8
Kot a apwüngü chon Israel pokiten ar angang ngeni anümwäl
8.1-14
1 Iwe, ewe Samol mi Lapalap a üra, “Kopwe ettiki ewe rappwa. Ekewe chon oputen Israel repwe feito usun eman ikel o maun ngeni nei aramas, pun nei aramas ra atai ai we pwon ngeniir o purätiu ai we allük.
2 Mürin chon Israel repwe siö ngeniei, “En äm we Kot, äm noum aia sileek.”
3 Nge chon Israel ra pöütala mine a mürina. Iei mine ekewe chon oputeer repwe tapweriir.
4 Ra seikätä ar kewe king, nge esap tipei, ra filätä nöür kewe samol, nge esap pwüng seniei. Ra föri uluulun anümwäl seni ar silifer me kolt. Ren ei ra püsin afeiengaueer.
5 Üa oput ewe uluulun nienifön kow ekewe chon Samaria ra fel ngeni. Ai song a pulopul ngeniir. Inet repwe ükütiu le fel ngeni ekewe uluulun anümwäl?
6 Ewe uluulun anümwäl, eman souangang re Israel a föri, esap fokun i Kot. Ewe uluulun nienifön kow lon Samaria epwe tatakis.
7 Iwe, ra amorafeili asepwäl, nge repwe kini eu ewiniär. Esap wor föün ekewe irä wiich, iei mine esap wor pilawa mi amas. Nge are epwe fen wor, chon ekis repwe eni.
8 Ewe mwün Israel a morola. Iei chon ra nom lein chon ekewe mwü usun eu pör mi mök esap wor lomotan.
9 Chon Israel ra ülöförea usun eman aas mi mwacho. Ra feila Asiria pwe repwe kütta alilisiir, ra möni pwal ekoch mwü pwe repwe tümwünüür.
10 Nge iei ngang üpwe achufengeniir pwe üpwe apwüngüür. Iwe, repwe popuetä le chokükünüla pokiten ewe kingen Asiria a ariaföüür.
11 Chon Israel ra senätä chomong rongen asor pwe repwe eäni asoren tipis wor, nge ekei rongen asor ra wiliti lenien tipis ngeniir.
12 Iwe, üa makei ngeniir chomong pwüngün ai allük, nge ir ra oputeer usun och mettoch resamwo küküna ika sisilei.
13 Ra uwato ar asor ngeniei o ochoch fituken ewe mönün asor. Nge ngang ewe Samol mi Lapalap üsap pwapwaitiir. Iei üpwe chechemeni ar kewe föföringau o apwüngüür fän iten ar tipis. Repwe liwinsefäliti Isip.
14 Chon Israel ra aüetä imwen king, nge ra manlükala Ewe mi Föriir. Ekewe chon Juta ra achomonga ar kewe telinimw mi pöchökül tittir. Nge ngang üpwe tinala ekkei wor, epwe kenala ar kewe imwen king me ar kewe telinimw.”