10
Ekewe engol me ruoman Soukünö
10.1-4
(Mark 3.13-19; Luk 6.12-16)
1 Iwe, Jesus a körifengeni nöün kewe engol me ruoman chon kaiö o ngeniir manaman pwe repwe asüela ekewe ngününgau o apöchöküla aramas mi eäni sokopaten samau me apwangapwang.
2 Ikkei iten ekewe engol me ruoman soukünö: Aemanün Simon, a pwal iteni Petrus me pwiin we Andru, James me pwiin we Johannes, ir nöün Sepeti,
3 Filip, Partolomeus, Tomas me Mateus ewe chon ioni takises, James nöün Alfäus me Tatäus,
4 Simon, i eman Selot me Jutas Iskariot, ätewe mi afangamä Jesus.
Jesus a tinala ekewe engol me ruoman soukünö ngeni ar angang
10.5-15
(Mark 6.7-13; Luk 9.1-6)
5 Iwe, Jesus a tinala ekei engol me ruoman mwän o ngeniir ekei öüröür, “Ousap feila lon fanüen chon lükün Israel ika lon telinimwen ekewe chon Samaria,
6 nge oupwe chök feila ren ekewe aramasen Israel ra usun chök sip mi mwalechela.
7 Oupwe feila o afalafala ei kapas, ‘Ewe Mwün Läng a arapoto.’
8 Oupwe apöchöküla ekewe chon samau, oupwe amanauasefäli ekewe mi mäla, oupwe amoola rupun chokewe mi üriir rupun pwötür o asüela ekewe anün rochopwak. Oua angafatei ewe manaman, oupwe pwal fangafat.
9 Ousap uwou lon ämi pwotou föün moni kolt, silifer ika kapa,
10 ousap pwal uwou pwotou lon ämi sai ika aruachön üfemi söch ika sus ika efoch wok. Pun eman chon angang a aüchea ngeni an epwe angei mine a osupwang ren.
11 Lupwen oupwe tolong lon eu telinimw ika sopw, oupwe pii iön aramas mi pwapwaiti an epwe etiwakemi. Iwe, oupwe nonom lon imwan tori ämi oupwe feil seni ewe leni.
12 Lupwen oupwe tolong lon eu imw, oupwe apasa ei kapong ngeni ekewe aramas, ‘Kinamwe epwe torikemi.’
13 Are aramasen ewe imw ra etiwakemi, ämi kapongen kinamwe epwe nonom rer. Nge are resap etiwakemi, ämi kapongen kinamwe epwe liwinitikemi.
14 Iwe, are chon eu imw ika telinimw resap etiwakemi ika aüselingakemi, mürin oupwe towu seni ewe leni o wichikala pwülün fän pechemi.
15 Enlet üpwe ürenikemi, pwe än Kot apwüngü ekewe aramasen Sotom me Komora lon ewe ränin apwüng epwe kisikis seni an apwüngü aramasen ei telinimw.
Ewe fansoun riaföü epwe wareto
10.16-25
(Mark 13.9-13; Luk 21.12-17)
16 “Nengeni, üpwe tinikemiila usun chök sip lein wolif kana. Iei mine oupwe eäni tipachem usun serepenit o oupwe tipepwetete usun tipepweteten ekewe lisom.
17 Oupwe mamasa, pun epwe wor aramas repwe fötekinikemi o emwenikemi lon kapwüng, repwe pwal wichikemi me lon ar kewe imwen felikis.
18 Repwe emwenikemiila mwen ekewe kepina me king pokiten itei, pwe oupwe apworausa ewe Pworaus Allim ngeniir, pwal ngeni ekewe chon lükün Israel.
19 Iwe, lupwen repwe emwenikemiila ngeni kapwüng, ousap öüreki ämi kapas are mine oupwe apasa, pun ekewe kapas oupwe apasa repwe torikemi lupwen a tori ena otun.
20 Pun sap ämi oupwe kapas, nge ewe Ngünün Sememi epwe ngenikemi mine oupwe apasa.
21 Iwe, pwipwi repwe afangamä pwiir ngeni mäla, eman sam epwe afangamä nöün. Nge ekewe nau repwe ü ngeni semer me iner o aturuur pwe repwe ninnila.
22 Aramas meinisin repwe oputakemi pokitei. Nge iö epwe likitü tori lesopolan epwe küna manau.
23 Iwe, lupwen repwe ariaföüükemi lon eu telinimw, oupwe süla lon pwal eu. Üpwe fokun ürenikemi, pwe ousamwo wes le föri ämi angang lon ekewe telinimwen Israel meinisin mwen ewe Nöün Aramas epwe liwinsefäl.
24 Eman chon sukul esap lap seni nöün sense, nge eman chon angang esap lap seni an masta.
25 Iei mine eman chon kaiö epwe menemenöch an epwe wewe ngeni nöün sense, nge eman chon angang epwe menemenöch an epwe wewe ngeni an masta. Are ra aita ngeni möküren ewe famili Peelsepul, epwe ifan me ngauen ewe it repwe aita ngeni chon an famili meinisin.
Iö sipwe niuokusiti
10.26-31
(Luk 12.2-7)
26 “Iwe, ousap niuokusiti aramas! Pun mettoch meinisin mi pwölüla epwe pwäla, nge mettoch meinisin mi monomonola aramas repwe silei.
27 Met ngang üa ürenikemi lon kiroch, oupwe apasatä lon saram. Nge met üa möngününgünülong lon selingemi oupwe asilefeili me won ungen ekewe imw.
28 Ousap niuokusiti ätekewe mi niela inis, nge resap tongeni niela ngün. Nge oupwe fokun niuokusiti Kot, ewe a tongeni niela inis me ngün lon hell.
29 Ifa usun, aramas resap amömöla ruoman nichok ren eföü chök kapa? Sap mwo nge eman nichok epwe turutiu lepwül lükün tipen Sememi.
30 Nge meten möküremi kewe mwo nge ra lea meinisin.
31 Iei mine ousap niuokus, ämi oua aüchea seni chomong nichok!
Ach pwärätä me ach amamäsini Kraist
10.32-33
(Luk 12.8-9)
32 “Iwe, iö a pwäriei mwen mesen aramas, pwal ngang üpwe pwäri mwen mesen Semei lon läng.
33 Nge iö a amam ngang mwen mesen aramas, pwal ngang üpwe amam i mwen mesen Semei lon läng.
Jesus esap uwato kinamwe pwe tipefesen
10.34-39
(Luk 12.51-53; 14.26-27)
34 “Ousap ekieki pwe üa feito pwe üpwe uwato kinamwe won fanüfan. Apwi, üsap feito pwe üpwe uwato kinamwe, pwe ketilas.
35 Pun ngang üa feito ai üpwe atipefeseni aramas: Ekewe alüal repwe ü ngeni semer kewe, ekewe föpwül repwe ü ngeni iner kewe, pwülüen nöür alüal repwe ü ngeni inen pwülüer kewe,
36 nge ekewe chon oputok repwe seni püsin chon om famili.
37 Iö a tongei saman are inan lap seniei, esap fich ngeni an epwe nei chon kaiö. Nge iö a tongei nöün ät are nengin lap seniei, esap fich ngeni an epwe nei chon kaiö.
38 Iwe, iö esap mwärei an iräpenges o tapweto müri, esap fich ngeni an epwe nei chon kaiö.
39 Iö a ekiekin püsin tümwünü manauan, epwe pöüt seni, nge iö a pölükü manauan fän itei, epwe amanaua manauan.
Ewe Liwin
10.40-42
(Mark 9.41)
40 “Iö a etiwakemi, a etiwaei, nge iö a etiwaei, a etiwa ewe mi tiniei.
41 Iö a etiwa eman nöün Kot chon künö pokiten i nöün Kot chon künö, epwe angei liwinin eman chon künö. Nge iö a etiwa eman chon pwüng pokiten i eman chon pwüng, epwe pwal angei liwinin eman chon pwüng.
42 Are eman a aünü ngeni eman ekei kükün eu mwo chök kapen koluk mi patapat pokiten an tapweto müri, enlet, üpwe ürenikemi, epwe fokun angei liwinin.”