Chru JĂNG 13

DU PƠNUAĬ PƠTO-PƠSÀI LUĬ-DŬT YÀNG JÊSU ĐỜM SƠ̆NG DU MƠNIH TUI MƠGRU

(Mư̆ng tăl 13:1 truh tăl 17:26)

Yàng Jêsu Rào Tơkai Tơ Du Mơnih Tui Mơgru

1 Dơlhơu pơnuaĭ pơjŭm 'bơ̆ng Nau-Găn, Yàng Jêsu thơu tŭ jơ Pô păl luơi dun-ya ni tô gài wơ̆ sơ̆ng Pô Yàng Ama hũ truh. Pô hũ rơnăm du mơnih găm sơ̆ng Pô lăm dun-ya, nư̆n Pô kừ rơnăm buơl guñu tơ̆l truh luĭ-dŭt.

2 Lăm tŭ 'bơ̆ng diơŭ, kơmlài-jĭnràk hũ daŭ pơnuaĭ pơblơ̆-dră Pô lăm hơtai-hơtiàn Juđa Iskariôt, anà Simôn. 3 Yàng Jêsu thơu lài Ama hũ jào abih tơgrơ̆ mơta lăm tơngàn Pô, sơ̆ng Pô mư̆ng Yàng Pô Lơngì truh, kŭng rơŭ mơrai wơ̆ sơ̆ng Yàng Pô Lơngì, 4 nư̆n Pô tơgồ dơ̆ng mư̆ng anih c̆ơnừng 'bơ̆ng, wà ào agàh, mă c̆ơnră wăr găn kơ-iăng drơi, 5 bloh nư̆n Pô tuh ia lăm thồng 'bàt, sơ̆ng rào tơkai tơ du mơnih tui-mơgru. Pô kŭng mă c̆ơnră hũ wăr tơ kơ-iăng drơi bloh uă tơkai tơ buơl guñu. 6 Tŭ Pô truh sơ̆ng Simôn Pier, nư̆n Pier đờm: “Ơ Yàng, rùp-phŭn Yàng bloh rào tơkai tơ dơlhă?” 7 Yàng Jêsu đờm: “Tŭ ni, hã ka wờng bruă Kơu ngă, bloh hơdơi ni hã rơŭ wờng.” 8 Pier đờm: “Dơlhă rơŭ 'buh tŭ lơi luơi Yàng rào tơkai dơlhă ơu.” Yàng Jêsu đờm: “Yah Kơu 'buh rào tơ hã, nư̆n hã 'buh hũ pơ-ơnah hơgĕ sơ̆ng Kơu tra.” 9 Simôn Pier đờm: “Ơ Yàng, yah yơu nư̆n 'buh iơŭ mĭn rào tơkai soh, bloh yòng rào abih găm tơngàn sơ̆ng akŏ dơlhă rơi.” 10 Yàng Jêsu đờm: “Aràng sơi hũ mơnưi bơjơ, mĭn păl rào tơkai soh, nư̆n hũ goh abih. Buơl guhã hũ goh-sơc̆ih bơjơ, bloh 'buh iơŭ la abih tơgrơ̆ aràng buơl guhã hũ goh-sơc̆ih ơu.” 11 Kơyoa Pô thơu aràng sơi rơŭ pơblơ̆-dră Pô, nư̆n jiơ̆ng Pô đờm: “'Buh iơŭ la abih tơgrơ̆ aràng buơl guhã hũ goh-sơc̆ih ơu.”

12 Hơdơi tŭ rào tơkai tơ du mơnih tui-mơgru, Pô c̆ù ào wơ̆, bloh nư̆n dò guh tơ anih c̆ơnừng 'bơ̆ng sơ̆ng đờm: “Buơl guhã hũ wờng bruă Kơu pơrpa ngă tơ buơl guhã ơu? 13 Buơl guhã iơu Kơu la Pô-Pơto, la Yàng. Buơl guhã đờm iơŭ, kơyoa Kơu biă yơu nư̆n. 14 Bloh yah Kơu la Pô-Pơto, la Yàng, bloh dò rào tơkai tơ buơl guhã, nư̆n buơl guhã kŭng păl rào tơkai tơ gơŭ yơu nư̆n rơi. 15 Kơyoa Kơu hũ ngă krơh tơ buơl guhã, tô buơl guhã kŭng ngă yơu Kơu hũ ngă tơ buơl guhã. 16 Iơŭ biă, Kơu đờm sơ̆ng buơl guhã: Hơlŭn-hơlă 'buh prŏng rơlau mơnih pô, mơnih kŏng pơđăr 'buh prŏng rơlau mơnih pơđăr drơi. 17 Yah buơl guhã thơu du pơnuaĭ ni sơ̆ng ngă tui, nư̆n buơl guhã hũ lơngai-pơtuah. 18 Kơu 'buh đờm mư̆ng abih tơgrơ̆ aràng buơl guhã ơu. Kơu thơu du mơnih Kơu hũ rơwah. Bloh pơnuaĭ ni lăm 'Bồn Bơ-àr Sơc̆ih-Sri păl hũ iơŭ tơpă: ‘Mơnih 'bơ̆ng pah Kơu, gài kơđuơ̆l tơkai tămdră wơ̆ sơ̆ng Kơu.’ * 19 Tŭ ni, Kơu đờm pơnuaĭ ni sơ̆ng buơl guhã dơlhơu tŭ bruă tơbiă truh, tô tŭ bruă tơbiă truh, buơl guhã rơŭ păng-tui Kơu la Pô nư̆n. 20 Iơŭ biă, Kơu đờm sơ̆ng buơl guhã, aràng sơi wă-rò mơnih Kơu pơđăr truh, nư̆n la wă-rò Kơu, sơ̆ng aràng sơi wă-rò Kơu, nư̆n la wă-rò Pô hũ pơđăr Kơu.”

Yàng Jêsu Đờm Dơlhơu Mư̆ng Bruă Juđa Pơblơ̆-dră Pô

21 Hơdơi tŭ đờm du pơnuaĭ nư̆n bơjơ, lăm hơtai-bơngă Pô 'buh suk dò. Yàng Jêsu đờm loh-làng: “Iơŭ biă, Kơu đờm sơ̆ng buơl guhã, sa aràng lăm buơl guhã rơŭ pơblơ̆-dră Kơu.” 22 Du mơnih tui-mơgru c̆ơ mơta gơŭ, 'buh thơu Pô đờm mư̆ng aràng sơi. 23 Sa aràng lăm du mơnih tui-mơgru, la mơnih hũ Yàng Jêsu rơnăm, mơnih nư̆n dò guh jĕ Pô. 24 Simôn Pier ngă nàl tơ mơnih nư̆n, pơđăr tơnia Pô c̆ơ: aràng sơi la mơnih bloh Pô đờm nư̆n. 25 Mơnih tui mơgru ni pơkiăng rùp drơi jĕ tơ hărda Yàng Jêsu, sơ̆ng tơnia: “Ơ Yàng, mơnih nư̆n la aràng sơi?” 26 Yàng Jêsu đờm: “Nư̆n la mơnih bloh Kơu rơŭ brơi pĕt pah Kơu kơjĕ ơñrŭ ni.” Bloh nư̆n Pô ơñrŭ sa pĕt pah sơ̆ng brơi tơ Juđa Iskariôt, anà Simôn. 27 Hơdơi tŭ Juđa đồ-mă pĕt pah, nư̆n Satăn tơma lăm hơtai-hơtiàn ñu. Yàng Jêsu đờm sơ̆ng Juđa: “Bruă hã ngă, nư̆n ngă sơmăr bĕ.” 28 Bloh 'buh sa aràng mơnih lơi dò guh lăm anih c̆ơnừng 'bơ̆ng thơu kơđa hơgĕ Pô đờm sơ̆ng ñu yơu nư̆n. 29 Hũ du mơnih sơnư̆ng lài, kơyoa Juđa la mơnih pioh kơdŭng priă, nư̆n Yàng Jêsu pơđăr ñu nau blơi du phơ̆n păl hũ tô angui lăm pơnuaĭ pơjŭm 'bơ̆ng, halài nau dŏng-kờl mơnih rơ'bah. 30 Hơdơi tŭ đồ-mă pĕt pah bơjơ, Juđa tơbiă nau mư. Tŭ nư̆n, lơngì kơnăm bơjơ.

Adăt-Pơđăr Bơrhơu

31 Tŭ Juđa tơbiă nau bơjơ, Yàng Jêsu đờm: “Tŭ ni Anà Mơnih hũ màng-kơc̆rà, sơ̆ng Yàng Pô Lơngì hũ màng-kơc̆rà anih Anà Mơnih. 32 Yah Yàng Pô Lơngì hũ màng-kơc̆rà anih Anà Mơnih, nư̆n Yàng Pô Lơngì kŭng rơŭ ngă màng-kơc̆rà Anà Mơnih lăm rùp-phŭn Pô, sơ̆ng Pô rơŭ ngă màng-kơc̆rà mư. 33 Ơ du anà tìt Kơu, Kơu mĭn dò sơ̆ng buơl guhã sa-sĭt suơi tra soh. Buơl guhã rơŭ duah Kơu, sơ̆ng yơu Kơu hũ đờm sơ̆ng mơnih Juđa lài: ‘Anih Kơu nau buơl guhã 'buh rơgơi truh jiơ̆ng,’ nư̆n tŭ ni Kơu kŭng đờm sơ̆ng buơl guhã yơu nư̆n rơi. 34 Kơu brơi tơ buơl guhã sa pơnuaĭ adăt-pơđăr bơrhơu, nư̆n la buơl guhã păl rơnăm gơŭ. Yơu Kơu hũ rơnăm buơl guhã hơyơu hơi, nư̆n buơl guhã kŭng păl rơnăm gơŭ bĕ yơu nư̆n rơi. 35 Yah buơl guhã rơnăm gơŭ, nư̆n kơyoa pơnuaĭ nư̆n, tơgrơ̆ mơnih rơŭ kràn-thơu buơl guhã la mơnih tui-mơgru Kơu.”

36 Simôn Pier đờm sơ̆ng Yàng Jêsu: “Ơ Yàng, Yàng nau anih lơi?” Yàng Jêsu đờm: “Anih Kơu nau, tŭ ni hã 'buh rơgơi tui jiơ̆ng, bloh hơdơi ni hã rơŭ tui.” 37 Pier tơnia Pô: “Khoai Yàng, kơđa hơgĕ tŭ ni dơlhă 'buh rơgơi tui Yàng jiơ̆ng? Dơlhă rơŭ prah-luơi pơnuaĭ hơdiŭ dơlhă kơyoa Yàng!” 38 Yàng Jêsu đờm: “Hã rơŭ prah-luơi pơnuaĭ hơdiŭ hã kơyoa Kơu? Iơŭ biă, Kơu đờm sơ̆ng hã: Dơlhơu tŭ mơnŭ kơ-iòk, hã rơŭ klơu amăng kơmlah la hã 'buh thơu Kơu.”