20
Kapas ais usun än Jesus pwüüng
20.1-8
(Mat 21.23-27; Mark 11.27-33)
1 Lon eu rän, lupwen Jesus a nom lon ewe imwenfel o afalafala ekewe aramas ewe Pworausen Manau, ekewe souasor mi lap, ekewe Sensen Allük me ekewe souakom ra feito ren
2 o aisini, “Kopwe ürenikem ika fän meni pwüüng ka föri ekei mettoch? Iö a ngonuk om pwüüng?”
3 Jesus a pölüeniir, “Iei ngang üpwe aisinikemi eu kapas ais, nge oupwe pwal ngeniei pölüan.
4 Ifa usun än Johannes pwüüng pwe epwe papataisi aramas a pop seni Kot ika seni aramas?”
5 Iwe, ra popuetä kapasfengen lefiler, “Met sipwe apasa? Are sipwe üra, ‘A pop seni Kot,’ epwe aisinikich, ‘Pwota chök ousap lükü Johannes?’
6 Nge are sipwe üra, ‘A pop seni aramas,’ unusen ei mwichen aramas repwe mone ngeni kich fau, pun ra lükü pwe Johannes eman soufos.”
7 Iei mine ra pölüeni Jesus, “Äm aisap silei ia a pop seni ie.”
8 Iwe, Jesus a üreniir, “Ika ina, üsap pwal ürenikemi fän meni pwüüng üa föri ekei mettoch.”
Pworausen awewe usun ekewe chon mälämäl mi ngau
20.9-18
(Mat 21.33-46; Mark 12.1-12)
9 Mürin Jesus a apworausa ngeni ekewe aramas ei pworausen awewe, “A wor eman mwän a fotuki eu tanipin wain. Iwe, a awisa ekoch chon mälämäl pwe repwe tümwünü, mürin a saila lon eu fanü toau.
10 Lupwen a tori fansoun kinikin, a tinala eman nöün chon angang ren ekewe chon mälämäl, pwe epwe angei seniir wisan me lon ekewe föün wain. Nge ekewe chon mälämäl ra wichi ewe chon angang o tinala fän an asöülapö.
11 Iei mine a tinala pwal eman nöün chon angang, nge ekewe chon mälämäl ra pwal wichi, ra föri ngeni sokun föför pwe epwe säw ren o tinala fän an asöülapö.
12 Mürin a tinala aülümanün nöün chon angang. Iwe, ekewe chon mälämäl ra akinasa o asüela.
13 Mürin ewe mine an ewe tanipin wain a apasa, ‘Met üpwe föri? Iei üpwe le tinala püsin nei we üa fokun echeni. Eli repwe meniniti i.’
14 Nge lupwen ekewe chon mälämäl ra küna i, ra kapasfengen lefiler, ‘Iei i alemürin ätei mine an ei tanipi. Ousipwe niela, pwe sipwe eäni an ei tanipi me ren saman.’
15 Iei mine ra etekinawu seni ewe tanipin wain o niela.” Iwe, Jesus a üra, “Met mine an ewe tanipin wain epwe föri ngeniir?
16 Epwe feito o niela ekei chon mälämäl, nge epwe ngeni pwal ekoch chon mälämäl an we tanipin wain.”
Lupwen ekewe aramas ra rongorong ei pworaus, ra apasa, “Apw, sap ina!”
17 Nge Jesus a nenengeniir o apasa, “Ifa chök wewen ekei kapas me lon ewe Toropwe mi Pin?
‘Ei fau ekewe chon kaü imw ra pöütala,
pun resap aücheani,
a wiliti ewe föün lepwokuku mi fokun aüchea.’
18 Are eman epwe turutiu won ei fau, epwe tatakis, nge are ewe fau epwe turutiu won eman, epwe fokun pachach.”
Kapas ais usun takises
20.19-26
(Mat 22.15-22; Mark 12.13-17)
19 Iwe, ekewe Sensen Allük me ekewe souasor mi lap ra silei pwe a afalafala ei pworausen awewe usur, iei mine ra sotuni ar repwe fötekini Jesus lon ewe otun, nge ra niuokusiti ekewe aramas.
20 Iei mine ra mamasa Jesus o tinala chon operi i mi pomweni pomwen aramas mi öch, pwe repwe särei Jesus ren ar kapas ais, pun repwe tongeni atolonga fän nemenemen me pöchökülen ewe kepina.
21 Ekei chon op ra üreni Jesus, “Sense, äm aia silei pwe ka kapas o afalafal fän wenechar. Aia pwal silei pwe kosap nenengeni nonomun aramas, nge ka afalafala mine a let usun letipen Kot ngeni aramas.
22 Kopwe ürenikem ika a pwüng ach sipwe mönatiu ach takises ngeni Sisar ika ese pwüng?”
23 Nge Jesus a silei usun ar likatuputup o üreniir,
24 “Oupwe pwäri ngeniei eföü föün moni silifer. Liosun iö me iten iö ei won ei moni?” Ra pölüeni, “Liosun Sisar me itan.”
25 Iei mine Jesus a üreniir, “Mi pwüng. Oupwe ngeni Sisar mine än Sisar, nge oupwe ngeni Kot mine än Kot.”
26 Iwe, resap tongeni särei Jesus won met a apasa me mwen ekewe aramas, iei mine ra fanafanala, nge ra ing ren mine a pölüeniir won.
Kapas ais usun manausefäl
20.27-40
(Mat 22.23-33; Mark 12.18-27)
27 Mürin, ekoch Satusi ra feito ren Jesus, ir chokewe mi apasa pwe aramas resap manausefäl seni mäla. Iwe, ra üreni Jesus,
28 “Sense, Moses a makkei ei allük fän itach: ‘Are eman mwän a mäla, nge esap wor nöün me won pwülüan, pwiin ei mwän epwe fokun pwülüeni ei fefin, pwe epwe wor nöün fänäsengesin mwirimwirin pwiin we mi mäla.’
29 Mi wor füman pwipwi. Ewe mwänichi a pwülüeni eman fefin, nge lupwen a mäla, esap wor nöün.
30 Mürin ewe aruomanün a pwülüeni ewe fefin,
31 pwal mürin ewe aülümanün. Pwal ina chök usun mine a fis ngeni ekewe lusun tori ewe afümanün. Ra mäla, nge esap wor nöür.
32 Lesopolan ewe fefin a mäla.
33 Iwe, lon ewe ränin, lupwen ekewe sotup repwe manausefäl, iö me leir epwe pwülüeni ewe fefin? Pun ir me füman ra pwüpwülü ngeni.”
34 Jesus a üreniir, “Lon ei fansoun mwän me fefin ra pwüpwülü,
35 nge ekewe mwän me fefin mi fich ngeni ar repwe manausefäl seni mäla o manau lon ewe fansoun epwe feito resap pwüpwülü.
36 Repwe wewe ngeni ekewe chon läng, nge resap chüen tongeni mäla. Ir nöün Kot, pun ra manausefäl seni mäla.
37 Pwal mwo nge Moses a pwärätä lon ewe pworaus usun ewe iräfölüföl mi pulopulen ekkei, pwe ekewe sotup repwe manausefäl. Pun ikenan a aita ngeni ewe Samol än Apraham Kot, än Isaak Kot me än Jakop Kot.
38 Kot än ekewe mi manau Kot, nge sap än ekewe mi mäla, pun ren i aramas meinisin ra tongeni eäni manau.”
39 Iwe, ekoch me lein ekewe Sensen Allük ra apasa, “Sense, a fokun mürina om kapasen pölüen.”
40 Pun ra niuokus le sopwela ar repwe kapas ngeni won och.
Kapas ais usun Kraist
20.41-44
(Mat 22.41-46; Mark 12.35-37)
41 Iwe, Jesus a aisiniir, “Ifa usun, pwota repwe tongeni apasa, pwe ewe Kraist epwe eman mwirimwirin Tafit?
42 Pun Tafit a püsin apasa lon ewe puken Kölfel,
‘Ewe Samol a kapas ngeni ai Samol:
Kopwe mot lepelifichi,
43 tori üpwe anomu
chon oputom fän pecheöm.’
44 Tafit a püsin aita ngeni ‘Samol’, ifa usun chök än Kraist epwe tongeni pwal eman mwirimwirin Tafit?”
Jesus a kapas usun än ekewe chon kaiö repwe afäliir ren ekewe Sensen Allük
20.45-47
(Mat 23.1-36; Mark 12.38-40)
45 Iwe, lupwen ekewe aramas meinisin ra aüseling ngeni Jesus, a üreni nöün kewe chon kaiö,
46 “Oupwe afälikemi ren ekewe Sensen Allük, ra sani ar repwe fetalfeil fän üfer mi langatam, ra pwal sani än aramas repwe kapong ngeniir fän suföl lon ekewe lenien amömö. Ra aea ekewe lenien mot än ekewe meilap lon ekewe imwen felikis, pwal ekewe leni fän iten aramas mi iteföüla lon ekewe lenien kametip.
47 Ra angemwäli imwen ekewe fefin mi mä pwülüer, mürin ra einga ngeni aramas ar iotek mi langatam. Ätekewe repwe küna apwüng mi fokun chou.”