58
Pwüngün echikefel
58.1-12
1 Ewe Samol mi Laplap a apasa, “Kopwe kökkö fän leüömong, nge kosap säw. Kopwe alapätä mweliom usun eu rappwa o pwärätä än nei aramas ekewe mwirimwirin Jakop pupungau me tipis.
2 Ewer, ra küttaei iteiten rän o mochen silei letipei. Nge ra usun chök eu täppin aramas mi pwomweni pwomwen chon pwüng resap pöütala än ar we Kot allük. Iwe, ra tüngor ngeniei pwe üpwe eäni pwüng lon ai apwüng, ra pwal tüngormau ngeniei pwe üpwe kanoto rer.”
3 Iwe, ekewe aramas ra ais, “Pwota aipwe echikefel are kosap nenengenikem? Pwota aipwe püsin ariaföüükem are kosap memef ren?” Ewe Samol mi Lapalap a pälüeniir, “Lon ränin ämi echikefel oua chök püsin kütta winnemi o ariaföüü nöümi chon angang.
4 Oua echikefel, nge mürin oua anini o fiufengen me köfölfengen. Ifa usun, oua ekieki pwe ei sokun echikefel oua eäni lon ei fansoun epwe alisi ämi iotek pwe üpwe aüselinga?
5 Ifa usun, üpwe tipeni ei sokun echikefel, eu rän aramas ra püsin ariaföüüür lon? Ifa usun, repwe amwarorou mökürer usun efoch wowo o kon won mangaku seni tuk me falangen ekkei? Are ifa usun, oua aita ngeni echikefel ei sokun, ika oua ekieki pwe üa efich ei sokun lapalap?
6 Nge iei ei sokun echikefel üa tipeni: Kopwe apichala ririn chokewe mi fötek fän pwüngingau. Kopwe angasa chon riaföü me ren aramas o kupi iteiten waas mi chou won afarer.
7 Kopwe ineti ngeni chon echik anom mongö, nge chon mwelele kopwe panalong lon imwom. Are kopwe küna eman mi selela, kopwe aüföüfa, nge kosap kul seni püsin aramasom.
8 Mürin, ai tong epwe tinetiu womw usun chök mallen rän, kopwe müttir chikar seni om samau. Om pwüng epwe akomwola mwom, nge ai ling epwe tapwela mürum o tümwünuk.
9 Iwe, lupwen kopwe iotek, üpwe aüselingok, nge lupwen kopwe kökköriei, üpwe apasa, ‘Ngang iei.’ Are kopwe ükütiu le ariaföüü aramas are kopwe ükütiu le tipitipmwäl ngeniir ika ükütiu le kapasingau,
10 are kopwe pwal amongöü chon echik o alisi chon riaföü, mürin ewe rochopwak mi nom ünükum epwe wiliti saram, nge mine a toputop ngonuk epwe saram usun chök leoloas.
11 Iwe, ngang ewe Samol mi Lapalap üpwe emwenuk fansoun meinisin, üpwe pwal ngonuk amötum lon fanüpwas o apöchöküla inisum. Iwe, kopwe usun chök eu tanipi mi nüküchöchön, pwal usun eu puächen koluk esap mor.
12 Iwe, noum aramas repwe aüsefälietä om kewe telinimw mi tala me lomlom, repwe seniretä won ekewe longolong om kewe lewo ra föri. Iwe, oupwe iteni chon apinasa pwangen tit pwal chon aüsefälietä telinimw.”
Pwüngün ewe ränin sapat
58.13-14
13 “Are kopwe tümwünuk pwe kosap apiningaua ewe ränin sapat, kosap pwal föri om angang lon ai rän mi pin, are kopwe aita ngeni ewe ränin sapat ränin pwapwa me pin o tümwünüöchü, pwe kosap kukuloufetal o föri püsin om angang lon, kosap pwal eäni kapas mi lomotongau,
14 mürin kopwe küna om pwapwa rei. Iwe, üpwe atekiokotä won ekewe leni mi tekia won fanüfan, pwe kopwe feiöchüni feiöchün ewe fanü üa ngeni Jakop om we lewo. Ngang ewe Samol mi Lapalap üa kapas.”