3
ពេត្រោស នទ្រែលយោហាន ជានឞាសឞូនុយ្សរាវែន
1 គែសទូនារតាម៝ងពែកេងមាង់អីទីម៝ងឞូវៃហាន់មឞើសឆើមនៃ ពេត្រោស នទ្រែលយោហាន ហាន់តាជ៝ង់គូងញីសជានឞ្រាស គៃមាមឞើសឆើមដ៝ង់។
2 តាឞោកមពោងងគារជ៝ង់គូងញីសជានឞ្រាសរី តាមពោងនៃឞូរាញាលាស «មពោងអ្វែស» តានៃគែសទូហ្វេឞូនុយ្សរាវែន។ ពាង់រាវែននតើមឞើសអ៝សឞេងាន់ អាប់នារឞូតូងពាង់អ៝ន់គុតានតុកនៃ គៃមាក៝ប់ទាន់នទើឞូអីហាន់តាជ៝ង់គូងញីសជានឞ្រាសមាកោរាញឞ្រាសនៃ។
3 ត៝ត់មាពាង់ឆៃពេត្រោស នទ្រែលយោហាន ហាន់លាប់តាជ៝ង់គូងញីសជានឞ្រាសនៃ ពាង់ទាន់នទើរ៝។
4 ពេត្រោស នទ្រែលយោហាន នៃ ខាន់ពាង់អ្វាញ់ជឹតពាង់រី ជេសរីពេត្រោស លាស៖ “អ្វាញ់ជឹតហេនអ្យា!”
5 ជេសរីពាង់អ្វាញ់ប្លីកជឹតខាន់ពាង់រីរ៝ ពាង់នអោនលាសខាន់ពាង់អ៝ន់ព្រាក់មាពាង់។
6 យើនមាពេត្រោស លាសមាពាង់កើតនអា៖ “ព្រាក់មាយ្សគ៝ប់មោគែសអោស យើនមានទើអីគ៝ប់គែសអ៝ន់មាមៃនៃ៖ យ៝រមានាវទើយកោរាញយេឆូក្រីស អីតាៈឞើសប៝ននាឆារែត មៃទ៝ក់ហាន់ហ៝ម់!”
7 ជេសរីពាង់ញុបតីឞើសមាឞូនុយ្សរាវែននៃ តេកអ៝ន់ពាង់ទ៝ក់។ ទោមាមពាងជ៝ង់ នទ្រែលមារាពាក់ជ៝ង់ពាង់រីន៝ប់រាក៝ក់រ៝
8 ជេសរីពាង់ទ៝ក់នត្លោៈដឺបនហ៝មានតើមឞ្រោៈរ៝។ ពាង់លាប់តាជ៝ង់គូងញីសជានឞ្រាសរី នទ្រែលមាឞារហៃកោរាញអ៝សម៝ននៃ។ ពាង់ហាន់ឞ្រោៈ ហាន់នត្លោៈនត្លាងរ៝ មឞូងពាង់នហ៝មារានេកោរាញឞ្រាសដ៝ង់។
9 លែៈផូងប៝នលានឆៃពាង់ឞ្រោៈ នទ្រែលមាតាង់ពាង់រានេមាកោរាញឞ្រាសដ៝ង់។
10 ឞូនទ្រ៝ត់ហីសរាហ៝ល់ មោវ៝ត់អោសម៝សនាវគែសមាពាង់អីនៃ យ៝រលាសឞូនាល់ពាង់ងាន់រ៝ ឞូនុយ្សអីវៃគុទាន់នទើឞូតាឞោកមពោងអ្វែសនៃនើស។
ពេត្រោស ងើយតាជ៝ង់គូងញីសជានឞ្រាស
11 ទោលឞូនុយ្សអីនៃហោមគុទាច់ពេត្រោស នទ្រែលមាយោហាន លែៈឞូនុយ្សតានៃនទ្រ៝ត់ញហីសងាន់ ជេសរីញច្វាត់រានតាខាន់ពាង់រីទាទេតានទ្រីងរី អីឞូរាញាលាស«នទ្រីងឆាលោមោន »រី។
12 ត៝ត់មាពេត្រោស ឆៃកើតនៃ ពាង់លាសមាផូងប៝នលាននៃ៖ “ហើយអ៝សនោឞាល់មពោលអីឆ្រាអែល ! ម៝សនាវខាន់អៃមៃនទ្រ៝ត់មានាវអ្យា? ម៝សនាវខាន់អៃមៃអ្វាញ់ផ៝ង់ជឹតហេន? ខាន់អៃមៃនអោនលាសហេនជានឞាសឞូនុយ្សអ្យាតាៈឞើសនាវទើយហេននើមឞើស មោលាសតាៈឞើសហេនឞ្លាវអ្យាត់នាវកោរាញឞ្រាស? មោអោស។
13 កោរាញឞ្រាសអីអាឞ្រាហាម់ អីឆាក់ នទ្រែលមាយាកោប វៃយើកមឞាស ជេងឞ្រាសអីអូចែឞ៝ន់កាល់អែនើស ពាង់នហាវកោរាញយេឆូ មាជានឞាសឞូនុយ្សរាវែនអីនៃយ៝រមានាវទើយកោរាញយេឆូ អីឞូនុយ្សជានការមាពាង់នឹង។ តីសមាផូងកោរាញខាន់អៃមៃញុបញជុនពាង់តាកោរាញក្វ៝ង់ពីលាត នើស គៃមាងខឹតពាង់។ ពីលាត អុចមាបើកអោឞាល់ យើនមាផូងកោរាញខាន់អៃមៃរាលាច់ឞើសនាប់ពីលាត លាសមអារ់លើយពាង់។
14 ខាន់ពាង់រាលាច់មោគឹតនាល់ពាង់អីក្ល៝សអ្វែសអីឆ៝ង់។ តីសមាគែសទូហ្វេឞូនុយ្សទោយ្សអីវៃងខឹតឞូនៃ ខាន់ពាង់ទាន់មអើកច្រាវ។
15 កោរាញឞ្រាសកើបខាន់អៃមៃជេងឞូនុយ្សងខឹតលើយកោរាញយេឆូ អីតើមនាវរេស យើនមាកោរាញឞ្រាសរាក្លាយ្សពាង់អ៝ន់ទ៝ក់រេស។ ហេនអ្យាឞូនុយ្សតើមមឞើសនាវអីនៃ។
16 យ៝រមាហេនញឆីងមាកោរាញយេឆូ ពាង់ជានអ៝ន់ឞូនុយ្សអីខាន់អៃមៃឆៃអ្យាទឹងគែសមាគែសឆ្វានទាង់។ ឞូនុយ្សអីនៃខាន់អៃមៃលែៈគឹតនាល់ជេស យ៝រនាវញឆីងមាកោរាញយេឆូ ទឹងឞាសពាង់អីលែៈខាន់អៃមៃឆៃអ្យា។
17 ហើយអ៝សនោ គ៝ប់លែៈគឹតខាន់អៃមៃ នទ្រែលមាផូងកោរាញខាន់អៃមៃងខឹតកោរាញយេឆូ នើសមោអោសគឹតឆាក់។
18 លែៈនាវអីខាន់អៃមៃជាននៃជេងកោរាញឞ្រាសនើមអ៝ន់ហ៝ចងាន់ ជេងទីដាសនាវពាង់លែៈជេសងក៝ចអ៝ន់មាលែៈឞូនុយ្សនតើយ្សនាវងើយពាង់កាល់អែនើស ខាន់ពាង់ញចីស៖ ឞ្រាសក្រីស អីពាង់លែៈត៝នញជុននើស អ្យាត់មាទើននាវជេរជ៝ត់ នទ្រែលមានាវខឹតរ៝។
19 លាសនទ្រីអ៝ន់ខាន់អៃមៃរាគ៝ល់ហ៝ម់នូយ្សនហ៝ម់អ្យើស ព្លឹឆឹតមាកោរាញឞ្រាសហ៝ម់ គៃមាពាង់យោៈនអាចមោហោមកើបនាវតីសខាន់អៃមៃ។
20 លាសខាន់អៃមៃរាគ៝ល់លើយនូយ្សនហ៝ម់អ្យើស កោរាញឞ្រាសអ៝ន់នាវទាង់មហែតានូយ្សនហ៝ម់ខាន់អៃមៃ។ កោរាញឞ្រាសញជ្វាល់ឞ្រាសក្រីស តានែសនតូអ្យា កោរាញឞ្រាសលែៈកើយ្សជេសពាង់ពាង់អីនៃកោរាញយេឆូ ។
21 អាបៃអ្យាអ្យាត់មាកោរាញយេឆូ ហោមគុតានតុកកោរាញឞ្រាសតាកាលើត្រោក នហ៝មាត៝ត់កោរាញឞ្រាសងក្រាតៃទឹងលែៈនទើពាង់លែៈជេសញជេងនើស កើតនាវពាង់លែៈដាៈមាឞូនុយ្សនតើយ្សនាវងើយពាង់កាល់អែនើសមឞើសមាផូងអូចែខាន់អៃមៃ។
22 មោឆេ កាល់អែនើស លែៈញចីសមាឞ្រាសក្រីស កើតនអា៖ «កោរាញឞ្រាសអីឞ្រាសខាន់អៃមៃយើកមឞាស ជឹតនាប់តៃពាង់អ៝ន់គែសទូហ្វេជឹតឞូនុយ្សនតើយ្សនាវងើយកោរាញឞ្រាសតឹមឞានមាគ៝ប់ ពាង់អ៝សនោខាន់អៃមៃ។ អ៝ន់ខាន់អៃមៃអ្យាត់លែៈនាវពាង់មឞើស។
23 ឞូម៝សអីមោអ្យាត់នាវពាង់អីនៃ ពាង់ងគ្រ៝សលើយឞូនុយ្សអីនៃឞើសផូងអីឆ្រាអែល អីប៝នលានពាង់នើម»។
24 ទឹងលែៈឞូនុយ្សនតើយ្សនាវងើយកោរាញឞ្រាសកាល់អែនើស នតើមឞើសឆាម់មោអែល ខាន់ពាង់ងក៝ចល៝រលែៈនទើអីលែៈគែសតារានោកអាបៃអ្យា។
25 ទឹងលែៈនាវអីឞូនុយ្សនតើយ្សនាវងើយកោរាញឞ្រាសកាល់អែនើសត៝ន នទើអីនៃត៝នមាខាន់អៃមៃដ៝ង់។ ជេសរីនាវតឹមរាង្លាប់កោរាញឞ្រាសនទ្រែលអូចែខាន់អៃមៃនើស ពាង់ហោមតឹមរាង្លាប់នទ្រែលខាន់អៃមៃដ៝ង់នោកពាង់មឞើសមាអាឞ្រាហាម់ នើស៖ «ទឹងលែៈរានាក់វ៝ល់តានែសនតូអ្យា គ៝ប់អ៝ន់គែសជេងតាៈឞើសរាន៝យទែសមៃ»។
26 កើតនទ្រីកោរាញឞ្រាសញជ្វាល់កោរាញយេឆូ តានែសនតូអ្យា គៃមាអ៝ន់នាវគែសជេងមាខាន់អៃមៃ អុចកើលខាន់អៃមៃឞាសជាននទើអ្យើស អ៝ន់ខាន់អៃមៃឞ្លាវជាននទើអីពាង់អុចច្រាវ។ ពាង់ញជ្វាល់កោរាញយេឆូ អីក៝នពាង់នើមអ៝ន់មាខាន់អៃមៃអីផូងអីឆ្រាអែល ល៝រ”។ នទ្រីនាវពេត្រោស មឞើសមាខាន់ពាង់តានៃ។