Chru II KÔRINTÔ 3

Du Mơnih Hơlŭn-Hơlă Pơnuaĭ Pơguăn-Pơđoàn Bơrhơu

1 Hũ iơŭ buơl dơlhă jiơ̆ng tơma đờm mư̆ng rùp-phŭn drơi ơu? Halài yơu du mơnih pơkơ̆n, buơl dơlhă c̆àng păl hũ bơ-àr wă pơyoa đờm pơthơu dơlhơu mư̆ng buơl dơlhă sơ̆ng buơl adơi-ai, halài bơ-àr wă pơyoa mư̆ng buơl adơi-ai đờm pơthơu dơlhơu mư̆ng buơl dơlhă? 2 Bơ-àr wă pơyoa đờm pơthơu dơlhơu mư̆ng buơl dơlhă la rùp-phŭn buơl adơi-ai, hũ wă lăm hơtai-hơtiàn buơl dơlhă, hũ abih tơgrơ̆ mơnih thơu sơ̆ng pơrpoh-c̆ơ. 3 Buơl adơi-ai kŭng hũ ràng-tơbiă lài rùp-phŭn buơl adơi-ai la bơ-àr wă pơyoa mư̆ng Pô Krist, hũ wă kơyoa gơnuăr-bruă buơl dơlhă, 'buh iơŭ wă sơ̆ng ia wă, bloh sơ̆ng Bơngă Sơc̆ih-Sri Yàng Pô Lơngì hơdiŭ mĭt-mĭt; 'buh iơŭ wă tơ ngŏ du blơ pơtơu, bloh tơ ngŏ du blơ sơ̆ng rơlo, nư̆n la hơtai-hơtiàn anà mơnih.

4 Gơnừm tơ Pô Krist bloh buơl dơlhă hũ pơnuaĭ păng-gơnừm pràn-kơjăp yơu nư̆n sơ̆ng Yàng Pô Lơngì. 5 'Buh iơŭ buơl dơlhă hũ pơnuaĭ khờh-rơgơi tô sơnư̆ng lài drơi hũ rơgơi ngă jiơ̆ng bruă hơgĕ, bloh pơnuaĭ khờh-rơgơi buơl dơlhă hũ la truh mư̆ng Yàng Pô Lơngì. 6 Rùp-phŭn Pô hũ brơi tơ buơl dơlhă pơnuaĭ khờh-rơgơi tô duh bruă pơnuaĭ Pơguăn-Pơđoàn Bơrhơu, 'buh iơŭ pơnuaĭ pơguăn-pơđoàn sơ̆ng akhăr wă, bloh la pơnuaĭ pơguăn-pơđoàn lăm Bơngă Sơc̆ih-Sri. Kơyoa akhăr wă ba truh pơnuaĭ mơtai, bloh Bơngă Sơc̆ih-Sri brơi pơnuaĭ hơdiŭ.

7 Kơyoa, yah gơnuăr-bruă ba truh pơnuaĭ mơtai, hũ klơh-wă sơ̆ng akhăr tơ ngŏ du blơ pơtơu, bloh dò hũ pơnuaĭ màng-kơc̆rà kàr nư̆n, tơ̆l truh buơl làng Israel 'buh rơgơi c̆ơ tơ 'bò mơta Môise jiơ̆ng, kơyoa 'bò mơta ñu kơc̆rà-sơrdah pơnuaĭ màng-kơc̆rà, yah mĭn la pơnuaĭ màng-kơc̆rà sơmăr lơhiă thĭt, 8 nư̆n gơnuăr-bruă Bơngă Sơc̆ih-Sri lài 'buh truh lăm pơnuaĭ màng-kơc̆rà lô amăng rơlau ơu? 9 Yơu nư̆n, yah gơnuăr-bruă ba truh pơnuaĭ ngă nìn-glài bloh dò hũ pơnuaĭ màng-kơc̆rà, nư̆n gơnuăr-bruă mư̆ng pơnuaĭ rĭng-tơpă 'brŏ hũ màng-kơc̆rà rơlau la thơu hơdùm! 10 Biă yơu nư̆n, mư̆ng bruă ni, nư̆n tơgrơ̆ pơnuaĭ hũ màng-kơc̆rà bơjơ rơŭ 'buh dò màng-kơc̆rà tra tơ anaŭ pơnuaĭ màng-kơc̆rà prŏng biă hơdơi ni. 11 Kơyoa yah pơnuaĭ sơdăng sơmăr lơhiă, bloh dò hũ pơnuaĭ màng-kơc̆rà yơu nư̆n, tơ-ài lài pơnuaĭ dò kơjăp mĭt-mĭt rơŭ hũ màng-kơc̆rà lô rơlau la thơu hơdùm!

12 Kơyoa hũ pơnuaĭ gơnừm-c̆àng yơu nư̆n bloh buơl dơlhă hĭl-kơjăp hơtai-hơtiàn biă. 13 Buơl gudrơi 'buh mơhiơ̆ yơu Môise, mă bơ-yài ac̆ĭng 'bò mơta drơi wơ̆, tô buơl làng Israel 'buh c̆ơ 'buh luĭ-dŭt pơnuaĭ sơrdah-kơc̆rà sơmăr lơhiă. 14 Bloh hơtai-hơtiàn buơl guñu sơđaŭ kră-khăng, kơyoa tơ̆l truh tơ hơrơi ni, tŭ buơl guñu pơrpoh-c̆ơ 'Bồn Bơ-àr Pơnuaĭ Pơguăn-Pơđoàn Yau, bơ-yài ac̆ĭng nư̆n sơđaŭ ka suă klàh mư̆ng buơl guñu. Kơyoa mĭn lăm Pô Krist, nư̆n ka bơ-yài ac̆ĭng nư̆n hũ suă prah. 15 Biă yơu nư̆n, tơ̆l truh tơ hơrơi ni, yàu tŭ mơhư̆ pơrpoh-c̆ơ 'bồn bơ-àr Môise, bơ-yài nư̆n sơđaŭ dò ac̆ĭng-tơrđơŭ hơtai-hơtiàn buơl guñu. 16 Bloh mĭn tŭ lơi buơl guñu gài mơrai wơ̆ sơ̆ng Yàng, nư̆n ka bơ-yài ac̆ĭng nư̆n hũ suă thĭt. 17 Yàng la Bơngă Sơc̆ih-Sri, sơ̆ng anih lơi hũ Bơngă Sơc̆ih-Sri Yàng, anih nư̆n hũ akŏ-lơhuai tơkai-lơnàng. 18 Abih buơl gudrơi, luơi 'bò mơta soh 'buh ac̆ĭng bơ-yài bloh c̆ơ sơ'buai pơnuaĭ màng-kơc̆rà Yàng yơu lăm sa boh krơh, sơ̆ng hũ pơsơlih tô tơbiă jiơ̆ng mơhiơ̆ yơu rùp-rơ̆p Pô, mư̆ng pơnuaĭ màng-kơc̆rà truh pơnuaĭ màng-kơc̆rà, kơyoa pơnuaĭ ni truh mư̆ng Yàng la Bơngă Sơc̆ih-Sri.