8
Jesus a amongöni rüanüngeröü aramas
8.1-10
(Mat 15.32-39)
1 Mürin ekoch chök fansoun pwal eu mwichen aramas mi chomong ra chufengen. Lupwen a itela aner mongö, Jesus a körato nöün kewe chon kaiö o üreniir,
2 “Üa fokun tongei ekei aramas, pun ra nom rei lon ükükün ülüngat rän, nge iei a itela aner mongö.
3 Are üpwe tiniirela lon lenier, nge üsap akom amongöniir, repwe mesarochola o turula won al, pun ekoch me leir ra feito seni toau.”
4 Iwe, nöün kewe chon kaiö ra aisini, “Ia me lon ei leni mi pön sipwe tongeni künakün mongö me ie pwe epwe naf ach sipwe amongöni ekei aramas?”
5 Jesus a aisiniir, “Fiteföü pilawa a wor remi?” Ra pölüeni, “Füföü.”
6 Iwe, a allük ngeni ekewe aramas, pwe repwe mottiu le pwül. Mürin a angei ekewe füföü pilawa o iotekin kilisou ngeni Kot won. A kiniretiu o ngeni nöün kewe chon kaiö pwe repwe ineti ngeni ewe mwichen aramas. Iwe, ra föri usun mine Jesus a apasa.
7 Mi pwal wor rer ekoch kükün ik. Jesus a iotekin kilisou wor, iwe, a üreni nöün kewe chon kaiö pwe repwe pwal ineti ngeni ekewe aramas.
8 Iwe, ir meinisin ra mongö o mötüla. Mürin nöün kewe chon kaiö ra amasoua fisu chüük ren lusun ekewe mongö.
9 Iwe, iteiten ekewe aramas mi nom lon ei otun ina epwe ükükün rüanüngeröü. Mürin, Jesus a tiniirela lon lenier.
10 Lon ewe chök otun Jesus me nöün kewe chon kaiö ra tötä won efoch wa o ra sai ngeni ewe fanü Talmanuta.
Ekewe Farisi ra tüngor Jesus pwe epwe föri eu manaman
8.11-13
(Mat 16.1-4)
11 Iwe, ekoch me lein ekewe Farisi ra feito ren Jesus o ra popuetä le anini ngeni. Ra mochen särei Jesus, iei mine ra tüngor ngeni pwe epwe föri eu manaman, pwe epwe pwä are Kot a tipeeu ngeni.
12 Nge Jesus a ngasalap o apasa, “Pwota ei pilon aramasen ikenai ra tüngor eu manaman? Enlet, üpwe ürenikemi pwe esap wor eu manaman epwe pwä ngeni ei pilon aramas.”
13 Iwe, Jesus a likitiirela, a tötä won efoch wa o saila pekilan ewe noom me epek.
Jesus a üreni nöün kewe chon kaiö pwe repwe afäliir ren ekewe Farisi me Herotes
8.14-21
(Mat 16.5-12)
14 Iwe, nöün Jesus kewe chon kaiö ra manlükala ar repwe anafa woser pilawa, pun a chök wor rer eföü pilawa won ewe wa.
15 Iwe, Jesus a üreniir, “Oupwe tümwünüfichi o afälikemi ren ewe iis än ekewe Farisi me Herotes.”
16 Iwe, ekewe chon kaiö ra popuetä kapasfengen lefiler, “A apasa ei ititin fos, pun esap wor rech pilawa.”
17 Nge Jesus a silei mine ra kapasfengen lefiler, iei mine a aisiniir, “Pwota oua kapasfengen usun an esap wor remi pilawa? Ifa usun, ousap mwo silei are weweöch ren? Ifa usun, lelukemi a chüen üleförea?
18 A wor mesemi, pwota ousap küna och? A wor selingemi, pwota ousap rongorong? Ousap chechemeni
19 lupwen üa kinikisietiu ekewe limeföü pilawa fän iten ekewe limungeröü aramas? Fitu chüük oua amasoua ren ekewe lusun mongö?” Iwe, ra pölüeni, “Engol me ruu chüük.”
20 “Nge lupwen üa kinikisietiu ekewe füföü pilawa fän iten ekewe rüanüngeröü aramas, fitu chüük oua amasoua ren ekewe lusun mongö?” Ra pölüeni, “Fisu chüük.”
21 Iwe, Jesus a aisiniir, “Ifa usun, oua chüen wewemang?”
Jesus a aneloi mesen eman mi chun lon Petsaita
8.22-26
22 Iwe, ra tori Petsaita. Ikenan ekoch aramas ra uwato ren Jesus eman mwän mi chun. Iwe, ra tüngormau ngeni pwe epwe atapa.
23 Iwe, Jesus a amwöchü pöün ewe mwän mi chun o emwenala lükün ewe sopw. A atufa mesen ewe mwän o iseis pöün won, mürin Jesus a aisini, “Ifa usun, ka tongeni künok?”
24 Iwe, ewe mwän a nenela o apasa, “Ewer, üa küna aramas, nge ra lapalapeni lapalapen irä mi fetalfeil.”
25 Mürin Jesus a iseissefäl pöün won mesen ewe mwän. Iwe, mesan kana ra newenewenela o öchsefäl, pwe a tongeni künaöchu mettoch meinisin.
26 Mürin Jesus a tinala ewe mwän lon lenian o üreni, “Kosap chüen liwinsefälilong lon ei sopw.”
Petrus a pwärätä usun Jesus
8.27-30
(Mat 16.13-20; Luk 9.18-21)
27 Mürin Jesus me nöün kewe chon kaiö ra feila lon ekewe sopw arap ngeni Seserea Filipi. Iwe, lupwen ar fetal, Jesus a aisiniir, “Met aramas ra apasa usi?”
28 Iwe, ra üreni, “Ekoch aramas ra apasa, pwe en Johannes Soupapatais, ekoch ra apasa, pwe en Elias, nge pwal ekoch ra apasa, pwe en eman ekewe soufos.”
29 Mürin Jesus a aisiniir, “Nge ämi, met oua apasa usi?” Petrus a pölüeni, “En Kraist!”
30 Iwe, Jesus a allük ngeniir, “Ousap fokun üreni eman och usi!”
Jesus a kapas usun an riaföü me mäla
8.31–9.1
(Mat 16.21-28; Luk 9.22-27)
31 Mürin Jesus a afalafala nöün kewe chon kaiö, “Nöün Aramas epwe fokun tolong lon riaföü watte, epwe küna koput me ren ekewe souakom, ren ekewe souasor mi lap me ekewe Sensen Allük. Repwe niela, nge mürin ülüngat rän epwe manausefälitä.”
32 Iwe, Jesus a fokun afata ngeniir usun ei. Iei mine Petrus a emwenala ekis o a popuetä le apwüngü.
33 Nge Jesus a kul ngeni nöün kewe chon kaiö o a apwüngü Petrus me mwer. Iwe, a üreni, “Kopwe sü seniei, Satan! Pun om ekiek esap pop seni Kot, nge a pop seni aramas.”
34 Mürin Jesus a körato ewe mwichen aramas me nöün kewe chon kaiö, iwe, a üreniir, “Are eman a mochen etiei, epwe pölükü manauan, epwe mwärei an iräpenges o tapweto müri.
35 Pun iö a mochen amanaua manauan epwe pöüt seni. Nge iö a pölükü manauan fän itei pwal fän iten ewe Pworausen Manau epwe amanaua manauan.
36 Epwe met lomoten än eman aramas epwe feiöchüni feiöchün unusen fanüfan, nge manauan epwe pöüt seni?
37 Esap wor och eman aramas a tongeni fangala pwe epwe angesefäli manauan.
38 Are eman a säwäsiniei me ai kewe kapas me lein ei täppin aramas mi kirikiringau me tipis ngeni Kot, Nöün Aramas epwe pwal säwäsini lupwen epwe war me ekewe chon läng mi pin lon lingen Saman.”