3
នាវឆើមកើលជានការនទ្រែលអ៝ន់មាកោរាញឞ្រាស
1 អើអ៝សនោតានាវញឆីង អាល៝រនើសគ៝ប់មោអោសទើយងើយដាសខាន់អៃមៃតឹមឞានមាងើយដាសឞូនុយ្សអីលែៈគឹតវ៝ត់នាវឞ្រាសហ្វេងអ្វែស។ គ៝ប់ងើយដាសខាន់អៃមៃនើសតឹមឞានមាងើយដាសឞូនុយ្សមោញឆីង មោលាសតឹមឞានមាងើយដាសឞូនុយ្សអីមហែឆឹតញឆីងអីតឹមឞានមាអ៝សឞេ។
2 គ៝ប់តឹមឞានមាមពូខាន់អៃមៃមាទាកត៝ស គ៝ប់មោអោសអ៝ន់ខាន់អៃមៃឆានទើទាង់ យ៝រលាសខាន់អៃមៃអេហ៝ៈទើយឆានើស។ ឞ៝លលាសត៝ត់អាបៃអ្យាខាន់អៃមៃហោមអែអេហ៝ៈទើយឆាដ៝ង់
3 យ៝រលាសខាន់អៃមៃហោមគែសនូយ្សនហ៝ម់នាវមឹនតឹមឞានមាឞូនុយ្សអីមោញឆីងកើតអើម។ តាផូងខាន់អៃមៃហោមគែសនាវតឹមមោនាច តឹមរាលាច់។ នាវអីនៃញហើខាន់អៃមៃហោមគែសនូយ្សនហ៝ម់នាវមឹនតឹមឞានមាឞូនុយ្សអីមោញឆីង ហោមគុរេសតឹមឞានមាឞូនុយ្សអីមោញឆីង។
4 នោកទូហ្វេឞូនុយ្សលាស៖ «គ៝ប់អ្យាអីក៝នឆៅពោល !» ជេសរីទូហ្វេឞូនុយ្សជឹតលាស៖ «គ៝ប់អ្យាអីក៝នឆៅអាពោលុស !» នាវអីនៃតឹមទីមានាវគុរេសឞូនុយ្សអីមោញឆីងងាន់។
5 លាសនទ្រីអាពោលុស ពាង់ឞូម៝ស? គ៝ប់ពោល ឞូម៝ស? ហេនឞារហៃជេងឞូនុយ្សឆើមកើលជានការអីលែវខាន់អៃមៃគែសនាវញឆីងនើស ហេនជានការតឹងនទើអីកោរាញឞ្រាសដាៈមាហេនជានទើម។
6 គ៝ប់តឹមឞានមាឞូនុយ្សមាតាម់ យ៝រលាសគ៝ប់លែវខាន់អៃមៃឆឹតញឆីង ជេសរីអាពោលុស ជេងតឹមឞានមាឞូនុយ្សមាត៝ៈទាក យ៝រលាសពាង់នតីខាន់អៃមៃឞើសកើយ អីនាវជេងតាៈឞើសកោរាញឞ្រាសនើមអ៝ន់។
7 លាសនទ្រីឞូនុយ្សតាម់ នទ្រែលមាឞូនុយ្សត៝ៈទាកមោអោសគែសនាវខ្លៃ កោរាញឞ្រាសនើមទើមអីអ៝ន់ជេងគែសនាវខ្លៃ។
8 ឞូនុយ្សតាម់ នទ្រែលមាឞូនុយ្សត៝ៈទាកគែសនាវអុចតឹមឞានទើម ជេសរីខាន់ពាង់មរាឆ៝ៈទើននទើងខោមតឹងនទើអីខាន់ពាង់នើមលែៈជាន។
9 ឞារហៃហេនជេងឞូនុយ្សឆើមកើលជានការនទ្រែលមាកោរាញឞ្រាស។ ខាន់អៃមៃជេងតឹមឞានមាមីរកោរាញឞ្រាស ជេងតឹមឞានមាជៃអីកោរាញឞ្រាសនើមជាន។
10 តាៈឞើសនាវអ្វែសកោរាញឞ្រាស ពាង់លែៈអ៝ន់ជេសមាគ៝ប់ជេងតឹមឞានមាទូហ្វេឞូនុយ្សអីទុតឞ្លាវជានជៃ ជេសរីគ៝ប់តាម់មែសអ៝ន់អ្វែស។ ឞូនុយ្សអេងជានកាលើនទើគ៝ប់លែៈជាននៃ។ យើនមាឞូម៝សអីជានការជានជៃ អ៝ន់ពាង់ញជ្រាង់មើមបាៈនាវពាង់ជាន។
11 តាជៃកោរាញឞ្រាសទើនគែសមែសអីនៃទើម មែសអីនៃជេងឞ្រាសយេឆូក្រីស មោហោមគែសអោសឞូនុយ្សឞ្លាវតាម់មែសអាអេងជឹត។
12 លាសឞូម៝សឆ៝ៈមាយ្ស ព្រាក់ ពិច តើមឆី ជា រាហែមាជានកាលើមែសអីនៃ
13 តានារកោរាញឞ្រាសវាច់ផាតទោយ្សតៃ នទើអីទូហ្វេទូហ្វេឞូនុយ្សលែៈជាននៃមរាឆៃនហេលរ៝ យ៝រលាសតានារនៃវាច់តឹមឞានមាអុញ ជេសរីអុញអីនៃមរារាល៝ងឆូនទើអីឞូនុយ្សលែៈជេសជានទូហ្វេទូហ្វេឆាក់នើស។
14 លាសឞូម៝សអីនទើពាង់លែៈជានអីនៃហោម ពាង់អីនៃហោមគែសនទើងខោម។
15 លាសឞូម៝សអីនទើពាង់ជានអុញទែឆាលែៈផ្យៅ ពាង់អីនៃរ៝សនទើងខោមដ៝ង់ អីឆាក់ពាង់នើមហោមក្លាយ្ស មោអោសគែសនាវជេរ យើនមាក្លាយ្សតឹមឞានមាឞូនុយ្សហាន់គ្លាត់រ៝ៈអុញទើម។
16 អាសខាន់អៃមៃមោគឹតបាស ឆាក់ខាន់អៃមៃនើមជេងញីសជានឞ្រាសមាកោរាញឞ្រាស! អាសខាន់អៃមៃមោគឹតបាស ឞ្រាសហ្វេងអ្វែសកោរាញឞ្រាសនើមលែៈគុតាខាន់អៃមៃ!
17 ឞូម៝សអីអុចលើសរាយលើយផូងញឆីងមាកោរាញឞ្រាស ពាង់អីនៃតឹមឞានមាឞូនុយ្សលើសរាយលើយញីសជានឞ្រាសមាកោរាញឞ្រាសនើម។ កោរាញឞ្រាសមរាលើសរាយលើយឞូនុយ្សអីនៃដ៝ង់ យ៝រលាសញីសជានឞ្រាសមាកោរាញឞ្រាសនើមជេងក្ល៝សអ្វែសជេងនទើកោរាញឞ្រាសនើម។ ជេសរីខាន់អៃមៃនើមជេងញីសជានឞ្រាសអីក្ល៝សអ្វែសអីនៃ។
18 លើយអោសមរោសអេងឆាក់ខាន់អៃមៃនើម។ លាសឞូម៝សអីកើបអេងឆាក់ពាង់នើមជេងឞូនុយ្សគែសនាវមឹនគឹតឞ្លាវអីផូងមោញឆីងកើបខ្លៃ អ៝ន់ពាង់អីនៃជានឞូនុយ្សអីផូងមោញឆីងកើបរាលូកម៝ល់ប៝ត់ គៃមាពាង់ជេងឞូនុយ្សអីគែសនាវមឹនគឹតឞ្លាវងាន់អីតាៈឞើសកោរាញឞ្រាស
19 យ៝រលាសកោរាញឞ្រាសកើបនាវមឹនគឹតឞ្លាវផូងឞូនុយ្សអីមោញឆីងជេងរាលូកម៝ល់ទើម។ នាវអីនៃតឹមទីតានាវកោរាញឞ្រាសងើយលែៈគែសញចីសលាស៖ «ឞូនុយ្សអីគែសនាវមឹនគឹតឞ្លាវ កោរាញឞ្រាសទ៝ង់នាវមឹនគឹតឞ្លាវឞូនុយ្សអីនៃ គៃមាតេៈទោយ្សឞូនុយ្សអីនៃ»។
20 ជេសរីលែៈគែសញចីសលាសដ៝ង់៖ «កោរាញឞ្រាសលែៈគឹតជេសនាវមឹនផូងអីគែសនាវមឹនគឹតឞ្លាវ ពាង់លែៈគឹតជេសនាវមឹនអីនៃមោអោសគែសនាវខ្លៃ»។
21 លាសនទ្រីលើយអោសអ៝ន់គែសទូហ្វេឞូនុយ្សនហីអេងឆាក់ពាង់នើមយ៝រមាអីនើមនតីពាង់នើម។ ទឹងលែៈនតីលនទើគែសគៃមាគែសនាវខ្លៃមាខាន់អៃមៃទាទេ៖
22 ឞ៝លលាសគ៝ប់ ឞ៝លលាសអាពោលុស ឞ៝លលាសពេត្រោស កាដោយ នែសនតូអ្យា នាវរេស នាវខឹតកាដោយ រានោកអាបៃអ្យា មោលាសរានោកជឹតនាប់តៃកាដោយ ជេងនទើគៃមាគែសនាវខ្លៃមាខាន់អៃមៃទាទេ។
23 ជេសរីខាន់អៃមៃនៃជេងផូងប៝នលានឞ្រាសក្រីស នើម ជេសរីឞ្រាសក្រីស អ្យាត់កោរាញឞ្រាសនើម។