1 Mürin, ewe king Tarius a föri eu allük pwe repwe kütta ei pworaus lon än ekewe king puken uruwo mi iseis lon Papilon. 2 Iwe, ra küna eu puk me lon ewe telinimw Ekpatana lon ewe fanü Metia. Iei usun mine a mak lon: 3 “Lon aeuin ierin mwün ewe king Sirus, i a föri eu allük fän iten ewe imwen Kot lon Jerusalem epwe kaüsefäl, pwe epwe eu lenien asor me keni asor. Tekian ewe imw epwe ükükün tiwe fiit, nge chölapan epwe pwal tiwe fiit. 4 Etippan kewe epwe wor ülüngat sässärin fau mi watte me eu sässärin irä, nge liwinin ewe angang epwe towu seni än ewe king lenien iseis moni. 5 Iwe, ekewe pisek seni kolt me silifer, Nepukatnesar a angei seni ewe imwenfel lon Jerusalem o uwala Papilon, repwe aliwinala ngeni ewe imwenfel lon Jerusalem lon en me lenian. Oupwe iseniir lon ewe imwen Kot.”

6 Mürin Tarius a makei pälüen ewe toropwe: “En Tatenai kepinan ewe fanü lotoun ewe chanpupu Oifrat me Setar-posenai, pwal ämi chiechier kewe mi nom lon ewe fanü lotoun ewe chanpupu Oifrat, oupwe feila seni ewe leni. 7 Ousap epeti angangen ewe imwen Kot. Ewe kepinan chon Juta me ekewe souakom repwe aüsefälietä ei imwen Kot won wesewesen lenian me lom. 8 Nge üa pwal föri eu allük usun mine oupwe föri ngeni ekei souakomwen chon Juta fän iten kaüsefälin ei imwen Kot. Ewe liwin epwe unus ngeni ekei mwän. Epwe towu seni än ewe king lenien iseis moni seni takisesin ewe fanü lotoun ewe chanpupu Oifrat, pwe ewe angang esap kaüla. 9 Iteiten rän oupwe pwal ngeni ekewe souasor lon Jerusalem meinisin mine ra mochen, nge ousap amwöchü och seniir. Oupwe ngeniir nienifön ätemwänin kow, ätemwänin sip ika sip fän iten asoren kek ngeni ewe Koten läng, pwal wiich, salt, wain ika apüra, 10 pwe repwe tongeni eäni ekewe asor mi fich ngeni ewe Koten läng, repwe pwal iotek fän iten manauei me nei kewe mwän. 11 Üa pwal föri eu allük pwe ika eman a aleasolap ngeni ei allük, efoch irä epwe uttuwu seni imwan, aramas repwe akeni lesopun o apwera ngeni, nge imwan epwe tala o wiliti eu ioien pipi. 12 Amwo ewe Kot mi filätä ei leni pwe aramas repwe fel ngeni ie, epwe asapwilätiu ekewe king me chon ekewe mwü mi ü ngeni ei allük o ataela ei imwen Kot lon Jerusalem. Ngang Tarius üa föri ewe allük. Aramas repwe tichik le aleasochis ngeni.”

13 Mürin, Tatenai kepinan ewe fanü lotoun ewe chanpupu Oifrat me Setar-posenai, pwal chiechier kewe ra tichik le apwönüetä mine ewe king a allük ngeniir. 14 Iei mine ekewe souakomwen chon Juta ra sopwela le aüsefälietä ewe imwenfel, nge ar angang a fisiöch, pun ekewe soufos Akai me Sekaraia ra apöchöküla leluker ren ar afalafal. Iwe, ra awesala ar angang ngeni ewe imwenfel fän än ewe Koten Israel allük, pwal fän än Sirus, Tarius me Artaksasta ekewe kingen Persia allük. ✡ 15 Iwe, ei imwenfel a wesila lon aülüngatin ränin ewe maram Atar lon awonuen ierin mwün ewe king Tarius.

16 Mürin, ekewe aramasen Israel, ir ekewe souasor me ekewe mwäns seni ewe ainangen Lefi, pwal chokewe meinisin mi liwinto seni ar oola ra föri efinünen ei imwen Kot fän pwapwa. 17 Iwe, lon efinünen ei imwen Kot ra eäni asor ükükün ipükü ätemwänin kow, ruupükü ätemwänin sip me föpükü nienifön sip. Nge fän iten chon Israel meinisin ra eäni asoren tipis ükükün engol me ruoman ätemwänin kuuch aükük ngeni iteiten ekewe engol me ruu ainangen Israel. 18 Ra pwal awisa ekewe souasor me ekewe mwän seni ewe ainangen Lefi lon en me an mwich fän iten ewe angangen Kot lon Jerusalem, usun a fen mak lon än Moses we puk.

19 Iwe, lon ewe engol me rüanün ränin ewe aeuin maram chokewe mi liwinto seni ar oola ra föri ewe Pasofer. ✡ 20 Ekewe souasor me ekewe mwän seni ewe ainangen Lefi ra tipepök le alimöchüür, pwe ir meinisin ra limöch le föri ewe angang. Iwe, ekewe mwän seni ewe ainangen Lefi ra niela ekewe mönün Pasofer fän iten chokewe meinisin mi liwinto seni ar oola, fän iten chiechier kewe ekewe souasor, pwal fän iten püsin ir. 21 Iwe, ekewe aramasen Israel mi liwinto seni ar oola ra ochei ekewe mönün Pasofer, pwal meinisin mi chu ngeniir, ir chokewe mi aimwürela seni än aramasen ewe fanü kewe föför mi ngau, pwe repwe fel ngeni ewe Samol mi Lapalap ewe Koten Israel. 22 Lon ükükün fisu rän ra pwal föri ewe chulapen mongö pilawa esap wor iis lon fän pwapwa, pun ewe Samol mi Lapalap a apwapwaar ren an akulu leluken ewe kingen Asiria ngeniir, pwe a alisiir lon angangen ewe imwen Kot, ewe Koten Israel.