82
Kot a apwüngü ekewe soukapwüng mi pwüngingau
82.1-8
Echö än Asaf köl.
1 Kot ewe meilapen ewe mwichen lon läng,
a eäni kapwüng me lein ekewe kot:
2 “Ifa ükükün fansoun ämi oupwe eäni kapwüng fän pwüngingau
o peni ekewe aramasangau?
3 Oupwe eäni kapwüng fän pwüng ngeni ekewe mi mwelele me ekewe mi mäsen.
Oupwe eäni pwüng ngeni ekewe mi riaföü me wöüngau.
4 Oupwe amanaua ekewe mi mwelele me ekewe mi osupwang o angaserela seni lepöün ekewe aramasangau.”
5 Iwe, esap wor ar sile ika mirit,
ra chök fetal lon rochopwak.
Ra ataela ekewe pwüüng ekewe mwün fanüfan ra longolong won.
6 Üa apasa, “Ämi oua kot,
ämi meinisin nöün Ewe mi Unusen Tekia.
7 Nge ämi oupwe chök mäla usun aramas,
oupwe mäfeiengau usun chök ekewe samol.”
8 Ai Kot, kopwe feito o apwüngü fanüfan,
pun noum chök chon ekewe mwü meinisin.