6
Chon Nasaret resap etiwa Jesus
6.1-6
(Mat 13.53-58; Luk 4.16-30)
1 Iwe, Jesus a feila seni ewe leni o liwinsefäliti poputän telinimwan, nge nöün kewe chon kaiö ra etala.
2 Iwe, lon ewe ränin sapat Jesus a popuetä le afalafal lon ewe imwen felikis. Chomong mi rongorong an afalafal ra mairü ren. Ra aisini, “Ia ei aramas a angei me ie ekei ekiek? Met sokun tipachem a tori? Ifa usun, ren met a tongeni föri ekei manaman?
3 Ifa usun, sap ätei ewe chon kaü imw nöün Maria, pwiin James, Josef, Jutas me Simeon? Ifa usun fefinan kewe resap nom rech?” Iei mine resap etiwa.
4 Iwe, Jesus a üreniir, “Eman soufos a wor meninin ekis meinisin, nge esap wor meninin lon poputän telinimwan, me ren aramasan me an famili.”
5 Iwe, Jesus esap tongeni föri manaman ikenan, pwe a chök iseis pöün won ekoch aramas mi samau o apöchöküleereta.
6 A fokun neneiruk pokiten ekewe aramas resap lükü.
Jesus a tinala nöün kewe engol me ruoman chon kaiö.
6.6-13
(Mat 10.5-15; Luk 9.1-6)
Mürin Jesus a feila ngeni ekewe sopw ünükün o a afalafala ekewe aramas.
7 A körifengeni nöün kewe engol me ruoman chon kaiö o tiniirela akaruoman. Iwe, a ngeniir manaman won ekewe ngününgau,
8 a pwal allük ngeniir, “Ousap uwei och lon ämi sai. Ousap uwou amötümi, ämi pwotou, ousap pwal uwou moni lon pokitemi, pwe oupwe chök uwei efoch wok.
9 Oupwe ipweipw sus, nge ousap uwou aruachön üfemi.”
10 A pwal üreniir, “Lon meni leni ra etiwakemi, oupwe nonom lon ewe imw tori ämi oupwe towu seni ewe telinimw.
11 Nge are oupwe tori eu telinimw, nge resap etiwakemi ika aüselingakemi, oupwe towu seni ei telinimw o wichikala pwülün fän pechemi, pwe epwe eu minen pwärätä ngeniir, pwe ra mwäl.”
12 Iwe, ra feila o afalafala ekewe aramas pwe repwe aier seni ar tipis.
13 Ra asüela chomong anün rochopwak, ra pwal epiti chomong chon samau ren lö seni föün olif o apöchöküleer.
Johannes Soupapatais a mäla
6.14-29
(Mat 14.1-12; Luk 9.7-9)
14 Iwe, ewe king Herotes a rong usun pworausen Jesus, pwe itan a föüla ekis meinisin. Ekoch aramas ra apasa, “Johannes Soupapatais a manausefäl seni mäla. Iei popun a wor an tufich le föri ekewe manaman.”
15 Nge ekoch ra apasa, “Ätei Elias,” nge pwal ekoch ra apasa, “Ätei eman soufos usun eman ekewe soufosun lom.”
16 Lupwen Herotes a rong ekei kapas a apasa, “Johannes, ätewe üa pöküela üan a manausefäl.”
17 Pun Herotes a allük, pwe repwe turufi Johannes, repwe föti o atolonga lon imwen fötek. Herotes a föri ei föför pokiten Herotias pwülüen pwiin we Filip, i a pwülüeni seni.
18 Pun Johannes Soupapatais a apasa, “Esap pwüng ngonuk om kopwe pwülüeni pwülüen pwiüm we.”
19 Iei mine Herotias a fokun song ngeni Johannes o a ekieki an epwe niela. Nge esap tongeni pokiten Herotes.
20 Iwe, Herotes a meniniti Johannes, pun a silei pwe i eman mwän mi pwüng o pin, iei mine a tümwünü, pwe esap tori feiengau. Herotes a sani an epwe rongorong ngeni än Johannes afalafal, inamwo ika a tolong lon watten osukosuk, lupwen a rongorong ngeni.
21 Nge feilfeil a tori eu fansoun mi fich pwe än Herotias ekiek epwele pwönüetä. Ei a fis lon ränin uputiuen Herotes, lupwen a föri eu kametip fän iten nöün kewe nöüwis, nöün kewe meilapen sounfiu me ekewe aramas tekia lon Kalilea.
22 Iwe, nöün Herotias we föpwül a tolong lon ewe leni o a pworuk, pwe Herotes me chokewe mi eti le mongö ra pwapwaiti. Iei mine a üreni ewe föpwül, “Met ka mochen üpwe ngonuk? Ngang üpwe ngonuk meinisin.”
23 A pwal allükülükü an pwon fän akapel, “Meinisin mine ka tüngor üpwe ngonuk, inamwo ika esopun mwüi.”
24 Iei mine ewe föpwül a feila ren inan we o aisini, “Met ngang üpwe tüngor?” Nge inan we a pölüeni, “Kopwe tüngor möküren Johannes Soupapatais.”
25 Iwe, ewe föpwül a müttir liwinla ren ewe king o tüngor ngeni, “Üa mochen pwe iei chök kopwe ngeniei möküren Johannes Soupapatais lon eu sepi.”
26 Iwe, ewe king a fokun letipeta ren ei tüngor. Nge pokiten an pwon fän akapel pwal pokiten chokewe mi eti le mongö a tipeeu ngeni an we tüngor.
27 Iei mine lon ewe chök otun Herotes a tinala eman sounfiu seni ewe mwichen chon tümwünü ewe king o a allük ngeni, pwe epwe uwato möküren Johannes. Iwe, ewe sounfiu a feila lon ewe imwen fötek o pöküela üen Johannes.
28 Mürin a uwala ewe mökür lon eu sepi o ngeni ewe föpwül, nge i a ngeni inan we.
29 Iwe, lupwen nöün Johannes kewe chon kaiö ra rong ei pworaus, ra feila o angei somän Johannes o peiaseni.
Jesus a amongöü limungeröü mwän
6.30-44
(Mat 14.13-21; Luk 9.10-17; Joh 6.1-14)
30 Iwe, nöün Jesus kewe chon kaiö ra liwinto ren Jesus o apworausa ngeni meinisin mine ra föri, pwal mine ra eäni afalafal.
31 A fokun wor chomong aramas mi feito o feila, pwe Jesus me nöün kewe chon kaiö esap chüen mwo nge wor fansoun ar repwe mongö. Iei mine Jesus a üreniir, “Ousipwe feila oukich chök lon eu leni mi toau seni lenien aramas, pwe oupwe tongeni ekis asösö.”
32 Iei mine ra tötä won efoch wa o saila ngeni eu leni mi toau seni lenien aramas.
33 Nge chomong aramas ra küneer lupwen ra saila o ra müttir silleniir. Iei mine ra feila seni ekewe telinimw meinisin o säla mwer, pwe ra tori ewe leni mwen Jesus me nöün kewe chon kaiö resamwo tori.
34 Iwe, lupwen Jesus a tötiu seni ewe wa, a küna eu mwichen aramas mi chomong. Iwe, a fokun tongeer, pun ra wewe ngeni sip esap wor nöür chon mas. Iei mine a popuetä le afalafala ngeniir chomong mettoch.
35 Iwe, lupwen a lekuniol, nöün kewe chon kaiö ra feito ren o üreni, “A fen lekuniol, nge ei leni a toau seni lenien aramas.
36 Kopwe tinala ekewe aramas, pwe repwe feila lon ekewe leni me sopw mi arap pwe repwe kamö aner mongö.”
37 Nge Jesus a üreniir, “Ämi oupwe ngeniir met repwe mongö.” Iwe, ra aisini, “Ka mochen aipwe feila kamö pilawa won ükükün ruopükü föün moni silifer, pwe repwe mongö?”
38 Iwe, Jesus a aisiniir, “Fiteföü pilawa mi wor remi? Oupwe feila o pii.” Nge lupwen ra küna, ra üreni Jesus, “A wor limeföü pilawa me ruoman ik.”
39 Mürin Jesus allük ngeni nöün kewe chon kaiö, “Oupwe üreni ekewe aramas, pwe repwe mottiu lein ekewe fetil lon eu mwich me eu mwich.”
40 Iei mine ekewe aramas ra mottiu lon en me an mwich, ipükü lon ekoch mwich, nge lime pwal lon ekoch mwich.
41 Mürin Jesus a angei ekewe limeföü pilawa me ekewe ruoman ik, a sachetä läng o iotekin kilisou ngeni Kot won. A kinikisiretiu o a ngeni nöün kewe chon kaiö, pwe repwe ineti ngeni ekewe aramas. A pwal ineti ekewe ruoman ik, pwe epwe tori ekewe aramas meinisin.
42 Iwe, ir meinisin ra mongö o ra mötüla.
43 Mürin ekewe chon kaiö ra ionifengeni o amasoua engol me ruu chüük ren lusun ekewe pilawa me ekewe ik.
44 Iwe, iteiten ekewe mwän mi mongö ükükün limungeröü.
Jesus a fetal won matau
6.45-52
(Mat 14.22-33; Joh 6.15-21)
45 Iwe, lon ewe chök otun Jesus a apacheua nöün kewe chon kaiö, pwe repwe tötä won ewe wa o akomwola mwan Petsaita epek ewe noom. Nge i epwe üreni ekewe aramas pwe repwe liwinla ngeni lenier.
46 Mürin an kapong ngeni ekewe aramas, Jesus a feita won eu chuk pwe epwe iotek.
47 Lupwen a pwinila, ewe wa a tori lukalapen ewe noom, nge Jesus a emanüla winifanü.
48 Iwe, a küna pwe nöün kewe chon kaiö ra pekus le fötül, pun ewe asepwäl a enito me mwer. Iwe, wünümweerän ina epwe lefilen kulok ülüngat me kulok wonu, Jesus a feito rer, nge a fetal won matau. Jesus a fetaleto o sänger seniir.
49 Nge lupwen ra küna pwe a fetal won ewe matau, ra ekieki pwe i eman anü. Iei mine ra puchörütä,
50 pun ir meinisin ra küna i o ra fokun rükö ren. Lon ei chök otun Jesus a kapas ngeniir o üreniir, “Oupwe tipepwora! Ngang ei. Ousap niuokus.”
51 Mürin Jesus a tötä won waar we, nge ewe asepwäl a manasösötiu. Iwe, ir meinisin ra fokun weitifengeniir,
52 pun resap mwo weweiti met wewen än Jesus ineti ekewe föün pilawa, resap fokun miritila ren.
Jesus a apöchöküla ekewe mi samau lon Kenesaret
6.53-56
(Mat 14.34-36)
53 Iwe, ra saila pekilan ewe noom o tori ewe fanü lon Kenesaret. Ikenan ra emisini waar we.
54 Nge lupwen ra tiwelong me won ewe wa, ekewe aramas ra müttir silleni Jesus.
55 Iei mine ra säfeil lon unusen ewe fanü o uwato ekewe chon samau mi kon won kier lon ekewe leni ia ra rong pwe Jesus a nom ie.
56 Iwe, ekis meinisin ia Jesus a feila ie lon ekewe sopw, telinimw me leni, ekewe aramas ra uwato ekewe chon samau lon ekewe lenien amömö o ra tüngor ngeni Jesus pwe epwe mwüt ngeni ekewe chon samau repwe atapa lepwülün üfan. Iwe, ir meinisin mi atapa ra pöchökületä seni ar samau.