Jonasarini kuku
Kirak yuwaa Jonasarinee kamanku anoo pakich kamanchintspa
¿Chakaja anoo yandarang?
Chakamasaja nee kirak yandarangiya. Yasareezini. Itaru, tputs Jonasarinee kuk kamankiya. Jonasarini yuwapur Jerobowam Israelshucheem kurak taarangu, anpurtatam taarangiya. Arapich tputs Ninipish yakat taarangsin, Israelchichee izuuru tpachingamaam zandaranganaya. Kizpur undararimuncha. Israelchich tputs uru, Apanll iyaatsimari chinakiya. ¿Antaati arapich tputsee tapachindacheeja? táranganaya. Ashirucha, Jonasarini amb naamaam kapung ngatarangiya Apanllee kuk kamanimaama.
¿Chakaama yandarang?
Apanll Jonasarinee, Nuwap tputsiri nuwaa kuki kamanishincha, nda tárangiya. Itaru, Ninipip kamanishincha, tárangiya. Ninipshuch tputs kizpur yutarit taaranganaya. Uwshtisin tsapurunasee ztaru tputs wamari kasiranganaya. Ashirucha, Apanll, Nuwsha Ninipshuchee zurampatari wanichima, tárangiya. Itaru, shiynaa Jonasaa, nduma wanichuri, wasina kamanshini, tárangiya.
Ashiritaa, Apanll nee kirak Israelchichpatatin wanimaam tuyandarangiya. Nuw tsapurunasee tputsi ichingaru chinakina, tápi átu atiya.
¿Mayaamaja yandarang?
Israelchich tputs, Apanll iyaatsimari chinakiya, tárangusin, Apanllsha, Tárintspa. Nuw kchinamisheeruri, arapcheetstaa tputs chinakina. Tputsee ichingaru nuw nayanikuri, tapachindamaam zandkina, tárangiya. Jonasarini waana tárangiya. Apaa, shiy nda musá tsiyantaksha. Watam shiy Apaa, kchinamishawa. ¿Antaati shiy Ninipshuchee tunaree wanicheezish? tárangiya.
¿Mayaatseeja kamanik?
Na yuwari kamanku anoo kamanchintspa.
Kapitoroo 1. Apanll Jonasarinee, Ninipip nuwaa kuki kamanishini. Kundarareetstaata kamaningcha, tárangiya. Jonasarinsha kapung ngatarangu, nllitarap tsap suwapi tárangu, Apanllee kuk kapeetarangu, kayupichsha Jonasaa pisharangiya.
Kapitoroo 2. Jonasarinisha kayupchimand chik Apanllpat tsiyatarangu, Apaa, nuw yutaritana. Nuw shiyaa kukish kapeetarangina. Ashiriy nuwaa nayaningandama, tárangu, Apanllsha mazinarangiya.
Kapitoroo 3. Jonasarini Ninipip naatarangu, Apanll siyaa zurampatari wanichintsa. Nimun 40 maats ichingurus tsipatssa, tárangiya.
Kapitoroo 4. Ninipshuchsha tputs Apanllee mangoonarangsin, yutaritshirinee izuuru kasayarangusin, Apanllsha nayanirangu, Ashiriya, wanimaam watsitshaparee, tárangiya. Anumand Jonasarini kapung tsiyantarangu, tsiyansimun tsipamaam zandarangiya. Itaru Apanllsha, ¿Mayaamsha ashiru chinaksha? Nuw tputsee ichingaru chinaktana, tárangiya.
Jonasarini kuku
1
Jonasarinee kuk kamanchintspa
1 Apanll Jonasaa, Amitarineetsi wip kamachtaku tárangiya.
2 Shiy Ninipip yakat na naachcha. Nuwaa kuki kamanishincha, watam nuw anshuchee mikeeruri wanichinawa. Na nuw tsiyatssee mazinarangina. Ninipshuch yakat tputs yutaritshishpansincha, tárangiya.
3 Itaru, Jonassha Ninipip Apanllee kuk kamanimaam kapung ngatarangu, suwamamarisha chinarangiya. Ashiri upeewapsha botee napkatu, patussip naatarangiya. Patusis sur Jopimuncha. Ashiri anush bot yuwaa naamachu, tununkachu, anoo parangiya. Ashiri botish naamaam tuwaparangiya. Sheeru, botish zaruyaru naatarangiya.
4 Itaru, Apanllsha kambusuru zanganirangiya. Kambusursha kizpur kambustarangu, marsha kizpur warastarangiya. Botsha izuuru yangamaam zandarangiya. Bot kizpur zpuzarangiya. Pátangamaam zandarangiya.
5 Ashiri botee ksutamapansha kapung puniranganaya. Minamtawarisin apanllputsirineetsi mashiranganaya. Anumunsha, botee tamuzingamaam mangush chinarangusin, maacheetsi kóstaroo kungush kapeetaranganaya. Itaru, Jonassha mapiyru wantsush pshturu, wachoo shtandayaru, maa ashirangiya.
6 Ashiri kapitansha yap Jonas mapiyru maaru amb naateeru tsiyatarangiya. ¿Shiy tamaktish nish mapiyru maasha? Natu mikeerush chiyzayarush, apanllireetsish mashangi. ¿Nduniya ashkachush, iyaatssha shiy Apanllirish istach? mang Jonasaa tárangiya.
7 Ashiri anumunsha, botee ksutamapansha waanpatatin tsiyatkusin, Na yachayani. ¿Chakaja yutaritshishirini taaru anumand Apanll ashik? atusin, tputsee sur yandarangusin, yacharangusin, Jonasaamsha sur shitungarangiya. Ashiri Jonasaatssha kurpashtaranganaya.
8 Kapitansha Jonasaa, Na kamaninda. ¿Mayaamsha shiy iyash zarurangsha? ¿Sheerush, iyaatssha tayuritaksha? ¿Maysha paxanxkatush, shiy iyash zarurangsha? ¿Yapsha shiy naatachsha? ¿Yapichsha shiya? ¿Chakshasha shiya? tárangiya.
9 Ashiri Jonassha, Nuw Hebrewshuchtana tputsi. Mishat, nuw tayaspatampantana Apanllee íwarpicheetsi, yuw maree tinarangu, anumun tsapootstam tinarangu anootsi.
10-11 Nuw Apanllee kuk nda payumaam zandaranguri, ningeemsha suwarangina, tárangiya. Itsinsaru kamanirangtaa, itaru marsha nda pakchiyam zanayarangiya. Aranginasha kizpurinasha warastarangiya. Ashiri tputs aranginasha punirangusin, anumun masharanganaya. Ashiriya, ¿mayaamsha amb ashirangsha? ¿Na shiyaa tamaycheezini mar zanayamaama? táranganaya.
12 Jonassha, Ashiri marish kpitangandama. Nuw nuwaanaatsi izuuru yasaktana. Nuwcha yutaritti. Mishat, nuwamand yutaritshishiri kambusur kizpur kambustakiya. Warassha kizpuritam warastakiya, tárangiya Jonasa.
13 Itaru, botee ksutamapanshtisin arachich kiteeni atusin, kizpuritaa kchungarangsin, nda waritaranganaya. Watam mar kizpur warastaranguwa. Aranginasha, aranginasha ashirangiya. Izuuru arachich kitamaam pinasaranganaya.
14 Apanlleetssha masharanganaya. Apaa, Jonasamand yutaritshishirini iyaa kungush tpachingarispa. Mishat, iyaa waneerichpa, yuwamand iy Jonasaa kungush kapeetkachini anumanda. Watam shaana tputsee natstayarush, wanitarshawa, Apanllee táranganaya.
15 Amb táyarusin, Apanllpa tsiyateersin, izuuru Jonasaa marish kapeetaranganaya. Ashiri marsha izuuru zanayatara sheeru, zanaramach ashirangiya.
16 Anoo parangusin, botee ksutamapanshtisin kapung Apanllee chinaranganaya. Apanllee kuk izuuru payuranganaya. Maacheetsi chinuzee Apanlleem wayayarusin, mbutarangsin, Apanllee kuk izuuru tuminuranganaya.
17 Ashiriya, waana Apanll kayupchee wataramashi wayayaru, Jonasaa pisharangiya. Jonassha kayupchish chik tuchip zari psaanpatari taarangiya.