Nau Kôranh Brah Ngơi Nau Tâm Rnglăp Mhe Luka 11

Brah Yêsu nti nau mbơh sơm

(Mat 6:9-13; 7:7-11)

1 Geh du nar Brah Yêsu mbơh sơm ta du ntŭk. Jêh Păng mbơh sơm ri, geh du huê oh mon lah ma Păng: “Hơi Kôranh, đă May nti ăn hên blao mbơh sơm ƀă ơ, kơt Yôhan-Ƀaptem nti ma mpôl oh mon păng.”* 2 Brah Yêsu ơh ma khân păng: “Ăn khân ay may mbơh sơm kơt nđa:

‘Ơ Bơ̆ [gŭ ta kalơ trôk],

Ăn dâng lĕ bunuyh yơk mbah ma May* [dăn dâng lĕ nau ta neh ntu dja tâng nau May ŭch, tâm ban ma nau May nơm lĕ ŭch ta kalơ trôk đŏng].*

3 Ăn ndơ sông sa ma hên ăp nar ăn tŏng.*

4 Yô̆ nđach lơi hôm kơp nau tih hên

Tâm ban ma hên yô̆ nđach ma bunuyh jan tih ma hên, mâu hôm kơp nau tih păng đŏng.

Kơl hên lơi ôh jan tih, nôk hên geh nau ndơm [dăn rklaih hên bơh nau djơh mhĭk]’.”*

Nau ngơi ntât ma mbơh sơm

5 Jêh ri Brah Yêsu lah đŏng ma mpôl oh mon nây: “Ta mpôl khân ay may, lah geh du huê bunuyh brô̆ ta jay mât jăng n'gul phŭt n'gul măng, păng kuăl: ‘Hơi jăng, ăn gâp manh ndơ sông sa aƀă ƀŏt ơ,* 6 yorlah gâp geh jăng mhe tât tă bơh ngai lah. Gâp mâu geh ndơ ma ăn păng sông sa mê’. 7 Khân ay may lah, bunuyh ta trôm jay nây ơh ma păng kơt nđa ƀah?: ‘Lơi hôm rkhuak gâp hia, mpông lĕ jêh rđăng, oh kon gâp lĕ bêch đŏng, gâp mâu dơi dâk sŏ ăn ma may jăng mê’. 8 Mâu di ndri ôh. Gâp mbơh ma khân ay may, bunuyh tơm jay nây mra dâk ndơ̆ ro, ndrel ma ăn moh ndơ aƀă êng jât mât jăng păng ŭch. Păng dâk ndơ̆ nây, yorlah bunuyh i nây bănh rkhuak păng mâu blao dŭt, mâu ôh yor ma jêng mât jăng dơm. 9 Kơt ndri Gâp mbơh ma khân ay may, dăn mro mrăng hŏm ma Kôranh Brah dâng Păng ăn ma khân ay may, joi mro mrăng hŏm dâng say, kuăl† mro mrăng hŏm bơh dih mpông dâng Kôranh Brah pơk ăn ma khân ay may ro.* 10 Yorlah bu moh dăn mra geh, bu moh joi mra say, jêh ri bu moh i kuăl bơh dih mpông mra pơk ăn ma păng. 11 Ta mpôl khân ay may vay geh đŏng [lah kon dăn piăng ăn nkhơng lŭ ma păng], lah kon dăn ka, bơ̆ păng ăn nkhơng bêh geh kăch ma păng bơh? 12 Mâu lah kon dăn tăp iăr ăn nkhơng ndơr ving ma păng? 13 Bol lah khân ay may jêng bunuyh tih kađôi, khân ay may hôm blao ăn ndơ ueh ma kon đŏng, lah ndri Bơ̆ gŭ ta kalơ trôk rlau bơh nây ăn Brah Huêng Ueh i kloh ueh ma bu moh dăn bơh Păng.”

Brah Yêsu ơh nau bu ntôn nchroh Păng

(Mat 12:22-30, 43-45; Mar 3:20-27)

14 Geh du huê bu klô brah djơh lăp ăn păng mlo, tât du nar ri Brah Yêsu ntrŭt brah djơh i nây lôh bơh păng, jêh ri păng blao ngơi ro. Bunuyh gŭ ta nây ŏk ngăn. Tât say nau i nây dâng lĕ khân păng ndrŏt hih rhŏl dadê ngăn.* 15 Yơn ma geh bu aƀă lah: “Yorlah Satăng‡ i kôranh mpôl brah djơh ăn nau dơi ta Păng, dâng Păng dơi ntrŭt brah djơh.” 16 Geh bu aƀă jât ŭch rlong Brah Yêsu dơm, đă Păng jan du nau mbên gay ma nhhơ nau dơi Păng tă bơh Kôranh Brah ri.* 17 Yơn ma Brah Yêsu lĕ gĭt jêh nau khân păng mân, jêh ri Păng lah: “Dâng lĕ bri i geh nau tâm lŏk tâm janh chah chrai băl, bri i nây roh hêng ro. Dâng lĕ rnăk i geh nau tâm lŏk tâm janh ndrăng nơm, rnăk i nây roh hêng mâu hôm geh đŏng. 18 Lah Gâp ntrŭt brah djơh tă bơh nau dơi Satăng i kôranh mpôl brah djơh, brah djơh geh nau tâm rlăch tâm janh chah chrai băl, lah ndri mơm dâng hôm geh bri jât? Gâp ngơi kơt nđa, yorlah khân may lah Gâp ntrŭt brah djơh yor ma Satăng§ ăn nau dơi ma Gâp. 19 Lah Gâp ntrŭt brah djơh yor ma nau dơi Satăng* ngăn, bơh tă nau dơi oh mon khân may ntrŭt brah djơh đŏng? Lah ndri oh mon khân may nơm i nây mra tê̆ dôih khân may ngăn ro.* 20 Yơn ma lah nau dơi Gâp ntrŭt brah djơh tă bơh Kôranh Brah, lah ndri nau Kôranh Brah mât uănh ma khân may lĕ tât jêh†.*

21 Lah bunuyh dăng ndjôt tak ndjôt đao, gŭ njrăng nhih jay păng nơm, lah ndri drăp ndơ păng hôm kơn. 22 Yơn ma lah geh du huê bunuyh jât dăng rlau păng, tâm lơh dơi bu, bu mra sŏ tak đao păng i nây, ndrel ma sŏ drăp ndơ păng pă ăn ma bunuyh êng jât‡.* 23 Bu moh i mâu gŭ mpeh ma Gâp, bunuyh i nây tâm rdâng đah Gâp, bu moh i mâu gŭ gum ndrel Gâp, bunuyh i nây chah chrai nhhing nhhang.”*

24 “Lah brah djơh lôh bơh du huê bunuyh, jêh ri păng brô̆ rŏ bri rdah, păng joi ntŭk ma gŭ mâu geh ôh, jêh ri păng mra lah êng kơt nđa: ‘Gâp plơ̆ gŭ ta jay ơm gâp ntŭk gâp mhe lôh nơh ƀŏt’. 25 Tât păng plơ̆ ta nây, say jay i nây lĕ mpêh ueh, ndrăp djahep, 26 jêh ri păng hăn jă brah djơh a êng pơh ơ̆ jât, brah djơh i nây janh rlau păng ngăn, hăn lăp gŭ ndrel ta nây đŏng, jan ăn bunuyh i nây geh nau jêr djơh rlau ơm nơh jât.”* 27 Dôl Brah Yêsu hôm ngơi nau nây, geh du huê bu ur ta phung bunuyh ŏk nây lah: “Bu ur i deh May, i mpu May ma toh, bu ur i nây lap ngăn ro.” 28 Yơn ma Brah Yêsu ơh: “Bunuyh i iăt Nau Kôranh Brah Ngơi, n'ho ma tâng kơt, păng i nây lap ŏk rlau.”*

Nau mbên Yônais

(Mat 12:38-42)

29 Jêh ri bunuyh gŭ gum lơ ma ŏk ngăn, Brah Yêsu lah ma phung i nây: “Bunuyh ta rnôk aƀaơ ri djơh mhĭk hô ngăn, ŭch say ma nau mbên dơm, yơn ma Kôranh Brah mâu ôh ăn nau mbên êng jât, Păng ăn du nau mbên tâm ban ma nau mbên Yônais i bunuyh ntơyh nau ngơi Kôranh Brah kăl e nơh dơm§.* 30 Yônais jêng nau mbên ma ƀon Ninivê say, ndri ta nar jât năp tay Gâp i Kon Bunuyh tă bơh Kôranh Brah jêng nau mbên ta rnôk aƀaơ dja đŏng. 31 Ta nar Kôranh Brah phat dôih dâng lĕ bunuyh ta neh ntu, geh kađăch bu ur rnha păng Sêƀa, păng mra tê̆ dôih ma bunuyh rnôk aƀaơ dja. Kăl e nơh păng kađăch ta bri êng ngai mpeh bơh dŏng bri Israel, bol lah păng gŭ ngai dŭt bri dŭt neh kađôi, păng hăn ta bri Israel gay ma iăt nau mân gĭt blao kađăch Salômôn ta bri dja. Yơn ma nar dja ta ntŭk dja geh du huê Bunuyh nau ngơi Păng khlay rlau nau ngơi kađăch Salômôn, tih ma khân ay may mâu ŭch ôh iăt Păng.* 32 Ta nar Kôranh Brah phat dôih dâng lĕ bunuyh ta neh ntu dja, bunuyh ƀon Ninivê mra tê̆ dôih bunuyh ta rnôk aƀaơ dja đŏng, yorlah rnôk kăl e nơh, jêh khân păng tăng nau Yônais mbơh, khân păng rgâl lơi nuih n'hâm djơh ro, khân păng rngot lĕ lăn nau khân păng jan tih nơh, yơn ma ta dja aƀaơ dja geh đŏng du huê Bunuyh kuŏng rlau ma Yônais nây jât.”*

Nau ngơi ntât ma ŭnh sagêng

(Mat 5:15; 6:22-23)

33 Brah Yêsu nti jât: “Mâu geh ôh bunuyh mpêh ŭnh sagêng, jêh ri pôn ta kuâl, mâu lah kŭp lơi đah sah bơh lơ. Bu vay mpêh sagêng yông ta kalơ, gay ma ang lĕ bunuyh i lăp ta trôm jay nây. 34 Trôm măt khân ay may jêng tâm ban ma sagêng ma săk jăn, lah trôm măt khân ay may hôm ang ueh, lĕ săk jăn khân ay may hôm ang dadê, yơn ma lah trôm măt khân ay may lĕ ngo jêh, lĕ săk jăn khân ay may jêng ngo dadê đŏng.* 35 Kơt nđay ăn khân ay may blao njrăng, lơi ăn khân ay may kơp êng nau ang, jêh ri bu mâu ôh say nau ang, say nau ngo chrao. 36 Lah lĕ săk jăn khân ay may hôm ang dadê, mâu ôh geh ntŭk ngo, lah ndri lĕ nau rêh khân ay may geh ang dadê, tâm ban ma ŭnh sagêng ngaang khân ay may nây đŏng.”*

Brah Yêsu lah phung Pharisi, ndrel ma phung nơm nti

(Mat 23:1-36; Mar 12:38-40)

37 Jêh Brah Yêsu ngơi nây, geh du huê phung Pharisi jă Brah Yêsu hăn sông sa ta jay păng ri. Brah Yêsu hăn tât ta nây gŭ sông sa ndrel ta ri.* 38 Bunuyh Pharisi i nây geh nau ndrŏt hih rhŏl ngăn say Brah Yêsu sông mâu geh rao ti* lor.* 39 Lah ndri Brah Yêsu lah ma păng: “Hơi nô, phung Pharisi khân may jêng tâm ban ma bunuyh i rao ngan, rao yăng ta bơh dih dơm, yơn ma ta trôm hôm e uk rmao, khân may rao ti tâng ma nau vay khân may, tih ma ta nuih n'hâm khân may ri hôm dŭt ŭch ma nau sa nsiăn, ndrel ma nau mân djơh mhĭk hô ngăn. 40 Hơi bunuyh mblŭ, lah Kôranh Brah lĕ njêng jêh ndơ bơh dih, ta trôm Păng njêng ndơ đŏng, lah ndri Păng ŭch ta nuih n'hâm khân may ăn kloh tâm ban ma săk jăn khân may đŏng. 41 Lah ndri ăn ŏk ndơ ma bunuyh o ach, ri mơ khân may kloh ta nuih n'hâm đŏng, jêh ri khân may kloh bơh dih đŏng, kloh ta nuih n'hâm đŏng.* 42 Hơi phung Pharisi, rêh rnhăl ngăn ma khân may mê! Khân may nơh sŏ ndơ geh jât ơ̆ rhuăt nguai nhhơr ma Kôranh Brah, kơt lah ndơ mâu khlay, klôyh, gir, ndrel ma ndơ ƀô aƀă êng đŏng. Nau i nhhơr jêng di, tih ma khân may mƀăr lơi nau sŏng, ndrel ma nau rŏng Kôranh Brah i geh nau khlay rlau bu, lah ndri ăn khân may nsrôyh nhhơr kơt i nây ma Kôranh Brah đŏng, yơn ma lơi chuêl nau sŏng, ndrel ma nau rŏng đŏng.* 43 Hơi phung Pharisi, rêh rnhăl ngăn ma khân may mê! Yorlah ta ntŭk nhih rƀŭn phung bân khân may nơh ŭch gŭ bơh năp bu i ntŭk bu lư ngăn, ndrel ma ŭch hăn rŏ ntŭk bu tăch drăp, ŏk bunuyh bu kŭnh bôk mbah ma khân may.* 44 Rêh rnhăl ngăn ma khân may mê [i phung Pharisi, ndrel ma i phung nơm nti nau vay phung bân, khân may mpôl nuih n'hâm ndŏp mpôn], yorlah khân may nơh jêng tâm ban ma ntu môch uănh mâu say, jêh ri bu de brô̆ jot kalơ mâu ôh gĭt săk, ndri păng mâu hôm kloh ôh. Kơt ndri đŏng khân may ueh ta bơh dih, tih ma ta nuih n'hâm ri djơh.”

45 Geh du huê nơm nti nau vay phung Israel ơh ma Brah Yêsu, păng lah: “Hơi Nơm Nti, May ngơi kơt i nây, jêng May mưch nsot ma phung hên đŏng mê.” 46 Brah Yêsu ơh ma păng: “Hơi phung nơm nti nau vay phung bân, rêh rnhăl ngăn ma khân may, yorlah khân may tê̆ nau vay dŭt jŏk ăn ma bunuyh jan, tih ma khân may nơm mâu geh ôh kơl jan nau i nây, đê̆ kŏ mâu geh đŏng.* 47 Rêh rnhăl ngăn ma khân may, yor ma khân may jan ueh ngăn jay môch ma bunuyh ntơyh nau ngơi Kôranh Brah, i u che khân may lĕ nkhât lơi kăl e nơh, tih ma khân may mâu ôh jan tâng nau nti bunuyh ntơyh nau ngơi Kôranh Brah i nây.* 48 Khân may jan kơt nây, khân may tâm di du ntôr nau ndrel u che khân may nây đŏng, khân păng ma nkhât, khân may ma jan jay môch dơm. 49 Ndri Kôranh Brah i geh nau gĭt mân lah kơt nđa: ‘Gâp đă bunuyh ntơyh nau ngơi Gâp hăn a khân păng, ndrel ma kôranh oh mon đŏng, tih ma bunuyh i nây, aƀă khân păng nkhât lơi, aƀă jât khân păng jan jêr’. 50 Kơt ndri Gâp kơp bunuyh ta rnôk aƀaơ dja geh dôih nkhât bunuyh ntơyh nau ngơi Kôranh Brah ntơm bơh njêng neh ntu. Bol lah bunuyh ntơyh nau ngơi Kôranh Brah i nây lĕ bu nkhât bơh kăl e nơh, dôih i nây hôm tê̆ tât ma bunuyh ta rnôk aƀaơ dja đŏng, 51 jêng ntơm bơh kon Ađăm† rnha păng Kain nkhât i oh păng rnha Abel, n'ho ma tât bu nkhât Sakari‡, i bu nkhât păng ta vah vang nsưng gŭch pur ndơ jan brah, ma nhih jan brah ri. Gâp mbơh ma khân may, mham khân păng i nây Kôranh Brah mra tê̆ dôih ta rnôk bunuyh aƀaơ dja.* 52 Hơi bunuyh nơm nti nau vay phung Israel, rêh rnhăl ngăn ma khân may mê, yorlah khân may mâu ăn bu gĭt năl nau ngăn Kôranh Brah. Nau i nây tâm ban ma rđăng lơi mpông bơh dih ma lăp nau Kôranh Brah mât uănh, săk khân may nơm lĕ mâu geh lăp ta mpông i nây, jêh ri khân may buay đŏng bu êng jât i ŭch lăp, mâu ăn lăp.”*

53 Ntơm bơh Brah Yêsu lôh bơh ntŭk nây, phung nơm nti nau vay phung Israel, ndrel ma phung Pharisi, tâm rdâng đah Păng dŭt hô, jêh ri ôp mpet Păng ma nau êng êng ŏk. 54 Khân păng jan kơt nây ŭch joi nau lah Brah Yêsu ơh tih, mâu lah ngơi tih, gay ma ntôn Păng ro.

* 11:1 Luk 5:16 * 11:2 Mâu lah ‘Ăn bri may gơnh tât’, mâu lah ‘Ăn nôk may mât uănh dâng lĕ bunuyh gơnh tât’. * 11:2 Êsa 29:23 * 11:3 1Pê 5:7 * 11:4 Mat 18:21-35; 1Kô 10:13 * 11:5 Luk 18:1-8 † 11:9 Ta nau ngơi Grek lah: ‘Goh’, yorlah ta ntŭk nây lah ŭch lăp ta trôm jay bu vay goh mpông. * 11:9 Yêr 29:13-14; Yôh 15:7 * 11:14 Mat 12:22-30; Mar 3:22-27 ‡ 11:15 Mâu lah ‘Ƀêlsêƀul’. * 11:16 Mat 12:38; Mar 8:11 § 11:18 Mâu lah ‘Ƀêlsêƀul’. * 11:19 Mâu lah ‘Ƀêlsêƀul’. * 11:19 Kar 19:13-16; Luk 11:31-32 † 11:20 Mâu lah ‘Lah ndri bri kađăch Kôranh Brah lĕ tât ma khân may jêh’. * 11:20 Luk 17:21; 1Yô 3:8 ‡ 11:22 Brah Yêsu jêng tâm ban ma bunuyh dăng i nây, păng dơi đah Satăng. * 11:22 Kôl 2:15; 1Yô 4:4 * 11:23 Luk 9:50 * 11:26 2Pê 2:20 * 11:28 Luk 6:47-48; Yak 1:22-25 § 11:29 Mâu lah ‘Păng ăn du nau mbên dơm, jêng geh du huê bunuyh đă rgâl lơi nuih n'hâm djơh tâm ban ma Yônais i bunuyh ntơyh nau ngơi Kôranh Brah kăl e nơh păng mbơh nkoch ma ƀon Ninivê’. * 11:29 Yôn 2:1-10; Mat 12:38-42 * 11:31 1KK 10:1-10 * 11:32 Yôn 3:5-9 * 11:34 Êph 1:18 * 11:36 Yôh 8:12; Êph 5:8; 1Tê 5:5 * 11:37 Luk 7:36; 14:1 * 11:38 Tâng ma nau vay phung Pharisi khân păng rao ti ê lor ma sông. Mâu geh ôh rao yor ma uk rmao. Khân păng rao gay ma kloh tâng ma nau vay phung Israel, klach lah Kôranh Brah mâu rom khân păng lah khân păng lĕ geh pah ndơ mâu kloh. * 11:38 Mar 7:2-4 * 11:41 Luk 12:33 * 11:42 KLê 27:30; Mik 6:8 * 11:43 Luk 14:7-11 * 11:46 Mat 11:28-30; 23:3 * 11:47 Kar 7:52 † 11:51 Ađăm jêng bunuyh tŏl nguai Kôranh Brah njêng. Nau nkoch nkhât Abel geh nchih ta samƀŭt Nau Ntơm i samƀŭt tŏl nguai ta Nau Kôranh Brah Ngơi. ‡ 11:51 Sakari jêng bunuyh ntơyh nau ngơi Kôranh Brah kăl e nơh, nau nkoch păng geh nchih ta 2NR 24:20-21. 2 Nau Rêh Jêng dja jêng saphao n'glĕ dŭt ta Nau Kôranh Brah Ngơi nôk Brah Yêsu, yơn ma nar dja bu tê̆ ta ntŭk êng ta Nau Kôranh Brah Ngơi. * 11:51 NNt 4:8; 2NR 24:20-21 * 11:52 Luk 6:39