នាវមហែមហានអ្វែស
លូកា
ញចីស
នាវឞោកអ៝ន់ឞូគឹតល៝រ
លូកា មោអោសទីផូងអីឆ្រាអែល ឞូមឹនលាសពាង់ឞូនុយ្សផូងគ្រែក ពាង់ជេងទូហ្វេកោរាញទាកឆី(កោល ៤:១៤) ពាង់គែសនតីជ្រូ។ ឞូនុយ្សអីនាក់ញចីសឆ៝ម់បុតតានាវកោរាញឞ្រាសងើយគែសទូហ្វេពាង់ទើមអីមោអោសទីផូងអីឆ្រាអែល ។ ពាង់មោអោសឆៃឞ្រាសយេឆូ មាត្រោមមាត់ពាង់នើម ជេសរីពាង់មោដ៝ង់ជេងកោរាញអ៝សម៝ន យើនមាពាង់ជេងទូហ្វេឞូនុយ្សញឆីងមាឞ្រាសក្រីស នទ្រែលមាពាង់ជេងឞូនុយ្សជានការនទ្រែលកោរាញអ៝សម៝នរាញាពោល នោកពោល ហាន់មឞើសងក៝ចនាវមហែមហានអ្វែសលាមនតុកផូងរោម ម៝ត់អ្វាញ់ ពាង់ញចីសនទើអីពាង់តាង់ឞើសពោល នអ៝ប់មាពាង់អោបឞើសឞូនុយ្សអាអេង។
លូកា លែៈញចីសឆ៝ម់បុត«នាវមហែមហានអ្វែសលូកា ញចីស»អ្យា នទ្រែលមាឆ៝ម់បុត«ការមពោលកោរាញអ៝សម៝ន»។ ពាង់ញចីសឆ៝ម់បុតអ្យាក្លាប់លាស ៣០ នាម់ជេសឞ្រាសយេឆូ ទ៝ក់រេស តានាម់ ៦០-៦៥ យើនមាឞូនុយ្សអាបាៈមឹនលាសគែសញចីសឞើសកើយនៃ គែសញចីសអេល៝រមានាម់ ៩០។
លូកា ញចីសឆ៝ម់បុតពាង់អ៝ន់មាទូហ្វេឞូនុយ្សរាញាថេវផីល ជេងឞូនុយ្សក្វ៝ង់ យើនមាឞ៝ន់មោហោមអោសគឹតនាវអេងតាថេវផីល ។ នាវលូកា ងក៝ច ពាង់ងក៝ចនតើមឞើសតោងពារ់មឞើសងក៝ចមានាវទែសយោហាន-បាប់តែម អ៝ន់មាឆាការី អីឞឹពាង់ ជេសរីមឞើសងក៝ចមានាវទែសឞ្រាសយេឆូ អ៝ន់មាមារី អីមេៈពាង់ នហ៝មាត៝ត់ឞ្រាសយេឆូ ទ៝ក់រេស ជេសរីហាវឆឹតតាកាលើត្រោក។
នាវអុចនត្រ៝ង់លូកា
លូកា ញចីសឆ៝ម់បុតពាង់ គៃមាអ៝ន់កោរាញថេវផីល គឹតនាល់ទឹងលែៈនាវអីពាង់លែៈតាង់ឞូនតីលាសមាឞ្រាសយេឆូក្រីស នើស នាវអីនៃជេងទីងាន់(លក ១:៤)។ លូកា ញចីសអ៝ក់មានាវមឞើសឆើម មាឞ្រាសហ្វេងអ្វែស នទ្រែលមានាវកោរាញឞ្រាសយោៈនាវតីសឞូនុយ្ស។ ទូហ្វេពាង់ទើមញចីសអ៝ក់មាផូងឞូអូរអីតឹងឞ្រាសយេឆូ ។
មឞើសនាវខ្លៃតាងកោៈតាឆ៝ម់បុតអ្យា
- នាវឞោកអ៝ន់ឞូគឹតនាល់ល៝រ (១:១-៤)
- នាវទែសយោហាន-បាប់តែម នទ្រែលមានាវទែសឞ្រាសយេឆូ (១:៥-២:៥២)
- នាវយោហាន-បាប់តែម មឞើសងក៝ច (៣:១-២០)
- ឞ្រាសយេឆូ ឆ៝ៈទើននាវបាប់តែមយុកមាទាក នទ្រែលមាទើយឞើសនាវនទើម (៣:២១-៤:១៣)
- ឞ្រាសយេឆូ មឞើសងក៝ចនាវមហែមហានអ្វែសតាឞ្រីកាលីលេ (៤:១៤-៩:៥០)
- ឞ្រាសយេឆូ លោសឞើសឞ្រីកាលីលេ ហាន់តាយេរូឆាលឹម (៩:៥១-១៩:២៧)
- ពើសងគ្លែៈទុតតាប៝នយេរូឆាលឹម នទ្រែលមាប៝នជេៈៗអីទាច់ច្យៅមានៃ (១៩:២៨-២៣:៥៦)
- ឞ្រាសយេឆូ ទ៝ក់រេសជេសពាង់ខឹត នទ្រែលមាញហើឆាក់ពាង់នើមអ៝ន់មាឞូនុយ្សញឆីងមាពាង់ (២៤:១-៥៣)
1
នាវឞោកអ៝ន់ឞូគឹតនាល់ល៝រ
1-2 ទាន់កោសមឞាសលាសអ្វែសមាកោរាញថេវផីល អ៝ន់គឹត! គែសអ៝ក់ឞូនុយ្សអីឆៃមាមាត់អ៝ក់នតីលនាវឞ្រាសយេឆូ ជាន នតើមពាង់នតុមនតីមាឞូនុយ្ស។ ជេសរីឞូនុយ្សអីនៃនហ៝មាជានការមឞើសងក៝ចនាវកោរាញឞ្រាស។ គែសអ៝ក់ឞូនុយ្សតាង់នាវខាន់ពាង់មឞើសងក៝ចនៃ ជេសរីញចីសនាវអីនៃអ៝ន់មាហេនគឹត។
3 ល៝ង់គ៝ប់មេតអ្វាញ់ទឹងលែៈនាវអីនៃទុតនហេលនានេៈងាន់។ គ៝ប់គឹតនាវអ្យាទីងាន់ញចីសអ៝ន់នហេលងាន់គៃមាញជ្វាល់អ៝ន់មៃដ៝ង់
4 អុចអ៝ន់មៃគឹតនាល់ទឹងលែៈនាវអីមៃលែៈតាង់ឞូនតីលាសមាមៃនើស នាវអីនៃជេងទីងាន់។
តោងពារ់មឞើសនាវទែសយោហាន-បាប់តែម
5 នោកហេរោត ជេងកាដាច់ម៝ត់អ្វាញ់តាឞ្រីយូដា នោកនៃគែសដ៝ង់ទូហ្វេឞូនុយ្សជានឞ្រាសរាញាពាង់ឆាការី អូរពាង់រាញាអេលីឆាបិត លែៈឞារហៃខាន់ពាង់រាន៝យទែសអារោន អីឞូនុយ្សជេងកោរាញជានឞ្រាសល៝រឞូតាផូងអីឆ្រាអែល ។ នោកនៃមពោលជានឞ្រាសគែស ២៤ មពោលតឹមព្លែសជានការតាញីសជានឞ្រាសមាកោរាញឞ្រាសតាប៝នក្វ៝ង់យេរូឆាលឹម ឆាការី គុតាមពោលរាញាអាបីយា ។
6 លែៈឞារហៃអូរឆាយនៃកោរាញឞ្រាសកើបខាន់ពាង់ជេងឞូនុយ្សឆ៝ង់ឆ្រាង់ងាន់ ញអោតន៝ប់ទឹងលែៈនាវកោរាញឞ្រាសដាៈ ជានទីទាទេមោអោសទូនតីលតីស។
7 តីសមាខាន់ពាង់មោគែសក៝ន យ៝រលាសអេលីឆាបិត អីឞូអូរមោឞាៈក៝ន ឆាក់ជាន់ខាន់ពាង់លែៈរាញដ៝ង់។
8 ត៝ត់ទីនារព្លែសមពោលជានឞ្រាសមពោលអាបីយា លាប់ជានការតាជ៝ង់គូងញីសជានឞ្រាសមាកោរាញឞ្រាស នារនៃឆាការី ឞូនុយ្សជានឞ្រាសគែសលាប់ជានការតាញីសនៃដ៝ង់។
9 តឹងនាវវៃជានមពោលជានឞ្រាស ខាន់ពាង់កើយ្សទូហ្វេឞូនុយ្សមានទើញច្រ៝ស ទីតាព្លាង់ឆាការី ជេសរីពាង់លាប់ឆូនទើបោកាសតាត្រោមញីសជានឞ្រាសរី។
10 ជេសរីឆាការី លាប់តាត្រោមនៃ ឆូនទើបោកាស ឞើសទីសអ្យាគែសអ៝ក់ឞូនុយ្សគុមឞើសឆើម។
11 ទូនហ៝ម់តានៃពាង់ឆៃទូហ្វេតោងពារ់តាៈឞើសកោរាញឞ្រាស ទ៝ក់ឞើសមាញឆឺងមាគុចនទើបោកាសរី។
12 ត៝ត់មាឆៃកើតនៃ ពាង់នទ្រ៝ត់ព្រោស ក្លាចទុតញឆ៝រ់ងាន់។
13 ជេសរីតោងពារ់លាសមាពាង់៖ “ហើយឆាការី លើយក្លាចអោស! កោរាញឞ្រាសអ្យាត់កើតនាវមៃលែៈជេសទាន់ នារជឹតនាប់តៃអូរមៃគែសទូហ្វេក៝នឞូក្លោ អ៝ន់មៃតេៈរាញាក្វាល់ពាង់ «យោហាន »។
14 ក៝នអីនៃមៃរាម់រាហើនហោងាន់ ជេសរីគែសអ៝ក់ឞូនុយ្សដ៝ង់រាម់មអាកពាង់ទែស
15 យ៝រលាសកោរាញឞ្រាសកើបក៝នអីនៃខ្លៃហោងាន់ងេន។ លើយអោសអ៝ន់ពាង់ញេតនទ្រាញ់ មោលាសទូនតីលនទើញុល ទូតឹមោអ៝ន់ដ៝ង់។ ឞ្រាសហ្វេងអ្វែសអីក្ល៝សអ្វែសគុតាពាង់នតើមឞើសនទុលមែរ៝។
16 ជេសរីពាង់លែវប៝នលានអីឆ្រាអែល អ៝ក់ឞូនុយ្សរាគ៝ល់លើយនូយ្សនហ៝ម់អ្យើសព្លឹឆឹតមាកោរាញឞ្រាសអីឞ្រាសខាន់ពាង់នើម។
17 ពាង់វាច់ល៝រឞើសនាប់កោរាញឞ្រាស នហ៝មាគែសឞ្រាសហ្វេងអ្វែសគុតាពាង់តឹមឞានមាឞូនុយ្សនតើយ្សនាវងើយកោរាញឞ្រាសកាល់អែនើស រាញាអេលីយា គែសនាវទាង់តឹមឞានមាអេលីយា នៃដ៝ង់។ ក៝នមៃអីនៃរាព្លឹនូយ្សនហ៝ម់ឞឹអ៝ន់ព្លឹរ៝ង់មាក៝នពាង់នើម យ៝រមាឞ្រាសហ្វេងអ្វែសគុតាពាង់។ គែសអ៝ក់ឞូនុយ្សមោអ្យាត់នាវកោរាញឞ្រាស ក៝នមៃអីនៃរាគ៝ល់នូយ្សនហ៝ម់អ្យើសខាន់ពាង់ព្លឹឆឹតមាកោរាញឞ្រាសជេងឞូនុយ្សឆ៝ង់ឞូនុយ្សអ្វែស កើតនទ្រីពាង់នទ្រាប់ឞូនុយ្សទូផូងអ៝ន់មាវើតទើនកោរាញឞ្រាសដ៝ង់”។
18 ឆាការី អោបតោងពារ់អីនៃលាស៖ “មើមជានហាៈ ទឹងគឹតនាវនៃហ៝ចងាន់? យ៝រលាសឆាក់គ៝ប់អ្យាលែៈរាញជេស នាម់អូរគ៝ប់លែៈអ៝ក់ដ៝ង់”។
19 តោងពារ់ព្លឹអើសមាពាង់៖ “គ៝ប់អ្យារាញាកាព្រីយែល អីកោរាញតោងពារ់កើលជានការមាកោរាញឞ្រាស ពាង់ដាៈគ៝ប់លែវនាវអ្វែសអ្យាមឞើសអ៝ន់មៃ។
20 នាវអ្យាគែសងាន់ត៝ត់ទីនាររីតៃ តីសមាមៃមោអ្យាត់អោសនាវគ៝ប់មឞើសងក៝ចនើស។ អ្វាញ់មៃតៃជេងឞូនុយ្សមល៝ងើយមោឞ្លាវអោស នហ៝មាត៝ត់អូរមៃគុអ៝ស”។
21 ឞូនុយ្សគុក៝ប់ឆាការី ឞើសទីសរី មោវ៝ត់អោសម៝សនាវគុជ៝ៈពាង់តាត្រោមញីសជានឞ្រាសរី។
22 ជេសរីឆាការី លោសអាទីសអ្យា ពាង់ងើយដាសឞូមោឞ្លាវអោស។ ពាង់ញច៝ង់មាតីទើមគៃអ៝ន់ឞូគឹតអីនាវពាង់ឆៃរីនើស។ ត៝ត់ឆៃពាង់ញច៝ង់នទ្រី ខាន់ពាង់គឹតវ៝ត់នទើសនើសតាត្រោមញីសជានឞ្រាសនៃ ឆាការី គែសឆៃនទើតាៈឞើសកោរាញឞ្រាសងាន់រ៝។
23 ពាង់អេហ៝ៈលែៈនារឆឹតអោស ហោមគុជានការតាញីសជានឞ្រាសអីនៃជឹត ត៝ត់ទីលែៈនារឞាសជានការ ជេសរីពាង់ព្លឹឆឹតអាប៝នពាង់នើមរី។
24 កាសអាកើយរីឆៃអូរពាង់នត្រែវ ជេសរីអីអូរពាង់គុងាន់តាជៃពាង់នើមរីជ៝ៈព្រាម់ខៃលិចលោសទីសអីសនារអោស។ ជេសរីពាង់លាស៖
25 “នាវនត្រែវគ៝ប់អ្យាតាៈឞើសកោរាញឞ្រាសទើមអ៝ន់មាគ៝ប់ ពាង់ជានគ៝ប់ អាបៃអ្យាមោហោមអោសដីតព្រេងឞូជឹត!”
តោងពារ់មឞើសនាវទែសឞ្រាសយេឆូ
26 ត៝ត់អេលីឆាបិត នត្រែវក្លាប់គែសព្រាវខៃ កោរាញឞ្រាសដាៈតោងពារ់រាញាកាព្រីយែល ហាន់តាប៝ននាឆារែត ឞ្រីកាលីលេ
27 គៃមាម៝ប់ទូហ្វេឞូទ្រោស រាញាពាង់មារី ។ ឞូទ្រោសអីនៃពាង់លែៈជាននទ្រោយដាសទូហ្វេឞូនទាម់ រាញាពាង់យោឆែប អីចែពាង់កាល់អែនើសកាដាច់ដាវីត ដ៝ង់។
28 ជេសរីតោងពារ់អីនៃលាប់តាត្រោមជៃមារី ពាង់លាស៖ “ហើយយោសមារី អ្វែសលាង់អៃឞើស! កោរាញឞ្រាសលែៈកើយ្សទូហ្វេអៃទើម អ៝ន់នាវគែសជេងមាអៃលើមាក្វ៝ង់លើមាព្រេសងាន់ ពាង់គុនទ្រែលអៃដ៝ង់”។
29 ត៝ត់មារី តាង់កើតនៃពាង់មោអោសគឹតវ៝ត់ គែសនាវរាវៃងាន់ ជេសរីងក្ល៝ន់អេងតាឆាក់ពាង់នើម៖ “ម៝សបាៈគែសនាវខ្លៃងើយព្រែអីនៃនើស?”
30 ជេសរីតោងពារ់លាសមាពាង់ជឹត៖ “អើយមារី លើយអៃក្លាចអោស កោរាញឞ្រាសកើយ្សអៃ គៃអ៝ន់នាវគែសជេងក្វ៝ង់ហោងាន់។
31 អៃតៃនត្រែវ ជេសរីគែសទូហ្វេក៝នឞូក្លោ អ៝ន់អៃតេៈរាញាពាង់ក្វាល់ «យេឆូ »។
32 ក៝នអ្យាគែសនាវខ្លៃនាវទើយហោងាន់ងេន ឞូក្វាល់ពាង់លាស៖ «ក៝នកោរាញឞ្រាសអីទុតព្រេស» ជេសរីកោរាញឞ្រាសអ៝ន់ក៝នអីនៃជេងកាដាច់មាផូងអីឆ្រាអែល តឹមឞានមាកាដាច់ដាវីត អីចែពាង់កាល់អែនើស។
33 យើនមាពាង់តៃជេងកោរាញម៝ត់អ្វាញ់ប៝នលានអីឆ្រាអែល អីក៝នឆៅរាន៝យទែសយាកោប នហ៝រ៝ ពាង់ម៝ត់អ្វាញ់មោអោសឞ្លាវលោចឞ្លាវទុត”។
34 ជេសរីមារី អោបតោងពារ់អីនៃលាស៖ “មើមជានមេសទឹងគែសនាវអ្យាត៝ត់ងាន់រ៝ យ៝រលាសគ៝ប់អេហ៝ៈគែសឆាយ?”
35 តោងពារ់អើស៖ “ឞ្រាសហ្វេងអ្វែសអីក្ល៝សអ្វែសវាច់គុតាអៃ នាវទើយកោរាញឞ្រាសអីទុតព្រេសងកុមអ៝ន់នហ៝ម់មាអៃ អ៝ន់អៃនត្រែវ។ កើតនទ្រីទឹងក៝នអីនៃក្ល៝សអ្វែស ឞូក្វាល់ពាង់ «ក៝នកោរាញឞ្រាស»។
36 ល៝ង់អេលីឆាបិត អីនទុលទែសអៃនើម ឞ៝លលាសពាង់លែៈរាញ នទ្រែលមាឞូលាសពាង់ឞូអូរមោឞាៈក៝នកាដោយលែៈ យើនមាអាបៃអ្យាពាង់លែៈនត្រែវក៝នឞូក្លោក្លាប់លាសគែសព្រាវខៃជេស
37 យ៝រលាសមោគែសអោសទូនតីលនទើកោរាញឞ្រាសមោឞ្លាវជាន”។
38 មារី អើស៖ “គ៝ប់អ្យាអុចជានតឹងទឹងលែៈនាវកោរាញឞ្រាស អ៝ន់ត៝ត់ងាន់កើតនាវអីមៃលាសរី!” ជេសរីតោងពារ់ទូលោសឞើសនតុកនៃ។
មារី ហាន់ខ៝ល់អេលីឆាបិត
39 ជេសរីមារី ទ៝ក់នទាលឞើសនតុកនៃ ហាន់ឞ្រុលរ៝ជឹតប៝នឆាការី គុរីតាឞ្រីយោក នតុកឞ្រីយូដា រី។
40 ត៝ត់តាជៃឆាការី រីពាង់អោបនាវអ្វែសលាង់មាអេលីឆាបិត ។
41 ត៝ត់តាង់មារី អោបនៃ ទោមាមព៝ត់រ៝អីក៝នតាត្រោមនទុលអេលីឆាបិត រី។ ជេសរីឞ្រាសហ្វេងអ្វែសអីក្ល៝សអ្វែសគុងាន់តាអេលីឆាបិត នៃរ៝
42 អ៝ន់នាវពាង់លាស ជេសរីពាង់ងើយនតែសៗងាន់៖ “កោរាញឞ្រាសលែៈអ៝ន់នាវគែសជេងទុតអ្វែសមាអៃអ៝ក់រាលាវមាដាសទឹងលែៈឞូអូរអេងជឹត នហ៝ពាង់អ៝ន់នាវគែសជេងមាក៝នតាត្រោមនទុលអៃនៃដ៝ង់។
43 ម៝សគែសនាវខ្លៃតាគ៝ប់អ្យាហៃ ទឹងគែសមាឞូអូរអីមែកោរាញគ៝ប់នើមហាន់ខ៝ល់គ៝ប់!
44 គ៝ប់គឹតនាល់រីនើស យ៝រលាសក៝នតាត្រោមនទុលគ៝ប់មព៝ត់រាម់មអាកងាន់រ៝ ត៝ត់គ៝ប់តាង់នាវអៃអោបអ្វែសលាង់នើស។
45 អៃលាបងាន់យ៝រមាអ្យាត់នាវកោរាញឞ្រាសលាសអីនៃត៝ត់មាអៃងាន់រ៝ អ៝សអេ”។
នាវមព្រើឞូទ្រោសមារី
46 ជេសរីមារី មព្រើលាស៖
“នូយ្សនហ៝ម់គ៝ប់រានេមាកោរាញឞ្រាស។
47 គ៝ប់រាម់មអាកហោងាន់មាកោរាញឞ្រាសអីនើមរាក្លាយ្សគ៝ប់
48 យ៝រលាសកោរាញឞ្រាសហោមកើយ្សគ៝ប់អីឞូនុយ្សប៝នលានទើមក៝ប់អ្យាត់នាវកោរាញឞ្រាស។
នតើមឞើសអ្យាជឹតនាប់តៃអាប់រានោកឞូនុយ្ស ឞូក្វាល់គ៝ប់អីឞូអូរលាបងាន់ងេន
49 យ៝រលាសកោរាញឞ្រាសអីគែសនាវទើយអ៝ន់នទើនាវខ្លៃងាន់មាគ៝ប់។
កោរាញឞ្រាសក្ល៝សអ្វែសងាន់ងេន
50 ពាង់យោៈនអាចមាឞូម៝សអីក្លាចអ្យាត់នាវកោរាញឞ្រាស
នហ៝រ៝ត៝ត់អាប់រានោកឞូនុយ្ស
51 នទ្រែលមាញហើនាវទាង់ពាង់
នត្រុតលើយឞូនុយ្សអីកើបអេងឆាក់ពាង់នើមក្វ៝ង់។
52 ពាង់នអុសលើយកាដាច់គែសនាវទើយងាន់អ៝ន់ជេងឞូនុយ្សប៝នលានទើម
ជេសរីពាង់នហាវឞូនុយ្សអីប៝នលាន។
53 ពាង់អ៝ន់គែសរាមែសលែរមាឞូនុយ្សជីង៝តជីហីរ
តីសមាឞូនុយ្សនទ្រ៝ង់ក្វ៝ង់អ៝ន់ឆឹតទើម តឹងកោរាញឞ្រាសនើមអុច។
54 ពាង់កើលប៝នលានអីឆ្រាអែល អីផូងជានការអ្យាត់នាវកោរាញឞ្រាសនើម
យ៝រមាហោមកាសគឹតនាវយោៈនអាចពាង់។
55 ពាង់ជានកើតនអាតឹងនាវពាង់ត៝នមាចែអាឞ្រាហាម់ កាល់អែនើស
នហ៝មាត៝ត់ក៝នត៝ត់ឆៅអាឞ្រាហាម់ នហ៝រ៝”។
នទ្រីនាវមព្រើមារី ។
56 ពាង់គុនទ្រែលអេលីឆាបិត ក្លាប់លាសគែសពែខៃ រីមើព្លឹឆឹតអាជៃពាង់នើម។
នាវទែសយោហាន-បាប់តែម
57 ត៝ត់អេលីឆាបិត អាប់ខៃជេស ពាង់គុអ៝សក៝នឞូក្លោ។
58 ឞូងក៝ចដើននាវអូលែៈរាញអីនៃហោមគែសក៝នអ៝ន់លែៈមពោលច្យៅមែង នទ្រែលមាឞាល់មពោលពាង់នើសគឹត។ ជេសតាង់លឺកោរាញឞ្រាសយោៈនអាចមាពាង់ហោងាន់ងេនកើតនអា ខាន់ពាង់រាម់មអាកនទ្រែលពាង់ទាទេ។
59 ត៝ត់អ៝សឞេអីនៃលែៈគែសផាមនារ លែៈឞាល់មពោលឞារហៃអូរឆាយខាន់ពាង់ នទ្រែលមាឞូនុយ្សច្យៅមែងហាន់រានតាខាន់ពាង់ដ៝ង់ តឹងនាវវៃផូងអីឆ្រាអែល អ៝ន់ឞូក៝សនតោមាក៝នឞេអីនៃ ងក្រែមាអុចតេៈរាញាពាង់ ក្វាល់ «ឆាការី » កើតរាញាអីឞឹពាង់នើមដ៝ង់។
60 តីសមាអីមេៈរីលាស៖ “មោអោស អុចតេៈរាញាពាង់ ក្វាល់ «យោហាន »”។
61 ឞូព្លឹអើសមាពាង់៖ “តឹងមានាវវៃឞ៝ន់មោទីអោស យ៝រលាសតាឞាល់មពោលខាន់អៃមៃមោគែសទូហ្វេរាញាកើតនទ្រី”។
62 ជេសរីឞូអោបឆាការី ញច៝ក់មាតី ម៝សអុចតេៈរាញាអ៝ន់មាក៝នពាង់នៃ។
63 ឆាការី ញច៝ក់ដាៈខាន់ពាង់ឆ៝ៈរាលាតកាដារ ជេសរីញចីសតារីលាស៖ “ក៝នអ្យាតេៈរាញាពាង់ ក្វាល់«យោហាន »”។ លែៈឞូតានៃនទ្រ៝ត់ហីសរាហ៝ល់ទាទេ។
64 ទូនហ៝ម់តានៃឆាការី ឞ្លាវងើយកើតអើមរ៝ ជេសរីពាង់នតែសឞ៝រ់ប្ហ៝ង់រានេកោរាញឞ្រាស។
65 ឞូនុយ្សច្យៅមែងក្លាចទាទេឆៃនាវទាង់កោរាញឞ្រាស។ ឞូលឺនាវអ្យាលាមនតុកប៝នរ៝ៈយោកឞ្រីយូដា នៃ។
66 ឞូម៝សអីតាង់លឺនាវអ្យាពាង់ងក្ល៝ន់អេងតានូយ្សនហ៝ម់ហោងាន់ ជេសរីអោបអេងឆាក់ពាង់នើមលាស៖ “ត៝ត់ក៝នអីនៃលែៈក្វ៝ង់ មើមពាង់ជេង?” ខាន់ពាង់ងើយកើតនទ្រីយ៝រលាសឞូឆៃនាវទើយកោរាញឞ្រាសគុតាក៝នអ្យា។
នាវមព្រើឆាការី
67 ជេសរីឆាការី អីឞឹអ៝សឞេរី ឞ្រាសហ្វេងអ្វែសអីក្ល៝សអ្វែសគុតាពាង់ងាន់ ដាៈពាង់ងើយ យ៝ររីពាង់ងើយតាៈឞើសកោរាញឞ្រាស ពាង់លាស៖
68 “រានេមាកោរាញឞ្រាសអីឞ្រាសផូងអីឆ្រាអែល យើកមឞាស
យ៝រលាសពាង់វាច់អុចរាក្លាយ្សផូងប៝នលានពាង់នើម។
69 កោរាញឞ្រាសអ៝ន់ទូហ្វេឞូនុយ្សគៃមារាក្លាយ្សឞ៝ន់ ឞូនុយ្សអីនៃគែសនាវទើយងាន់
ពាង់រាន៝យទែសកាដាច់ដាវីត អីឞូនុយ្សជានការអ្យាត់នាវកោរាញឞ្រាសកាល់អែនើស ពាង់អីនៃអីឞូក្វាល់ឞ្រាសក្រីស ដ៝ង់។
70 កោរាញឞ្រាសលែៈមឞើសជេសនាវអ្យាអ៝ន់មាឞូនុយ្សនតើយ្សនាវពាង់ងើយកាល់អែនើស។
71 នោកនៃនើសកោរាញឞ្រាសលាស ពាង់មរារាក្លាយ្សឞ៝ន់ឞើសតីផូងរាលាង់ នទ្រែលមាអ៝ន់ឞ៝ន់លោសឞើសមពោលរាងឹមពោលឞ្យាញ់។
72 ពាង់លែៈត៝ននាវយោៈនអាចមាអូចែឞ៝ន់កាល់អែនើស។
នាវតឹមរាង្លាប់ក្ល៝សអ្វែសកោរាញឞ្រាសពាង់មោច្វេលអោស។
73 ពាង់លែៈត៝នងាន់មាអាឞ្រាហាម់ ចែឞ៝ន់កាល់អែនើស
74 ពាង់តៃរាក្លាយ្សឞ៝ន់ឞើសតីផូងរាលាង់
គៃមាឞ៝ន់មោហោមក្លាចជានការអ្យាត់នាវកោរាញឞ្រាស
75 នទ្រែលមាអ៝ន់ឞ៝ន់ជានការនៃឆ៝ង់ឆ្រាង់
តឹមទីដាសនាវកោរាញឞ្រាសអុចនហ៝រ៝អាប់ញជារ់នាវរេស។
76 ល៝ង់ក៝នគ៝ប់អ្យា ឞូតៃលាសពាង់ជេងឞូនុយ្សនតើយ្សនាវងើយកោរាញឞ្រាសអីឞ្រាសទុតព្រេស
យ៝រលាសមៃហាន់ល៝រឞើសនាប់ឞ្រាសក្រីស គៃមានទ្រាប់នូយ្សនហ៝ម់ឞូនុយ្សអ៝ន់មាពាង់តឹមឞានមាឞូក្វាយ្សត្រ៝ងអ៝ន់មាកាដាច់ហាន់។
77 មៃអ៝ន់ប៝នលានអីឆ្រាអែល គឹតនាល់លាសមើមកោរាញឞ្រាសរាក្លាយ្សខាន់ពាង់លោសឞើសនាវតេៈទោយ្ស
មើមកោរាញឞ្រាសយោៈមោហោមអោសកើបមោហោមអោសក្លាប់នទាង់នាវតីសខាន់ពាង់។
78 ពាង់យោៈនអាចឞ៝ន់ហោងាន់
នទ្រីពាង់អ៝ន់ឞ្រាសក្រីស តាៈឞើសកាលើត្រោកនតុកកោរាញឞ្រាសរីជុរវាច់តាឞ៝ន់ តឹមឞានមាប្រីងលោសនារអាអោយ។
79 ឞូនុយ្សអីមោគឹតនាល់កោរាញឞ្រាស ជេងតឹមឞានមាឞូនុយ្សអីគុតានតុកង៝ ឞូនុយ្សអីក្លាចខឹតដ៝ង់ យើនមាឞ្រាសក្រីស វាច់តាអ្យាជេងនាវអាងមាឞូនុយ្សអីនៃ
ពាង់លែវឞ៝ន់រ៝ៈត្រ៝ងដាប់មពាន់”។ នទ្រីនាវឆាការី ងើយ។
80 ល៝ង់យោហាន រីឆាក់ជាន់ពាង់លើមាហាវនទាម់ នាវមឹនគឹតឞ្លាវពាង់លើមាហោដ៝ង់។ ជេសរីពាង់គុរេសតានតុកឞ្រីរាទាសងាយឞើសប៝នអេងៗ នហ៝មាត៝ត់នារពាង់ញហើឆាក់ ជេសរីនតើមនតុមនតីប៝នលានអីឆ្រាអែល នៃគឹត។