36
Elihu a ingemwareiti tekian Kot
36.1–37.24
1 Iwe, Elihu a sopwela le kapas,
2 “Kopwe mwo witiwit ekis, mi chüen wor mine üpwe aiti ngonuk,
pun mi chüen wor mine üpwe apasa fän iten Kot.
3 Ai silelap a watte,
üpwe aea le pwärätä pwe ewe Chon Föriei a pwüng.
4 Pun ellet, ai kewe kapas resap mwäl.
Eman mi fokun silelap a nom reöm.
5 Nengeni, Kot a manaman, nge esap oput eman.
Esap wor och i esap tongeni weweiti.
6 Esap amwöchü manauen eman aramasangau,
nge a ngeni ekewe mi mwelele ar pwüüng.
7 A tümwünü ekewe chon pwüng seni feiengau,
a mwüt ngeniir pwe repwe nemenem usun ekewe king
o atekiaretä tori feilfeilachök.
8 Nge are aramas ra fötek ngeni selimächä
o nom lon riaföü,
9 mürin, Kot a pwäri ngeniir ar föför me ar tipis pwe ra lamalamtekia.
10 A suki selinger ngeni kapasen amirit
o allük ngeniir pwe repwe kul seni ar föföringau.
11 Are repwe aleasochisi Kot o angang ngeni,
repwe aunusa ierin manauer fän pisekisek me feiöch.
12 Nge are resap mochen aüselinga,
repwe feiengau ren ketilas o mäla lon ar miritimang.
13 Iwe, chokewe resap aleasochisi Kot ra chök sossong.
Nge lupwen Kot a apwüngüür, resap siö ngeni pwe epwe alisiir.
14 Ra mäla lealüalür,
manauer a müchüla ren ar föri föför mi äsäw.
15 Nge Kot a angasa chokewe mi riaföü seni ar riaföü
o kapas ngeniir lon ar weires.
16 A pwal panukowu seni lon riaföü
o anomuk lon eu leni mi chölap ia esap wor achachach ie.
Om chepel a uren mongö mi anö.
17 Nge iei Kot a apwünguk usun an apwüngü eman chon föföringau,
a küük met mi pwüng ngonuk.
18 Kopwe afäliik pwe esap wor eman epwe atupuk ren chomong wöü,
kosap mwütätä eu watten lifangen amichimich epwe atokok.
19 Ifa usun, om siö ika unusen om pöchökül repwe alisuk seni riaföü?
20 Kosap asüküsükü pwin,
lupwen chon ekewe mwü ra kärila seni lenier.
21 Kopwe afäliik pwe kosap kul ngeni föföringau,
pun iei popun ka küna sosot ren riaföü.
22 Nengeni, Kot a tekia lon an manaman.
Iö a eman chon kait usun i?
23 Iö a aiti ngeni mine epwe föri,
ika iö a tongeni apasa ngeni, ‘Ka föri mine a mwäl?’
24 Kopwe chechemeni pwe kopwe ingeiti an angang aramas ra kölü lon ar köl.
25 Aramas meinisin ra küna mine a föri,
ra chök tongeni nenengeni me toau.
26 Kot a fokun tekia, nge kich sisap tongeni weweiti.
Esap wor eman a tongeni aleani ükükün ierin manauan.
27 A angeatä ekewe chiin koluk seni won pwül
o siwili nüküchöchön ngeni üt.
28 Ewe üt a püngütiu seni läng
o püngümongetiu won aramas.
29 Ifa usun, eman a tongeni weweiti usun an ameresala ekewe kuchu,
pwal usun an apüngü chopulap seni lenian.
30 Nengeni usun an atoropasa ekewe inefi ünükün
o pwölüela epin matau.
31 Ren ekei sokun lapalap a apwüngü chon ekewe mwü,
a pwal fangoto chomong mongö.
32 A amasoua pöün ren inefi
o allük ngeni pwe epwe küw ewe lenien ännen.
33 Ewe chopulap a asisilätä pwe eu mölümöl epwe waroto,
pwal ekewe pwiin kow ra silei pwe epwe war.