1 Eman mi angei apwüng fän chomong, nge a chök tipeförea, epwe müttir fisikai an feiengau, nge esap chüen chikarsefäl. 2 Lupwen ekewe chon pwüng ra nemenem, ekewe aramas ra mwänek, nge lupwen ekewe aramasangau ra nemenem, ekewe aramas ra ngüngü. 3 Eman mi aücheani tipachem a apwapwai saman, nge eman mi chiechi ngeni fefin mi amömö inisir fän iten lisowu a fangesoroula wöün. 4 Eman king a anüküchara mwün ren an eäni pwüng, nge ätewe mi angei lifangen amichimich epwe ataela. 5 Eman aramas mi eäni kapas amichimich ngeni chon arun a ameresala eu cheew fän iten püsin pechen. 6 Eman aramas mi ngau a fif lon püsin an tipis, nge eman aramas mi pwüng a köl o mwänek. 7 Eman chon pwüng a ekieki met ekewe chon mwelele repwe eäni pwüng ren, nge eman aramasangau esap ekieki usun ei. 8 Chon turunufas ra afitikokoi chon eu telinimw, nge aramas mi tipachem ra akinamwela song. 9 Are eman aramas mi tipachem a anini ngeni eman mi tiparoch, ewe mi tiparoch a chök song ika takir, nge esap wor kinamwe. 10 Aramas mi mochen niela aramas ra oput eman esap wor an tipis o kütta met repwe niela ekewe chon pwüng ren. 11 Eman aramas mi tiparoch a fokun songokai, nge eman aramas mi tipachem a engila fän mosonoson. 12 Are eman sounemenem a aüseling ngeni pworaus mi mwäl, nöün kewe nöüwis meinisin repwe aramasangau. 13 Eman aramas mi wöüngau me eman mi ariaföüü aramas ra wewefengen lon ei lapalap: Ewe Samol mi Lapalap a aneneloi meser me ruoman pwe repwe küna mwer. 14 Are eman king a eäni kapwüng ngeni ekewe chon wöüngau fän wenechar, an nemenem epwe nüküchar fansoun meinisin. 15 Efoch wok me kapasen fön ra atoto tipachem, nge eman semirit, esap wor eman a apwüngü, epwe atoto säw won inan. 16 Lupwen ekewe aramasangau ra nemenem, tipis a lapalapala, nge ekewe chon pwüng repwe nenengeni usun ar turutiu. 17 Kopwe apwüngü noum, pwe i epwe akinamweek, epwe pwal apwapwai lelukom. 18 Anaie esap wor kapasen osuni ie, ekewe aramas ra chök förfetalei mine ra mochen. Nge feiöchün eman aramas mi aleasochisi än Kot kewe allük. 19 Kosap tongeni apwüngü eman chon angang ren kapas chök, pun inamwo ika a weweiti om kapas, nge esap mochen aleasochisi. 20 Ka fen küna eman aramas mi müttir le fos? Ka tongeni apilükülükü eman chon tiparoch lap seni ena sokun aramas. 21 Eman mi nöüwechen ngeni nöün chon angang seni lekükünün, lon eu rän ewe chon angang epwe wöüni wöün. 22 Eman aramas mi nisosong a afisätä fitikoko, nge eman mi songokai a tolong lon chomong tipis. 23 Eman aramas mi lamalamtekia epwe küna tekison, nge eman aramas mi tekison epwe küna iteüöch. 24 Eman aramas mi chonäni eman chon solä a oput püsin manauan. Epwe küna liwiningau, are a pwärätä mine a let lon kapwüng. Nge are esap pwärätä, Kot epwe anümamaua. 25 Om niuokusiti aramas, iei eu sär fän itom, nge are ka apilükülükü ewe Samol mi Lapalap, kosap feiengau. 26 Chomong aramas ra kütta chenir me ren eman sounemenem, nge ewe Samol mi Lapalap echök a eäni pwüng ngeni aramas. 27 Ekewe chon pwüng ra oput ekewe aramasangau, nge ekewe aramasangau ra oput ekewe chon pwüng.