Salmo 10
1 Ginoo, nganong nagpalayo ka man?
Nganong motago ka man
sa panahon sa among mga kalisod?
2 Tungod sa pagkamapahitas-on sa mga daotan,
gipaantos nila ang mga kabos.
Hinaut pa nga maunay sila
sa ilang daotang mga tinguha.
3 Gipasigarbo nila ang ilang daotang mga tinguha.
Gitunglo ug gisalikway ang Ginoo
sa mga tawong hakog.
4 Tungod sa pagkamapahitas-on sa mga daotan,
dili sila modangop kanimo.
Wala man gani sila maghuna-huna
mahitungod kanimo.
5 Apan kanunay silang nagmauswagon.
Wala sila nabalaka sa imong paghukom.
Gibiay-biay nila ang tanan nilang mga kaaway.
6 Naghuna-huna sila nga dili sila matarog,
ug kanunay silang luwas sa katalagman.
7 Ang ilang baba puno sa pagpanunglo,
bakak, ug pagpanghulga.
Sayon ra alang kanila ang pagpanghimaraot sa uban.
8 Nanago sila diha sa mga baryo
naghulat ug mga tawong inosente, aron ilang pamatyon.
Kanunay silang nangita ug ilang mabiktima.
9 Daw liyon sila nga mag-atang sa tago nga dapit.
Panid-an nila ang ilang alaot nga mga biktima
aron sa pagdakop kanila,
ug kon madakpan na gani nila,
ila na dayon kining guyoron.
10 Pinaagi sa ilang kusog dugmokon nila
ang mga makaluluoy nga biktima
hangtod nga dili na kini makabangon.
11 Moingon sila sa ilang kaugalingon
nga wala magtagad ang Dios
ug dili gayod siya makakita sa ilang gibuhat.
12 Sige na, Ginoong Dios, siloti na ang mga daotan!
Ayaw pasagdi ang mga dinaog-daog.
13 O Dios, nganong gibugal-bugalan ka sa mga daotan?
Nag-ingon pa sila nga dili kuno nimo sila silotan.
14 Apan nakita mo ang nag-antos ug ang mga anaa sa kaguol,
ug andam ikaw sa pagtabang kanila.
Nagdangop kanimo ang mga makaluluoy sama sa mga ilo,
ug ginatabangan mo sila.
15 Kuha-i ug kusog ang daotang mga tawo.
Siloti sila sa ilang kadaotan hangtod
nga moundang na sila sa paghimo niini.
16 Ginoo, hari ka sa walay kataposan.
Mahanaw sa kalibotan ang mga kanasoran
nga wala moila kanimo.
17 Nadungog mo, Ginoo,
ang pag-ampo sa mga tinamay.
Tubaga sila ug lig-ona.
18 Hatagi ug katarungan ang mga ilo ug mga dinaog-daog,
aron dili na sila hulgaon sa tawo nga gikan ra man sa yuta.