10
Kapasen fön usun ach sipwe ü ngeni angangen anümwäl
10.1–11.1
1 Ämi pwii kana, üa mochen ämi oupwe chechemeni mine a fis ngeni ach kewe lewo lupwen Moses a emweniir. Ir meinisin ra nom fän tümwünün ewe kuchu o pwerela pekilan ewe Setipar.
2 Ir meinisin ra papatais ngeni Moses lon ewe kuchu pwal lon ewe Setipar.
3 Ir meinisin ra mongö eu chök mongön ngün
4 o ünümi eu chök kolukun ngün. Ra ün seni ewe achauen ngün mi etiir, nge ei achau iei i Kraist.
5 Nge iei mwo nge Kot esap pwapwa ren chomong me leir, iei mine somäär a toropasfeil lon ewe fanüapö.
6 Iwe, ekei mettoch mi fis eu lenien awewe fän itach an epwe fönöökich, pwe sisap mochenia ngeni mettoch mi ngau usun ir ra föri,
7 sisap pwal fel ngeni uluulun anümwäl usun ekoch me leir ra föri. Pun iei usun a mak lon ekewe Toropwe mi Pin, “Ekewe aramas ra mottiu pwe repwe momongö o ükün, mürin ra ütä o urumwotongau.”
8 Sisap fokun föri föförün lisowu mi fokun ngau usun ekoch me leir ra föri, iwe, lon eu chök rän rüe me ülüngatngeröü ra mäla.
9 Sisap fokun sotuni Kraist usun ekoch me leir ra föri, iwe, ra feiengau o mäla ren ekewe serepenit.
10 Sisap pwal lalangau usun ekoch me leir ra föri, iei mine ra ninnila o rosola ren ewe Chon Läng.
11 Ekei mettoch meinisin ra fis ngeniir pwe eu lenien awewe fän iten ekewe pwal ekoch, eman a makkeretiu pwe repwe eu kapasen fön fän itach. Pun sia manau lon eu fansoun a arapoto fansoun sopolan.
12 Iei mine iö a ekieki pwe a nüküchar, epwe fokun tümwünüfichi pwe esap turula.
13 Ekewe sosot ra torikemi sosotun aramas chök. Nge Kot a apwönüetä an pwon o esap mwütätä ngenikemi pwe oupwe tolong lon sokun sosot mi lap seni ämi tufich. Nge lupwen oupwe tolong lon sosot, i epwe föri efoch alen towu, pwe oupwe tongeni pwora ngeni.
14 Iei mine ämi chiechiei mi achengicheng, oupwe ükütiu seni ämi angang ngeni uluulun anümwäl.
15 Üa kapas ngenikemi usun ai kapas ngeni aramas mi mirit. Oupwe püsin apwüngü mine üa apasa.
16 Lupwen sia ün seni ewe kap sia aea lupwen ach eäni ewe mongö än ach Samol o sia kilisou ngeni Kot ren, sia chiechifengen lon ewe chaan Kraist. Nge ren ach utu ewe pilawa lupwen sia mongö seni, sia chiechifengen lon ewe inisin Kraist.
17 Pokiten mi wor efoch chök pilawa, kich mi chomong, sia eu chök inis, pun kich meinisin sia mongö seni ewe chök efoch pilawa.
18 Oupwe ekieki usun ekewe aramasen Israel. Chokewe mi mongö seni ewe asor ra chiechifengen me Kot, i ewe, ekewe aramas ra uwala ar asor ngeni won ewe rongen asor.
19 Met wewen ai kei kapas? Wewen pwe eu uluulun anümwäl ika ewe mongö aramas ra asor ngeni a wor lomotan?
20 Apwi! Wewen ai kei kapas, pwe mine chon lükün ra eäni asor won ekewe rongen asor ra asor ngeni ekewe anün rochopwak, nge sap ngeni Kot. Iwe, ngang üsap mochen ämi oupwe chiechi ngeni ekewe anün rochopwak.
21 Ousap tongeni ün seni än ach Samol kap pwal ün seni än ekewe anün rochopwak kap. Ousap pwal tongeni mongö seni än ach Samol chepel, nge pwal mongö seni än ekewe anün rochopwak chepel.
22 Ika sia mochen asonga ach Samol? Ifa usun, sia pöchökül seni i?
23 Iwe, ra apasa, “A mwümwütä ngenikich pwe sipwe föri mettoch meinisin.” Ewer, mi pwüng, nge sap mettoch meinisin ra lomot ngenikich. “A mwümwü ngenikich ach sipwe föri mettoch meinisin,” nge sap mettoch meinisin ra alisikich.
24 Esap wor eman leimi epwe chök kütta püsin an feiöch, nge epwe pwal kütta feiöchün chiechian souläng.
25 A mwümwü ngenikemi ämi oupwe ochoch ewe fituk oua möni me lon ewe lenien amömö, nge ousap ais och kapas ais, pun ete fis mengiringirin lelukemi.
26 Pun iei usun a mak lon ekewe Toropwe mi Pin, “Fanüfan me masouan meinisin än ewe Samol.”
27 Are eman esap souläng a körikemi pwe oupwe mongö ren, o ämi oua feila, oupwe mongö met a molotä mwemi, nge ousap ais och kapas ais, pun ete fis mengiringirin lelukemi.
28 Nge are eman a ürenikemi, “Ei mongö aramas ra fen asor ngeni uluulun anümwäl,” mürin ousap mongö, pokiten ätewe mi asile ngenikemi, pwal pokiten mengiringirin leluken eman.
29 Üsap kapas usun mengiringirin lelukemi, nge üa kapas usun mengiringirin leluken ewe eman.
Eli eman epwe ais, “Pwota üpwe küna apwüng won mine üa föri lon ai ngas, pokiten mengiringirin leluken eman?
30 Are üa kilisou ngeni Kot fän iten anei, pwota eman epwe esitaei usun och mongö üa kilisou ren?”
31 Iei mine are oua momongö ika ükün, ika met oua föri, oupwe föri meinisin pwe Kot epwe ling ren.
32 Ousap manaueni eu sokun manau epwe afisätä chepetek ngeni ekewe chon Juta, ika ngeni ekewe chon lükün Israel, ika ngeni chon ewe mwichefelin Kot.
33 Oupwe chök föri usun mine ngang üa föri. Üa sotuni ai üpwe apwapwai aramas meinisin lon meinisin mine üa föri. Üsap kütta mine üpwe püsin feiöch ren, nge üa kütta mine ekewe chomong repwe feiöch ren, pun üa mochen pwe repwe küna manau.