15
នាវងើយនតឹតឞែឞ្យាប់រ៝ស
(មថ ១៨:១២-១៤)
1 ជេសរីគែសទូនារ គែសមពោលក៝ប់ឆ៝ៈព្រាក់ឞើសឞូមាអ៝ន់កោរាញម៝ត់អ្វាញ់ នទ្រែលមាឞូនុយ្សអីឞូកើបជេងឞូនុយ្សតីស រានវាច់តាឞ្រាសយេឆូ រីទាទេ គៃមាអ្យាត់នាវពាង់ងើយ។
2 ជេសរីផូងផារីឆី នទ្រែលមាផូងនើមនតីនាវវៃផូងអីឆ្រាអែល ខាន់ពាង់ងើយបុកងើយឆ្វីសលាស៖ “ល៝ង់ពាង់អីនៃរ៝មឞូនុយ្សតីស ឆោងឆានទ្រែលខាន់ពាង់ដ៝ង់!”
3 ជេសរីឞ្រាសយេឆូ លាសមាខាន់ពាង់មានាវងើយនតឹត៖
4 “នតឹតលាសតាផូងខាន់មៃ ឞូម៝សគែសឞែឞ្យាប់ ១០០ ជេសរីរ៝សទូមល៝ម់ ពាង់មរានត្លើយឞែឞ្យាប់ ៩៩ អីនៃតាឞ្រីរាទាស ជេសរីហាន់ជ៝យងាន់ជ៝យងាន់ទូមល៝ម់ឞែឞ្យាប់អីរ៝សនៃអ៝ន់ត៝ត់ឆៃរ៝។
5 ត៝ត់ឆៃរី ពាង់រាម់មអាកងាន់ ពឺឞែឞ្យាប់អីនៃតេៈតាមលីកពាង់នើមរី ជេសរីព្លឹឆឹតតៃតានតុកអីនៃ។
6 ឆឹតត៝ត់អាជៃពាង់នើមរី ពាង់ក្វាល់មឹតជាង់ពាង់ នទ្រែលមាអ៝សនោច្យៅមែង មឞើសមាខាន់ពាង់៖ «ហើយខាន់អៃមៃកើលរាម់មអាកនទ្រែលគ៝ប់ហ៝ម់ យ៝រលាសឞែឞ្យាប់គ៝ប់អីរ៝សនើសលែៈឆៃជេស»។
7 គ៝ប់មឞើសមាខាន់មៃ គែសនាវរាម់មអាកហោងាន់តាកាលើត្រោកតានតុកកោរាញឞ្រាសនើម មាទូហ្វេឞូនុយ្សតីសរាគ៝ល់លើយនូយ្សនហ៝ម់អ្យើស រាលាវមាឞូនុយ្សឆ៝ង់ ៩៩ អីមោហោមខាច់រាគ៝ល់នូយ្សនហ៝ម់អ្យើស”។
នាវងើយនតឹតមាព្រាក់កាក់រ៝ស
8 ឞ្រាសយេឆូ ងើយទូនាវនតឹតជឹត៖ “នតឹតលាស លាសគែសទូហ្វេឞូអូរគែសជឹតមល៝ម់ព្រាក់កាក់ ជេសរីរ៝សទូកាក់ ពាង់មរាមពេសនទ៝ក់មរ៝ម់ មពេសអុញងអាងរ៝ៈពុងរ៝ៈញជោញជ៝យរាម្យាង់អ៝ន់ត៝ត់ឆៃរ៝។
9 ត៝ត់មាឆៃរី ពាង់ក្វាល់មឹតជាង់ពាង់ នទ្រែលមាអ៝សនោច្យៅមែង មឞើសមាខាន់ពាង់៖ «ហើយខាន់អៃមៃកើលរាម់មអាកនទ្រែលគ៝ប់ហ៝ម់ យ៝រលាសព្រាក់គ៝ប់អីរ៝សនើសលែៈឆៃជេស»។
10 គ៝ប់មឞើសមាខាន់មៃ តោងពារ់កោរាញឞ្រាសគែសនាវរាម់មអាកទុតហោ យ៝រលាសគែសទូហ្វេទើមឞូនុយ្សតីសលែៈរាគ៝ល់លើយនូយ្សនហ៝ម់អ្យើស”។
នាវងើយនតឹតមាក៝នមពុតរ៝ស នទ្រែលមានោពាង់
11 ឞ្រាសយេឆូ លាសជឹត៖ “គែសទូហ្វេឞូនុយ្សគែសឞារហៃក៝នឞូក្លោ។
12 គែសទូនារ អីក៝នមពុតនៃលាសមាឞឹពាង់៖ «ហើយឞឹ ដាៈមៃពាៈទ្រាប់នទើខ្លៃអីមៃអុចពាៈអ៝ន់មាគ៝ប់នោកមៃខឹត មៃពាៈហ៝ម់អ៝ន់គ៝ប់អាបៃអ្យារ៝។ គ៝ប់មោអុចអោសក៝ប់ត៝ត់មៃខឹត»។ ជេសរីអីឞឹរីពាៈទ្រាប់នទើខ្លៃអ៝ន់មាលែៈឞារហៃក៝ននៃរ៝។
13 ត៝ត់ឞារពែនារឞើសកើយនៃ អីក៝នមពុតរីពាង់តាច់ទឹងលែៈទ្រាប់នទើពាង់នើម ជេសរីញអោតព្រាក់ហាន់ជឹតឞ្រីងាយ។ តាឞ្រីអីនៃពាង់ទឹញរីស(មអីសមអែស) ព្រាក់ពាង់នើមត៝ត់លែៈ។
14 ត៝ត់មាលែៈព្រាក់រី ល៝ង់តាឞ្រីអីនៃនតើមគែសនាវជីឆ៝ត់ជីង៝តទុតហោ អីពាង់នើមរីលែៈអ៝អាចដ៝ង់។
15 ជេសរីពាង់ហាន់ទាន់គុជានការឞូទូហ្វេតាឞ្រីនៃ ឞូដាៈពាង់ម៝ត់ឆុរផូងរ៝ៈមីរ។
16 ពាង់អុចងាន់មាមពាឞូអ៝ន់ឆុរឆាគៃមាឞាសជីង៝ត តីសមាមោគែសអោសឞូអ៝ន់ពាង់ឆា។
17 ត៝ត់ទូនារពាង់កាសគឹតឆាក់ ពាង់មឹនអេងតាឆាក់ពាង់នើមរី៖ «ទឹងលែៈឞូនុយ្សជានការមាឞឹគ៝ប់គែសនទើឆោងឆាត៝ង់រាមែស ល៝ង់គ៝ប់គុតាអ្យាតាច់ព្រ៝ចអុចមាខឹតងាន់រ៝។
18 គ៝ប់ព្លឹឆឹតមាឞឹហើយ្ស មឞើសមាពាង់៖ «ហើយឞឹ ក៝នជានតីសមាកោរាញឞ្រាស ជេសរីជានតីសមាមៃដ៝ង់។
19 គ៝ប់អ្យាមោហោមអោសទីមៃក្វាល់ជេងក៝នមៃជឹតឞឹ ទាន់មៃកើបគ៝ប់ជេងឞូនុយ្សជានការមាមៃទើមហ៝ៈ»»។
20 ជេសមឹនកើតនៃពាង់ទ៝ក់ឆឹតមាឞឹពាង់រ៝។ ពាង់ហាន់រ៝ៈត្រ៝ងឞឹពាង់ឆៃហោមងាយ ត៝ត់មាឆៃឞឹពាង់យោៈនអាចហោងាន់ ញច្វាត់រានអូតអីក៝នរី។
21 ជេសរីអីក៝នរីមឞើសមាឞឹ៖ «ហើយឞឹ ក៝នជានតីសមាកោរាញឞ្រាស ជេសរីជានតីសមាឞឹដ៝ង់ គ៝ប់អ្យាមោហោមអោសទីមៃក្វាល់ជេងក៝នមៃជឹត ឞឹ»។
22 ជេសរីអីឞឹនៃមឞើសមាទឹកពាង់៖ «ហាន់ឆ៝ៈឞ៝កអាវអីទុតអ្វែសអ៝ន់គើញ ញឆ៝សអ៝ន់មាក៝នគ៝ប់អ្យា ជេសរីឆ៝ៈរាគេន នទ្រែលមានតោជ៝តឆើមនត្រុបអ៝ន់ពាង់ដ៝ង់ គៃមាញហើពាង់ជេងក៝នគ៝ប់ងាន់រ៝។
23 ជេសរីឆ៝ៈក៝ននទ្រោកអីពេតអេងនើសលាច់គុចញេតឆោងឆាអ៝ន់មអាក
24 យ៝រលាសក៝នគ៝ប់នើសតឹមឞានមាខឹត អាបៃអ្យាពាង់លែៈរេសជឹត ពាង់នើសរ៝ស អាបៃអ្យាលែៈគ៝ប់ឆៃដ៝ង់»។ ជេសរីខាន់ពាង់លែវឞាល់ញេតឆោងឆាមអាកងាន់។
25 នោកនៃអីក៝នឞោកទាករីគុអាមីរ។ ត៝ត់ពាង់ឆឹតឞើយត៝ត់អាជៃ តាង់នតែសគ៝ងគ៝រ់ នទ្រែលមារ៝ម់មព្រើ
26 ពាង់ក្វាល់ទូហ្វេទឹកអោប៖ «ម៝សនទើជាននៃ?»
27 ទឹកអីនៃមឞើសមាពាង់៖ «អ៝សមៃលែៈឆឹត។ ឞឹមៃដាៈឞូលាច់គុចក៝ននទ្រោកអីឞ៝ន់ពេតនើស យ៝រលាសក៝នពាង់ព្លឹឆឹតគែសនាវអ្វែសលាង់»។
28 ក៝នឞោកទាកអីនៃជីនូយ្សរាមាវងាន់ មោអុចអោសលាប់ត្រោមជៃ ជេសរីអីឞឹរីលោសអាទីសអ្យាឞ៝ញដាៈពាង់លាប់។
29 ពាង់អើសមាអីឞឹ៖ «គ៝ប់គុនទ្រែលមៃលែៈជ៝ៈនាម់ងាន់ មោអោសរាលាវឞ៝រ់មឞូងមៃ ជេសរីឞ៝លលាសអីក៝នឞែមៃមោអ៝ន់មាគ៝ប់ គ៝ប់ឞែមាលាច់គុចញេតឆោងឆានទ្រែលមឹតជាង់ ទូមល៝ម់មោអើម។
30 ល៝ង់អីក៝នមៃអីនៃ ពាង់ទឹញរីស(មអីសមអែស) លែៈទ្រាប់នទើមៃ ឆ៝ៈទ៝ង់គុដាសឞូអូរអេងៗ យើនមាត៝ត់មាពាង់ព្លឹឆឹតមៃលាច់ក៝ននទ្រោកអីពេតអ៝ន់មាពាង់រ៝»។
31 អីឞឹអើសមាពាង់៖ «ហើយនោ មៃគុនទ្រែលគ៝ប់មរ៝ លែៈនទើគ៝ប់ហោមគែសនើសជេងនទើមៃដ៝ង់។
32 យ៝រលាសអ៝សមៃអីនៃនើសតឹមឞានមាខឹត អាបៃអ្យាលែៈរេសជឹត ពាង់នើសរ៝ស អាបៃអ្យាលែៈឞ៝ន់ឆៃដ៝ង់ លាសនទ្រីអ៝ន់ឞ៝ន់ញេតឆោងឆាមអាក»”។