Chru II KÔRINTÔ 7

1 Ơ buơl adơi-ai uơ̆n-rơnăm, kơyoa buơl gudrơi hũ du pơnuaĭ đờm pơguăn ni, buơl gudrơi ngă pơsơc̆ih-goh bĕ rùp-phŭn drơi klàh mư̆ng tơgrơ̆ nàl sơŭ-sơnoh gah rùp-phàp drah-rơlo sơ̆ng gah hơtai-bơngă, ngă bĕ tơ pơnuaĭ pơsơc̆ih-sri hũ wĭl-tơ̆l lăm pơnuaĭ duh-huơĭ Yàng Pô Lơngì.

Pôl Hũ Pơluơ-Pơrơngài Kơyoa Mơnih Kôrintô

2 Yòng pioh bĕ tơ buơl dơlhă sa anih lăm hơtai-hơtiàn buơl adơi-ai. Buơl dơlhă 'buh ngă pơnuaĭ hơgĕ sŭng sơ̆ng aràng sơi, 'buh ngă jơhà tơ aràng sơi. Buơl dơlhă 'buh 'bơ̆ng soh phơ̆n aràng sơi. 3 Dơlhă 'buh đờm pơnuaĭ ni tô ngă nìn-glài buơl adơi-ai ơu, kơyoa yơu dơlhă hũ đờm mư̆ng dơlhơu lài buơl adơi-ai mĭt-mĭt dò lăm hơtai-hơtiàn dơlhă, yah hơdiŭ halài mơtai kŭng yơu nư̆n rơi. 4 Dơlhă păng-gơnừm buơl adơi-ai biă, sơ̆ng prŏng 'bò biă mư̆ng buơl adơi-ai. Dơlhă hũ baŭ-bèng pơnuaĭ pơluơ-pơrơngài, sơ̆ng dơlhă hũ baŭ-bèng pơnuaĭ sờh-sài tơkrah tơgrơ̆ pơnuaĭ pơđì-pơđoa gleh-glăr. 5 Kơyoa tŭ truh tơ Maseđoan, rùp-phàp drah-rơlo buơl dơlhă 'buh hũ dò pơgleh sa-sĭt lơi, pơnuaĭ siơŭ-kơđòng gơrwàng tòmdăr buơl dơlhă. Gah agàh nư̆n tămmơsau tămsuh, gah dơrlăm nư̆n huơĭ kơ-ù. 6 Bloh Yàng Pô Lơngì, la Pô pơluơ-pơrơngài du mơnih pơblơ̆ hơtai-hơtiàn, Pô hũ pơluơ-pơrơngài buơl dơlhă tŭ pơđăr Tĭt truh. 7 Buơl dơlhă 'buh iơŭ mĭn hũ pơluơ-pơrơngài kơyoa bruă Tĭt truh soh, bloh dò kơyoa pơnuaĭ pơluơ-pơrơngài bloh ñu hũ đồ-mă mư̆ng anih buơl adơi-ai rơi. Sơ-ai nư̆n hũ đờm tơ buơl dơlhă thơu mư̆ng pơnuaĭ buơl adơi-ai kraŭ-c̆àng, pơnuaĭ buơl adơi-ai hia-c̆ŏ dơnuh-dơnà, sơ̆ng pơnuaĭ buơl adơi-ai abih hơtai-hơtiàn sơnư̆ng kơ-ù tơ dơlhă, pơnuaĭ nư̆n ngă tơ dơlhă 'brŏ sờh-sài rơlau wơ̆.

Pơnuaĭ Dơnuh-Dơnà Tui Hơtai-Khiăng Yàng Pô Lơngì

8 Yah lăm bơ-àr wă pơyoa dơlhơu dơlhă hũ ngă tơ buơl adơi-ai dơnuh-dơnà, nư̆n dơlhă kŭng 'buh dơmàn-pơlai. Bloh yah dơlhơu nư̆n dơlhă hũ dơmàn-pơlai, — kơyoa dơlhă 'buh bơ-àr wă pơyoa nư̆n lô-tơkì kŭng hũ ngă tơ buơl adơi-ai păl dơnuh-dơnà, yah mĭn lăm sa-sĭt tŭ — 9 nư̆n tŭ ni dơlhă sờh-sài. 'Buh iơŭ dơlhă sờh-sài kơyoa hũ ngă tơ buơl adơi-ai dơnuh-dơnà, bloh sờh-sài kơyoa pơnuaĭ dơnuh-dơnà nư̆n ba truh pơnuaĭ mơbai prah-luơi glài-sơnoh. Biă, buơl adơi-ai hũ dơnuh-dơnà tui hơtai-khiăng Yàng Pô Lơngì, kơyoa nư̆n, buơl dơlhă 'buh ngă jơhà hơgĕ tơ buơl adơi-ai ơu. 10 Kơyoa pơnuaĭ dơnuh-dơnà tui hơtai-khiăng Yàng Pô Lơngì ba truh pơnuaĭ mơbai prah-luơi glài-sơnoh tô hũ dŏng-pơklàh, pơnuaĭ ni 'buh hũ hơgĕ păl dơmàn-pơlai. Bloh pơnuaĭ dơnuh-dơnà tui dun-ya, nư̆n ba truh pơnuaĭ mơtai. 11 Yơu nư̆n, buơl adơi-ai c̆ơ bĕ, pơnuaĭ dơnuh-dơnà tui hơtai-khiăng Yàng Pô Lơngì hũ ba truh tơ buơl adơi-ai pơnuaĭ abih hơtai-hơtiàn hơyơu lơi! Sơ̆ng rơlau tơ nư̆n wơ̆, ñu ngă tơ buơl adơi-ai khiăng ràng-tơbiă lài drơi 'buh ngă pơnuaĭ sŭng. Ñu ngă tơ buơl adơi-ai găm anok găm huơĭ. Ñu ngă tơ buơl adơi-ai khiăng tòm dơlhă. Ñu ngă tơ buơl adơi-ai huơĭ kơ-ù. Ñu ngă tơ buơl adơi-ai khiăng ngă pơnuaĭ iơŭ. Buơl adơi-ai hũ ràng-tơbiă tơ abih tơgrơ̆ mơnih thơu lài buơl adơi-ai goh-sơc̆ih lăm bruă nư̆n.

12 Yơu nư̆n, yah dơlhă hũ wă bơ-àr pơyoa tơ buơl adơi-ai, nư̆n 'buh iơŭ kơyoa mơnih hũ ngă pơnuaĭ sŭng asŭ, halài kơyoa mơnih hũ kŏng pơnuaĭ ngă jơhà nư̆n, bloh tô pơnuaĭ buơl adơi-ai abih hơtai-hơtiàn sơ̆ng buơl dơlhă hũ ràng-tơbiă tơkrah buơl adơi-ai, tơ anaŭ Yàng Pô Lơngì. 13 Nư̆n la pơnuaĭ pơluơ-pơrơngài buơl dơlhă.

Rơlau pơnuaĭ pơluơ-pơrơngài nư̆n, buơl dơlhă dò hũ pơnuaĭ sờh-sài rơlau wơ̆, kơyoa 'buh Tĭt sờh-sài biă; kơyoa abih buơl adơi-ai hũ ngă tơ hơtai-bơngă sơ-ai nư̆n hũ kơđơ̆ng-lơngai. 14 Yah dơlhă hũ yeh-drơi sa-sĭt sơ̆ng Tĭt mư̆ng buơl adơi-ai lăm bruă hơgĕ, nư̆n dơlhă kŭng 'buh mơlơu alah. Kơyoa yơu tơgrơ̆ pơnuaĭ hơgĕ buơl dơlhă hũ đờm sơ̆ng buơl adơi-ai la tơpă biă, nư̆n pơnuaĭ buơl dơlhă đờm yeh-drơi mư̆ng buơl adơi-ai tơ anaŭ Tĭt kŭng hũ ràng-tơbiă la iơŭ tơpă yơu nư̆n rơi. 15 Sơ̆ng hơtai-hơtiàn sơ-ai nư̆n uơ̆n-rơnăm buơl adơi-ai 'brŏ lô amăng rơlau wơ̆, tŭ sơ-ai nư̆n sơdơ̆r truh bruă buơl adơi-ai hũ păng-bơbah hơyơu lơi, găm sơ̆ng pơnuaĭ huơĭ-kơđa, kơtơ̆ drơi, tŭ wă-rò sơ-ai nư̆n. 16 Dơlhă sờh-sài biă, kơyoa lăm abih tơgrơ̆ bruă, dơlhă hũ rơgơi păng-gơnừm buơl adơi-ai wĭl-tơ̆l.