Chru PƠH-TƠBIĂ PƠNUAĬ TƠRĐƠŬ 15

Pơnuaĭ Adoh Du Mơnih Pha-Jai Rơlau Tơ Jơi-Phơ̆n Pà Gah Tơkai

1 Dơlhă 'buh sa nàl c̆rih pơkơ̆n tơ ngŏ lơngì, nàl c̆rih nư̆n găm prŏng sơ̆ng găm c̆rih-krơi biă: Tơjuh aràng mơnih gơdrưh apăn tơjuh pơnuaĭ suh-ru rŭng-rài hơdơi luĭ, kơyoa mư̆ng du pơnuaĭ suh-ru rŭng-rài ni, pơnuaĭ anok-anoa prŏng Yàng Pô Lơngì hũ wĭl-tơ̆l.

2 Dơlhă 'buh hũ hơgĕ mơhiơ̆ yơu ia-tơsì krơh jrơu sơ̆ng apui, sơ̆ng du mơnih hũ pha-jai rơlau jơi-phơ̆n pà gah tơkai, rơ̆p-rùp ñu, găm sơ̆ng khà angăn mơta ñu, dò dơ̆ng tơ gah ia-tơsì krơh nư̆n, lăm tơngàn buơl guñu apăn du kơñi-pĕ Yàng Pô Lơngì. 3 Buơl guñu găm sơ̆ng gơŭ adoh pơnuaĭ adoh Môise, la mơnih hơlŭn-hơlă Yàng Pô Lơngì, sơ̆ng pơnuaĭ adoh Abo Anà lài:

“Khoai Yàng la Yàng Pô Lơngì Gơnăp-Gơnuăr Wĭl-Tơ̆l,

Tơgrơ̆ bruă Pô la prŏng biă sơ̆ng c̆rih-krơi biă!

Khoai Pơtau tơgrơ̆-tơgrơ̆ jơi-rài,

Jơlàn sơnah Pô la rĭng-tơpă sơ̆ng tơpă-tơpe!

4 Khoai Yàng, aràng sơi rơŭ 'buh duh-huơĭ Yàng,

Sơ̆ng 'buh mơyòm-pơglòng angăn Pô?

Kơyoa mĭn sa aràng Yàng la sơc̆ih-sri.

Tơgrơ̆ buơl làng rơŭ truh,

Duh-dơlbăt tơ anaŭ Pô,

Kơyoa tơgrơ̆ bruă rĭng-tơpă Pô hũ ràng-tơbiă.”

5 Hơdơi tơgrơ̆ bruă nư̆n, dơlhă 'buh sàng duh-dơlbăt pơh tơbiă, nư̆n la Pờ bơ-yài Pơnuaĭ Grơh-Pơđoàn dò tơ ngŏ lơngì. 6 Tơjuh aràng mơnih gơdrưh apăn tơjuh pơnuaĭ suh-ru rŭng-rài mư̆ng sàng duh-dơlbăt nau tơbiă, rùp c̆ù ào bơ-yài kơbuă-lơmŭn goh-sơc̆ih kơc̆rà sơrdah, sơ̆ng găn hărda akă tơlơi mừh. 7 Sa lăm pà Jơi-Phơ̆n Hơdiŭ brơi tơ tơjuh aràng mơnih gơdrưh tơjuh boh pơtĭl mừh daŭ baŭ pơnuaĭ anok-anoa prŏng Yàng Pô Lơngì, la Pô hơdiŭ mĭt rài pơdò rài. 8 Sàng duh-dơlbăt baŭ asă mư̆ng pơnuaĭ màng-kơc̆rà Yàng Pô Lơngì sơ̆ng gơnăp-gơnuăr Pô. 'Buh aràng sơi hũ rơgơi tơma lăm sàng duh-dơlbăt jiơ̆ng tơ̆l truh tơ tŭ tơjuh pơnuaĭ suh-ru rŭng-rài mư̆ng tơjuh aràng mơnih gơdrưh hũ wĭl-tơ̆l.