Än Salomon Köl
Kapas akom
I. Iten ei puk: Än Salomon Köl, pun mine a mak lon, ekewe köl Salomon a föri. Ei puk a pwal iteni “Ewe köl mi öch seni köl meinisin”.
II. Chon makei ei puk: Salomon
III. Itelapemongen ei puk: Tipen Kot pwe eman mwän me eman fefin repwe pwüpwülüfengen o tongfengen.
IV. Kapas aüchean ei puk: Ewe tong lefilen eman mwän me eman fefin a aliosunätä usun ewe tong lefilen Jesus Kristus me nöün kana.
V. Masouen ei puk Än Salomon Köl: Lon ei puk a mak ekoch kölün tong, ra pwärätä usun än eman mwän kölüw eman fefin, pwal usun än eman fefin kölüw eman mwän. Ekei köl chon Israel ra awewe ngeni ewe chiechiöchfengen lefilen Kot me nöün aramas, nge ren souläng ra awewe ngeni ewe chiechiöchfengen lefilen Kristus me mwichefel, pwal lefilen Kristus me eman me eman souläng.
VI. Tettelin masouen ei puk:
Ekewe kapasen tong lefilen ewe fin-apwüpwülü-söfö me ewe mwän-apwüpwülü söfö 1.1–2.7
Ewe fin-apwüpwülü-söfö a fos usun ewe mwän-apwüpwülü-söfö, a tana ewe mwän 2.8–3.5
Telin aramas lon ränin apwüpwülü. Ewe fin-apwüpwülü söfö a tana ewe mwän fän aruuan. A fosfengen me ekewe fin Jerusalem 3.6–6.3
Ewe mwän-apwüpwülü-söfö a mwareiti liöchün pwülüan we. Ewe fin-apwüpwülü-söfö a positi pwülüan we 6.4–8.4
Ekewe kapasen lesopolan usun ar tongfengen 8.5-14
1
Ewe fin apwüpwülü söfö me ekewe fin Jerusalem
1.1-7
1 Iei ewe köl mi öch seni ekewe köl meinisin Salomon a föri.
Fefin
2 Amwo kopwe mitiriei.
Pun om tong a mürina seni wain.
3 Epitom lö a fokun pwokus.
Itom a wewe ngeni lö mi niiniila.
Iei mine ekewe föpwül ra tongeek.
4 Kopwe nukiei pwe sipwe müttir le sä.
Ai king, kopwe emwenieila lon rumwom.
Chienan fefin
Sipwe pwapwaituk o mwäneketuk,
sipwe pwal mwareiti om tong lap seni wain.
A fokun pwüng ach tongeek.
Fefin
5 Ämi föpwülün Jerusalem, üa liechochol, nge üa liöch.
Üa chol usun chök ekewe imw mangaku lon Ketar,
üa pwal öch usun chök ekewe cheech lon imwen Salomon.
6 Ousap nenengeniei, pun ngang üa liechochol
pokiten akkar a acholaei.
Iwe, nöün inei kewe mwän ra song ngeniei.
Ra awisaei pwe üpwe tümwünü ekewe tanipin wain,
nge püsin tanipii üsap tümwünü.
7 Kopwe aiti ngeniei, en ewe üa tongei seni lon letipei,
ia kopwe foleni ie noum kewe sip?
Ia kopwe asösöör ie leoloas?
Pwota üpwe usun chök eman mi mwalechfeil
lein nöün chienom kewe pwiin sip?
Ewe mwän apwüpwülü söfö me ewe fin apwüpwülü söfö
1.8–2.17
Mwän
8 Are kosap silei ewe leni, en mi liöch mwen ekewe fefin,
kopwe tapwala mürin ipwen ekewe pwiin sip.
Kopwe foleni noum nienifön kuuch
ünükün imwen ekewe chon mas imw mangaku.
9 En mi wor tongom me rei,
üa awewe ngonuk eman liefefinin oris mi nuki wän Farao woken.
10 Sapom a ling ren foutan,
nge üom a ling ren mwärämwär seni fau aüchea.
Chienan fefin
11 Sipwe föri fän itom fout
seni kolt me silifer.
Fefin
12 Lupwen ewe king a kon won an peet,
ai lö a fokun pwopwonfeil.
13 Ätewe mi wor tongan me rei a usun chök eu tükütükün säfei mi aüchea itan mör,
a nonom lefilen oupwi.
14 Ätewe mi wor tongan me rei a usun chök epilük pilükün pön irä mi pwokus,
ra mär lon ekewe tanipin wain lon Enketi.
Mwän
15 Nengeni, en ka fokun liöch, en mi wor tongom me rei.
Ka fokun liöch, föün mesom ra wewe ngeni föün mesen lisom.
Fefin
16 Nengeni, en ka fokun äteöch,
en mi wor tongom me rei, ka wesewesen äteöch.
Mwän
Lenien ach kon a anüen fetil,
17 irän imwach ewe irä setar,
nge etippen imwach ewe irä saipires.
Fefin