Chru JĂNG 15

Yàng Jêsu La Phŭn Ño Biă

1 “Kơu la phŭn ño biă, Ama Kơu la mơnih pla ño. 2 Yah thàn lơi lăm Kơu bloh 'buh tơbiă boh, nư̆n Pô koh prah. Dò du thàn lơi tơbiă boh, nư̆n Pô treh-kơtrĕ siàm, tô hũ lô boh rơlau. 3 Buơl guhã hũ goh-sơc̆ih, gơnừm tơ pơnuaĭ Kơu hũ đờm pơto buơl guhã. 4 Dò bĕ mĭt lăm Kơu, nư̆n Kơu rơŭ dò lăm buơl guhã. Mơhiơ̆ yơu thàn ño, yah 'buh klĕm lăm phŭn ño, nư̆n 'buh mư̆ng rùp-phŭn drơi tơbiă boh jiơ̆ng. Buơl guhã kŭng yơu nư̆n rơi, yah buơl guhã 'buh dò mĭt lăm Kơu, nư̆n kŭng 'buh mư̆ng rùp-phŭn drơi tơbiă boh jiơ̆ng. 5 Kơu la phŭn ño, buơl guhã la thàn. Aràng sơi dò mĭt lăm Kơu, sơ̆ng Kơu dò mĭt lăm buơl guñu, nư̆n rơŭ tơbiă lô boh, kơyoa 'buh hũ Kơu, buơl guhã 'buh ngă hơgĕ jiơ̆ng. 6 Yah aràng sơi 'buh dò mĭt lăm Kơu, nư̆n păl prah tơ agàh, kŭng mơhiơ̆ yơu thàn ño, thàn thu, aràng duơ̆n wơ̆, prah lăm apui, nư̆n ñu 'bơ̆ng gùh. 7 Yah buơl guhã dò mĭt lăm Kơu, sơ̆ng du pơnuaĭ Kơu dò mĭt lăm buơl guhã, yòng-lơkơu bĕ tơgrơ̆ pơnuaĭ hơgĕ drơi khiăng, nư̆n buơl guhã rơŭ đồ-mă hũ pơnuaĭ nư̆n. 8 Pơnuaĭ rơŭ ngă tơ Ama Kơu hũ mơyòm-pơglòng nư̆n la: Buơl guhã hũ tơbiă lô boh sơ̆ng tơbiă jiơ̆ng mơnih tui-mơgru Kơu. 9 Yơu Ama hũ uơ̆n-rơnăm Kơu hơyơu lơi, Kơu kŭng uơ̆n-rơnăm buơl guhã yơu nư̆n rơi. Dò bĕ mĭt lăm pơnuaĭ uơ̆n-rơnăm Kơu. 10 Yah buơl guhã păng-rơmiă du pơnuaĭ adăt-pơđăr Kơu, nư̆n rơŭ dò lăm pơnuaĭ uơ̆n-rơnăm Kơu, kŭng yơu Kơu hũ păng-rơmiă du pơnuaĭ adăt-pơđăr Ama Kơu, sơ̆ng dò mĭt lăm pơnuaĭ uơ̆n-rơnăm Pô. 11 Kơu đờm sơ̆ng buơl guhã du pơnuaĭ ni, tô pơnuaĭ sờh-sài Kơu dò lăm buơl guhã, sơ̆ng pơnuaĭ sờh-sài buơl guhã hũ wĭl-tơ̆l.

12 Ni la pơnuaĭ adăt-pơđăr Kơu: Buơl guhã păl rơnăm gơŭ bĕ, kŭng yơu Kơu hũ rơnăm buơl guhã. 13 'Buh hũ pơnuaĭ uơ̆n-rơnăm lơi prŏng rơlau pơnuaĭ uơ̆n-rơnăm la kơyoa mư̆ng mơnih adơi-ai gơŭ bloh prah-luơi pơnuaĭ hơdiŭ drơi. 14 Yah buơl guhã ngă tui du pơnuaĭ Kơu pơto pơđăr, nư̆n buơl guhã la adơi-ai gơŭ Kơu. 15 Kơu 'buh iơu buơl guhã la hơlŭn-hơlă tra, kơyoa hơlŭn-hơlă 'buh thơu du bruă mơnih pô drơi ngă. Bloh Kơu iơu buơl guhã la adơi-ai gơŭ, kơyoa Kơu hũ ràng-tơbiă tơ buơl guhã thơu abih tơgrơ̆ pơnuaĭ Kơu hũ mơhư̆ anih Ama Kơu. 16 'Buh iơŭ buơl guhã hũ rơwah Kơu, bloh Kơu hũ rơwah sơ̆ng pồ-pơđăr buơl guhã, tô buơl guhã nau sơ̆ng hũ tơbiă bơnga boh, sơ̆ng boh buơl guhã kừ dò mĭt; tô abih tơgrơ̆ pơnuaĭ hơgĕ buơl guhã mă angăn Kơu bloh lơkơu-yòng sơ̆ng Ama, nư̆n Pô brơi tơ buơl guhã. 17 Kơu pơto pơđăr pơnuaĭ ni tơ buơl guhã, tô buơl guhã uơ̆n-rơnăm duă gơŭ.”

Dun-ya Mơbai Mơnih Tui-Mơgru Yàng

18 “Yah dun-ya mơbai buơl guhã, nư̆n thơu bĕ lài buơl guñu hũ mơbai tơ Kơu dơlhơu tơ buơl guhã. 19 Yah buơl guhã găm sơ̆ng dun-ya, nư̆n dun-ya rơŭ uơ̆n-rơnăm du mơnih găm sơ̆ng ñu. Bloh kơyoa buơl guhã 'buh găm sơ̆ng dun-ya, sơ̆ng Kơu hũ pơlih-rơwah buơl guhã tơbiă klàh mư̆ng dun-ya, nư̆n dun-ya mơbai buơl guhã. 20 Sơdơ̆r bĕ pơnuaĭ Kơu hũ đờm sơ̆ng buơl guhã: ‘Hơlŭn-hơlă 'buh prŏng rơlau pô drơi.’ Yah buơl guñu hũ mă-pơkơŭ Kơu, nư̆n kŭng rơŭ mă-pơkơŭ buơl guhã. Yah buơl guñu păng-rơmiă pơnuaĭ Kơu, nư̆n kŭng rơŭ păng-rơmiă pơnuaĭ buơl guhã. 21 Bloh kơyoa angăn Kơu, buơl guñu rơŭ ngă tơgrơ̆ pơnuaĭ nư̆n tơ buơl guhã, kơyoa buơl guñu 'buh thơu Pô hũ pơđăr Kơu truh. 22 Yah Kơu 'buh truh sơ̆ng 'buh đờm sơ̆ng buơl guñu, nư̆n buơl guñu 'buh hũ glài hơgĕ. Bloh tŭ ni, buơl guñu 'buh rơgơi đờm dŏng tơ glài-sơnoh buơl guñu jiơ̆ng. 23 Aràng sơi mơbai Kơu, nư̆n kŭng mơbai Ama Kơu rơi. 24 Yah Kơu 'buh ngă tơkrah buơl guñu tơgrơ̆ bruă bloh ka hũ mơnih lơi ngă, nư̆n buơl guñu 'buh hũ glài. Bloh tŭ ni buơl guñu hũ 'buh tơgrơ̆ bruă nư̆n bơjơ, bloh sơđaŭ dò mơbai tơ Kơu sơ̆ng Ama Kơu wơ̆. 25 Yơu nư̆n la tơbiă iơŭ tơpă yơu pơnuaĭ hũ wă lăm 'bồn bơ-àr Adăt-Adia buơl guñu: ‘Guñu mơbai tơ Kơu soh-săr 'buh kơyoa pơnuaĭ hơgĕ.’ *

26 Bloh tŭ Pô Pơluơ-Pơrơngài truh, la Pô bloh Kơu rơŭ mư̆ng Ama pơđăr truh sơ̆ng buơl guhã. Pô la Bơngă Sơc̆ih-Sri pơnuaĭ-tơpă tơbiă mư̆ng Ama, rùp-phŭn Pô rơŭ ngă grơh mư̆ng Kơu. 27 Buơl guhã kŭng rơŭ ngă grơh mư̆ng Kơu, kơyoa buơl guhã hũ dò sơ̆ng Kơu mư̆ng tŭ c̆ơmrừp.”