១០
ឞ្រាសយេឆូ ជេងនើមច្យាប់អ្វែស
១ ជេសរីឞ្រាសយេឆូ លាសជឹត៖ “គ៝ប់លាសនហេលនានេៈងាន់មាខាន់មៃ ឞូម៝សលាប់តាត្រោមងគារឞែឞ្យាប់ មោអោសលាប់រ៝ៈមពោងងគារ បេងមាហាវលាប់ងខើងត្រ៝ងអេងច្រាវ ពាង់អីនៃជេងឞូនុយ្សនតុង។
២ យើនមាឞូម៝សលាប់រ៝ៈមពោងងគារ ឞូនុយ្សអីនៃងាន់រ៝ជេងនើមច្យាប់ឞែឞ្យាប់អីគុតាត្រោមងគារអីនៃ។
៣ ឞូនុយ្សម៝ត់ញជ្រាង់ងគារពាង់ឆើមពើកមពោងមានើមច្យាប់ឞែឞ្យាប់អីនៃអ៝ន់លាប់។ ទឹងលែៈឞែឞ្យាប់នាល់ឞ៝រ់មឞូងឞូនុយ្សអីច្យាប់ខាន់ពាង់ទាទេ ឞូនុយ្សអីនៃក្វាល់ទឹងលែៈឞែឞ្យាប់ពាង់នើមនៃតឹងរាញាអេងៗ ជេសរីពាង់លែវឞែឞ្យាប់លោសឞើសទីសងគារនៃ។
៤ ត៝ត់ឞែឞ្យាប់លែៈលោសឞើសទីសងគារលែៈផ្យៅ ពាង់នើមឞ្រោៈឞើសនាប់ ឞែឞ្យាប់តឹងឞើសកើយឞើសកើយពាង់នើម យ៝រលាសទឹងលែៈឞែឞ្យាប់អីនៃលែៈនាល់ឞ៝រ់មឞូងពាង់ទាទេ។
៥ ផូងឞែឞ្យាប់អីនៃមោអោសតឹងឞូអេង ខាន់ពាង់ញច្វាត់ងាយឞើសឞូអេងរ៝ យ៝រលាសខាន់ពាង់មោអោសគឹតនាល់ឞ៝រ់មឞូងឞូអេង”។
៦ ឞ្រាសយេឆូ ងើយនាវនតឹតអីនៃមាផូងផារីឆី អីគុតានៃ យើនមាខាន់ពាង់មោវ៝ត់អោស ម៝សនាវពាង់អុចងើយអីនៃ។
៧ នទ្រីទឹងឞ្រាសយេឆូ ងើយតៃទូតឹជឹតមាខាន់ពាង់៖ “គ៝ប់លាសនហេលនានេៈងាន់មាខាន់មៃ គ៝ប់អ្យាជេងតឹមឞានមាមពោងឞែឞ្យាប់មាលោសលាប់។
៨ ទឹងលែៈនើមនតីផូងអីឆ្រាអែល នទ្រែលមាទឹងលែៈកោរាញផូងអីឆ្រាអែល អីហាន់ល៝រឞើសនាប់គ៝ប់ តីសមានតីងក្លាៈ ខាន់ពាង់ឞូនុយ្សនតុងទាទេ ឞែឞ្យាប់អីនៃមោអ្យាត់អោសឞ៝រ់មឞូងខាន់ពាង់។
៩ គ៝ប់អ្យាតឹមឞានមាមពោង ឞូម៝សលាប់រ៝ៈមពោងអីនៃមរាគែសនាវរាក្លាយ្ស គ៝ប់ម៝ត់ញជ្រាង់ពាង់តឹមឞានមាឞែឞ្យាប់លោសលាប់ឞើសត្រោមងគារឆៃរេបឆាដ៝ង់។
១០ ឞូនុយ្សនតុងវាច់ ពាង់គៃមានតុង មាងខឹត មាលើសញអើសទើម។ យើនមាគ៝ប់វាច់ គៃមាអ៝ន់ឞូនុយ្សគែសនាវរេស គែសនាវរេសទុតអ្វែសងាន់”។
១១ “គ៝ប់អ្យាអីនើមច្យាប់អ្វែស។ នើមច្យាប់អ្វែសពាង់ជាវឆាក់ពាង់នើមអ៝ន់មាឞែឞ្យាប់ពាង់។
១២ ល៝ង់ឞូនុយ្សច្យាប់ជានការគៃមាគែសនទើងខោមទើម មោអោសទីជេងឞូនុយ្សច្យាប់ងាន់ មោអោសទីជេងនើមតើមឞែឞ្យាប់អីនៃ លាសឆៃត៝ត់ឆ៝ឞ្រីវាច់ ពាង់ញច្វាត់នត្លើយឞែឞ្យាប់រ៝ អ៝ន់ឆ៝ឞ្រីកាប់ឆាហេកខាន់ពាង់ នអ៝ប់មាជានអ៝ន់ខាន់ពាង់ញច្វាត់ចាសច្រាយដ៝ង់។
១៣ ពាង់ញច្វាត់នើស យ៝រលាសពាង់ជានការគៃមាគែសនទើងខោមទើម ពាង់មោអោសរាវៃមាឞែឞ្យាប់។
១៤ យើនមាគ៝ប់គ៝ប់នើមច្យាប់អ្វែស គ៝ប់គឹតនាល់ឞែឞ្យាប់គ៝ប់នើម ជេសរីឞែឞ្យាប់គ៝ប់គឹតនាល់គ៝ប់
១៥ តឹមឞានមាឞឹគ៝ប់គឹតនាល់គ៝ប់ ជេសរីគ៝ប់គឹតនាល់ឞឹគ៝ប់ដ៝ង់។ គ៝ប់ជាវឆាក់គ៝ប់នើមអ៝ន់មាឞែឞ្យាប់គ៝ប់។
១៦ គ៝ប់ហោមគែសដ៝ង់ឞែឞ្យាប់អាបាៈអេងមោអោសគុតាត្រោមងគារអ្យា គែសនាវខ្លៃលាសគែសឞូនុយ្សអីមោទីផូងអីឆ្រាអែល មរាជេងផូងប៝នលានគ៝ប់ដ៝ង់ អ្យាត់មាគ៝ប់លែវខាន់ពាង់លាប់តាងគារដ៝ង់។ ខាន់ពាង់អីនៃមរាអ្យាត់ឞ៝រ់មឞូងគ៝ប់។ លាសនទ្រីទឹងលែៈខាន់ពាង់ជេងទូផូងទើម ជេសរីគែសទូហ្វេទើមដ៝ង់នើម ច្យាប់”។
១៧ “ឞឹគ៝ប់រ៝ង់មាគ៝ប់ យ៝រលាសគ៝ប់ជាវឆាក់គ៝ប់នើម គៃមាឆ៝ៈតៃនាវរេស។
១៨ មោគែសអោសទូហ្វេទើយងខឹតគ៝ប់គ៝ប់នើមទើមជាវឆាក់គ៝ប់នើមខឹត។ គ៝ប់គែសនាវទើយជាវឆាក់គ៝ប់នើមខឹត គែសនាវទើយឆ៝ៈតៃនាវរេស។ នាវអីនៃឞឹគ៝ប់លែៈដាៈមាគ៝ប់”។
១៩ នោកនៃមពោលកោរាញផូងអីឆ្រាអែល តឹមងខាសមពោលតៃទូតឹជឹត យ៝រមានាវងើយឞ្រាសយេឆូ អីនៃ។
២០ គែសអ៝ក់ឞូនុយ្សលាស៖ “ពាង់លែៈគែសឞ្រាសអ្យើសគុតាពាង់ពាង់លែៈជេងត្រើយ។ លើយហោមអ្យាត់នាវងើយពាង់”។
២១ យើនមាឞូនុយ្សអាបាៈលាស៖ “នាវងើយអីនៃមោអោសតាៈឞើសឞូនុយ្សគែសឞ្រាសអ្យើសគុតាពាង់ យ៝រលាសឞ្រាសអ្យើសមោទើយអោសជានអ៝ន់ឆៃអាងឞូនុយ្សចែសមាត់”។
ផូងអីឆ្រាអែល មោអោសញឆីងមាឞ្រាសយេឆូ
២២ នោកខៃជីកាត់នៃ តាប៝នយេរូឆាលឹម រីឞូជានញេតបុនលាប់ញីសជានឞ្រាសមាកោរាញឞ្រាស។
២៣ ឞ្រាសយេឆូ ហាន់រាឆ៝ងតាជ៝ង់គូងញីសជានឞ្រាសរ៝ៈនទ្រីងឆាលោមោន រី។
២៤ ជេសរីមពោលកោរាញផូងអីឆ្រាអែល គុជុមឞ្រាសយេឆូ ខាន់ពាង់អោប៖ “ទាសហោមជ៝ៈមៃអុចអ៝ន់ហេនហោមវិវែៈ មៃមោមឞើសនហេលមាហេនមៃឞ្រាសក្រីស មោលាសមោ? លាសមៃឞ្រាសក្រីស ងាន់ អ៝ន់មៃមឞើសហ៝ម់មាហេន”។
២៥ ឞ្រាសយេឆូ លាសមាខាន់ពាង់៖ “គ៝ប់លែៈមឞើសងក៝ចមាខាន់មៃ យើនមាខាន់មៃមោអោសអុចអ្យាត់នាវគ៝ប់។ ទឹងលែៈនាវខ្លៃគ៝ប់ជានតាៈឞើសនាវទើយឞឹគ៝ប់ នទើអីនៃអ៝ន់ខាន់មៃគឹតឆៃ។
២៦ យើនមាខាន់មៃមោអុចអ្យាត់ យ៝រលាសខាន់មៃមោអោសទីប៝នលានគ៝ប់អីតឹមឞានមាឞែឞ្យាប់គ៝ប់នើម។
២៧ ទឹងលែៈឞូនុយ្សអីតឹមឞានមាឞែឞ្យាប់គ៝ប់នើមអ្យាត់ឞ៝រ់មឞូងគ៝ប់។ គ៝ប់គឹតនាល់ខាន់ពាង់ ជេសរីខាន់ពាង់តឹងគ៝ប់ឞើសកើយ។
២៨ គ៝ប់អ៝ន់ខាន់ពាង់នាវរេសនហ៝រ៝ ខាន់ពាង់មោអោសមរារ៝សហេង មោដ៝ង់គែសទូហ្វេទើយពីតខាន់ពាង់ឞើសតីគ៝ប់។
២៩ ឞឹគ៝ប់ទុតក្វ៝ង់រាលាវឞូងាន់ ពាង់អីតើមអ៝ន់ខាន់ពាង់អីនៃមាគ៝ប់ មោគែសអោសទូហ្វេទើយពីតខាន់ពាង់ឞើសតីពាង់។
៣០ គ៝ប់នទ្រែលឞឹគ៝ប់ ជេងង្វាយទើម”។
៣១ មពោលកោរាញផូងអីឆ្រាអែល ទោញលុ គៃមាក្លុបងខឹតឞ្រាសយេឆូ ទូតឹជឹត។
៣២ ឞ្រាសយេឆូ លាសមាខាន់ពាង់៖ “គ៝ប់លែៈជាននទើអ្វែសតាៈឞើសឞឹគ៝ប់នើមអ៝ក់ងាន់ញហើអ៝ន់ខាន់មៃឆៃ លាសនទ្រីម៝សនទើគ៝ប់ជាននទើអីនៃ ទឹងខាន់មៃអុចក្លុបគ៝ប់មាលុ?”
៣៣ ខាន់ពាង់លាសមាពាង់៖ “ហេនក្លុបមៃមាលុ មោគែសអោសយ៝រមាមៃជាននទើអ្វែស អាចមាមៃងើយមឺចរាម៝តកោរាញឞ្រាស យ៝រលាសមៃឞូនុយ្សទើម មៃកើបអេងឆាក់មៃនើមលាសមៃតឹមឞានមាកោរាញឞ្រាស”។
៣៤ ឞ្រាសយេឆូ លាសមាខាន់ពាង់៖ “តានាវវៃខាន់មៃលែៈញចីសលាស៖ «កោរាញឞ្រាសលាស៖ «គ៝ប់មឞើសមាខាន់មៃ ខាន់មៃជេងឞ្រាស»»។
៣៥ តានាវកោរាញឞ្រាសងើយមោគែសអោសនទើង្វាយទើយជូតទើយរាគ៝ល់។ លាសនទ្រីលាសកោរាញឞ្រាសក្វាល់ឞូនុយ្សអីនៃ«ឞ្រាស»តឹមឞានមាពាង់នើម
៣៦ លាសនទ្រីមើមទឹងខាន់មៃលាសគ៝ប់បេងមាងើយមឺចកោរាញឞ្រាស អាចមាគ៝ប់មឞើសឆាក់គ៝ប់នើម៖ «គ៝ប់អ្យាក៝នកោរាញឞ្រាស»? យ៝រលាសគ៝ប់អីអ្យាលែៈកោរាញឞ្រាសទែកើយ្សញជ្វាល់វាច់តានែសនតូអ្យា។
៣៧ លាសនទើគ៝ប់ជានមោអោសទីតាៈឞើសឞឹគ៝ប់ លើយអោសខាន់មៃញឆីងមាគ៝ប់។
៣៨ យើនមាលាសនទើគ៝ប់ជានតាៈឞើសឞឹគ៝ប់ងាន់ អ៝ន់ខាន់មៃញឆីងមាគ៝ប់ហ៝ម់យ៝រមានទើគ៝ប់ជានអីនៃ ឞ៝លលាសខាន់មៃមោញឆីងមានាវគ៝ប់ងើយកាដោយ។ នទ្រីទឹងខាន់មៃគឹតវ៝ត់នហេលឞឹគ៝ប់នើមគុនទ្រែលតាគ៝ប់ ជេសរីគ៝ប់គុនទ្រែលតាឞឹគ៝ប់”។
៣៩ ឞូគៃមាអុចញុបតៃឞ្រាសយេឆូ ទូតឹជឹត យើនមាពាង់ទូលោសឞើសតីមពោលកោរាញផូងអីឆ្រាអែល នៃ។
៤០ ជេសរីពាង់ហាន់តៃកាល់តីទាករាលាយយោរដាន់ រីជឹត នតុកយោហាន-បាប់តែម វៃគុជានបាប់តែមយុកមាទាកអ៝ន់ឞូនើស ពាង់គុតានតុកនៃ។
៤១ គែសឞូនុយ្សអ៝ក់ងាន់វាច់រានតាពាង់ ខាន់ពាង់តឹមលាសនទ្រាង់ខាន់ពាង់៖ “យោហាន-បាប់តែម មោអោសព្រ៝តជាននាវខ្លៃ យើនមាទឹងលែៈនាវយោហាន-បាប់តែម មឞើសងក៝ចមាឞូនុយ្សអីអ្យា ទីទាទេងាន់”។
៤២ តានតុកនៃគែសអ៝ក់ឞូនុយ្សញឆីងមាឞ្រាសយេឆូ ។