29
Jeremaia a makei echö toropwe ngeni ekewe chon oola
29.1-32
1 Iwe, ewe soufos Jeremaia a makei echö toropwe o tinala seni Jerusalem ngeni ekewe souakom lein ekewe chon oola, ngeni ekewe souasor me soufos, pwal ngeni ekewe aramas meinisin Nepukatnesar a fen angeer seni Jerusalem o uweerela Papilon.
2 A makei ei toropwe mürin än ewe king Jehoiachin me inelapan, ekewe nöüwisen lon imwen king me ekewe souemwenin Juta me Jerusalem, ekewe soufalafal me ekewe chon angang ngeni mächä ra oola.
3 Iwe, Elasa nöün Safan we mwän me Kemaria nöün Hilkia we ra uwei ewe toropwe. Ir ätekewe Setekia ewe kingen Juta a tinirela Papilon ren ewe king Nepukatnesar. Iwe, iei masouen ewe toropwe:
4 “Iei alon ewe Samol mi Unusen Manaman, ewe Koten Israel, ngeni ekewe chon oola meinisin, chokewe a tinirela seni Jerusalem ngeni Papilon,
5 ‘Oupwe aüetä imwemi o nonom lor, oupwe fotuki ämi tanipi o mongö uar.
6 Oupwe pwüpwülü o nöünöü ät me nengin. Oupwe apwüpwülüa nöümi mwän me nöümi fefin, pwe ir repwe nöünöü ät me nengin. Oupwe achomongakemiila me ikenan, nge ousap chokükünüla.
7 Oupwe kütta feiöchün ekewe telinimw ia üa tinikemiila ie pwe oupwe oola lon. Oupwe iotek ngeniei fän iter, pun are epwe wor feiöchür, ämi oupwe pwal feiöch.
8 Ngang ewe Samol mi Unusen Manaman, ewe Koten Israel üa ürenikemi pwe ousap tup ren nöümi kewe soufos me nöümi kewe soupwe mi nom leimi. Ousap aüseling ngeni ekewe tan ra eäni.
9 Pun a chofana mine ra osuni ngenikemi fän itei. Ngang üsap tinirela. Ngang ewe Samol mi Lapalap üa kapas.’
10 Pun iei alon ewe Samol mi Lapalap, ‘Are a wes ekewe fik ier fän iten Papilon, ngang üpwe ämwakemi. Üpwe apwönüetä ai pwon ngenikemi o aliwinikemi ngeni ei leni.
11 Pun ngang üa silei mine üa ekieki ngenikemi. Üa ekieki feiöchümi, nge sap feiengauemi, pwe üpwe ngenikemi eu fansounöch me apilükülük.
12 Mürin oupwe köriei, oupwe feito o iotek ngeniei, nge ngang üpwe aüselingakemi.
13 Ämi oupwe küttaei o künaei, pun oua küttaei ren unusen lelukemi.
14 Ewer, üa apasa pwe oupwe künaei, nge ngang üpwe aliwinisefälikemi ngeni fanüemi. Üpwe achufengenikemi seni ekewe mwü me ekewe leni meinisin ia üa atoropasakemiila ie o aliwinisefälikemi seni ewe leni ia üa tinikemiila ie pwe oupwe oola. Ngang ewe Samol mi Lapalap üa kapas.’
15 Iwe, ämi oua apasa pwe ewe Samol mi Lapalap a ngenikemi soufos me lon Papilon.
16 Oupwe rongorong ngeni mine ewe Samol mi Lapalap a apasa fän äsengesin ewe king mi nemeni ewe mwü Tafit a nemeni me lom, pwal fän äsengesin ekewe aramas meinisin mi nom lon ei telinimw, ir aramasemi resap etikemi le oola,
17 ‘Iei alon ewe Samol mi Unusen Manaman: Üpwe awarato maun wor, pwal lengita me mätter, üpwe pwal föri pwe repwe usun chök ekewe föün fiik mi fokun ngau pwe esap wor eman a tongeni ocheer.
18 Üpwe tapweriir fän maun, fän lengita me mätter. Üpwe föri pwe repwe och minen eniweniw ngeni chon ekewe mwü meinisin won fanüfan. Aramas repwe leaweniir lon ar ottek, repwe enniw o küna turunufas me itengau me lein chon ekewe mwü meinisin ia üa asürela ie.
19 Ei epwe fis ngeniir pokiten resap aleasochisi ai kewe kapas üa tinikisiela rer ren nei chon angang ekewe soufos. Nge resap mochen aüselinga. Ngang ewe Samol mi Lapalap üa kapas.’
20 Oupwe aüselinga alon ewe Samol mi Lapalap, ämi chon oola meinisin, ämi kewe a tinikemiila seni Jerusalem ngeni Papilon.
21 Ewe Samol mi Unusen Manaman, ewe Koten Israel a apasa fänäsengesin Ahap nöün Kolaia we mwän me Setekia nöün Maseia we mi chofana osunier ngenikemi fän itan. A apasa pwe epwe atolongeer fän nemenien Nepukatnesar ewe kingen Papilon, nge i epwe nirela me fän mesemi.
22 Iwe, ekewe chon oola seni Juta mi nom Papilon repwe eänifengeni lefiler ei kapasen ottek fän iter, ‘Amwo ewe Samol mi Lapalap epwe föri ngonuk usun mine a föri ngeni Setekia me Ahap, ir ätekewe ewe kingen Papilon a arapeer won ekkei.’
23 Ei epwe fis ngeniir, pokiten ra föri eu tipis watte me lon Israel. Ra lisowu ngeni pwülüen chon arur, ra pwal eäni kapas chofana fän itan, nge esap üreniir pwe repwe kapas. Ewe Samol mi Lapalap a silei mine ra föri, i ewe chon pwärätä. Iei alon ewe Samol mi Lapalap.”
24 Iwe, Jeremaia, kopwe üreni Semaia seni Neelam,
25 pwe iei alon ewe Samol mi Unusen Manaman, ewe Koten Israel, “Ka tinala toropwe fän püsin itom ngeni ekewe aramas meinisin mi nom lon Jerusalem, ngeni ewe souasor Sefania nöün Maseia we mwän pwal ngeni ekewe souasor meinisin. Ka mak ngeni Sefania,
26 ‘Ewe Samol mi Lapalap a filuk pwe kopwe souasor siwilin ewe souasor Joiata o tümwünü imwen ewe Samol mi Lapalap. Iei wisom pwe kopwe annükü lefilen irä pöün me pechen ekewe chon umwes mi osuni usun eman soufos, kopwe pwal atolonga üer lon efoch ring seni mächä.
27 Pwota kosap apwüngü Jeremaia seni Anatot mi osuni ngenikemi?
28 Pun a tinala toropwe rem lon Papilon o üra: Ämi chon oola, ämi oupwe nonomotam lon Papilon. Iei mine oupwe aüetä imwemi o nonom lor. Oupwe pwal fotuki ämi tanipi o mongö uar.’ ”
29 Iwe, ewe souasor Sefania a aleani ei toropwe me fän mesen ewe soufos Jeremaia.
30 Mürin ewe Samol mi Lapalap a üreni Jeremaia,
31 “Kopwe tinala ei pworaus ngeni ekewe chon oola meinisin, ‘Iei alon ewe Samol mi Lapalap fänäsengesin Semaia seni Neelam: Pokiten Semaia a osuni ngenikemi, nge üsap tini, a pwal emwenikemi pwe oupwe lükü kapas chofana,
32 iei mine üpwe apwüngü Semaia seni Neelam me mwirimwirin kana. Esap wor eman me lein aramasan epwe manau o küna ewe feiöch üpwe ngeni nei aramas, pun a üreni ekewe aramas pwe repwe ü ngeniei. Ngang ewe Samol mi Lapalap üa kapas.’ ”