24
Eman nöün Apraham chon angang a kütta pwülüen Isaak
24.1-67
1 Iwe, Apraham a chinlapala, pun ierin a chomong. Nge ewe Samol mi Lapalap a afeiöchü Apraham lon meinisin mine a föri.
2 Iwe, Apraham a üreni ewe meilapen nöün kewe chon angang mi nemeni an kewe pisek meinisin, “Kopwe sökalong poum fän aföi,
3 pun kopwe pwon fän akapel ngeni ewe Samol mi Lapalap, ewe Koten läng me fanüfan, pwe kosap tüngor pwülüen nei we me lein ekewe fin Kanaan, ewe ia üa nonom ie.
4 Nge kopwe feila lon fanüei ren aramasei kewe pwe kopwe kütta eman pwülüen Isaak nei we.”
5 Iwe, ewe chon angang a üreni, “Eli ewe föpwül esap mochen etieito ikei. Ifa usun, üpwe uwala noum we ngeni ewe fanü ka feito seni?”
6 Nge Apraham a pälüeni, “Kopwe afäli pwe kosap uwala nei we ikenan.
7 Ewe Samol mi Lapalap, ewe Koten läng mi emwenieiwu seni imwen semei pwal seni poputän fanüei, i a pwon ngeniei fän akapel pwe epwe ngeni mwirimwiri kana ei fanü. Kot epwe tinala nöün chon läng, pwe epwe akom mwom pwe kopwe angei pwülüen nei we seni ikenan.
8 Nge are ewe fefin esap mochen etuk, en kopwe ngas seni om pwon fän akapel ngeniei. Nge kosap fokun uwala nei we ikenan.”
9 Iei mine ewe chon angang a sökalong pöün fän afön an samol Apraham o pwon fän akapel ngeni pwe epwe föri usun mine a apasa.
10 Mürin, ewe chon angang a angei seni an samol engol kamel pwal chomong sokun lifang o feila lon ewe telinimwen Nahor mi nom efeng lon ewe fanü Mesopotamia.
11 Iwe, lupwen ewe chon angang a tori ewe leni, a asösöü ekewe kamel lükün ewe telinimw ünükün eu chönüttu. Ei otun a tori lekuniol, lupwen fefin ra feito pwe repwe üfüf koluk.
12 Iwe, a iotek, “Ai Samol mi Lapalap, än ai samol Apraham we Kot, kose mochen kopwe atufichiei ikenai o eäni kirikiröch ngeni ai we samol Apraham.
13 Üa ütä ikei ünükün ei chönüttu, ia nöün chon ewe telinimw föpwül repwe feito ie o üfüf koluk.
14 Iwe, amwo epwe iei usun: Are üpwe tüngor ngeni eman föpwül, ‘Kose mochen apäa om na rume pwe üpwe ünümi ekis koluk seni,’ nge i epwe üra, ‘Kopwe ün, nge üpwe pwal aünü noum kewe kamel,’ neminewe epwe ina i ewe ka filätä pwe pwülüen noum we chon angang Isaak. Ren ei ngang üpwe silei pwe ka eäni kirikiröch ngeni ai we samol.”
15 Iwe, lupwen esamwo wes me iotek, Repeka a war o uwei eu an rumen koluk won afaran. Iwe, Repeka nöün Petuel we föpwül, nge Petuel nöün Milka pwülüen Nahor we, nge Nahor pwin Apraham.
16 Iwe, ewe föpwül a fokun liöch, nge esamwo pwal pwüpwülü. Iwe, a tötiu lon ewe chönüttu o alölöü an we rume. Iwe, lupwen a tötä,
17 ewe chon angang a mümütüto ren o üreni, “Kose mochen ngeniei ekkum ünümei koluk seni om na rume.”
18 Nge Repeka a pälüeni, “Kopwe ün ai samol.” Iwe, a müttir uwätiu an we rume me won afaran o aünü ewe mwän ewe koluk.
19 Iwe, lupwen Repeka a wes me aünü, a pwal üreni, “Ngang üpwe pwal üfi ünümen noum kewe kamel tori ar repwe möt.”
20 Mürin, a müttir ninalong ewe koluk lon ewe lenien ün o mümütsefälila ngeni ewe chönüttu pwe epwe üfi ünümen ekewe kamel koluk tori ra möt.
21 Iwe, ewe mwän a chök fanafanala o newenewen ngeni, pun epwe pi ika ewe Samol mi Lapalap a afeiöchü an sai, ika esap afeiöchü.
22 Iwe, lupwen ekewe kamel ra wes me ün, ewe mwän a angei efoch ring o ngeni ewe föpwül, nge choun ewe ring ina epwe eu lelimu aunus. Iwe, a pwal ngeni ruu lälä seni kolt fän iten pöün, nge choun eu lälä ina epwe rüanü aunus.
23 Mürin a aisini, “Kose mochen üreniei ika en nöün iö? Ifa usun, epwe wor lenien äm asösö lon imwen semom?”
24 Nge Repeka a pälüeni, “Ngang nöün Petuel, nge semei nöün Milka pwülüen Nahor we.”
25 Iwe, a pwal apasa, “Mi fokun wor lenien om asösö rem, mi pwal wor fetilipwas me enen noum kewe man.”
26 Mürin, ewe mwän a chapetiu lepwül o fel ngeni ewe Samol mi Lapalap.
27 Iwe, a apasa, “Üpwe mwareiti ewe Samol mi Lapalap än ai samol Apraham we Kot, pwe esap amwöchü seni ai samol an tong me an allükülük. Pun ewe Samol mi Lapalap a wenewenen emweniei tori imwen aramasen semen ai we samol.”
28 Iwe, ewe föpwül a mümütüla lon imwen inan we o apworausa ekewe mettoch meinisin.
29 Nge a wor eman mongeen Repeka itan Lapan. Iwe, ätewe a mümütüla ren ewe mwän mi nom ünükün ewe chönüttu.
30 Pun lupwen Lapan a küna ewe ring me ekewe lälä won pöün fefinan we, a pwal rong mine Repeka a apworausa usun alon ewe mwän ngeni, a feila ren nöün Apraham we chon angang mi ütä ren nöün kewe kamel ünükün ewe chönüttu.
31 Iwe, Lapan a üreni, “Kopwe etiei, chon feiöch me ren ewe Samol mi Lapalap. Pwota ka chök ükü ikei? Üa fen amolätä leniom lon imwei, pwal lenien ekewe kamel.”
32 Iei mine ewe mwän a tolong leimw. Nge Lapan a apichala ririn ekewe kamel, a pwal ngeniir fetilipwas me mongö. Iwe, a uwato koluk ren ewe mwän me chienan kewe pwe repwe talü pecher.
33 Nge lupwen a uwato mongö ren ewe mwän, ätewe a üreni, “Üsap fokun mongö tori üpwe wes me apworausa pworausei.” Mürin, Lapan a pälüeni, “Kopwe pworaus.”
34 Iwe, a apasa, “Ngang nöün Apraham we chon angang.
35 Ewe Samol mi Lapalap a fokun afeiöchü ai samol pwe a wöümong. A ngeni chomong pwiin sip me kow, silifer me kolt, chon angang mwän me chon angang fefin, pwal kamel me aas kana.
36 Nge lupwen Sara pwülüen ai we samol a chinlap, a nöüni eman ät me won. Iwe, Apraham a ngeni nöün we wöün meinisin.
37 Ai samol a üreniei pwe üpwe pwon fän akapel ngeni. Iwe, a apasa, ‘Kosap tüngor pwülüen nei we me lein ekewe fin Kanaan, ewe ia üa nonom ie.
38 Nge kopwe feila ren aramasen semei o kütta eman pwülüen nei we alüal.’
39 Nge ngang üa üreni ai samol, ‘Eli ewe föpwül esap mochen etieito.’
40 Iwe, a üreniei, ‘Ewe Samol mi Lapalap üa aleasochis ngeni epwe tinato nöün chon läng pwe epwe etuk o afeiöchü om sai. Kopwe angei eman pwülüen nei we alüal seni aramasen semei.
41 Iwe, lupwen kopwe tori aramasei kewe, kopwe ngas seni om we pwon fän akapel ngeniei. Nge are resap mochen mwüt ngonuk ewe föpwül, kopwe chök ngas seni om we pwon fän akapel ngeniei.’
42 Iwe, lupwen üa tori ünükün ewe chönüttu ikenai, üa iotek, ‘Ai Samol mi Lapalap, än ai samol Apraham we Kot, kose mochen afeiöchü ai ei sai.
43 Üa ütä ikei ünükün ei chönüttu. Amwo epwe iei usun: Are eman föpwül a feito pwe epwe üfüf koluk, nge üpwe tüngor ngeni, “Kose mochen ngeniei ekkum ünümei koluk seni om na rume,”
44 nge i epwe üra, “Kopwe ün, nge üpwe pwal aünü noum kewe kamel,” neminewe epwe ina i ewe ka filätä pwe pwülüen nöün ai we samol.’
45 Iwe, mwen üsamwo wes le iotek lon lelukei, Repeka a feito o uwei an we rumen koluk won afaran. A tötiu lon ewe chönüttu pwe epwe üfüf koluk. Iwe, ngang üa tüngor ngeni, ‘Kose mochen kopwe aünüei.’
46 Iwe, a müttir isetiu an we rume seni won afaran o apasa, ‘Kopwe ün, nge üpwe pwal aünü noum kewe kamel.’ Iwe, üa ün, nge a pwal aünü ekewe kamel.
47 Mürin üa aisini, ‘En nöün iö?’ Iwe, a pälüeni, ‘Ngang nöün Petuel, nge semei nöün Milka pwülüen Nahor we.’ Mürin üa apachätä ewe ring won pwötün o anomu ekewe lälä won pöün.
48 Iwe, üa chapetiu lepwül o fel ngeni ewe Samol mi Lapalap. Üa mwareiti ewe Samol mi Lapalap än ai samol Apraham we Kot, pun a emwenieito won efoch al mi wenechar, pwe üpwe tüngor eman föpwül seni aramasen ai samol pwe pwülüen nöün we alüal.
49 Iei kopwe pwäri ngeniei are kopwe eäni kirikiröch me allükülük ngeni ai we samol. Nge ika kosap, kopwe pwal pwäri ngeniei pwe üpwe silei mine üpwe föri.”
50 Mürin, Lapan me Petuel ra pälüeni, “Ei mettoch a pop seni ewe Samol mi Lapalap. Äm aisap tongeni filätä och me lükün ei.
51 Iei i Repeka. Kopwe angei o uwala pwe epwe pwülüen nöün om we samol usun ewe Samol mi Lapalap a püsin apasa.”
52 Iwe, lupwen nöün Apraham we chon angang a rong ar kewe kapas, a chapetiu lepwül o fel ngeni ewe Samol mi Lapalap.
53 Mürin, ewe chon angang a uwawu fout seni silifer me kolt pwal mangaku o ngeni Repeka. Iwe, a pwal kisen ngeni mongeen Repeka we me inan pisek mi aüchea.
54 Mürin, ewe chon angang me chienan kewe ra mongö o ün, ra pwal möür ikenan. Nge lupwen ra pwätä lesosor, ewe chon angang a apasa, “Ouse mochen oupwe mwüt ngeniei pwe üpwe liwinla ren ai samol.”
55 Nge mongeen Repeka me inan we ra üreni, “Kose mochen mwüt ngenikem ewe föpwül epwe mwo ekis nonom rem, eli lon ükükün engol rän. Mürin epwap feila.”
56 Nge ewe chon angang a pälüeni, “Ouse mochen ousap amwöchüei, pun ewe Samol mi Lapalap a afeiöchü ai sai. Ouse mochen oupwe mwüt ngeniei pwe üpwe liwinla ren ai samol.”
57 Iwe, ra üreni, “Aipwe köri Repeka o aisini met letipan.”
58 Mürin ra körato o aisini, “Ifa usun, ka mochen eti ei mwän?” Nge Repeka a pälüeni, “Ewer, üpwe eti.”
59 Iwe, ra tinala Repeka fefiner we me nöün chon angang fefin, pwal nöün Apraham chon angang me chienan kewe.
60 Ra afeiöchü Repeka o üreni,
“En fefinem kopwe inelapen aramas mi chomong usun pien aroset.
Mwirimwirum kana repwe nemeni ekewe telinimwen chon oputeer.”
61 Mürin Repeka me nöün kewe chon angang fefin ra amolätä ar sai, ra tötä won ekewe kamel pwe repwe eti nöün Apraham we chon angang. Iei usun ir meinisin ra feila.
62 Iwe, Isaak a liwinto seni ewe chönüttu Peer Lahairoi, pun a nonom lon ewe fanü Nekep.
63 Iwe, Isaak a feila lemäl lekuniol pwe epwe iotek. Nge lupwen a chimwetä, a küna pwe eu mwichen kamel a feito.
64 Iwe, pwal Repeka a chimwetä. Nge lupwen a küna Isaak, a tötiu seni wan we kamel
65 o aisini ewe chon angang, “Iö ewe mwän pekila a fetal lemäl pwe epwe sounikich?” Ewe chon angang a pälüeni, “Iei i ai we samol.” Iwe, Repeka a angei och mangaku o pwölüöla won mesan.
66 Nge ewe chon angang a apworausa ngeni Isaak usun meinisin mine a föri.
67 Mürin, Isaak a emwenalong Repeka lon imwen Sara inan we. Iwe, a pwülüeni o echeni. Iei usun Isaak a chipila mürin än inan we mäla.