13
នាវខ្លៃមារាគ៝ល់នូយ្សនហ៝ម់អ្យើស
1 តានតុកនៃដ៝ង់ គែសឞូនុយ្សអាបាៈតាផូងអីនៃមឞើសមាឞ្រាសយេឆូ មានាវកោរាញពីលាត ទែជាន ខាន់ពាង់លាស៖ “ហើយកោរាញ គែសមពោលកាលីលេ ពីលាត ទែងខឹតខាន់ពាង់តាជ៝ង់គូងញីសជានឞ្រាសមាកោរាញឞ្រាស តានតុកនៃខាន់ពាង់ហោមអែជានឞ្រាស នទ្រីមហាមខាន់ពាង់ហ៝ចលាយដាសមហាមមពោមពា(ឆ្យុម)អីខាន់ពាង់ជានឞ្រាសនើស”។
2 ឞ្រាសយេឆូ អើសមាខាន់ពាង់៖ “អាសខាន់អៃមៃមឹនមពោលកាលីលេ អីនៃគែសនាវតីសអ៝ក់រាលាវមាដាសផូងកាលីលេ អេងៗឞើស ទឹងគែសមាខាន់ពាង់ខឹតអ្យើសកើតនៃ?
3 គ៝ប់មឞើសមាខាន់អៃមៃ មោទីអោស! លាសខាន់អៃមៃមោគែសរាគ៝ល់លើយនូយ្សនហ៝ម់អ្យើស ខាន់អៃមៃមរារ៝សហេងតឹមឞានមាខឹតឞូអីនៃដ៝ង់។
4 លាសនទ្រីអ៝ន់ខាន់អៃមៃកាសគឹតនោកទូមល៝ម់ជៃព្រេសរាញាឆីល៝ម តាប៝នក្វ៝ង់យេរូឆាលឹម ជៃអីនៃងក្ល៝ន់ឞូនុយ្ស ១៨ នុយ្សខឹត។ អាសខាន់អៃមៃមឹនខាន់ពាង់អីនៃយ៝រមាគែសនាវតីសអ៝ក់រាលាវមាឞូនុយ្សអាបាៈអេងតាប៝នយេរូឆាលឹម ឞើស?
5 មោទីអោស! គ៝ប់មឞើសមាខាន់អៃមៃ លាសខាន់អៃមៃមោគែសរាគ៝ល់លើយនូយ្សនហ៝ម់អ្យើស ខាន់អៃមៃតៃរ៝សហេងដ៝ង់”។
នាវងើយនតឹតមាតើមរាវី មោគែសព្លៃ
6 ជេសរីឞ្រាសយេឆូ ងើយនាវនតឹតអ្យាលាស៖ “គែសទូហ្វេឞូក្លោតាម់ទូតើមរាវី តាមីរពាង់នើម។ អាប់នាម់ត៝ត់ខៃគែសព្លៃឞូនុយ្សអីតើមមីរអីនៃគៃមាពែៈព្លៃឞើសតើមរាវី អីនៃមោអោសឆៃគែសព្លៃ។
7 ជេសរីពាង់លាសមាឞូនុយ្សម៝ត់មីរនៃ៖ «ហើយមៃ តើមរាវី អ្យាលែៈពែនាម់ជេសគ៝ប់គៃមាពែៈព្លៃ មោអោសឆៃព្លៃ។ កាល់មអារ់លើយទោស ម៝សជានរ៝ងហ្វាចទើមនែស!»
8 ជេសរីឞូនុយ្សអីម៝ត់មីរនៃលាស៖ «ហើយកោរាញ មៃរ៝ងពាង់ហោមទូនាម់ជឹត ក៝ប់គ៝ប់ញឆើរនែស តេៈអាច់នទ្រោកប៝ត់។
9 ងខេបលាសនាម់ឞើសនាប់តៃព្លៃ។ លាសមោឆៃព្លៃដ៝ង់ទឹងគែសមាកាល់លើយពាង់!»”
ឞ្រាសយេឆូ ជានឞាសឞូអូរដុនច៝រកុយ្ស
10 គែសទូនាររី ជេងនារឆាបាត់ អីនារផូងអីឆ្រាអែល រាលូឞ្វៃជានការ ឞ្រាសយេឆូ គុនតីឞូតាញីសរាបុនផូងអីឆ្រាអែល រី។
11 តានតុកនៃគែសទូហ្វេឞូអូរឞ្រាសអ្យើសលើសពាង់ លែៈជ៝ៈ ១៨ នាម់ហើយ ច៝រកុយ្សពាង់ដុន ទ៝ក់ឆ៝ង់មោឞ្លាវអោស។
12 ទោលឞ្រាសយេឆូ ឆៃឞូអូរអីនៃ ពាង់ក្វាល់ឞូអូរអីនៃវាច់ទាច់ ជេសរីលាសមាពាង់៖ “នាវដុនច៝រកុយ្សអៃលែៈឞាសជេស”។
13 ឞ្រាសយេឆូ តេៈតីកាលើឆាក់ពាង់រី ជេសរីឞូអូរអីនៃទ៝ក់ឆ៝ង់ឞាសនទាលតានៃរ៝ ងក្រែមាពាង់រានេមាកោរាញឞ្រាសដ៝ង់។
14 តីសមាឞូនុយ្សអីម៝ត់អ្វាញ់ញីសរាបុននៃ ឆៃឞ្រាសយេឆូ ជានឞាសឞូតានារឆាបាត់ ពាង់ជីនូយ្សងាន់។ ពាង់លាសមាផូងប៝នលានអីនៃ៖ “គែសព្រាវនារទើយជានការ លាសនទ្រីខាន់អៃមៃហាន់តានារអីនៃទោ លាសអុចជានឞាសនាវជី លើយអោសហាន់តានារឆាបាត់ ”។
15 ឞ្រាសយេឆូ លាសមាឞូនុយ្សអីម៝ត់ញីសរាបុននៃ៖ “ហើយឞូនុយ្សជានអ្យាត់នាវកោរាញឞ្រាសទើម! អាសទឹងលែៈខាន់មៃអើមមោលាសទ្រ៝សនទ្រោក ឆែសលៀ ឞើសនទ្រូងងគារលែវអ៝ន់ពាង់ញេតទាកតានារឆាបាត់ ហែស? នទើអីនៃជានការដ៝ង់។
16 ឞូអូរអ្យាក៝នឆៅអាឞ្រាហាម់ អីចែផូងឞ៝ន់ដ៝ង់។ ឆាតាង់ អីកោរាញមពោលឞ្រាសអ្យើសក៝ត់ពាង់លែៈជ៝ៈ ១៨ នាម់ងាន់ លាសនទ្រីគ៝ប់រាក្លាយ្សពាង់តានារឆាបាត់ អើមមោទីបាស?”
17 ជេសឞ្រាសយេឆូ ងើយនៃ ដីតព្រេងទាទេងាន់លែៈឞូនុយ្សអីតឹមរាទ៝ង់ដាសពាង់រីនើស។ ល៝ង់អីប៝នលានរីឞូគែសនាវរាម់មអាកងាន់មាលែៈនាវទើយនាវអ្វែសឞ្រាសយេឆូ ជានអីនៃ។
នាវងើយនតឹតមាគារ់ឆីទុតជេៈ នទ្រែលមានទ្រូយ
នាវងើយនតឹតមានាវកោរាញឞ្រាសម៝ត់អ្វាញ់ឞូនុយ្ស
(មថ ១៣:៣១-៣៣; មក ៤:៣០-៣២)
18 ជេសរីឞ្រាសយេឆូ លាស៖ “ម៝សនទើទើយតឹមនតឹតមានាវកោរាញឞ្រាសម៝ត់អ្វាញ់? លាសនទ្រីម៝សនទើគ៝ប់ជានគៃមាទើយតឹមរាដឹលមានាវកោរាញឞ្រាសម៝ត់អ្វាញ់ឞូនុយ្សនៃ?
19 នាវកោរាញឞ្រាសម៝ត់អ្វាញ់ឞូនុយ្ស ជេងតឹមឞានមាគារ់ឆីទូនតីលទុតជេៈ គែសទូហ្វេឞូក្លោតាម់តាមីរពាង់នើមរី។ គារ់ឆីអីនៃហ៝នជេងតើមឆីទុតក្វ៝ង់ ជេសរីនហ៝មាគែសឆ្យុមជានរាឆ្វាន់តាងគីងនៃដ៝ង់”។
20 ឞ្រាសយេឆូ លាសជឹត៖ “លាសនទ្រីម៝សនទើអេងជឹតគ៝ប់នតឹតគៃមាទើយតឹមឞានមានាវកោរាញឞ្រាសម៝ត់អ្វាញ់នៃ?
21 នាវកោរាញឞ្រាសម៝ត់អ្វាញ់ឞូនុយ្ស ជេងតឹមឞានមានទ្រូយទូមល៝ម់ ទូហ្វេឞូអូរឆ៝ៈព៝តលាយនទ្រែលរានីសឞាព្រាង់ ពាង់តេៈទាកមព្យាច់អ៝ន់តឹមលាប់ឞាល់គៃមាជាននុមពាង់ ត៝ត់ជ៝ៈទូម៝ងឞារម៝ងឞើសកើយនៃ ទឹងលែៈនទើអីនៃលើមាក្វ៝ង់លើមាក្វ៝ង់”។
នាវនតឹតមាមពោងហ្វេត
(មថ ៧:១៣-១៤, ២១-២៣)
22 ជេសរីឞ្រាសយេឆូ ហាន់រាប៝ង់ជឹតប៝នក្វ៝ង់យេរូឆាលឹម ពាង់ហាន់គ្លាត់រ៝ៈប៝នក្វ៝ង់ រ៝ៈប៝នជេៈអេងៗ នហ៝មានតុមនតីឞូដ៝ង់។
23 តាទូប៝នគែសទូហ្វេឞូក្លោអោបពាង់៖ “ហើយកោរាញ ឞូនុយ្សអីគែសនាវរាក្លាយ្សគែសដេៈទើមបាស?” ឞ្រាសយេឆូ អើសមាពាង់៖
24 “ត្រ៝ងតានាវរាក្លាយ្សតឹមឞានមាមពោងជៃហ្វេត លាសនទ្រីអ៝ន់ខាន់អៃមៃញឆ្រោយ្សលាប់រ៝ៈមពោងជៃហ្វេតអីនៃ។ គ៝ប់មឞើសមាខាន់អៃមៃ គែសអ៝ក់ឞូនុយ្សអុចលាប់ តីសមាមោទើយអោស។
25 គែសទូហ្វេតើមជៃ ត៝ត់ទូនារពាង់ទ៝ក់រាដាង់លើយមពោង ខាន់អៃមៃគុឞើសទីសមពោងរី នតើមក្វាល់ពាង់៖ «ហើយកោរាញ! ហើយកោរាញ! ពឹមពោងមាហេនបាៈអើ»។ ពាង់អីតើមជៃនៃអើសមាខាន់អៃមៃលាស៖ «មោអោស គ៝ប់មោអោសគឹតនាល់ខាន់អៃមៃអីនៃឞើសតាៈ!»
26 ជេសរីខាន់អៃមៃមឞើសតៃមាពាង់ដ៝ង់៖ «ម៝សនើស! ហេនវៃគុឆោងឆានទ្រែលមៃនើសហ្យើ មៃវៃនតុមនតីហេនរ៝ៈប៝នដ៝ង់»។
27 ពាង់លាសមាខាន់អៃមៃ៖ «ហើយមពោលជានការក្វែ ទូងាយឞើសគ៝ប់ហ៝ម់! គ៝ប់មោអោសគឹតនាល់ខាន់អៃមៃអីនៃឞើសតាៈ!» គ៝ប់តឹមឞានមាតើមជៃអីនៃ។
28 ជេសរីខាន់អៃមៃគែសនាវញហ្យាង់ញុម នទ្រែលមារាច្យាត់ឆេក ទោលខាន់អៃមៃឆៃមពោលចែខាន់អៃមៃអាឞ្រាហាម់ អីឆាក់ នទ្រែលមាយាកោប ជេសរីនទ្រែលមាឞូនុយ្សនតើយ្សនាវងើយកោរាញឞ្រាសកាល់អែនើសគុតានាវកោរាញឞ្រាសម៝ត់អ្វាញ់នៃ តីសមាអីខាន់អៃមៃនៃកោរាញឞ្រាសនត្លើយលើយឞើសទីសរី។
29 គែសឞូនុយ្សអីតាៈឞើសអាប់ញជោញឞ្រី ខាន់ពាង់មោអោសទីផូងអីឆ្រាអែល គុញេតឆោងឆានទ្រែលតានតុកឞ្រីកាដាច់កោរាញឞ្រាសរីដ៝ង់។
30 ល៝ង់ឞូនុយ្សអីឞើសកើយព្លាច់ឞើសនាប់ ឞូនុយ្សអីឞើសនាប់ព្លាច់ឞើសកើយច្រាវ គែសឞូនុយ្សអាបាៈតានែសនតូអ្យាឞូគឹតខាន់ពាង់គែសនាវខ្លៃងាន់ យើនមាតាជឹតនាប់តៃមោអោសគែសនាវខ្លៃ តីសមាគែសឞូនុយ្សអាបាៈអេងជឹតតានែសនតូអ្យាឞូគឹតខាន់ពាង់មោអោសគែសនាវខ្លៃ យើនមាតាជឹតនាប់តៃងខើងមាគែសនាវខ្លៃ”។
ឞ្រាសយេឆូ គែសនាវរាង៝តមាប៝នក្វ៝ង់យេរូឆាលឹម
(មថ ២៣:៣៧-៣៩)
31 តានោកនៃគែសផូងផារីឆី អាបាៈហាន់ម៝ប់ឞ្រាសយេឆូ ជេសរីលាសមាពាង់៖ “មៃទូឞើសនតុកអ្យាហ៝ម់ កោរាញម៝ត់អ្វាញ់ហេរោត-អ៝ន់តីពាស អុចងខឹតមៃ”។
32 ឞ្រាសយេឆូ លាសមាផូងអីនៃ៖ “ពាង់មោអោសគែសនាវទើយមាគ៝ប់ ហាន់ខាន់មៃមឞើសមាពាង់អីឞូនុយ្សតឹមឞានមាឆ៝ឞ្រីអីនៃ នារអ្យា នារអោយតៃ គ៝ប់ហោមនត្រុតឞ្រាសអ្យើស នទ្រែលមាជានឞាសឞូនុយ្សជី ត៝ត់នារអោយក្លាកគ៝ប់ជានការគ៝ប់អ្យាត៝ត់ជេស។
33 យើនមានារអ្យា នារអោយតៃ នទ្រែលមានារអោយក្លាក អ្យាត់មាគ៝ប់ហាន់រ៝ៈត្រ៝ង គ៝ប់ហាន់ត៝ត់តាប៝នក្វ៝ង់យេរូឆាលឹម យ៝រលាសមោទីអោសមាឞូនុយ្សនតើយ្សនាវងើយកោរាញឞ្រាសខឹតឞើសទីសប៝នអីនៃ។
34 ហើយឞូនុយ្សតាប៝នយេរូឆាលឹម ឞូនុយ្សតាប៝នយេរូឆាលឹម ខាន់អៃមៃលែៈងខឹតជេសឞូនុយ្សនតើយ្សនាវងើយកោរាញឞ្រាសកាល់អែនើស ឆ៝ៈលុនតុបងខឹតលើយអីឞូនុយ្សកោរាញឞ្រាសដាៈហាន់នតីខាន់អៃមៃ។ យើនមាលែៈបាបើងាន់គ៝ប់អុចរាគូមខាន់អៃមៃ តឹមឞានមាមែអ្យារ់រាតុកក៝នអ៝ន់គុគូមតាន៝ម់នារពាង់ តីសមាខាន់អៃមៃមោអុចអោស។
35 គ៝ប់មឞើសមាខាន់អៃមៃ គ៝ប់ហាន់អាខាន់អៃមៃហោមទូតឹទើម ជេសរីតៃខាន់អៃមៃមោហោមអោសឆៃគ៝ប់ជឹត។ អ្វាញ់ប៝នខាន់អៃមៃតៃកោរាញឞ្រាសនត្លើយងាន់ នហ៝មាត៝ត់ម៝ងខាន់អៃមៃលាសមាគ៝ប់៖ «ទាន់កោរាញឞ្រាសអ៝ន់នាវគែសជេងមាឞូនុយ្សអ្យា អីកោរាញឞ្រាសទែដាៈវាច់»”។