7
Jesus me pwiin kewe
7.1-9
1 Mürin ei pworaus, Jesus a chök saifetal lon Kalilea, pun esap mochen saifetal lon Jutea, pokiten ekewe nöüwisen chon Juta ra mochen niela i.
2 Nge a arap fansoun ewe chulapen likachoch än ekewe chon Juta.
3 Iei mine pwiin Jesus kewe ra üreni, “Kopwe feila seni ikei o feila Jutea, pwe noumw kewe chon kaiö repwe küna ekewe mettoch ka föri.
4 Esap wor eman mi mochen epwe sil me lein aramas a föri an kewe föför le monomon. Iwe, pokiten ka föri ekei föför, kopwe pwärukela ngeni chon fanüfan meinisin, pwe repwe silei usumw.”
5 Pun püsin pwiin kewe mwo nge resap lükü i.
6 Jesus a pölüeniir, “Esamwo tori ewe fansoun mi fich ngeniei, nge ämi fansoun esap lifilifil.
7 Chon fanüfan resap tongeni oputakemi, nge ra oputaei, pun üa pwäri ngeniir pwe ar föför a ngau.
8 Ämi oupwe feila ngeni ewe chulap. Ngang üsap mwo feila, pun esamwo tori ewe fansoun mi fich fän itei.”
9 Jesus a apasatä ekei kapas o nomola lon Kalilea.
Jesus a nom lon ewe Chulapen Likachoch
7.10-24
10 Mürin än pwiin kewe feila ren ewe chulap, Jesus a pwal feila. Nge esap feila le pwäpwäla, pwe le monomon chök.
11 Iwe, ekewe nöüwisen chon Juta ra kütta Jesus lon ewe chulap. Ra ais, “Ifa i ätewe?”
12 Ekewe aramas lon ewe chulap ra möngününgünfengen usun i. Ekoch ra apasa, “I eman aramasöch,” nge pwal ekoch ra apasa, “Apw, a chök atupu ekewe aramas.”
13 Nge esap wor eman a kapas usun Jesus le pwäpwäla, pun ra niuokusiti ekewe nöüwisen chon Juta.
14 Lupwen a tori esopun ekewe ränin chulapen likachoch, Jesus a feitä lon ewe imwenfel o popuetä le afalafal.
15 Iwe, ekewe nöüwisen chon Juta ra mairü ren an kapas o ra apasa, “Pwota iei me silelapen ei mwän, nge esap fiti sukul?”
16 Mürin Jesus a pölüeniir, “Mine üa eäni afalafal esap püsin ai, nge a pop seni Kot ewe mi tinieito.
17 Iö a mochen föri letipen Kot epwe silei ika mine üa eäni afalafal a feito seni Kot, are üa chök kapas fän püsin itei.
18 Eman mi kapas fän püsin itan, a chök püsin kütta iteüöchün. Nge eman mi kütta iteüöchün ewe eman a tinato, i eman aramas mi let, nge esap wor och mine a mwäl won.
19 Ifa usun, Moses esap ngenikemi ekewe Allük? Nge esap wor eman leimi a aleasochisi ekewe Allük. Pwota oua ekiekin nieila?”
20 Ekewe aramas ra pölüeni, “Eman anün rochopwak a wänuk. Iö a ekiekin niikela?”
21 Jesus a pölüeniir, “Üa föri eu chök manaman, nge ämi meinisin oua mairü ren.
22 Iwe, Moses a allük pwe oupwe sirkomsaisi nöümi ät. (Nge ei esap pop seni Moses, nge ämi kewe lewo ra popuetä.) Iei usun oua sirkomsaisi eman ät lon ewe ränin sapat.
23 Are än Moses kewe Allük resap ta ren ämi sirkomsaisi eman ät lon ewe ränin sapat, pwota oua song ngeniei pokiten üa apöchökülätä unusen inisin eman mwän lon ewe ränin sapat?
24 Ousap apwüngü eman ren mine oua küna me lükün, nge oupwe eäni apwüng fän pwüng.”
Ifa usun, epwe Jesus ewe Kraist?
7.25-31
25 Iwe, lon ewe chök otun ekoch aramasen Jerusalem ra popuetä le ais, “Ifa usun, sap iei i ewe mwän ekewe nöüwis ra ekiekin ar repwe niela?
26 Nengeni, a kapas le pwäpwäla, nge esap wor eman a pölüeni! Ifa usun, ir mi silei pwe i Kraist?
27 Nge lupwen Kraist epwe war, esap wor eman epwe silei ia a feito seni ie.”
28 Iwe, lupwen Jesus a afalafal lon ewe imwenfel, a leüömong le apasa, “Ifa usun, oua wesewesen sileei? Oua silei ia üa feito me ie? Ngang üsap feito fän püsin itei, nge ewe mi tinieito a let. Ämi ousap silei i.
29 Nge ngang üa silei i, pun ngang üa feito seni, i a tinieito.”
30 Mürin ra sotuni ar repwe turufi, nge esap wor eman a atapa, pun esamwo tori an fansoun.
31 Nge chomong aramas lon ewe mwich ra lükü i o ra apasa, “Lupwen Kraist epwe war, ifa usun, epwe föri chomong manaman lap seni ekewe manaman ei mwän a föri?”
Ra tinala chon künö pwe repwe turufi Jesus
7.32-36
32 Iwe, ekewe Farisi ra rongorong än ekewe aramas möngününgün won ekei mettoch usun Jesus, iei mine ir me ekewe souasor mi lap ra tinala ekoch chon tümwünü imwenfel pwe repwe turufi Jesus.
33 Mürin Jesus a apasa, “Ekis chök fansoun üpwe chüen nom remi, mürin üpwe feila ren ewe mi tinieito.
34 Ämi oupwe küttaei, nge ousap künaei, pun ousap tongeni feila ewe ia üpwe nom ie.”
35 Iwe, ekewe nöüwisen chon Juta ra kapasfengen lefiler, “Ia i epwe feila ie, pwe äm aisap tongeni küna? Ifa usun, epwe feila lon ekewe telinimwen chon Krik, ia nöüch aramas ra toropasfeil ie o afalafala ekewe chon Krik?
36 Met wewen an apasa, ‘Oupwe küttaei, nge ousap künaei, ousap pwal tongeni feila ia üpwe nom ie?’ ”
Ewe chanpupun Kolukun Manau
7.37-39
37 Lesopolan ränin ewe chulap, iei ewe rän mi fokun aüchea, Jesus a ütä o apasa fän leüömong, “Iö a kaka epwe feito rei o ün!
38 Iö a lüküei usun ekewe Toropwe mi Pin ra apasa, chanpupun kolukun manau repwe puwu seni lelukan.”
39 Jesus a kapas won ei usun ewe Ngünmifel, chokewe mi lükü i repwe angei. Lon ena fansoun Kot esamwo tinato Ngünmifel, pun Jesus esamwo tolong lon lingan.
Ekewe aramas ra tipefesen
7.40-44
40 Iwe, ekoch ekewe aramas me lon ewe mwich ra rongorong än Jesus kapas o ra apasa, “Ei mwän i wesewesen ewe Soufos.”
41 Nge ekoch ra apasa, “I ewe Kraist.” Nge pwal ekoch ra apasa, “Kraist esap feito seni Kalilea.
42 Ekewe Toropwe mi Pin ra apasa, pwe Kraist epwe eman mwirimwirin Tafit, epwe uputiu lon Petleem ewe telinimwen Tafit.”
43 Iei usun a fis tipefesen lon ewe mwich pokiten Jesus.
44 Ekoch ra mochen turufi i, nge esap wor eman a atapa.
Ekewe nöüwisen chon Juta resap lükü
7.45-52
45 Iwe, lupwen ekewe chon tümwünü imwenfel ra liwinsefäl, ekewe souasor mi lap me ekewe Farisi ra aisiniir, “Pwota ousap etekinato?”
46 Ra pölüeni, “Esap wor eman aramas a afalafal usun än ei mwän afalafal.”
47 Ekewe Farisi ra aisiniir, “Ifa usun, ei mwän a pwal atupukemi?
48 Ifa usun, a wor eman lein ekewe nöüwis ika ekewe Farisi a lükü i?
49 Ei mwichen aramas esap silei än Moses kewe Allük, iei mine ra nom fän än Kot anümamau.”
50 Eman me lein ekewe Farisi Nikotemus, ätewe a fen feila churi Jesus me mwan, a üreni chiechian kewe,
51 “Lon pwüngün ach kewe Allük sisap tongeni apwüngü eman aramas me mwen ach sipwe rongorong ngeni an pworaus o küttaöchü met a föri.”
52 Ra pölüeni, “Ifa usun, pwal en eman re Kalilea? Kopwe kütta lon ekewe Toropwe mi Pin o küna, pwe esap wor eman soufos epwe feito seni Kalilea.”