1 Eman fefin mi tipachem a aüetä imwan, nge eman mi tiparoch a püsin ataetiu imwan. 2 Eman mi wenechar a niuokusiti ewe Samol mi Lapalap, nge eman mi rikirik a turunufasei i. 3 Än ekewe chon tiparoch kapas a usun chök efoch wokun wichiwich fän iten püsin ir, nge än ekewe chon tipachem kapas a tümwünüür. 4 Anaie esap wor ätemwänin kow ie mi tuw pwül, esap wor wiich, nge pöchökülen eman ätemwänin kow a aworato chomong föün wiich. 5 Eman chon pwärätä mi allükülük a apasa mine a let, nge eman chon pwärätä mi mwäl a apasawu kapas chofana. 6 Eman chon turunufas a kütta tipachem, nge esap küna. Nge eman aramas mi silelap a mecheres ngeni an epwe weweöch. 7 Kosap chiechi ngeni eman mi tiparoch, pun kosap tongeni kaiö kapasen mirit seni. 8 Eman aramas mi mirit a tipachem, pun a silei mine epwe föri, nge eman mi tiparoch a umwes, pun a püsin atupu i. 9 Ekewe chon tiparoch resap ekieki pwe a ngau ar föri tipis, nge ekewe chon wenechar ra weweöchiti usun ingauen tipis. 10 Eman aramas a püsin silei riaföün lelukan, nge eman chon ekis esap tongeni eti i lon an pwapwa. 11 Imwen ekewe aramasangau repwe tala, nge imwen ekewe chon wenechar repwe chök nonomola. 12 Eman aramas a tongeni ekieki pwe ewe al a fetal won a pwüng, nge lesopolan ewe al a ale ngeni mäla. ✡ 13 Inamwo ika eman a takir, a pwal tongeni wor lolilen lon lelukan, nge mürin än eman pwapwa a tongeni fis letipeta. 14 Eman aramas mi rikirik epwe kini uän an föför, nge eman aramasöch epwe kini uän an angang. 15 Eman mi wewemang a lükü mettoch meinisin, nge eman mi mirit a nenengeni ia epwe feila ie. 16 Eman mwän mi tipachem a föröchü o kul seni mine a ngau, nge eman mi tiparoch a tümwününgau o müttir föri mine a mochen. 17 Eman aramas mi songokai a föri föför mi umwes, nge eman mi mirit a mosonotam. 18 Ekewe chon wewemang repwe angei mine a fich ngeniir lon ar tiparoch, nge ekewe mi mirit repwe angei silelap pwe liwiniir. 19 Ekewe chon föföringau ra wisen rotiu me fän mesen ekewe aramasöch, nge ekewe aramasangau ra wisen rotiu me ünükün asamalapen imwen ekewe chon pwüng. 20 Eman chon wöüngau a koput me ren aramas, pwal mwo nge ren chon arun, nge eman chon wöümong a wor chomong chiechian. 21 Eman mi oput chon arun a tipis, nge eman mi kirikriöch ngeni ekewe chon wöüngau epwe feiöch. 22 Chokewe mi ekiekietä mine a ngau repwe tokola. Nge chokewe mi ekiekietä mine a mürina repwe angei ümöümöch me allükülük. 23 Eman mi weires le angang epwe angei winnan, nge eman mi kapas chök epwe tolong lon osupwang. 24 Än ekewe chon tipachem pisekisek iei ar lingöch, nge än ekewe chon tiparoch wewemang iei ar umwes. 25 Eman chon pwärätä mine a let a amanaua aramas, nge eman mi eäni kapas chofana eman chon afangamä aramas. 26 Än eman aramas meniniti ewe Samol mi Lapalap a atoto an apilükülüköch me nonomöchün me chon an famili. 27 Än eman aramas meniniti ewe Samol mi Lapalap iei eu puächen manau, pwe esap tolong lon ewe feiengauen mäla. 28 Eman king a iteüöch ren chomongun nöün aramas, nge eman samol esap wor nöün aramas esap wor manan. 29 Eman mi mang ngeni song a watte an weweöch, nge eman mi müttir ngeni song a pwärätä watten an tiparoch. 30 Eu letip mi kinamwe a awora pöchökülen inis, nge lolowo a usun chök kanser lon chü. 31 Eman mi ariaföüü ekewe chon wöüngau a esita ewe Chon Föriir, nge ätewe mi kirikiröch ngeni ekewe chon mwelele a asamolu Kot. 32 Ekewe aramasangau ra feiengau ren püsin ar föför mi ngau, nge ekewe chon pwüng a wor ar lenien op lupwen ar mäla. 33 Tipachem a nonom lon letipen ekewe aramas mi wewekai, nge esap tongeni nom lon letipen ekewe chon tiparoch. 34 Pwüng a afefeitäi eu mwü, nge tipis a afefeitiua o aitengaua. 35 Eman king a pwapwa ren eman chon angang mi tipachem, nge a song ngeni eman mi föri föför mi äsäw.