14
Än ekewe aramas umwes me föföringau
14.1-7
(Kölf 53)
Ngeni ewe mi emweni chon köl: Echö än Tafit köl.
1 Ekewe mi umwes ra ekieki lon leluker, “Esap wor Kot.” Ir ra fokun ngau,
ra föri sokun föför mi anioput,
esap wor eman a föri mine a pwüng.
2 Ewe Samol mi Lapalap a nenetiu seni läng won aramas meinisin,
pwe epwe küna ika a wor eman mi mirit,
ika eman mi kütta Kot.
3 Nge ir meinisin ra tokola, ir ra ingaueppök.
Esap wor eman a föri mine a pwüng,
esap fokun wor eman.
4 Ewe Samol mi Lapalap a ais, “Ifa usun, esap wor än ekewe chon föföringau mirit?
Ir chokewe mi manau seni mine ra soläni seni nei aramas,
nge resap iotek ngeniei.”
5 Nge mürin repwe nom lon niuokus watte,
pun Kot a nom ren ekewe aramas mi pwüng.
6 Ekewe chon föföringau ra pinei än ewe chon wöüngau akot,
nge ewe Samol mi Lapalap an lenien op.
7 Amwo eman epwe feito seni Sion o amanaua chon Israel.
Ekewe chon Israel repwe fokun pwapwa,
lupwen ewe Samol mi Lapalap epwe aliwini ngeniir wöür.