6
នាវផូងញឆីងតឹមនតោនតានតុកផាតទោយ្ស
1 តាផូងខាន់អៃមៃនោកគែសឞារហៃឞូនុយ្សតឹមល៝ក់ឞាល់ មើមទឹងខាន់ពាង់ហាន់ជ៝យតាផូងអីមោញឆីងឆើមផាតទោយ្ស មោអុចអោសជ៝យតាផូងប៝នលានកោរាញឞ្រាសឆើមផាតទោយ្ស?
2 អើមខាន់អៃមៃមោគឹតបាស នារជឹតនាប់តៃ ផូងប៝នលានកោរាញឞ្រាសមរាផាតទោយ្សទឹងលែៈឞូនុយ្សតានែសនតូអ្យា? លាសខាន់អៃមៃមរាផាតទោយ្សទឹងលែៈឞូនុយ្សកើតនៃ លាសនទ្រីមើមទឹងនាវអីជេៈលេៈអ្យាខាន់អៃមៃផាតមោទើយ?
3 អើមខាន់អៃមៃមោគឹតលាស ឞ៝លលាសផូងតោងពារ់ ឞ៝ន់ហោមមរាផាតទោយ្សដ៝ង់? លាសនទ្រីមើមទឹងនទើអីជេៈលេៈតានាវរេសអ្យាខាន់អៃមៃផាតទោយ្សមោទើយ?
4 នោកខាន់អៃមៃតឹមគែសនាវនទ្រាង់ខាន់អៃមៃនើម មើមទឹងខាន់អៃមៃហាន់ជ៝យផូងអីមោញឆីងច្រាវឆើមផាតទោយ្ស? យ៝រលាសផូងញឆីងមោយើកមាផូងអីនៃដ៝ង់។
5 គ៝ប់ងើយកើតនៃ គៃមាអ៝ន់ខាន់អៃមៃដីតព្រេង។ មើមទឹងតាផូងខាន់អៃមៃមោគែសទូហ្វេឞូនុយ្សអីគឹតឞ្លាវមាផាតនាវឞូនុយ្សអីញឆីងតឹមនតោននាវនៃ?
6 យើនមានោកឞារហៃឞូនុយ្សតាផូងញឆីងតឹមនតោនឞាល់ មើមទឹងខាន់អៃមៃហាន់ជ៝យផូងអីមោញឆីងច្រាវឆើមផាតទោយ្ស?
7 នាវអីខាន់អៃមៃតឹមនតោនឞាល់កើតនៃលែៈមោទីជេស។ មើមទឹងមោអ៝ន់ឞូអូយ្សទ្រាប់នទើខាន់អៃមៃ? មើមទឹងមោអ៝ន់នទ្រាង់ខាន់អៃមៃនើមឆ៝ៈមរោសឆាញឆ្យាន់ទ្រាប់នទើខាន់អៃមៃ?
8 តាផូងខាន់អៃមៃនើមលែៈគែសឞូនុយ្សអូយ្សទ្រាប់នទើនទ្រាង់ខាន់អៃមៃនើម អីឆ៝ៈមរោសឆាញឆ្យាន់ទ្រាប់នទើខាន់អៃមៃនើមច្រាវ។
9 អាសខាន់អៃមៃមោគឹតបាស? ឞូនុយ្សអីជានក្វែមោទើយអោសលាប់តានាវកោរាញឞ្រាសម៝ត់អ្វាញ់។ ខាន់អៃមៃលើយវិអោស ផូងអីតឹមទ៝ង់អីខើសក្លែរ ផូងអីយើកមឞាសមារូបឞ្រាស ផូងអីល៝ម់អូរល៝ម់ឆាយ ផូងអីតឹមទ៝ង់នទ្រាង់ឞូក្លោ
10 ផូងអីនតុងឞូ ផូងអីកើញនទើហោអីរ ផូងអីញុលឞ្លឹកឞ្លែក ផូងអីរាកឆ្វាយឞូ ផូងអីនតុងឞូ ទឹងលែៈផូងអីនៃមោទើយអោសលាប់តានាវកោរាញឞ្រាសម៝ត់អ្វាញ់។
11 អាល៝រនើសតាផូងខាន់អៃមៃអាបាៈជេងឞូនុយ្សតឹមឞានកើតអីនៃដ៝ង់ យើនមាអាបៃអ្យាកោរាញឞ្រាសលែៈរាវជេសខាន់អៃមៃលែៈជានខាន់អៃមៃអ៝ន់ក្ល៝ស នអ៝ប់មាជានខាន់អៃមៃលែៈជេងឞូនុយ្សឆ៝ង់យ៝រមាកោរាញយេឆូក្រីស យ៝រមាឞ្រាសហ្វេងអ្វែសកោរាញឞ្រាស កោរាញឞ្រាសអីឞ៝ន់យើកមឞាសនៃ។
នាវទែរមានាវខើសក្លែរ
12 គែសឞូនុយ្សអាបាៈលាស៖ «គ៝ប់គែសនាវទើយមាជានទឹងលែៈរាងោចនទើ» យើនមាទឹងលែៈនទើមោអោសអ៝ន់នាវអ្វែសមាគ៝ប់ទាទេ។ «គ៝ប់គែសនាវទើយជានទឹងលែៈរាងោចនទើ» យើនមាគ៝ប់មោអោសអ៝ន់នទើជានកោរាញមាគ៝ប់។
13 គែសឞូនុយ្សអាបាៈលាស៖ «នទើឆោងឆាមាឆ្យាម់នទុល ជេសរីនទុលមាឆ៝ៈទើននទើឆោងឆាអីនៃ»។ ទីងាន់ ជេសរីកោរាញឞ្រាសមរាងគ្រ៝សលើយនទើលែៈឞារអីនៃអ៝ន់រ៝សហេង។ យើនមាមោអោសទីមានាវខើសក្លែរ រាង្លៃឆាក់មោអោសទីមាជាននទើខើសក្លែរ អ៝ន់ក្ល៝សអ្វែសឆើមកើលជានការរានេកោរាញឞ្រាសនើម ជេសរីកោរាញឞ្រាសនើមអីជេងកោរាញ មារាង្លៃឆាក់ឞ៝ន់ដ៝ង់។
14 កោរាញឞ្រាសលែៈជានអ៝ន់ទ៝ក់រេសកោរាញយេឆូ ពាង់មរាជានអ៝ន់ឞ៝ន់ទ៝ក់រេសមានាវទើយពាង់នើមដ៝ង់។
15 អាសខាន់អៃមៃមោគឹតបាស ឆាក់ជាន់ខាន់អៃមៃជេងតឹមឞាននទើអេងៗតាឆាក់ជាន់ឞ្រាសក្រីស តឹមឞានមាមាត់ តឹមឞានមាតី? លាសនទ្រីអាសទីដ៝ង់ឞ៝ន់ឆ៝ៈនទើអេងៗឞ្រាសក្រីស មាតឹមរាង្លាប់ដាសឞូអូរវាង់តឹរបាស? មោអោស មោទីអោស!
16 អាសខាន់អៃមៃមោគឹតបាស ឞូម៝សអីតឹមទ៝ង់ដាសឞូអូរវាង់តឹរ ពាង់អីនៃជេងទូឆាក់ជាន់ដាសឞូអូរអីនៃដ៝ង់? យ៝រលាសលែៈគែសញចីសតានាវកោរាញឞ្រាសងើយលាស៖ «ឞារហៃខាន់ពាង់ជេងទូរាង្លៃឆាក់»។
17 យើនមាឞូនុយ្សអីគុតឹមរាង្លាប់នទ្រែលកោរាញយេឆូ អីនូយ្សនហ៝ម់នាវមឹនពាង់ជេងតឹមរាង្លាប់នទ្រែលកោរាញយេឆូ ដ៝ង់។
18 អ៝ន់ញច្វាត់ទែរហ៝ម់ឞើសនាវតឹមទ៝ង់នាវខើសក្លែរ។ នាវតីសអាបាៈអេងអីឞូនុយ្សជានមោអោសអ្យើសក្រេបត៝ត់មាឆាក់ជាន់។ យើនមាឞូម៝សអីជាននទើខើសក្លែរ ពាង់អីនៃជានតីសអ្យើសក្រេបត៝ត់មាឆាក់ជាន់ពាង់នើមដ៝ង់។
19 អាសខាន់អៃមៃមោគឹតបាស ឆាក់ជាន់ខាន់អៃមៃនៃជេងញីសជានឞ្រាសអីនតុកឞ្រាសហ្វេងអ្វែសអីក្ល៝សអ្វែសនើមគុ អីខាន់អៃមៃលែៈឆ៝ៈទើនជេសឞើសកោរាញឞ្រាសនើម? ខាន់អៃមៃមោហោមអោសជេងកោរាញមាឆាក់ជាន់ខាន់អៃមៃនើមជឹត
20 យ៝រលាសកោរាញឞ្រាសលែៈត៝ម់រាន៝សខ្លៃអ៝ក់ងាន់មាច្វាយខាន់អៃមៃ។ លាសនទ្រីអ៝ន់ខាន់អៃមៃទ៝ង់ឆាក់ជាន់ខាន់អៃមៃនើមនៃមារានេកោរាញឞ្រាស។