11
ពេត្រោស មឞើសងក៝ចអ៝ន់មាផូងញឆីងតាប៝នយេរូឆាលឹម
1 ជេសរីមពោលកោរាញអ៝សម៝ន នទ្រែលមាផូងញឆីងមាឞ្រាសយេឆូ អីគុតាឞ្រីយូដា ខាន់ពាង់លែៈតាង់លឺគែសផូងអីមោទីផូងអីឆ្រាអែល ឆ៝ៈទើននាវកោរាញឞ្រាសដ៝ង់។
2 ទោលពេត្រោស ឆឹតត៝ត់តាប៝នយេរូឆាលឹម គែសផូងញឆីងមាឞ្រាសយេឆូ អីផូងអីឆ្រាអែល នទុយ្សមាពាង់កើតនអា៖
3 “មៃតីសងាន់លាប់តាជៃផូងអីមោទីផូងអីឆ្រាអែល លើមាហោតីសជឹតមៃលែៈញេតឆោងនទ្រែលផូងអីនៃដ៝ង់”។
4 ជេសរីពេត្រោស មឞើសងក៝ចទឹងលែៈនាវអីនៃអ៝ន់មាឞូគឹត៖
5 “នោកគ៝ប់គុតាប៝នយោបពេ ទោលគ៝ប់មឞើសឆើម គ៝ប់តឹមឆៃគែសតឹមឞានមាទូឞ្លាសឞ៝កលាយ្សក្វ៝ង់ ក៝ត់ព្វាន់ញជោញ យូរតាៈឞើសកាលើតីត៝ត់តាគ៝ប់រី។
6 ទោលគ៝ប់គុអ្វាញ់នហេលនទើអីនៃ គ៝ប់ឆៃគែសអាប់នតីលមពោមពា(ឆ្យុម)ជ៝ង់ព្វាន់ មពោមពា(ឆ្យុម)ឞ្រី មពោមពា(ឆ្យុម)ហូងវើរ នទ្រែលមាឆ្យុមមពារ់កាលើត្រោក គែសដ៝ង់មពោមពា(ឆ្យុម)មោក្ល៝សមោអោសទីមាឆាតឹងនាវវៃផូងឞ៝ន់។
7 ជេសរីគ៝ប់តាង់ងើយតាៈឞើសកាលើត្រោកតីលាសមាគ៝ប់៖ «ហើយពេត្រោស ! មៃងខឹតមពោមពា(ឆ្យុម)អ្យាមាគុចឆាទោ!»
8 យើនមាគ៝ប់រាលាច់មាពាង់កើតនអា៖ «មោអោសកោរាញ យ៝រលាសនទើអីមោក្ល៝សមោទីមាឆា គ៝ប់មោអោសវៃឆាតាទូញជារ់នាវរេសគ៝ប់»។
9 ជេសរីងើយតាៈកាលើត្រោកតីលាសតៃមាគ៝ប់ដ៝ង់ នៃជេងងើយត៝ល់ឞារ ពាង់លាសកើតនអា៖ «ម៝សនទើកោរាញឞ្រាសជានលែៈក្ល៝សជេស លើយហោមអោសកើបនទើនៃបឹ»។
10 នាវអីនៃគែសពែតឹងាន់ ជេសរីទឹងលែៈនទើអីនៃនហាវតៃកាលើត្រោកតីលែៈផ្យៅ។
11 នោកនៃទោមាគែសឞូនុយ្សពែនុយ្សត៝ត់តាជៃគ៝ប់គុរី ឞូដាៈហាន់ជ៝យគ៝ប់ ខាន់ពាង់តាៈឞើសប៝នឆេឆារា ។
12 ឞ្រាសហ្វេងអ្វែសលាសមាគ៝ប់ ដាៈគ៝ប់ហាន់នទ្រែលខាន់ពាង់រ៝ លើយអោសវិវែៈ។ ជេសរីគែសផូងអ៝សនោញឆីងមាកោរាញយេឆូ ព្រាវនុយ្សអ្យាហាន់នទ្រែលដ៝ង់ ត៝ត់តានៃហេនលាប់តាជៃកោនេលេស រី។
13 ជេសរីពាង់ងក៝ចឞ្រីមាហេននាវពាង់តឹមឆៃមាតោងពារ់តាជៃពាង់នើម។ តោងពារ់រីលាសមាពាង់៖ «មៃដាៈឞូហាន់តាប៝នយោបពេ ជាៈរាញាឆីមោន អីឞូក្វាល់ពេត្រោស ដ៝ង់វាច់តាអ្យា។
14 ពាង់អីនៃមឞើសងក៝ចមាមៃ អ៝ន់មៃ នទ្រែលមាលែៈរានាក់វ៝ល់មៃគែសរាក្លាយ្សដ៝ង់»។
15 ទោលគ៝ប់នតើមងើយមាខាន់ពាង់ ឞ្រាសហ្វេងអ្វែសអីក្ល៝សអ្វែសជុរគុតាខាន់ពាង់រី តឹមឞានមាពាង់ជុរគុតាឞ៝ន់ឞើសនតើមនើសតានោកញេតបុន ៥០ នារនើសដ៝ង់។
16 ទោលនៃគ៝ប់កាសគឹតនាវកោរាញយេឆូ លាសនើស៖ «យោហាន-បាប់តែម ជានបាប់តែមអ៝ន់ឞូយុកមាទាក យើនមាជឹតនាប់តៃកោរាញឞ្រាសអុចអ៝ន់ឞ្រាសហ្វេងអ្វែសជុរគុតាឆាក់ខាន់មៃ។ នទើអីនៃតឹមឞានមាខាន់មៃយុកមាឞ្រាសហ្វេងអ្វែសអីក្ល៝សអ្វែស»។
17 លាសកោរាញឞ្រាសអ៝ន់ឞ្រាសហ្វេងអ្វែសគុតាខាន់ពាង់ តឹមឞានពាង់អ៝ន់មាឞ៝ន់នោកឞ៝ន់ញឆីងមាកោរាញយេឆូក្រីស នើស លាសនទ្រីឞូម៝សគ៝ប់អ្យាទឹងគែសមាទើយឞ្វៃកោរាញឞ្រាស?”
18 ត៝ត់មាតាង់នាវនៃ ផូងអីនៃមោហោមអោសងើយទូត៝ង ជេសរីខាន់ពាង់រានេមាកោរាញឞ្រាស ខាន់ពាង់លាស៖ “លាសនទ្រីផូងអីមោទីផូងអីឆ្រាអែល កោរាញឞ្រាសអ៝ន់នាវរេសនហ៝រ៝ដ៝ង់ លាសខាន់ពាង់រាគ៝ល់នូយ្សនហ៝ម់អ្យើស”។
ផូងញឆីងតាប៝នក្វ៝ង់អ៝ន់តីយោក
19 ជេសឞូងខឹតឆាតេផាន នតើមឞើសនៃឞូជានជេរមាផូងញឆីងមាឞ្រាសយេឆូ ដ៝ង់ ជេសរីគែសអ៝ក់ផូងញឆីងទូលោសឞើសប៝នយេរូឆាលឹម ញច្វាត់ញហីងញហាង។ អាបាៈហាន់តាឞ្រីផេនីស អាបាៈហាន់តាគោលទាកកីព្រ៝ស អាបាៈជឹតហាន់តាប៝នក្វ៝ង់អ៝ន់តីយោក ។ លែៈផូងនៃមឞើសងក៝ចឞ្រាសយេឆូ ទើនមឞើសងក៝ចអ៝ន់មាផូងអីឆ្រាអែល ទើម។
20 យើនមាគែសឞូនុយ្សតាផូងនៃអើមតាៈឞើសគោលទាកកីព្រ៝ស នទ្រែលប៝នក្វ៝ង់កីរេន ហាន់តាប៝នអ៝ន់តីយោក ។ ខាន់ពាង់មឞើសងក៝ចនាវមហែមហានអ្វែសកោរាញយេឆូ អ៝ន់មាផូងអីមោទីផូងអីឆ្រាអែល ដ៝ង់។
21 នាវទើយកោរាញឞ្រាសគុនទ្រែលខាន់ពាង់ ជេសរីគែសអ៝ក់ឞូនុយ្សឆឹតញឆីងមាកោរាញយេឆូ ។
22 ផូងញឆីងមាឞ្រាសក្រីស តាប៝នយេរូឆាលឹម រីតាង់លឺនាវនៃ ជេសរីខាន់ពាង់ដាៈបារនាបាស ហាន់តាប៝នអ៝ន់តីយោក រី។
23 ត៝ត់តារី ពាង់ឆៃនាវយោៈក្វ៝ង់កោរាញឞ្រាសអ៝ន់មាខាន់ពាង់ ពាង់រាម់មអាកងាន់។ ជេសរីពាង់នតុមនតីអ៝ន់មាទឹងលែៈខាន់ពាង់ អ៝ន់គុន៝ប់ញឆីងមាកោរាញយេឆូ មាលែៈនូយ្សនហ៝ម់។
24 ពាង់ជេងឞូនុយ្សគែសនូយ្សនហ៝ម់អ្វែស ឞ្រាសហ្វេងអ្វែសអីក្ល៝សអ្វែសគុតាពាង់ងាន់ នទ្រែលមាគែសនាវញឆីងន៝ប់ងាន់។ ជេសរីគែសអ៝ក់ឞូនុយ្សឆឹតញឆីងមាកោរាញយេឆូ ។
25 ជេសរីបារនាបាស ហាន់តាប៝នតាឆើស គៃមាជ៝យឆោល តាប៝ននៃ។
26 ត៝ត់មាឆៃរី បារនាបាស លែវពាង់ហាន់តាប៝នអ៝ន់តីយោក ។ ឞារហៃខាន់ពាង់រីគុនទ្រែលផូងញឆីងមាឞ្រាសក្រីស តាប៝ននៃជ៝ៈទូនាម់ នហ៝មាគែសអ៝ក់ប៝នលានអីខាន់ពាង់នតុមនតីដ៝ង់។ តាប៝នអ៝ន់តីយោក អ្យានតើមឞោកទាកឞូក្វាល់ផូងអ៝សម៝នលាស «ផូងឞ្រាសក្រីស »។
27 នោកនៃគែសមពោលអ៝សម៝នអាបាៈខាន់ពាង់ឞូនុយ្សនតើយ្សនាវងើយកោរាញឞ្រាសតាៈឞើសប៝នយេរូឆាលឹម ហាន់ត៝ត់តាប៝នអ៝ន់តីយោក រី។
28 តាមពោលអីនៃគែសទូហ្វេឞូក្លោរាញាពាង់អាកាបុស ពាង់ទ៝ក់ ជេសរីលាសយ៝រមាឞ្រាសហ្វេងអ្វែសដាៈពាង់ ពាង់លាស៖ “មោជ៝ៈជឹតគែសនាវជីឆ៝ត់ជីង៝តក្វ៝ង់លាមនែសនតូអ្យា”។ នាវនៃគែសងាន់រ៝តានោកកោរាញកាដាច់ក្លោដេស តាប៝នក្វ៝ង់រោម ម៝ត់អ្វាញ់។
29 តាង់នាវអាកាបុស ងើយកើតនៃ ផូងញឆីងមាឞ្រាសយេឆូ តាប៝នអ៝ន់តីយោក លែៈអុចកើលញជ្វាល់ព្រាក់អ៝ន់មាផូងញឆីងគុតាឞ្រីយូដា តឹងខាន់ពាង់នើមគែសទូហ្វេទូហ្វេ។
30 ខាន់ពាង់ញជ្វាល់ព្រាក់អីនៃតាបារនាបាស នទ្រែលមាឆោល អ៝ន់មាកោរាញផូងញឆីងមាឞ្រាសក្រីស តាប៝នយេរូឆាលឹម ។