1 Chon Israel ra chök föri mine a lomotongau o afeiengau iteiten rän. Ra achomonga ar chofana me ar angangen mwänewüs. Ra föri eu pwonen atipeeu ngeni Asiria o tinala apüra seni föün olif ngeni Isip.

2 A wor än ewe Samol mi Lapalap kapasen atipisi chon Juta, epwe pwal apwüngü chon Israel pokiten lapalaper o ngeniir liwinin ar kewe föför. 3 Lupwen Jakop ar we lewo a nonom lon letipen inan, a amwöchü apilipilin pechen pwin we, nge lupwen a mwän, a aülap ngeni Kot. ✡ 4 A aülap ngeni ewe chon läng o akufu, a kechü o tüngor ngeni pwe epwe afeiöchü. Kot a churi Jakop me lon Petel o kapas ngeni me ikenan, ✡ 5 i ewe Kot, ewe Samol mi Unusen Manaman itan ewe Samol mi Lapalap. 6 Iei mine ämi mwirimwirin Jakop oupwe liwiniti ämi we Kot, oupwe eäni tong me wenechar o anomu ämi apilükülük won Kot iteiten fansoun.

7 Iwe, ewe Samol mi Lapalap a üra, “Ekewe chon amömö ra nöünöü kilo mi mwäl, ra chök efich ar repwe atupu aramas. 8 Iwe, ra apasa, ‘Sa fokun wöü, sa pisekisekila. Nge esap wor eman a tongeni atipisikich pwe sa pisekisekila fän atuputup.’ 9 Ngang ewe Samol mi Lapalap ämi we Kot mi emwenikemiiwu seni ewe fanü Isip. Üpwe föri pwe oupwe nonomsefäl lon imw mangaku, usun chök oua föri lon ekewe ränin chulapen likachoch. ✡

10 Üa kapas ngeni ekewe soufos o awora ngeniir chomong künaer, üa pwäri me rer ekewe kapas monomon. 11 Nge ekewe aramas ra fel ngeni uluulun anümwäl me lon Kiliat, iei mine repwe fokun mäla. Ra eäni asor ätemwänin kow lon Kilkal, iei mine ar kewe rongen asor repwe wiliti ioien fau lon eu mälämäl mi tu.” 12 Jakop ach we lewo a süla ngeni ewe fanü Aram, ikenan a angang fän iten eman fefin o tümwünü sip pwe mön pwülüan. ✡ 13 Ewe Samol mi Lapalap a tinala eman soufos pwe epwe emwenawu chon Israel seni Isip, epwe pwal tümwünüür lon ar sai. ✡ 14 Nge chon Israel ra fokun asongongauei ar we Samol mi Lapalap. Iei mine epwe ukun ngeniir liwinin ar nimanau o aliwini ngeniir ar aitengaua.