135
Kot a tekia, nge ekewe uluulun anümwäl ra lomotongau
135.1-21
1 Ousipwe mwareiti ewe Samol mi Lapalap.
Oupwe mwareiti iten ewe Samol mi Lapalap, ämi nöün kewe chon angang.
Oupwe mwareiti i,
2 ämi mi angang lon imwen ewe Samol mi Lapalap,
ämi mi nom lon ekewe leni ünükün imwen ach we Kot.
3 Oupwe mwareiti ewe Samol mi Lapalap, pun a kirikiröch.
Oupwe kölün mwareiti itan, pun i a ümöümöch.
4 Ewe Samol mi Lapalap a filätä Jakop fän püsin itan,
a filätä ekewe chon Israel pwe epwe nöüniir.
5 Üa silei pwe ewe Samol mi Lapalap a tekia,
a nom asen ekewe kot meinisin.
6 Ewe Samol mi Lapalap a föri meinisin
mine a efich lon läng pwal won fanüfan,
lon ekewe matau pwal lon ekewe leni mi alolol meinisin.
7 I ewe mi atötäi ekewe kuchu me lesopun fanüfan,
a förätä inefi fiti püngün üt,
a pwal atowu asepwäl seni an lenien iseis.
8 I ewe mi niela ekewe mwänichi lon Isip,
ekewe mwänichien aramas me ekewe mweinöün man,
9 a föri ekewe asisil me manaman lefilen ekewe chon Isip,
pwe epwe apwüngü Farao me nöün kewe nöüwis meinisin.
10 I ewe mi ataela chomong mwü
o niela ekewe king mi pwora.
11 A niela Sihon ewe kingen chon Amor,
pwal Ok ewe kingen Pasan
me ekewe kingen Kanaan meinisin,
12 nge fanüer a ngeni nöün kewe aramasen Israel pwe repwe fanüeni.
13 Ai Samol mi Lapalap, itom a nonom tori feilfeilachök.
Ai Samol mi Lapalap, iteüöchum a nonom fansoun meinisin.
14 Pun ewe Samol mi Lapalap epwe alletätä pwüngün nöün kewe aramas
o eäni tong ngeni nöün kewe chon angang.
15 Än chon ekewe mwü uluulun anümwäl seni silifer me kolt
aramas chök ra föri.
16 A wor awer, nge resap tongeni kapas,
a wor meser, nge resap tongeni küneer.
17 A wor selinger, nge resap tongeni rongorong,
resap pwal tongeni ngasangas.
18 Ewer, chokewe mi föri ekewe uluulun anümwäl o lüküür
repwe pwal wewe ngeni ekewe uluulun anümwäl.
19 Ämi chon Israel, oupwe mwareiti ewe Samol mi Lapalap.
Ämi mwirimwirin Aaron, oupwe mwareiti ewe Samol mi Lapalap.
20 Ämi mwirimwirin Lefi, oupwe mwareiti ewe Samol mi Lapalap.
Ämi meinisin mi niuokusiti ewe Samol mi Lapalap, oupwe mwareiti i.
21 Oupwe mwareiti ewe Samol mi Lapalap seni lon Sion,
i ewe mi imweimw lon Jerusalem.
Ousipwe mwareiti ewe Samol mi Lapalap.