47
Ewe koluk a puwu seni ewe Imwenfel, aramas ra pöchökül ren
47.1-12
1 Mürin, ewe mwän a aliwinisefälieila ren asamalapen ewe Imwenfel. Ikenan üa küna eu koluk a puwu seni fän asamalapen ewe Imwenfel o pula ngeni ötiu, pun ewe Imwenfel a sape ngeni ötiu. Iwe, ewe koluk a putiu me peliörün ewe Imwenfel, pwal me peliörün ewe rongen asor.
2 Mürin, ewe mwän a emwenieiwu me lon ewe asamalap mi sape ngeni efeng o emwenieila lükün ren asamalapen ewe leni lükün Imwenfel mi sape ngeni ötiu. Iwe, ewe koluk a puwu me peliörün ewe asamalap.
3 Lupwen ewe mwän a feila ötiu, a amwöchü efoch selin aükük o aükü ükükün limepükü wone iach. Mürin a emwenieilong lon ewe koluk, nge ewe koluk a tori kirupun pechei.
4 Iwe, a aüküsefäli ükükün limepükü wone iach o emwenieila lon ewe koluk, nge a tori pwäsuki. Mürin a pwal aüküsefäli ükükün limepükü wone iach o emwenieila lon ewe koluk, nge a tori won wilai.
5 Iwe, a pwal aüküsefäli ükükün limepükü wone iach, nge iei ewe koluk a wiliti eu chanpupu üsap chüen tongeni fetal lon. Pun ewe chanpupu a fefeitä, a pwal alolol pwe üa chök tongeni ää, nge üsap tongeni fetalla epek.
6 Iwe, ewe mwän a aisiniei, “Nöün aramas, ifa usun, ka küna ei?” Mürin a aliwinieila lepekin ewe chanpupu.
7 Nge lupwen üa tori, üa küna chomong irä lepekin me rüepek.
8 Iwe, a üreniei, “Ei koluk a pula ngeni ewe fanü mi nom ötiu, a putiu lemolun Jortan o pulong lon ewe Setin Mäla. Nge lupwen a pulong lon, ewe sät epwe wiliti koluk mi mürina.
9 Iwe, ia ewe chanpupu a pula ie, epwe wor sokopaten man me chomong ik. Pun ia ewe chanpupu a tori ie, ekewe sät repwe wiliti koluk mi mürina. Iei usun epwe wor manau ia ewe chanpupu a pula ie.
10 Iwe, chon attau repwe ütä ünükün, nge seni Enketi tori Eneklaim epwe eu lenien ar apwas epilo. Iwe, ikenen lon repwe sokopat usun chök ikenen ewe matau watte.
11 Nge ekewe warawar me pwakak esap fis manau lon, pwe salt epwe chök nom lon.
12 Iwe, lepekin ewe chanpupu me rüepek epwe märitä chomong sokun irän mongö. Chör resap pwasala, uar resap itela, pwe epwe wor uar mi nup iteiten maram, pun ewe koluk ra manau ren a puwu seni ewe leni mi pin. Iwe, aramas repwe mongö uar, repwe pwal pöchökül seni ar samau ren chör.”
Ainetin fanü me kiännin
47.13–48.29
13 Iei alon Kot ewe Samol mi Lapalap, “Iei usun ekewe kiä oupwe aea le aineti ewe fanü ngeni ekewe engol me ruu ainangen Israel. Chon ewe ainangen Josef repwe fanüeni ruu kinikin.
14 Iwe, oupwe kinikinöchfengen won ei fanü. Pun üa pwon fän akapel ngeni ämi kewe lewo pwe üpwe ngeniir ei fanü, iei mine ämi oupwe faffanü seni.
15 Iei usun kiännin ewe fanü: Lepelian me efeng epwe popuetä seni ewe matau watte wenewenen Hetlon tori Hamat, pwal tori Setat,
16 Perota, Sipraim mi nom lekiännin lefilen Tamaskus me Hamat, epwe pwal tori Haserhatikon mi nom lekiännin Hauran.
17 Ina usun kiännin ewe fanü epwe fetal seni ewe matau watte tori Hasarenon, pwe fanüen Tamaskus me fanüen Hamat repwe nom efeng. Iei usun kiännin ewe fanü me efeng.
18 Iwe, ewe chanpupu Jortan epwe kiännin ewe fanü me ötiu seni Hasarenon lefilen Hauran me Tamaskus, pwal lefilen ewe fanü Kiliat me ewe fanü Israel tori ewe Setin Mäla, pwal tori Tamar. Iei usun kiännin ewe fanü me ötiu.
19 Iwe, lepelien ewe fanü me ör kiännin epwe fetal seni Tamar tori ewe kolukun Meripa-Kates, tori ewe öüwön Isip, pwal tori ewe matau watte. Iei usun kiännin ewe fanü me ör.
20 Nge kiännin ewe fanü me lotou ewe matau watte tori awenewenen Hamat. Iei usun kiännin ewe fanü me lotou.
21 Oupwe aineti ewe fanü lefilemi won eu me eu ainangen Israel.
22 Oupwe aineti ewe fanü ren üttüt, pwe oupwe fanüeni, ämi me ekewe chon ekis mi nom leimi, pwal nöür kewe mi uputiu ngeniir. Iwe, ir repwe usun chök chon Israel me remi, pwe repwe etikemi le faffanü ewe fanü me lein chon ekewe ainangen Israel.
23 Oupwe awisa ngeni iteiten chon ekis wisan me lon ewe ainang ia a nonom ie. Ngang Kot ewe Samol mi Lapalap üa kapas.”