5
Jesus a köri ekoch chon kaiö
5.1-11
(Mat 4.18-22; Mark 1.16-20)
1 Lon eu rän, lupwen Jesus a ütä arun ewe nomun Kalilea, ekewe aramas ra mwicheto o etieti ngeni, pwe repwe rongorong än Kot kapas.
2 Iwe, a küna ruofoch wa ra ürütä le pi, nge ekewe chon attau ra tötiu me won ekewe wa o talü nöür kewe chew.
3 Iwe, Jesus a tötä won efoch kewe wa, wään Simon o tüngor ngeni pwe epwe ekis sikawu seni le pi. Nge Jesus a mottiu won o afalafala ewe mwichen aramas.
4 Lupwen Jesus a wes le afalafal, a üreni Simon, “Kopwe fötünewu ewe ia a alolol ie, en me chiechiom kewe, oupwe aturätiu nöümi kewe chew, pwe oupwe liap.”
5 Simon a pölüeni, “Ai samol, äm aia weires le attau lon unusen ewe pwin, nge aisap liap. Nge fän alom üpwe aturätiu ekewe chew.”
6 Iwe, lupwen ra aturätiu nöür kewe chew, ra liapeni chomong, chomong ik, pwe nöür kewe chew ra popuetä le kam.
7 Iei mine ra äkänipöü chiechier kewe mi nom won pwal ewe efoch wa, pwe repwe feito o alisiir. Iwe, ra feito o amasoua waar kewe ruofoch tori ra ur o arapakan ngeni ar repwe kokola.
8 Lupwen Simon Petrus a küna mine a fis, a fotopwäsuketiu mwen Jesus o üreni, “Kopwe feila seniei ai Samol, pun ngang eman chon tipis.”
9 Pun i me chokewe mi eti ra mairü ren chomongun liaper ik ra liapeni.
10 Pwal ina chök usun mine a fis ngeni chiechien Petrus kewe James me Johannes nöün Sepeti kewe. Mürin Jesus a üreni Simon, “Kosap niuokus, seni ikenai kopwe eman chon attaua aramas.”
11 Iwe, ra ürätä waar kewe le pi, ra likitala meinisin o tapwela mürin Jesus.
Jesus a apöchöküla eman mi rupun pwötür
5.12-16
(Mat 8.1-4; Mark 1.40-45)
12 Iwe, lupwen Jesus a nom lon eu kewe telinimw, a feito eman mwän mi kula inisin ren rupun pwötür. Lupwen a küna Jesus, a chapetiu le pwül o tüngormau ngeni, “Ai Samol, are ka mochen ka tongeni limetiei.”
13 Iwe, Jesus a aitiela pöün, a atapa inisin ewe mwän o apasa, “Ngang üa mochen, kopwe limöch.” Lon ewe chök otun ewe rupun pwötür a mola me won inisin ewe mwän.
14 Mürin Jesus a allük ngeni ewe mwän, “Kosap apworausa ngeni eman mine a fis ngonuk. Nge kopwe feila ren ewe souasor pwe epwe nenengenuk. Mürin kopwe eäni ewe asor Moses a allük fän iten om limelim, pwe epwe alletätä ngeni aramas pwe ka limöch.”
15 Iei mwo ei, nge ewe pworaus usun Jesus a chök chöfetal ekis meinisin. Iwe, eu mwichen aramas mi chomong ra feito pwe repwe rongorong an afalafal, repwe pwal küna pöchökül seni ar samau.
16 Nge Jesus a feila seniir, a emanüla lon eu leni ia esap wor aramas ie o iotek.
Jesus a apöchöküla eman mwän mi mwök
5.17-26
(Mat 9.1-8; Mark 2.1-12)
17 Lon eu rän, lupwen Jesus a afalafal, ekoch ekewe Farisi me Sensen Allük ra mot ren, ra feito seni ekewe telinimwen Kalilea me Jutea meinisin, pwal seni Jerusalem. Iwe, manamanen ewe Samol a nom ren Jesus, pwe a tufichin apöchöküla ekewe chon samau.
18 Iwe, ekoch mwän ra ekieto eman mwän mi mwök won eu peet. Ra sotuni ar repwe ekielong lon ewe imw o anomu mwen Jesus,
19 nge resap tongeni pokiten ewe mwichen aramas mi chomong. Iei mine ra tötä won osun ewe imw o säresi awenewenen ewe ia Jesus a nom ie. Iwe, wesin ar säresi ra aürätiu ewe mwän me mwen Jesus lein ewe mwichen aramas.
20 Lupwen Jesus a küna ar lükülük, a üreni ewe mwän, “Pwii, om tipis kana ra musola.”
21 Iwe, ekewe Sensen Allük me ekewe Farisi ra popuetä le ekieki lon leluker, “Iö ei mwän a apasa ekei kapasen turunufas? Iö a tongeni amusala tipis, sap Kot echök?”
22 Iwe, Jesus a silei ar ekiek o üreniir, “Pwota oua ekieki ei sokun?
23 Meta a mecheres ai üpwe apasa, ‘Om tipis kana ra musola,’ are ai apasa, ‘Kopwe ütä o fetal?’
24 Ngang üpwe allükülükü ngenikemi, pwe Nöün Aramas a wor an pwüüng won fanüfan pwe epwe amusala tipis.” Iei mine a üreni ewe mwän mi mwök, “Üpwe ürenuk: Kopwe ütä, angei kiom o feila lon imwom.”
25 Lon ewe chök otun ewe mwän a ütä me mwer meinisin, a angei kian o liwinla lon lenian fän an mwareiti Kot.
26 Iwe, ir meinisin ra fokun mairü, ra uren niuokus, ra mwareiti Kot o apasa, “Mwa met, amwararen ekei mettoch sa küna ikenai!”
Jesus a köri Lefi
5.27-32
(Mat 9.9-13; Mark 2.13-17)
27 Mürin ekei mettoch, Jesus a towu seni ewe telinimw o küna eman chon ioni takises itan Lefi, a mot lon an ofes. Iwe, Jesus a üreni, “Kopwe tapweto müri.”
28 Iwe, Lefi a ütä, a likitala meinisin o tapwela mürin.
29 Mürin Lefi a föri eu watten kametip lon imwan fän iten Jesus. Iwe, chomong chon ioni takises me pwal ekoch aramas ra nom lein ekewe chon kökköto.
30 Iwe, ekoch ekewe Farisi me ekoch Sensen Allük mi choni ar kewe mwich, ra ngününgün ngeni nöün Jesus kewe chon kaiö o aisiniir, “Pwota oua mongö o ün me ekewe chon ioni takises me ekewe chon tipis?”
31 Jesus a pölüeniir, “Aramas mi pöchökül esap lomot ngeniir eman sousafei, nge a lomot ngeni ekewe chon samau.
32 Ngang üsap feito, pwe üpwe köri ekewe chon pwüng ar repwe ekieksefäl, pwe ekewe chon tipis.”
Kapas ais usun echikefel
5.33-39
(Mat 9.14-17; Mark 2.18-22)
33 Iwe, ekoch aramas ra üreni Jesus, “Nöün Johannes kewe chon kaiö ra echikefel fän chomong o iotek, pwal usun chök nöün ekewe Farisi kewe chon kaiö. Nge noumw kewe chon kaiö ra chök momongö o ükün.”
34 Jesus a pölüeniir, “Ifa usun, oua ekieki pwe ekewe chon kökkö ngeni fetallapen apwüpwülü ra echik lupwen ewe mwän apwüpwülü söfö a nom rer? Resap fokun echik lupwen fansoun a nom rer.
35 Nge epwe war ewe rän lupwen aramas repwe angei seniir ewe mwän apwüpwülü söfö fän pöchökül, iwe, lon ekana rän repwapw echik.”
36 Iwe, Jesus a pwal apworausa ngeniir eu pworausen awewe: “Esap wor eman a angei ekam mangaku seni echö üf mi fö o teiätä won echö üf mi mes. Pun are epwe föri iei usun, a föri met ewe üf mi fö epwe kam ren, nge ewe ekam mangaku mi fö esap pwal öch ngeni echö üf mi mes.
37 Esap pwal wor eman epwe alölöülong wain mi fö lon eu pör seni silin man mi mes, pun ewe wain mi fö epwe amökkü ewe pör, iwe, ewe wain epwe nitiu le pwül, nge ewe pör epwe mökküla.
38 Nge wain mi fö sipwe alölöülong lon pör mi fö.
39 Esap wor eman epwe mochen ünümi wain mi fö mürin an ünümi ewe wain mi mes, pun a apasa, ‘Ewe wain mi mes a annö seni ewe wain mi fö.’ ”