4
Chiechi ngeni fanüfan
4.1-10
1 Ia ra feito me ie fiu me anini lefilemi? Resap feito seni ämi mochenia kana mi fiufengen lon letipemi?
2 Oua mochen mettoch, nge esap torikemi. Oua ninni o mochenia, nge ousap tongeni angei met oua mochen. Oua anini o fiu. Ousap eäni mine oua mochen, pun ousap tüngor seni Kot.
3 Nge lupwen oua tüngor, ousap angei och, pun oua tüngor fän ämi ekiek mi ngau, pwe oupwe asolapa lon ämi mocheniangau.
4 Ämi aramas mi kirikiringau! Ousap silei pwe chiechi ngeni fanüfan wewen fiu ngeni Kot? Iö a mochen chiechi ngeni fanüfan, i ewe aramas mi fiu ngeni Kot.
5 Ousap ekieki pwe a lomotongau mine a mak lon ekewe Toropwe mi Pin, “Ewe ngün Kot a anomu loch a fokun ekimong woch.”
6 Nge Kot a awattei ngenikich an ümöümöch. Iei mine a mak lon ekewe Toropwe mi Pin, “Kot a ü ngeni ekewe chon lamalamtekia, nge a ümöümöch ngeni ekewe chon tipetekison.”
7 Iei mine oupwe aleasochisi Kot. Oupwe ü ngeni Tefil, iwe, epwe sü senikemi.
8 Oupwe arap ngeni Kot, iwe, epwe arap ngenikemi. Oupwe limeti pöümi, ämi chon tipis kana, oupwe limeti lelukemi, ämi chon tipekinikin kana.
9 Oupwe letipeta, oupwe kechü o ngüngüres. Oupwe siwili ämi takir ngeni kechü, pwal ämi pwapwa ngeni lolilen!
10 Oupwe püsin atekisonakemi mwen mesen ach Samol, iwe, i epwe atekiakemiitä.
Kapasen fön pwe sisap apwüngü eman pwiich souläng
4.11-12
11 Ämi pwii kana, ousap aitengauafengenikemi lefilemi. Iö a aitengaua eman pwiin souläng ika apwüngü, a aitengaua o apwüngü ewe Allük. Are ka apwüngü ewe Allük, mürin kosap chüen eman chon aleasochis ngeni, nge ka eman chon apwüngü ewe Allük.
12 Kot echök ewe mi föri ewe Allük, pwal i ewe souapwüng. I chök a tongeni amanaua o afeiengaua aramas. Nge en iö, pwe kopwe apwüngü chon arum?
Kapasen fön usun sikesik
4.13-17
13 Oupwe aüselingaei, ämi mi apasa, “Ikenai ika lesor sipwe feila lon enan telinimw. Ikenan sipwe nonom eu ier, sipwe föri ach angangen amömö o angei winnach.”
14 Ämi ousap fen mwo nge silei met epwe fis ngeni manauemi lesor. Pun manauemi a usun chök eu ötüöt mi pwä lon ekis chök fansoun mochomoch, mürin esap chüen nom.
15 Iwe, iei usun mine oupwe apasa, “Are a fän letipen ach Samol, sipwe manau o föri ei ika enan.”
16 Nge iei oua lamalamtekia o sikesik. Ämi sikesik meinisin a ngau.
17 Iei mine eman aramas mi silei mine a mürina, nge esap föri, a tipis.