9 Yusura ecuana Ijahua quejaque inajacamerehua. Tura yatse mepehua tujaque juishu, tuque pureamaturayaque ani ishu. Jadidya tujatu ahua, ecuanara cuita ai jidaque ahuaju baatsu ama. Jadya tujatu ahua, tuja jadya inime juhua tibu. Tura ecuana iyuhueda bahua tibu, tujatu ahuadya, arepa ecuana tuque ujeu juhua ama bucha. Riyaque yahua ejitaju juma jarijutu Yusura quisarati acuare: “Inajacamerebuque tuque Jesucristo queja catyatibuque cuanaque” jadya.
10 Icuene ecuana baecua juhua tura ecuana dyaque iyuhueda bahuaque. Ejitaju tujatu ahua Jesús ecuana inajacamere ishu majuhuaju. Tuaqueja catyatitsu tuque ecuanaja aijama baji maju ishu, Jesús ecuana emajuuque majuhua tibu. Iyacuaque quisarati bacatsu, ecuana bahuedya juhua majutsu Yusu queja judiruyaque ni eje tupu jaca ishu ama. Bahuedya ecuana cacuitatinucatsu netitsuranucabuqueque yuta jida, arepa ririterehua ama bucha.
11 Yusura ique cuadishahua riyaque quisarati cueja ishu. Cuatsashahua tura ique tuja yana atsaqui juishu.
12 Yusura amerehua eque juhua tibu, nerecada netiya etare apudaju. Jadya tibudya ique bisuya ama jadya canerecatie juya cabatitsu. Bahuedya ique ai queja catyatihuaque; tuquetu casada. Turadya ique cuejamerehua Yusu queja judiru ishuque quisarati. Arepa tunara ique iyebuque ama bucha, ecue inimetu yuneri cuitadya riyaque quisarati cuejatanajacabuque ama. Jesús eje tupu junanucaya tuputu riyaque quisarati cuejatanabuque.
13 Icuene mique bahuityahua yunerique Jesúsra bahuityahuaque, mique peya cuana bahuitya ishu bahue juishu. Bahuityaume bapeque quisarati. Jesús queja nimeedya jutidya juajecue. Peya cuana iyuhueda bajacaume. Jadya anie juatsutu ejitaju juya Jesús ecuana tsehueque, ecuana bacue tuatsehue jadique.
14 Yusurami cuadishahua Jesúsra bahuityahuaque yunerique cueja ishu. Bape bape cuejae aume. Peya cuana queja bape cuejameree aume. Yusuja Espíritu micuana tsehuera micuana tsahuaajeyadya jutidya jadya juishu.
15 Aniyatu ique jacaqui juhua cuanaque. Dutya jujeri Asiaju cuanaque Jesús queja ecatyati cuanara tsahuacarama ahua; Figelo, Hermógenes ecatsera bacue tumebaedya. Miratu dutyadya adebaya.
16-18 Onesíforo bacue jadya ama juhua. Tujatu bisu aijama juhua eatsehue, arepa ique etare apudaju netiyaju baya ama bucha. Romaju junatiya tajira tura sarehua. Ique dadiya tupu tura sarehua. Daditsu tura casaturahua. Rehua junama jarira tujatu Efesoju cuanaque dyaque tsahuahua Jesús queja ecatyati cuanaque. Miquemi dyaque jidadya bahue tura ecana eje bucha tsahuae ahuaque. Ecuana Cuatsashaquija canerecabati paani Onesiforoja etareju aniya cuana tsehue, tumeque ecuitaja eatsehue dyaque canerecabati anihua tibu. Jadya tibudya Jesúsra Onesíforo dyaque canerecabati tsehue pabana tuque junanucatsu.