14
Eu tüngor ngeni chon Israel pwe repwe liwiniti Kot
14.1-9
1 Ämi chon Israel, oupwe liwiniti ewe Samol mi Lapalap ämi we Kot. Oua chepetek o turula pokiten ämi kewe tipis.
2 Oupwe liwiniti ewe Samol mi Lapalap o eäni ei iotek ngeni, “Kopwe amusala äm kewe tipis meinisin o etiwakem fän om ümöümöch, pwe aipwe mwareituk usun äm aia fen pwon.
3 Asiria esap tongeni amanauakem, ekewe orisin maun resap tongeni alisikem. Aisap chüen apasa ngeni äm kewe uluulun anümwäl pwe ir äm Kot. Ekewe mi mäsen ra küna ümöümöch me reöm.”
4 Iwe, ewe Samol mi Lapalap a üra,
“Üpwe aliwinato nei aramas
o tongeer seni unusen letipei,
pun üsap chüen song ngeniir.
5 Üpwe usun chök amurenipwin ngeni chon Israel.
Repwe sonula usun pön kiop,
repwe fokun warar usun ekewe irän Lepanon.
6 Fasarer repwe mämäritä,
repwe ling usun ekewe irä olif,
repwe pwoöch usun ekewe setaren Lepanon.
7 Repwe liwinsefäl o nom fän ai tümwün.
Repwe mämäritä usun wiich
o ua usun ekewe irän wain.
Repwe iteföüla usun ewe wainin Lepanon.
8 Ekewe chon Israel resap chüen fel ngeni ekewe uluulun anümwäl.
Ngang ewe mi pälüeni ar iotek o tümwünüür.
Ngang üa wewe ngeni ewe irä saipires mi arauarau fochofoch,
ar feiöch a feito seniei.”
9 Iö mi tipachem epwe weweiti mine a mak ikei, iö mi mirit epwe ekieki usun lon lelukan. Pun än ewe Samol mi Lapalap kewe al ra wenechar, ekewe chon pwüng ra fetal wor, nge ekewe chon tipis ra chepetek wor o turula.