2
Kot a nemeni läng me fanüfan fän kinamwe
2.1-4
1 Iei ewe kapasen pwärätä Kot a asile ngeni Aisea nöün Amos we mwän usun Juta me Jerusalem:
2 Iwe, lon fansoun sopolan,
ewe chuk ia a nom ie imwenfelin ewe Samol mi Lapalap
epwe fefeitä o nükünük,
epwe pwal tekia seni chuk meinisin.
Chon ekewe mwü won fanüfan repwe mwicheto ren.
3 Iwe, chomong aramas repwe feito o apasa,
“Ousipwe feitä won chukun ewe Samol mi Lapalap
ren imwenfelin än Israel we Kot.
I epwe aiti ngenikich mine a mochen sipwe föri,
pwe sipwe tongeni apwönüetä an kewe kapas.”
Pun seni won Sion epwe towu ewe allük,
nge seni lon Jerusalem än ewe Samol mi Lapalap kapas.
4 Ewe Samol mi Lapalap epwe souapwüng lefilen ekewe mwü, epwe pwal aükätiu änini lefilen aramas.
Iwe, repwe amani nöür ketilas o awili ngeni pisekin tuw pwül,
nge wokur siles repwe awili ngeni naifen otot.
Ekewe mwü resap chüen maunfengen,
resap pwal chüen kaiö maun.
Kot a apwüngü chon lamalamtekia
2.5-22
5 Ou etto, ämi mwirimwirin Jakop, ousipwe fetal lon ewe saram ewe Samol mi Lapalap a ngenikich.
6 Ai Kot, ka pöütala noum aramas, ekewe mwirimwirin Jakop. Pun ra chök föri angangen pwee, örunien ekewe fanüen ötiu, ra pwal föri angangen souasisil usun ekewe chon Filistia o chiechi ngeni ekewe chon lükün.
7 Fanüer a ur ren silifer me kolt, nge wöür kana resap tongeni it. Iwe, fanüer a masou ren oris kana, nge war woken ra fokun chomong.
8 Fanüer a pwal masou ren uluulun anümwäl kana, nge chon ewe fanü ra asamolu mine ra püsin föri ren pöür.
9 Iei mine aramas meinisin ra küna itengau me tekison. Kosap amusala ar tipis.
10 Oupwe sülong lon pwangen achau, oupwe aopakemi fän pwül me mwen än ewe Samol mi Lapalap song me lingen an manaman.
11 Lon ena rän chon tipetekia repwe küna tekison, än aramas lamalamtekia epwe kisikisitiu, nge ewe Samol mi Lapalap chök epwe tekia.
12 Pun ewe Samol mi Unusen Manaman epwe awara eu ränin an epwe apwüngü aramas meinisin mi lamalamtekia o tunosikesik, nge meinisin mi tekia repwe küna tekison.
13 Epwe ataela ekewe irä setar mi üwenewenetä won Lepanon, pwal ekewe irä ook meinisin lon Pasan.
14 Epwe asönü ekewe chukutekia me ekewe chukutekison meinisin,
15 epwe ataetiu ekewe imw tekia pwal ekewe tit mi pöchökül,
16 epwe ataela ekewe sipwen Tarsis meinisin, me ekewe wa mi lingöch.
17 Lon ena rän chon tipetekia repwe küna tekison, än aramas lamalamtekia epwe kisikisitiu, nge ewe Samol mi Lapalap chök epwe tekia.
18 Iwe, ekewe uluulun anümwäl repwe wesewesen morola.
19 Ekewe aramas repwe sülong lon pwangen achau pwal lon pwangen fän pwül me mwen än ewe Samol mi Lapalap song me lingen an manaman, lupwen a feito pwe epwe achecha fanüfan.
20 Lon ena rän aramas repwe pöütala ngeni nakich me pöüte ar kewe uluulun anümwäl ra föri seni silifer me kolt fän iten ar repwe fel ngeniir.
21 Lupwen ewe Samol mi Lapalap epwe feito pwe epwe achecha fanüfan, aramas repwe sülong lon pwangen achau pwal fän säpereperen achau me mwen än ewe Samol mi Lapalap song me lingen an manaman.
22 Oupwe ükütiu le apilükülükü aramas, pun a chök mochomoch fansoun manauer. Met aüchear?