ALIMUEN PUK
107
Kot a angasala chon riaföü
107.1-43
1 Oupwe kilisou ngeni ewe Samol mi Lapalap,
pun i a kirikiröch,
an tong ellet a nonom tori feilfeilachök.
2 Ekewe mi ngasala ren ewe Samol mi Lapalap repwe apasa iei usun,
chokewe i a angaserela seni ekewe chon oputeer
3 o achufengeniir seni ekewe fanü,
seni ötiu me lotou,
seni ör me efeng.
4 Ekoch aramas ra fetalfeil lon fanüapö,
nge resap küna efoch al ngeni eu telinimw pwe repwe imweimw lon.
5 Ra echik me kaka
o apilükingau lon leluker.
6 Mürin, ra siö ngeni ewe Samol mi Lapalap lon ar weires,
nge i a angaseer seni ar riaföü.
7 A emwenirela won efoch al mi wenechar
tori ra tori eu telinimw pwe repwe imweimw lon.
8 Ir repwe kilisou ngeni ewe Samol mi Lapalap pokiten an tong ellet,
pwal pokiten an kewe föför mi amwarar ngeni chon fanüfan.
9 Pun a amötü chokewe mi kaka
o amongöü chokewe mi echik ngeni mongö mi annö.
10 Ekoch aramas ra nom lon rochopwak me nürün mäla,
ra fötek ren selimächä o riaföü,
11 pun ra ü ngeni alon Kot
o oput än Ewe mi Unusen Tekia öüröür.
12 A atolongeer fän angang weires,
ra turula, nge esap wor eman mi alisiir.
13 Mürin ra siö ngeni ewe Samol mi Lapalap lon ar weires,
nge i a angaseer seni ar riaföü.
14 Iwe, a emwenirewu seni lon rochopwak me nürün mäla
o mwütifeseni föföör kewe selimächä.
15 Ir repwe kilisou ngeni ewe Samol mi Lapalap pokiten an tong ellet,
pwal pokiten an kewe föför mi amwarar ngeni chon fanüfan.
16 Pun a atatakisi ekewe asam seni piras
o pöküsopwei ekewe ömwöch seni mächä.
17 Ekoch aramas ra samau ren ar föförün tipis,
ra pwal riaföü pokiten ar föför mi ngau.
18 Ra nou sokopaten mongö meinisin
o kan ngeni mäla.
19 Mürin ra siö ngeni ewe Samol mi Lapalap lon ar weires,
nge i a angaseer seni ar riaföü.
20 A tinala an kapas o apöchöküleer,
a amanaueer seni mäla.
21 Ir repwe kilisou ngeni ewe Samol mi Lapalap pokiten an tong ellet,
pwal pokiten an kewe föför mi amwarar ngeni chon fanüfan.
22 Repwe pwal eäni asoren kilisou ngeni
o apworausa an kewe föför lon kölün pwapwa.
23 Ekoch aramas ra sai lematau won sip
pwe repwe föri ar angangen amömö won ekewe mataulap.
24 Ra küna än ewe Samol mi Lapalap föför,
an angang mi amwarar lon ekewe leni mi alolol.
25 Iwe, Kot a kapas o awarato eu mölümöl
mi apwota noon ewe matau.
26 Ekewe sip ra kekitä fän läng,
ra pwal feitiu tori lealololun matau,
pwe chokewe mi nom won ra apilükingau pokiten ar feiengau.
27 Ra mwaroro o rikirikfetal usun ir mi pulas,
resap chüen silei mine repwe föri.
28 Mürin ra siö ngeni ewe Samol mi Lapalap lon ar weires,
nge i a angaseer seni ar riaföü.
29 A aükätiu ewe mölümöl,
pwe nonon ewe matau a lüala.
30 Mürin ra pwapwa pwe a lüa,
nge i a emweniir ngeni ewe leni ia ra mochen ilelong ie.
31 Iwe, ir repwe kilisou ngeni ewe Samol mi Lapalap pokiten an tong ellet,
pwal pokiten an kewe föför mi amwarar ngeni chon fanüfan.
32 Repwe ingeiti Kot lon ewe mwichen aramas
o mwareiti i lon ewe mwichen souakom.
33 Kot a awili ekewe chanpupu ngeni fanüpwas,
a pwal awili ekewe fanüen puächen koluk ngeni pwül mi pwasapwas.
34 A awili eu fanü mi pwülüöch ngeni eu fanüapö mi uren salt,
pun chon ewe fanü ra föföringau.
35 Kot a pwal awili eu fanüpwas ngeni eu fanüen koluk,
a pwal awili eu fanü mi pwasapwas ngeni eu fanüen puächen koluk.
36 Iwe, a mwüt ngeni ekewe chon echik pwe repwe nonom ikenan,
repwe aüetä eu telinimw pwe repwe nonom lon.
37 Iwe, ra amora pwükil lon ar kewe tanipi,
ra fotuki irän wain o kini eu räs mi watte.
38 Kot a afeiöchü nöün aramas pwe ra chomongola.
Esap pwal mwütätä pwe nöür pwiin kow repwe chokükünüla.
39 Mürin ra chokisikisila, ra küna tekison ren riaföü,
weires me letipeta.
40 Iwe, Kot a anomu itengau won ekewe aramas tekia
o föri pwe ra fetalfeil lon fanüapö, ia esap wor efoch al ie.
41 Nge a angasala ekewe chon osupwang seni ar riaföü
o achomongala ar kewe famili pwe ra usun chomongun pwiin sip.
42 Ekewe chon pwüng ra küna ei o pwapwa,
nge ekewe aramasangau meinisin ra fanafanala.
43 Iön mi tipachem epwe iseis ekei mettoch lon lelukan
o ekieki usun än ewe Samol mi Lapalap tong ellet.