10
Kabo Yesu yoori yoowa kpekun n kpein ni
1 Nyɛmɛ nɔaniɛ kpamaawa ni, i ferema ni deke kpa n bo Nyɛmɛ ŋa i fá ba n wɔ, ama, má yiri lɛɛ. Nyini ti, yoowa n bo bu yo bu saŋga kɛrɛ akoro ama má bɛrɛ bo bu cin dodo Nyɛmɛ ni, ati má kabo má i koro ka bu ti ni.
2 Nzɛn má nyini yoowam n kɛrɛ koro yiiri minɛm n bo bu su Nyɛmɛ n fiteeri bu satiɛm nu, má bu sunsunni ma má bu cɛɛn be ka ba yo satiɛ, má bu yaki nyini yoowam wɔ.
3 Ama, kabo i ti n la ka, nyini yoowa n bo bu yo i afɔ kɛrɛ afɔ n teŋge bu su fa kɔ bu satiɛm bo ba yo bu n su wɔ.
4 Dama tooram ni sirim mbunja koro yi má satiɛ bo i wo adamande ahore su ni, cɛɛn be.
5 Nyini dɛɛ ti, saŋga bo Yesu koro ka i ba durunya n nu fɛn ni, na wɔ se Nyɛmɛ ka,
“A koro má ka minɛ fa aceerim
ni neŋgendɔrɛm n yo yoowa ma u,
ama, adamande ŋuniɛmbaa ye a fa ama m
ka m fa yo yoowa n a.
6 U nyunu ayi má yoowam
bo bu yo bu na bu kpiɛ neŋgendɔrɛm kɔm,
na bu yara bu sayoowa yoobiri n su ni,
ni yoowam n bo bu yo satiɛ na bu yo bu ni.”
7 Na wɔ kaaki ase Nyɛmɛ ka,
“Mini yaa, ma ba ka m ba yo u koroowa n wɔ,
kabo ba kɛrɛ m ŋusu jɔrɛ u nɔaniɛ kpamaawa n dɛɛ kadasi n nu ni.”
8 I du mɔ seeri Nyɛmɛ ka, “A koro má ka minɛ fa aceerim ni neŋgendɔrɛm n fa yo yoowa ma u, u nyunu ayi má yoowam bo bu yo na bu kpiɛ neŋgendɔrɛm kɔm, na bu yara bu sayoowa yoobiri n su ni, ni yoowam n bo bu yo satiɛ na bu yo bu ni.” I seeri sɔ ɔ, haari ni bo Nyɛmɛ nɔaniɛ kpamaawa n kere sɔ ni.
9 Na wɔ se Nyɛmɛ ka, “Mini yaa, ma ba ka m ba yo u koroowa n wɔ.” Nyini la ka, Nyɛmɛ akun ciciri su dɛɛ yoowam kɛrɛ nɔɔ lɛɛ, ye wɔ fa fɔfɔrɛ aba.
10 Nyɛmɛ koroowa n lɛɛ ye i yoori n a. Kpekun n kpein ye i faari i ŋu yoori yoowa. Nyini ti ye wɔ kpakpara ya kɛrɛ fin ayo ya casi n a.
11 Yudafɔm Nyɛmɛ sayoowa dɔŋguyofɔ kɛrɛ yo i Nyɛmɛ juma cɛɛn n kɛrɛ wɔ, na i suyo nyini yoowa kun n saŋga kɛrɛ. Haari ni nyini yoowam n kɛrɛ, bu be koro yi má minɛm satiɛ bo i wo bu sunsunni nu ni.
12 Ama, Yesu yiri yoori yoowa kpekun n kpein wɔ, bo i yo juma saŋga kɛrɛ, fa kɔ minɛ satiɛ bo bu yo i su. Na wɔ nya akɔ atana aŋgoro Nyɛmɛ saa fɔmbɔrɔ su.
13 Fite nyini saŋga ni, i ŋminda kabo Nyɛmɛ ba ma i kunma i kpɔfɔm na i nana bu kɛrɛ ŋu.
14 Nyini yoowa kun n dɛɛ ti, wɔ kpakpara minɛm fin kɛrɛ na wɔ ma ba ti kabo Nyɛmɛ koro ka bu ti ni, saŋga kɛrɛ.
15 Awiɛwiɛ Casi n gusu kaanri i sɔ kereeri ya. Wɔ du mɔ ase ka,
16 “Micɛra ŋa, sɛsɛsu n bo m ni bɛrɛ adi i di
fa kɔ saŋga bo i suba n la ka,
m fá m nɔaniɛ kpamaawa n wura bu sunsunni nu,
na m kɛ́rɛ i gɔ bu ahore su.”
17 Na wɔ kaaki ase ka,
“M téŋge má bu satiɛm bo ba yo bu n su,
kabo bu keteeri na ba su má m nɔaniɛ kpamaawa n su kun.”
18 Tɔ, Nyɛmɛ afa satiɛ bo minɛm ayo i ace bu, nyini la ka, yoowa be wo má bɛrɛ bo be yo i fa kɔ satiɛ su kun.
Am ma ya cin dodo Nyɛmɛ
19 M ninbaam, Yesu dɛɛ mbunja n ti ye ya la ahoresi kɛrɛ ka ya koro cin dodo Nyɛmɛ a, na ya koro wura Casi Kɛrɛ Casi Sɔɔ n nu a.
20 Yesu ateke atin fɔfɔrɛ bo i ma ŋgɔɔ nahɔrɛ su ama ya. Kabo i faari i ŋu yoori yoowa ni, i ti ka wɔ teke atin ama ya na ya koro sin tani bambaka n bo bu fa kanda n ŋu, na ya wura Casi Kɛrɛ Casi Sɔɔ n nu.
21 Tɔ, kisa na ya la Nyɛmɛ sayoowa dɔŋguyofɔ bambaka bo i niɛ yɛrɛ n bo ya ti Nyɛmɛ minɛm n su ni.
22 Nyini dɛɛ ti, am ma ya cin dodo Nyɛmɛ ni ya ahorembaa kun, na má ya yo sika be. Yesu mbunja n akpakpara ayi satiɛ kɛrɛ bo i wo ya ahore su a, na má ya sunsunni nu suma ya saŋga kɛrɛ ka ya yo satiɛ. Nyɛmɛ nzue n gusu bo ba fa abiɛ ya ni ama ya ŋuniɛ ayo casi a.
23 Tama n bo ya ŋa ya la i ni, am ma ya bita i ni ya saa nnyɔ, má am ma ya fa sika wura nu, dama ya si ka Nyɛmɛ yo deke n bo wɔ fa sɛsɛsu adi i di ka i yo i ni.
24 Am ma ya sutu ya beŋgum fɔ, na ya buka ya beŋgu, na koro wo ya afiɛn na ya yo sakpa.
25 Kabo i ti ye ni ka ya sutiɛn ya nɔɔ na ya su Nyɛmɛ saŋga kɛrɛ ni, má am ma ya yaki i kabo nbem suyo barasu ni, ama, am ma ya sutu ya beŋgu fɔ na bu nya ahoresi buka su, dama ya kɛrɛ ŋu ka Micɛra n dɛɛ cɛɛn n adodo lɛɛ.
26 Tɔ, kisa na ya si kereewa n bo i ti nahɔrɛ ni, na nzɛn ya toko kete i yo satiɛ ni, yoowa be wo má bɛrɛ bo ya yo i na Nyɛmɛ fa ya satiɛ ce ya kun,
27 má ka ya ŋminda ni sɛrɛ fa kɔ cɛɛn n bo i suba na Nyɛmɛ bá di minɛm jɔrɛ, na i fa bo ba kete i nɔaniɛ n wura sin n bo i ti kɛkɛrɛ agaya n nu, na bu ka ŋgbɛɛn ni.
28 Nyɛmɛ nɔaniɛ kpamaawa n bo i yo fa maari Moyisi ni, nzɛn sɔnɔ be keteeri na i yoori satiɛ, na minɛ nnyɔ wara nsan diiri daani ka i ti sɔ, nkpiɛnkpiɛnm si má i mi aŋunfɔ, bu kun i wɔ.
29 Ye nzɛn i nya ti sɔ, sɔnɔ kɛrɛ bo i buuri Nyɛmɛ Wa ni ŋgbɛɛn na i sunsun ka Yesu mbunja n bo i yo ya casi n ti ŋgbɛɛn, na i jɔjɔ wura Awiɛwiɛ Casi n bo i si ya aŋunfɔ ni ŋgasi nu, suicin barasu bɔnɔ ye am sunsun ka Nyɛmɛ fá cin i a?
30 Dama ya si ka Micɛra n ase ka, “Mini cín bu sui a. Mini tɔ́ bu kaari a,” na wɔ kaaki ase ka, “Mini dí m minɛm jɔrɛ a.”
31 Wɔrɔ kɛrɛ bo a to Nyɛmɛ saa nu, yiri bo i wo bɛrɛ saŋga kɛrɛ ni, i la sɛrɛ agaya.
32 Am teŋge su, na am niɛ saŋga bo am du mɔ nyaari anyunuteke fa kɔ labari kpa n su ni, haari ni bo am yo diiri wahara agaya ni, am afa ahoresi ade nyini kekereke n kɛrɛ.
33 Saŋga be bu yo kpiɛ am nzukɔ, na bu kere am wuwuruwa jama nu. Na saŋga be gusu na am asaŋga adi wahara ni am beŋgum bo bu kere bu wuwuruwa ni.
34 I ti nahɔrɛ wɔ ka, am asi dansarakam aŋunfɔ. Bekun, haari nzɛn minɛ fiinri am neŋgem kɛrɛ bo am la i ni, am ahore ti jɔɔwa a, dama am si ka am la deke bo i tara nyinim bo ba de am dɔ ni, nyini deke n yiri wo bɛrɛ wɔ saŋga kɛrɛ.
35 Nyini dɛɛ ti, má am ma am ŋuniɛ yɔrɔki am, dama ahoresi n bo am la i ni, nyini ma am nya aceeri bambaka Nyɛmɛ dɔ a.
36 Kisa, wɔ yo daka ka am la mindi, adena am yo Nyɛmɛ koroowa, na am nyá deke n bo Nyɛmɛ afa sɛsɛsu adi i di ka i ma am ni.
37 Dama ba kɛrɛ i Nyɛmɛ Jɔrɛ Kadasi n nu ka,
“Wɔ ka kaan, i cɛ́ má,
yiri n bo i suba ni, i bá.
38 M sɔnɔ bo i yo sa bo i kɔ atin su m dɔ,
i nyá ŋgɔɔ, i yarada n dɛɛ ti,
ama, sɔnɔ kɛrɛ bo i kaakiiri i sin boori m,
m ahore jɔ má i mi ŋu.”
39 Yɛrɛ yiri, ya ti má minɛm bo bu kaaki bu sin, na bu ka ŋgbɛɛn ni, ama, ya ti minɛm bo ya yo Nyɛmɛ yarada na ya nya tiide wɔ.