1 Eman aramas a tongeni ekiekietä mettoch lon lelukan, nge mine epwe apasa a feito seni ewe Samol mi Lapalap. 2 Eman aramas a ekieki pwe meinisin mine a föri a pwüng, nge ewe Samol mi Lapalap a apwüngü ekiekin letipan. 3 Kopwe lükü ngeni ewe Samol mi Lapalap om angang, pwe mine ka ekiekietä epwe fisiöch. 4 Mettoch meinisin ewe Samol mi Lapalap a föri a wor sopolan, nge sopolan ekewe aramasangau repwe feiengau. 5 Ewe Samol mi Lapalap a oput chokewe meinisin mi lamalamtekia. A fokun let pwe repwe angei liwinir. 6 Kot epwe amusala tipisin eman aramas mi eäni kirikiröch me allükülük, nge ren än eman niuokusiti ewe Samol mi Lapalap a kul seni mine a ngau. 7 Are än eman aramas föför a apwapwai ewe Samol mi Lapalap, i epwe pwal föri pwe chon oputan repwe kinamwe ngeni. 8 A mürina ach sipwe wöükükün fän pwüng, lap seni watten ach moni tolong fän pwüngingau. 9 Eman aramas a ekiekietä lon letipan mine epwe föri, nge ewe Samol mi Lapalap a emweni lon an föför. 10 Eman king a kapas fän an manaman seni Kot, esap mwäl won mine a apwüngala. 11 Ewe Samol mi Lapalap a mochen pwe aramas repwe nöünöü kilo me aükük mi pwüng me föün kilo mi pwüngüöch. 12 Ekewe king ra oput föför mi ngau, pun mwür a longolong won pwüng. 13 Eman king a fokun pwapwa ren kapas wenechar, a echeni ätewe mi apasa mine a let. 14 Än eman king lingeringer a usun chök eman chon künö mi uwato pworausen mäla, nge eman mi mirit a tongeni amanasösötiu an lingeringer. 15 Wopwapwan won mesen eman king iei asisilan pwe mi wor manau, an ümöümöch a usun chök ekewe kuchu mi apüngätiu ütten mwen leres. 16 Ach sipwe eäni tipachem a mürina seni ach eäni kolt, nge ach eäni silelap a mürina seni ach eäni silifer. 17 Ewe alelap ekewe chon wenechar ra aleni a rik seni föför mi ngau, nge ätewe mi tümwünü alan a tümwünü manauan. 18 Lamalamtekia a akom mwen feiengau, nge tunosikesik a akom mwen än eman tur. 19 A mürina ach sipwe tipetekison o nom lein ekewe chon wöüngau lap seni ach sipwe nom lein chon lamalamtekia o angei liapach seniir. 20 Eman mi aüselinga än Kot kewe kapas epwe fefeitä, nge eman mi anomu an apilükülük won ewe Samol mi Lapalap epwe feiöch. 21 Eman mi tipachem lon letipan a iteni eman mi mirit, nge afalafal mürina a awatteela än eman silelap. 22 Tipachem eu puächen manau ngeni chokewe mi eäni tipachem, nge tiparoch a atoto apwüng ngeni ekewe mi umwes. 23 Ekiekin letipen eman mi tipachem a afisätä an afalafal mirit o awattela an kapasen kait. 24 Kapas pwetete ra usun chök chönün chunen, ra arar ngeni eman aramas o apöchöküla inisin. 25 Eman aramas a ekieki pwe ewe al a fetal won a pwüng, nge lesopolan ewe al a ale ngeni mäla. ✡ 26 Eman chon angang a achocho le angang pokiten an mochen mongö, an echik a pesei ngeni. 27 Eman aramas mi ngau a ekiekietä mine a ngau, an fos a usun chök ekkei mi ngeteri mettoch. 28 Eman aramas rikirik a afisätä fitikoko, nge eman mi uwokükü a aimwüfeseni chokewe mi fokun pwipwifengen. 29 Eman aramas mi mwänewüs a atupu chon arun o emweniir ngeni föför mi ngau. 30 Eman mi ächiki mesan a ekiekietä föför mi atuputup, nge eman mi emeni awan a föri mine a ngau. 31 Meten mökür mi üwan epa mwärämwär mi ling, a fis ngeni eman mi manau fän pwüng. 32 Eman mi mang ngeni song a mürina seni eman mi pöchökül, nge eman mi püsin nemeni letipan a mürina seni eman mi liapeni eu telinimw. 33 Aramas ra asisil won mettoch, nge ewe Samol mi Lapalap a wesewesen filätä pwüngün.