34
1 Ashiri Taarashipan waantari Móysispa tsiyatku; Shiy na shaanasha tsimbun táwar patumbich turungi. Turuyarush, shiy pátangarangish ashiritam tinangi. Sheerush, nuwsha nuwaanaatsi kamachtamari ichtaru táwaramun yandarangi antam yusur yandachima.
2 Ashiri wasina ichinguru kamiran yuwapangcha. Sheerush, machip Sinayap pu zar puturta káringcha. Anpari machush íwar shiyapa chamayangachinipa.
3 Itaru, shiy tputspa minamtiyam ipunurush kárinllpa. Mishat, tputs machish kustapa. Mishat, opeejatam, wakaratam anush machinungi kustapa, Taarashipan Móysisee taarangiya.
4 Ashiri Móysissha tsimbunoo táwara patumbchi tatsamooritam tururangiya. Ashiri putamsha puturi táwara patumbchee yáyaru, machip Sinayap kárirangiya. Yuwari Taarashipan kamachtarangu anuri Móysis tuminurangiya.
5-6 Ashiri Taarashipansha msasush karuweeru, naantachu, yuwartatam Móysisee tárangu anuritam arangeem tushiyramchu; Nuwaa izuuru mangoonpana, átu, Móysisee tsiyatku tárangiya; Nuw Apanlli Taarashipantana. Nuw kchinamishtana. Tputsee nayanikina. Mishat, nuw nda ngutariti tputsee mikeeru tsiyantakina. Tputsireetsi kapung zurampatarta chinaktana, tárangiya Taarashipani.
7 Ashiri tputsee chinakuri ayamta nda kasachima. Urutamaritam nlluranureewa chinachtamana. Urutamaritam yutaritshishirineetsini yarkuri taachima. Itaru, tputsee chinaktaati, uru yutaritshishimand wanichima. Yuwaatsimari tputs nuwaa kuki kapeetkana, misha nuwaa mantsir tsiyatkana anumandari nuw izuuru wanichima. Wipaatstamta, anumunsha wachinllinootstamta, anumun wachinllinootstam wipa, uru kiyung kachiykusin taachinllinaya, waparimand yutaritshishirini, tárangiya Taarashipani.
8 Ashiri Móysissha mikeeru timucheeru, tsapumun much kandanchinand sheeru, Taarashipanee ungirtarangiya.
9 Ashiri Apaa, shiy zurampatari nuwaa chinakush, iyapat ipuneerush naangcha, Apaa. In tputs zurampatari yutaritssincha; itaru shiysha Apaa, iyaa yutaritshishirini izuuru mapiyngcha. Sheerush, shaana tputsireemish yusur iyaa ínangcha, Móysisi Taarashipanee tárangiya.
10 Ashiri Taarashipansha; Na mazinangcha; Ashiri na nuw yusur tputsireemi siyaa ínchintspa. Ashiriya, nuw siyaa izuuru istachintspa. Nuwaa wizpuri kizpur napuxtamashee siysa pangatssa. Mishat, ichinguritam tputs nuwaa wizpuri pangchinllinaya. Yuwaa tputs tsapurunasush nllurtakchu nda anoo parangusin, itaru natsha pangchinllinaya. Mishat, siysa Kanaanush tsap taakchus, Kanaanshurisha ichingurusin nuwaa, Taarashipaneetsi wizpuri pangchinllinaya.
11 Ashiri siysa nuwaa kuki payukinaareesa, nuwsha Kanaanshuchee tputs ichinguru tashitungachima; Amorrewshuchee, mishat Hititshuchee, mishat Feresewshuchi, mishat Hebewshuchee, mishat Jebusewshuchee ashpiri ichinguru Kanaanush tsap tashitungachima.
12 Ashiri siysa Kanaanush tsap kuskachus, anpa tputs wanasir amikurtarintspa, watam uwapa mapiyru taakchus, uru siyaa xarashish wayachinllinawa.
13 Ashiri paptsa. Siy mangiptis tángtsa. Uwaatssin apanllirinee minamtiyam chinarintspa, izuuru anoo mapiyngtsa. Anoo siysa ichinguroo kpitangtsa. Maachee ichinguru, patumbich xanatama anoo kapeeta kapeeta shingtsa. Mishat, apanllputsee waana tinayarusin, Aseraa sura ísamarangana, anoo ashpiri izuuru kpitangtsa. Ichinguroo pátangambeerus ksangtsa.
14 Apanllputsee ungirtarintspa, watam nuw Taarashipani Apanlli watseenurinawa.
15 Ashiri yusursha táchintspa siyaatsi, Kanaanshuchpa tputs wanasir amikurtarintspa. Uwapa wanasir amikurtakchinaareesha, ashiri uwshapsiniya shambatkusin, apanllputseem maacheetsi chinuzee mucheersin, siyaatssha; Pza; shiyaptatam washunand shambateeni, táyarusin, siysa uwapat anoo katungchitamsa.
16 Ashiri minsha siyaa táchintspa; Siy minamtiyam ipareetsis kizaa uwashcheem wip kamuzinur panarintspa. Mishat, siysa iparis kamuzinur uwashchee wip kizanur yamarusinapa. Itaru, siyaa iparis yamakchinaari ashiru, apanllputseetssha wazaranllpa, nduntaati ashiru wizanllpa, ungirtachpasinaya.
17 Mishat, siyaa táchintspa; Ayamtaati yusur siy maachee orpat tinayarus, Watacha Apanlli ini, tárintspa.
18 Ashiriya, uru nuwaatsimari chinayarus, nuwaa kuki payungtsa. Ichinguru masach pangaa nda ísima tsimbun matayaru zari katungangtsa. Nuw sirú kamachtarangi anuri shingtsa. Ambari ashkus tángtsa yuwash Marsu tsup yakachu anshu, watam anush tsup Ijiptosh tsap nuw siyaa tashitungaranguri, siyaa tapachindarangina, Taarashipani tárangiya.
19 Mishat, siyaa tina; Siy iparis kamuz iwachiztam nllurtakachu anoo nuwaam wayangtsa. Ashiri iparis iwachiztam nllurtakachu, minam opeejaa karupana, nduntaati ashiru kaaparaa karupana pchangtsa. Amb ashkachus, iparshitis ndusha tsipachinlliniya. Mishat, chineetsis wip iwachiztamawa upapchiri wakaraa, misha opeejaa, kaaparaa aship an karupanaw nuwaam wayayarus pchangtsa. Pachayarus, mucheerus, nuwaa ungirtangtsa.
20 Burroo wip iwachiztama nuwaam ipuseerus wayangtsa. Itaru, pcharintspa. Burrumand opeejaa karupana, nduntaati ashiru kaaparaa karupana pchangtsa. Itaru, nda ashimaam zandkus, ashiri burroo wayarpunish tupeerus, pchangtsa. Ashiri tputs maachee nuwaam wayamaam nda zandku, pachindku, ashiriya nuwashsha ungirtamaam kustapa, átcha Taarashipani tángcha, tárangiya.
21 Mishat, siyaa táchintspa; Ashiri siy minam matayaru zari tarawaztangtsa. Itaru, tsimbunurinsha matayaru zar anush kanusangtsa. Izuuru mapiyngtsa. Mapshis taaritaa, mzareemis mzaktaateesa ashiru, misha tatsumsheetsis pusaktaateesa ashiru, itaru anoo kanusishush zari kasayarus, izuuru kanusangtsa, Taarashipan tárangiya.
22 Urutamari yuwapur tirik wanus kayanakchu anush chtayarus, tsimbun matayaru siman pusakus, ichinguru xanateerus, nuwaatssha uru, Wapparee, átus, shambatkus tángtsa. Mishat, ichinguru tatsummareetsis wanus pusayarus, pusam iwapayarus, xanateerus, anumand shaniyeerus, nuwaatssha, Wapparee átus, shambatkus tángtsa.
23 Mishat, siy Israelchichis kamuzis ichingurus tputsis minamtash masach tuchip shaniykus, nuwash pangi kuseerus, nuwaa Apanlleetsi, Taarashipaneetsi, ungirtangtsa.
24 Ashiri nuwsha siyash tsapunis, Kanaanush tsap, nllitaritaa tputs tashitungayaruri, arap zanganchima. Siyaamsha tsap kapunguri panachintspa. Anoo tsap siy ichinguru payutssa. Ashiri siysa tuchip nuwash pangi shaniymaam naakchus, itaru ¿chakaja siyaa tsapunis itutsich? mapiyrus, naatssa nuwap pangi, Taarashipan tárangiya.
25 Ashiri misha siyaa táchintspa; Chineetsis nuwaam pachakus, ursirpat pangapat tputampat nuwash wayarintspa. Yuwapur nuw siyaa tapachindarangi anush zar shaniykachus, opeejaa karupan wanuts katungkachus, katuchimaa putam zari katungamaam wayarintspa.
26 Anumunsha siy tatsumim wanus yuwaa ichtakachuri kayanakchu anoo pusayarus, nuwash pangi yushindayarus wayangtsa. Itaru, wanus wanasirinandari nuwash wayangtsa. Mishat, kaaparaa karupana waniripat mimiri k'parintspa, Taarashipan Móysisee kamachtaku tárangiya.
27 Ashiri Taarashipan Móysispat tsiyatamaam iwatspayaru; Na shiysha nuwaa kamachtamarini ichinguru kirakamun yandangcha. Sheeru, Israelchichee tputs ichingurusin nuwaa kamachtamari kamaningcha. Ashiri Israelchichsha nuwaa kamachtamarinee ichinguru payukchusin, nuwsha; Siyaa nuw tputsirtana, táchima siyaatsi, Taarashipan Móysisee tárangiya.
28 Ashiri Móysisi anpari Taarashipanpat tsiyatku ipunpunar chunga zari psaanpatari zapshtarangiya. Nda katungku, misha nduntam waaku, taarangiya. Ashiri Taarashipansha yusur táwaramun patumbchimun waanaatsee wamachtash, minam chunga, yandarangiya. Yandamaam iwaparamchu, Móysiseem panarangiya.
Ashiri na kamaneena yuwaa Apanll yusur kamachtamarineetsi patumbchimun yandarangu, mishat Israelchichee yusur tiptsireem ínarangu anootsi.
Ashiri na kamanchintspa yuwaa Móysis wach tashpatari kizpur kurakurtar ashirangu anootsi
29 Ashiri Móysissha machip Sinayush karuweeshinu, táwar patumbich tsimbun Taarashipan kamachtamarini yandam payuru karuwarangiya. Itaru, Móysissha Taarashipanpat tsiyatarangu, wachsha kizpur kurakurtar ashirangiya. Itaru, Móysissha anoo nda waanaatsi yasarangiya yuwaa wach kurakurtaru anootsi.
30 Ashiri tputsush kusarangu, Aaronsha misha ichingurusin Israelchich Móysisee wach kurakurtarangu anu parangusin, watsiri napamaam puniksin, arapinlltamarisha shaneersin napatarach ashiranganaya.
31 Itaru, Móysissha Aaronaa mishat tputseetstam; Naanints ningeema, tárangiya. Ashiri Aaronsha mishat Israelchichtam urkar Móysispat tsiyatamaam kayumaranganaya.
32 Sheeru, uwshatssin, ichingurusin Israelchich, apinlliri naattusin kayumarangitamanaya. Ashiri ichingurusin Móysisush shaniyeersin, Móysissha Taarashipanee kuk yuwaa machish Sinayush tsiyatarangu anoo kamanirangiya.
33 Ashiri tsiyatssee kamanimaam iwatsparamchu, waanaatsisha natstarangiya yuwaa wach kurakurtaru anootsi. Ashiri wachoo kamispasha pakich kámanarangiya.
34 Itaru, anumunsha sheeru, urutari Móysisi Taarashipanpat tsiyatamaam Apanllush pang' pshtukchu, kamisaa yusheeru wayarangiya yuwaa wachoo kámanaru anootsi. Sheeru, Apanllush pang' shitungeeru, Móysis yuwaa Taarashipan tputsee kamanishini, tárangu, anoo uwsha Israelchichee ichinguru kamanirangiya.
35 Ashiri Israelchich Móysisee wach kurakurtaru anoo paranganaya. Ashiriya, Móysissha waanasha wachoo yusur kamispat purangiya. Itaru yuwashumari Taarashipanpat tsiyatamaam Apanllush pang' pshtukchu anshumari kamisaa yushtariya.
Ashiri na kamaneena yuwaa Móysis wach kizpur kurakurtar ashirangu anootsi.