Chru PƠH-TƠBIĂ PƠNUAĬ TƠRĐƠŬ 5

'Bồn Bơ-àr Sơ̆ng Abo Anà

1 Bloh nư̆n dơlhă c̆ơ 'buh lăm tơngàn gah hơnuă Pô dò guh tơ ngŏ sơbàn sa blah bơ-àr hũ wă găm gah dơrlăm sơ̆ng gah agàh, hũ tơ̆m tơjuh nàl 'băng-kì. 2 Dơlhă kŭng 'buh sa aràng mơnih gơdrưh khăng-pràn prŏng săp đờm lài: “Aràng sơi la mơnih iơŭ păl tô pơh bơ-àr, sơ̆ng suă du băng-kì ni?” 3 'Buh sa aràng mơnih lơi tơ ngŏ lơngì, tơ ala lơ̆n, halài gah dơrlăm lơ̆n ala, hũ rơgơi pơh 'bồn bơ-àr halài c̆ơ lăm nư̆n. 4 Dơlhă hia sơngơh-sơngờt, kơyoa 'buh aràng sơi hũ c̆ơ la iơŭ păl tô pơh 'bồn bơ-àr halài c̆ơ lăm nư̆n. 5 Bloh sa aràng lăm du mơnih gơnuăr-tha đờm sơ̆ng dơlhă: “Juơi hia, dih, Rơmòng-Sơnuh mư̆ng jơi-pơtiàn Juđa, anà-tơc̆o Đabit, hũ pha-jai rơlau bơjơ, Pô hũ rơgơi pơh 'bồn bơ-àr sơ̆ng pơh tơjuh nàl 'băng-kì nư̆n.”

6 Dơlhă 'buh Abo Anà yơu kŏng pơmơtai dò dơ̆ng tơkrah sơbàn, gơrwàng tòmdăr kơyoa pà Jơi-Phơ̆n Hơdiŭ sơ̆ng du mơnih gơnuăr-tha. Abo Anà hũ tơjuh 'bĕ tơki sơ̆ng tơjuh găr mơta, nư̆n la tơjuh bơngă gơdrưh Yàng Pô Lơngì hũ pơđăr nau lăm abih boh tơnah. 7 Abo Anà truh, mă 'bồn bơ-àr mư̆ng tơngàn hơnuă Pô dò guh tơ ngŏ sơbàn. 8 Tŭ Abo Anà mă 'bồn bơ-àr, pà Jơi-Phơ̆n Hơdiŭ sơ̆ng dua pluh pà aràng mơnih gơnuăr-tha pơđih rùp tơ anaŭ Abo Anà, yàu aràng apăn sa 'bĕ kơñi-pĕ, sơ̆ng du pơtĭl mừh daŭ baŭ gơlhơu, nư̆n la pơnuaĭ iơu-lài du mơnih sơc̆ih-sri.

9 Buơl guñu adoh sa pơnuaĭ adoh-mơyòm bơrhơu lài:

“Pô iơŭ păl tô mă 'bồn bơ-àr sơ̆ng pơh du nàl 'băng-kì tơbiă,

Kơyoa Pô hũ kŏng pơmơtai, sơ̆ng mă drah drơi bloh tơrbuh tơ Yàng Pô Lơngì,

Du mơnih mư̆ng tơgrơ̆ jơi-pơtiàn, tơgrơ̆ ia đờm, tơgrơ̆ buơl làng, sơ̆ng tơgrơ̆ lơgăr.

10 Pô kŭng ngă tơ buơl guñu tơbiă jiơ̆ng buơl làng Lơgăr Yàng, jiơ̆ng du mơnih gơnuăr pơyă phơ̆n duh-dơlbăt tơ Yàng Pô Lơngì buơl gudrơi, sơ̆ng buơl guñu rơŭ apăn-akŏ lăm boh tơnah.”

11 Dơlhă c̆ơ 'buh, sơ̆ng mơhư̆ săp lô mơnih gơdrưh tòmdăr sơbàn, du Jơi-Phơ̆n Hơdiŭ găm sơ̆ng du mơnih gơnuăr-tha. Hũ tơmừn-tơmừn, rơbơu-rơbơu mơnih gơdrưh, 12 sơ̆ng gơŭ adoh prŏng săp lài:

“Abo Anà hũ kŏng pơmơtai, iơŭ păl biă tô đồ-mă gơnăp-gơnuăr, mơda gơn-hư̆p, jak-khờh, gơnuăr-pràn, màng-rơyŭ, màng-kơc̆rà sơ̆ng adoh-mơyòm!”

13 Bloh nư̆n dơlhă mơhư̆ abih tơgrơ̆ jơi-phơ̆n hũ c̆rơ̆ng-tơbiă tơ ngŏ lơngì, tơ ala lơ̆n, gah dơrlăm lơ̆n, lăm ia-tơsì, sơ̆ng abih tơgrơ̆ jơi-phơ̆n lăm du anih nư̆n sơgơŭ đờm lài:

“Lơkơu Pô dò guh tơ ngŏ sơbàn sơ̆ng Abo Anà,

Hũ mơyòm-pơglòng, prŏng-màng, màng-kơc̆rà sơ̆ng gơnuăr-pràn tơ̆l truh rài pơdò rài!”

14 Pà Jơi-Phơ̆n Hơdiŭ sơgơŭ đờm: “Amen!” Bloh nư̆n du mơnih gơnuăr-tha pơđih rùp trŭn sơ̆ng c̆ĕ-dơlbăt.