80
Eu iotek pwe chon Israel repwe liwinsefäl
80.1-19
Ngeni ewe mi emweni chon köl: Ei köl usun ngingin ewe köl itan ‘Kiop’. Eu än Asaf kapasen pwärätä. Echö köl.
1 Kopwe aüselingakem, en än Israel chon mas,
en mi emweni ekewe mwirimwirin Josef usun eu pwiin sip.
En mi mot won om lenien motun king asen ekewe kerop,
2 Kopwe pwärukela ngeni chon ekewe ainangen Efraim me Peniamin me Manasa.
Kopwe pwäri ngenikem om manaman, kopwe feito o amanauakem.
3 Ai Kot, kopwe aliwinisefälikem,
kopwe netiu wom fän om kirikiröch pwe aipwe küna manau.
4 Ai Samol mi Lapalap, en ewe Kot mi unusen manaman,
ifa ükükün fansoun om kopwe song ren än noum kewe aramas iotek?
5 Ka amongöü ngenikem riaföü pwe enem mongö,
ka pwal aünü ngenikem chönün mesem fän aükük watte.
6 Ka föri pwe chon ekewe mwü mi nom aruum ra aninifengen won fanüem,
nge chon oputakem ra takirin ämängauakem.
7 Ai Kot mi Unusen Manaman, kopwe aliwinisefälikem,
kopwe netiu wom fän om kirikiröch pwe aipwe küna manau.
8 En ka uwato efoch irän wain seni Isip,
ka asüela chon ekewe mwü o fotukätiu ewe irä lon fanüer.
9 Ka limeti eu leni fän iten ewe irä pwe epwe tongeni märitä.
A tötiu waran fän pwül lealolol, a pwal amasoua ewe fanü.
10 Ekewe chuk ra pwölüla ren nürün,
nge palan kewe ra usun chök palen ekewe irä setar mi fokun watte.
11 Palen ewe irän wain ra meresiwu tori ewe matau watte,
nge fasaran kewe ra tori ewe chanpupu Oifrat.
12 Pwota ka ataetiu tittin kewe,
pwe meinisin mi pwerela won ewe al ra kini uan?
13 Pik mi mwacho seni ewe wöllap ra tipwei ewe irä,
nge ekewe manmwacho ra mongö seni.
14 Ai Kot mi Unusen Manaman, kopwe kul ngenikem,
kopwe netiu seni läng o nenengenikem.
Kopwe ekieki ei irän wain.
15 Kopwe tümwünü, pun en ewe ka püsin fotukätiu.
Kopwe tümwünü palan we ka ämärätä o apöchöküla fän itom.
16 Ra pöküetiu om we irän wain o kenala.
Kopwe netiu wor fän om song o aroserela.
17 Nge kopwe fokun tümwünü noum aramas ka filätä,
ewe mwü ka fokun apöchöküla fän itom.
18 Mürin, äm aisap fokun chüen kul senuk.
Kopwe fang ngenikem manau, nge äm aipwe mwareituk.
19 Ai Samol mi Lapalap, en ewe Kot mi Unusen Manaman, kopwe aliwinisefälikem,
kopwe netiu wom fän om kirikiröch pwe aipwe küna manau.