ឆ៝ម់បុតពោលញជ្វាល់អ៝ន់មាផូងញឆីងតាប៝ន
ផីលីប
នាវឞោកអ៝ន់ឞូគឹតល៝រ
នើមញចីសឆ៝ម់បុតអ្យារាញាពោល ពាង់ញចីសឆ៝ម់បុតអ្យាក្លាប់លាសតានាម់ ៦១ ក្លាប់លាស ២៨ នាម់ជេសឞ្រាសយេឆូ ទ៝ក់រេស។ ពាង់ញចីសឆ៝ម់បុតអ្យានោកពាង់ហោមគុតាត្រោមនទ្រូង នាវពាង់គុនទ្រូងនៃ យ៝រមានាវមឞើសងក៝ចនាវមហែមហានអ្វែស(ផល ១:៧, ១៣, ១៤, ១៧)។ ឞូមឹនលាសពាង់គុនទ្រូងតាប៝នរោម ។ នោកពោលញជ្វាល់ឆ៝ម់បុតផីលីបអ្យា ពាង់ញជ្វាល់នទ្រែលដ៝ង់ពែអឹឆ៝ម់បុតអាអេងជឹត ១. ឆ៝ម់បុតអេផេឆោ ២. ឆ៝ម់បុតកោលោស ៣. ឆ៝ម់បុតផីលេមោន។
មាឆ៝ម់បុតអាអេងអីពោល ញចីសទាន់អ្វាញ់តាឆ៝ម់បុតរោមតានាវឞោក «ឆ៝ម់បុតពោល »។
ប៝នផីលីបតាឞ្រីមាឆេដោន ឞ្រីមាឆេដោន ឞើសលើឞ្រីអាខៃ លែៈឞារឞ្រីអីនៃអាបៃអ្យាជេងឞ្រីគ្រែក ។ ពោល លែៈអើមហាន់នតីនាវមហែមហានអ្វែសតាប៝នផីលីប ក្លាប់លាសតានាម់ ៥០(ការ ១៦:៦-៤៩)។ ផូងញឆីងតាប៝នផីលីប អ៝ក់តឹខាន់ពាង់អ៝ន់ព្រាក់មាពោល គៃមាពាង់ហាន់មឞើសងក៝ចនាវមហែមហានអ្វែស។ ត៝ត់ផូងញឆីងតាប៝នផីលីប តាង់លឺពោល គុតានទ្រូង ខាន់ពាង់ដាៈនោអេពាព្រោដីត ហាន់ម៝ប់ពាង់ នអ៝ប់មាញជ្វាល់ព្រាក់។
នាវអុចនត្រ៝ង់តាឆ៝ម់បុតអ្យា
ពោល ញចីសឆ៝ម់បុតអ្យាគៃមាលាសអ្វែសផូងញឆីងតាប៝នផីលីប អុចនហាវនូយ្សនហ៝ម់ខាន់ពាង់គៃមាគុន៝ប់តានាវញឆីង អុចនហាវនូយ្សនហ៝ម់ខាន់ពាង់គៃមាគុតានាវរាម់មអាក អុចមឞើសមាខាន់ពាង់លើយអោសអ្យាត់នាវនតីអីនើមនតីងក្លាៈ។ តា ផល ៤:៤ ពោល ញចីស៖ «អើអ៝សនោតានាវញឆីង អ៝ន់ខាន់អៃមៃគែសនូយ្សនហ៝ម់រាម់មអាកនឹងយ៝រមាខាន់អៃមៃគុនទ្រែលកោរាញយេឆូ ។ គ៝ប់ទាន់មឞើសតៃទូតឹជឹត៖ អ៝ន់រាម់មអាកហ៝ម់!»
មឞើសនាវខ្លៃតាឆ៝ម់បុតអ្យា
- នាវអោបអ្វែសលាង់ (១:១-១១)
- នាវរេសជេងពោល (១:១២-២៦)
- នាវរេសនទ្រែលឞ្រាសក្រីស (១:២៧-២:១៨)
- នាវតីមោថេ នទ្រែលមាអេពាព្រោដីត ហាន់តាប៝នផីលីប (២:១៩-៣០)
- នាវនតុមនតីអ៝ន់គុរេសតឹមទីដាសនាវកោរាញឞ្រាសអុច (៣:១-៤:៩)
- ពោល លាសអ្វែសផូងញឆីងតាប៝នផីលីប (៤:១០-២០)
- នាវនតិញងគ្លែៈទុត (៤:២១-២៣)
1
នាវអោបអ្វែសលាង់
1 ឆ៝ម់បុតគ៝ប់ពោល ញចីស។ គ៝ប់នទ្រែលមាតីមោថេ ហេនឞូនុយ្សឆើមកើលជានការឞ្រាសក្រីសយេឆូ ជេសរីហេនញជ្វាល់ឆ៝ម់បុតអ្យាអ៝ន់មាខាន់អៃមៃអីផូងប៝នលានកោរាញឞ្រាសតាប៝នផីលីប អីគុនទ្រែលឞ្រាសក្រីសយេឆូ នអ៝ប់មាញជ្វាល់អ៝ន់មាមពោលកោរាញម៝ត់អ្វាញ់ផូងញឆីង នទ្រែលមាមពោលកើលជានការផូងញឆីងដ៝ង់។
2 ទាន់កោរាញឞ្រាសឞឹឞ៝ន់នើម នទ្រែលមាកោរាញយេឆូក្រីស អ៝ន់នាវអ្វែស នាវដាប់មពាន់មាទឹងលែៈខាន់អៃមៃ។
នាវពោល មឞើសឆើម
3 អាប់តឹគ៝ប់កាសគឹតមាខាន់អៃមៃ គ៝ប់លាសអ្វែសមាកោរាញឞ្រាសបាបើ។
4 អាប់តឹគ៝ប់ទាន់កោរាញឞ្រាសកើលទឹងលែៈខាន់អៃមៃ គ៝ប់មឞើសឆើមមានូយ្សនហ៝ម់មអាក
5 យ៝រលាសខាន់អៃមៃលែៈគែសលាប់នទ្រែលគ៝ប់តានាវមឞើសងក៝ចនាវមហែមហានអ្វែស ឞើសនតើមខាន់អៃមៃមហែញឆីងនហ៝មាត៝ត់អាបៃអ្យា។
6 គ៝ប់លែៈគឹតនហេលជេសនាវអ្យា៖ កោរាញឞ្រាសអីនើមនតើមជាននទើអ្វែសអ៝ន់តានូយ្សនហ៝ម់ខាន់អៃមៃនៃ ពាង់ហោមជាននឹងអ៝ន់ត៝ត់ជេសនាវអីនៃនហ៝មាត៝ត់នារឞ្រាសក្រីសយេឆូ វាច់តៃ។
7 នាវគ៝ប់រាម់មអាកមាទឹងលែៈខាន់អៃមៃកើតនអាជេងទីងាន់ យ៝រលាសតានូយ្សនហ៝ម់គ៝ប់អុចរ៝ង់មាខាន់អៃមៃ។ ឞ៝លលាសគ៝ប់គែសនទ្រូង មោលាសហោមមឞើសងក៝ចមានាវមហែមហានអ្វែសតាឞើសនាប់ឞូនុយ្សអីតឹមរាទ៝ង់ដាសនាវអីនៃកាដោយ ទឹងលែៈខាន់អៃមៃហោមគុជានការកើតគ៝ប់ដ៝ង់តានាវអ្យាអីតាៈឞើសនាវអ្វែសកោរាញឞ្រាសនើមអ៝ន់មាគ៝ប់។
8 កោរាញឞ្រាសលែៈគឹតជេសទាសហោនាវគ៝ប់ក្ល៝ង់មាទឹងលែៈខាន់អៃមៃ យ៝រមាគ៝ប់យោៈរ៝ង់មាខាន់អៃមៃតឹមឞានមាឞ្រាសយេឆូក្រីស យោៈរ៝ង់មាខាន់អៃមៃដ៝ង់។
9 គ៝ប់មឞើសឆើមទាន់កោរាញឞ្រាសអ៝ន់មាខាន់អៃមៃគែសនាវរ៝ង់លើមាហោលើមាហោ អ៝ន់គែសនាវមឹនគឹតឞ្លាវអាប់នតីលដ៝ង់។
10 គ៝ប់មឞើសឆើមកើតនៃ យ៝រលាសលាសគែសនាវអីនៃខាន់អៃមៃគឹតនហេលនានេៈម៝សនទើអីទុតអ្វែស។ ជេសរីត៝ត់នារឞ្រាសក្រីស វាច់ខាន់អៃមៃលែៈក្ល៝សងាន់ មោអោសគែសនាវមានទុយ្ស។
11 គ៝ប់ទាន់ដ៝ង់ខាន់អៃមៃជាននទើទុតអ៝ក់មានាវឆ៝ង់អីឞ្រាសយេឆូក្រីស ទែកើល គៃមាកោរាញឞ្រាសគែសនាវច្រេកលើប គែសឞូរានេពាង់។
ពោល គុតាត្រោមនទ្រូង
12 អើអ៝សនោតានាវញឆីង គ៝ប់អុចខាន់អៃមៃគឹតនាវអ្យា៖ ទឹងលែៈនទើឞូជានជេរគ៝ប់អ្យា បេងមាជេងអ្វែសច្រាវកើលឞូនុយ្សអ៝ក់តាង់នាវមហែមហានអ្វែស។
13 នទ្រីទឹងលែៈផូងតាហែនញជ្រាង់ញីសកោរាញកាដាច់ នទ្រែលមាឞូនុយ្សអេងជឹតអ៝ក់ងាន់លែៈគឹតនហេលនានេៈជេសនាវគ៝ប់គែសនទ្រូងអ្យាជេងយ៝រមាគ៝ប់តឹងឞ្រាសក្រីស ទើម។
14 អ៝ក់ឞូនុយ្សញឆីងមាកោរាញយេឆូ គែសនូយ្សនហ៝ម់ឞាញ់យ៝រមាលែៈគឹតគ៝ប់គែសនទ្រូងអ្យា ជេសរីលើមាហោឞាញ់មឞើសងក៝ចនាវកោរាញឞ្រាសមោអោសគែសនាវក្លាច។
15 គែសឞូនុយ្សអាបាៈមឞើសងក៝ចនាវមហែមហានអ្វែសមាឞ្រាសក្រីស នូយ្សនហ៝ម់គែសនាវតឹមមោនាចមាគ៝ប់ អុចជេងក្វ៝ង់រាលាវមាគ៝ប់ យើនមាគែសឞូនុយ្សអាបាៈជឹតមឞើសងក៝ចមានូយ្សនហ៝ម់អ្វែស។
16 ល៝ង់ខាន់ពាង់អីមឞើសងក៝ចមានូយ្សនហ៝ម់អ្វែសនៃ មឞើសងក៝ចមានូយ្សនហ៝ម់រ៝ង់មាគ៝ប់ យ៝រលាសគឹតកោរាញឞ្រាសលែៈអ៝ន់ជេសគ៝ប់គុតាអ្យាគៃមាព្លើងអើសដាសឞូនុយ្សអីតឹមរាទ៝ង់ដាសនាវមហែមហានអ្វែសអ្យា។
17 តីសមាមពោលអីមឞើសងក៝ចនាវមហែមហានអ្វែសឞ្រាសក្រីស មានូយ្សនហ៝ម់អុចជេងក្វ៝ង់ទើម ខាន់ពាង់មោអោសគែសនូយ្សនហ៝ម់ឆ៝ង់។ ខាន់ពាង់មឹននត៝បនាវជេរជ៝ត់លើមាហោជឹតមាគ៝ប់នោកគ៝ប់ហោមគុតាត្រោមនទ្រូងអ្យា។
18 មោច្រាវអោស! នាវអីឞូមឞើសងក៝ចនាវមហែមហានអ្វែសឞ្រាសក្រីស ឞ៝លលាសនទ្រាមាជានកាដោយ ឞ៝លលាសជានងាន់កាដោយ គ៝ប់ហោមរាម់មអាកមានាវអីនៃ។ ជេសរីគ៝ប់ហោមរាម់មអាកជឹត
19 យ៝រលាសគ៝ប់លែៈគឹតគ៝ប់មរាគែសនាវរាក្លាយ្សឞើសនាវជេរជ៝ត់អ្យាច្រាវ។ គ៝ប់មរាគែសនាវរាក្លាយ្សតាៈឞើសខាន់អៃមៃមឞើសឆើមទាន់អ៝ន់មាគ៝ប់ នទ្រែលមាឞ្រាសហ្វេងអ្វែសអីឞ្រាសយេឆូក្រីស ទែដាៈកើលគ៝ប់។
20 គ៝ប់អុចហោងាន់ នទ្រែលមារានើមន៝ប់រាក៝ក់ គ៝ប់មោអោសគែសនាវដីតព្រេងតានាប់កោរាញឞ្រាស ដេៈមោអើម យ៝រលាសគ៝ប់ហោមគុន៝ប់តាពាង់ត៝ត់លោច។ ជេសរីគ៝ប់អុចហោងាន់ នទ្រែលមារានើមន៝ប់រាក៝ក់ គ៝ប់មោអោសគែសនាវដីតព្រេងតាៈឞើសគ៝ប់ហោមមឞើសងក៝ចឞ្រាសក្រីស មានូយ្សនហ៝ម់ទុតឞាញ់កើតអើមដ៝ង់ ឞ្រាសក្រីស គែសនាវរានេតាៈឞើសឆាក់គ៝ប់ ឞ៝លលាសគ៝ប់ហោមរេស មោលាសខឹតកាដោយ។
21 ល៝ង់គ៝ប់អ្យា លាសហោមរេសគ៝ប់គុងាវគៃមាអ៝ន់នាវរានេមាឞ្រាសក្រីស ជេសរីលាសគ៝ប់ខឹតហោមអ្វែសមាគ៝ប់ជឹត។
22 យើនមាលាសគ៝ប់ហោមរេសតានែសនតូអ្យាជឹត គ៝ប់ហោមទើយជានការមាគែសអ៝ក់ព្លៃជឹត។ គ៝ប់មោគឹតអោសម៝សនទើអីគ៝ប់អុច។
23 នូយ្សនហ៝ម់គ៝ប់វិវែៈទឹងលែៈឞារទីងងាន់។ គ៝ប់អុចងាន់លោសឞើសនែសនតូអ្យាហាន់គុនទ្រែលមាឞ្រាសក្រីស នើមតាកាលើរី អីនៃជេងអ្វែសរាលាវមាគ៝ប់ងាន់។
24 យើនមាលាសហោមគុរេសតានែសនតូអ្យាហោមជានការមាឞ្រាសក្រីស ជឹត អីនៃគែសនាវខ្លៃរាលាវអ៝ន់មាខាន់អៃមៃ។
25 ជេសរីយ៝រមាគ៝ប់អ្យាត់នហេលនានេៈនាវអីនៃ គ៝ប់លែៈគឹតជេស គ៝ប់ហោមគុរេសតានែសនតូអ្យា គៃមាជានការកើលទឹងលែៈខាន់អៃមៃ។ គ៝ប់ហោមគុរេសគៃមាអ៝ន់ខាន់អៃមៃគែសនាវញឆីងលើមាន៝ប់ នអ៝ប់មាខាន់អៃមៃគែសនូយ្សនហ៝ម់រាម់មអាក។
26 ជេសរីនោកគ៝ប់ព្លឹខ៝ល់ខាន់អៃមៃតៃ ខាន់អៃមៃលើមារានេឞ្រាសក្រីសយេឆូ យ៝រមានទើឞ្រាសក្រីស ជានតាគ៝ប់។
នាវជេរជ៝ត់មាផូងញឆីង
27 អ៝ន់ខាន់អៃមៃគុងាវក្រាវឆាចតឹមទីដាសនាវនតីតានាវមហែមហានអ្វែសឞ្រាសក្រីស នើម។ លាសនទ្រីឞ៝លលាសគ៝ប់ហាន់ខ៝ល់ខាន់អៃមៃកាដោយ មោហាន់កាដោយ តាង់ឞូងក៝ចនាវឞើសខាន់អៃមៃទើម គ៝ប់លែៈគឹតនហេលជេសខាន់អៃមៃគុន៝ប់តាទូនតោរនាវ ញឆ្រោយ្សជានការនទ្រែលឞាល់មានាវញឆីងតានាវមហែមហានអ្វែសមានាវមឹនង្វាយទើម
28 មោគែសអោសក្លាចទូនតីលមាផូងរាលាង់អុចតឹមរាទ៝ង់មាខាន់អៃមៃ។ ត៝ត់ផូងរាលាង់អីនៃឆៃនាវឞាញ់ខាន់អៃមៃ រីមើខាន់ពាង់គឹតវ៝ត់កោរាញឞ្រាសមរាលើសខាន់ពាង់រ៝សហេង យើនមាខាន់អៃមៃលែៈគែសជេសនាវរាក្លាយ្ស។ នាវអីនៃជេងគែសតាៈឞើសកោរាញឞ្រាស
29 តាៈឞើសនាវអ្វែសពាង់នើម ពាង់លែៈអ៝ន់ជេសខាន់អៃមៃញឆីងមាពាង់ មោអោសទើនញឆីងមាពាង់ទើម យើនមាពាង់អ៝ន់ខាន់អៃមៃគែសនាវជេរជ៝ត់យ៝រមាពាង់ជឹត។
30 អាបៃអ្យាខាន់អៃមៃលែៈគែសនាវជេរជ៝ត់ជេស កើតគ៝ប់លែៈគែសនោកគ៝ប់គុតាប៝នខាន់អៃមៃនើស។ ខាន់អៃមៃវៃឆៃនទើអីនៃ ជេសរីលែៈតាង់ដ៝ង់គ៝ប់អាបៃអ្យាហោមគែសនានាវ។