15
អ៝ន់ឞូនុយ្សអីលែៈញឆីងន៝ប់គែសនាវអ៝ត់នូយ្សមាផូងអីញឆីងរាអ្យា
1 ឞ៝ន់អីឞូនុយ្សលែៈន៝ប់ជេសតានាវញឆីង អ៝ន់ឞ៝ន់អ៝ត់នូយ្សមាផូងអ៝សនោតានាវញឆីងអីអេគឹតវ៝ត់ម៝សនទើតីសម៝សនទើទី លើយអោសឞ៝ន់ជ៝យនាវរាម់មអាកមាឆាក់ឞ៝ន់នើមទើម។
2 ទឹងលែៈឞ៝ន់ អ៝ន់ញឆ្រោយ្សជាននទើអីអ៝ន់ឞូនុយ្សអាអេងរាម់មអាក នទើអីកើលខាន់ពាង់គែសនាវញឆីងមាឞ្រាសក្រីស លើមាន៝ប់។
3 ឞ៝លលាសឞ្រាសក្រីស ក៝ៈមោជានមអាកមាឆាក់ពាង់នើមដ៝ង់ កើតមាលែៈគែសញចីសលាសមាពាង់កើតនអា៖ «អើកោរាញឞ្រាស ទឹងលែៈនាវឞូមឺចរាម៝តញឆ៝តមៃ លែៈគែសតាគ៝ប់»។
4 ទឹងលែៈនទើអីលែៈគែសឞូញចីសតានាវកោរាញឞ្រាសងើយអាល៝រនើស ជេងញចីសគៃមានតុមនតីឞ៝ន់ ជេងញចីសគៃមាឞ៝ន់គែសនាវរានើមកោរាញឞ្រាសមរាជានងាន់នទើពាង់លែៈត៝ននើស ជេងញចីសគៃមានហាវនូយ្សនហ៝ម់ឞ៝ន់គែសនូយ្សនហ៝ម់អ៝ត់នូយ្សក៝ប់ត៝ត់គែសនាវអីនៃ។
5 លាសនទ្រីទាន់កោរាញឞ្រាសអីកើលនហាវនូយ្សនហ៝ម់ នទ្រែលមាកើលអ៝ត់នូយ្សជានអ៝ន់ខាន់អៃមៃគែសនូយ្សនហ៝ម់ទូនតោរនាវហ៝ៈ នាវអីនៃទីមាឞូនុយ្សអីតឹងឞ្រាសក្រីសយេឆូ
6 គៃមាខាន់អៃមៃគុទូនតោរនាវ គុតឹមរាង្លាប់រានេនាវច្រេកលើបកោរាញឞ្រាសអីឞឹឞ្រាសយេឆូក្រីស អីកោរាញឞ៝ន់។
នាវមហែមហានអ្វែសអ៝ន់មាទឹងលែៈនទុលមពោលឞូនុយ្ស
7 អ៝ន់ខាន់អៃមៃតឹមរ៝មនទ្រាង់នើម តឹមឞានមាឞ្រាសក្រីស លែៈរ៝មខាន់អៃមៃដ៝ង់ ជានកើតនៃខាន់អៃមៃយើកមាកោរាញឞ្រាស។
8 គ៝ប់មឞើសមាខាន់អៃមៃ ឞ្រាសក្រីស វាច់គៃមាឆើមកើលជានការអ៝ន់មាផូងអីឆ្រាអែល គៃមាញហើកោរាញឞ្រាសជានងាន់នទើពាង់លែៈត៝នមាផូងចែឞ៝ន់កាល់អែនើស។
9 ជេសរីឞ្រាសក្រីស វាច់គៃមាផូងអីមោទីផូងអីឆ្រាអែល រានេនាវច្រេកលើបកោរាញឞ្រាសយ៝រមានាវយោៈពាង់ដ៝ង់ ជេងទីកើតនាវលែៈគែសញចីសកើតនអា៖
«កើតនទ្រីគ៝ប់មរារានេមៃតាងក្លាងផូងអីមោទីផូងអីឆ្រាអែល
គ៝ប់មរាមព្រើរានេមៃ»។
10 គែសញចីសដ៝ង់កើតនអា៖
«អើផូងអីមោទីផូងអីឆ្រាអែល រាម់មអាកហ៝ម់នទ្រែលផូងអីឆ្រាអែល អីផូងប៝នលានកោរាញឞ្រាសនើម!»
11 ជេសរីគែសញចីសជឹតលាសកើតនអា៖
«អើផូងអីមោទីផូងអីឆ្រាអែល អ៝ន់ទឹងលែៈខាន់អៃមៃរានេហ៝ម់មាកោរាញឞ្រាស
អើទឹងលែៈនទុលមពោលឞូនុយ្សអ៝ន់មព្រើរានេហ៝ម់មាកោរាញឞ្រាស»។
12 ជេសរីគែសតាឆ៝ម់បុតឞូនុយ្សនតើយ្សនាវងើយកោរាញឞ្រាសរាញាអេឆាយ លាសកើតនអា៖
«គែសទូហ្វេតាៈឞើសរាន៝យទែសយេឆេ អីឞឹកាដាច់ដាវីត
ពាង់មរាម៝ត់អ្វាញ់ផូងអីមោទីផូងអីឆ្រាអែល
ផូងអីនៃមរារានើមមាពាង់»។
13 លាសនទ្រីគ៝ប់ទាន់កោរាញឞ្រាសអីតើមនាវរានើមអ៝ន់ខាន់អៃមៃគែសនូយ្សនហ៝ម់រាម់មអាក នអ៝ប់មានាវដាប់មពាន់ហោងាន់ យ៝រលាសខាន់អៃមៃញឆីងមាពាង់ គៃមាអ៝ន់ខាន់អៃមៃគែសនាវរានើមទុតន៝ប់រាក៝ក់ងាន់យ៝រមានាវទើយឞ្រាសហ្វេងអ្វែសអីក្ល៝សអ្វែស។
នាវជានការពោល តាផូងអីមោទីផូងអីឆ្រាអែល
14 អើអ៝សនោតានាវញឆីង គ៝ប់លែៈគឹតនហេលងាន់នាវគុងាវខាន់អៃមៃលែៈអ្វែសងាន់ នទ្រែលមាគែសនាវគឹតឞ្លាវជ្រូដ៝ង់មពែសមានាវញឆីងឞ៝ន់ កើតនទ្រីខាន់អៃមៃលែៈឞ្លាវតឹមនតុមនតីនទ្រាង់ខាន់អៃមៃនើមជឹត។
15 យើនមាគ៝ប់ហោមញចីសនាវអាបាៈតាឆ៝ម់បុតអ្យាមានូយ្សនហ៝ម់ឞាញ់ គៃមាងកាសតោរខាន់អៃមៃ។ គ៝ប់ញចីសយ៝រលាសកោរាញឞ្រាសអ៝ន់មាគ៝ប់តាៈឞើសនាវអ្វែសពាង់នើម
16 អ៝ន់គ៝ប់ជេងនើមឆើមកើលជានការមាឞ្រាសក្រីសយេឆូ តាផូងអីមោទីផូងអីឆ្រាអែល អ៝ន់គ៝ប់ជេងនើមជានការមឞើសងក៝ចនាវមហែមហានអ្វែសកោរាញឞ្រាសនើម ជេងតឹមឞានមានាវជានការឞូនុយ្សជានឞ្រាសតាញីសជានឞ្រាសមាកោរាញឞ្រាស។ កោរាញឞ្រាសដាៈគ៝ប់កើតនៃ គៃមាលែវផូងអីមោទីផូងអីឆ្រាអែល ជេងឞូនុយ្សអីកោរាញឞ្រាសរ៝មតឹមឞានមាពាង់ឆ៝ៈទើននទើញហើរមាពាង់ គៃមាខាន់ពាង់ជេងផូងប៝នលានពាង់នើមតាៈឞើសឞ្រាសហ្វេងអ្វែសអីក្ល៝សអ្វែសកើល។
17 គ៝ប់រាម់មអាកមានទើអីគ៝ប់លែៈជានតានាវជានការមាកោរាញឞ្រាស គ៝ប់ទើយជាននទើអីនៃ យ៝រមាឞ្រាសក្រីសយេឆូ គុតាគ៝ប់។
18 គ៝ប់មឞើសងក៝ចទើមមានទើអីគ៝ប់លែៈជេសជានយ៝រមាឞ្រាសក្រីស គុតាគ៝ប់ គ៝ប់មោអោសឞាញ់មឞើសងក៝ចនាវអាបាៈអេងជឹត នាវជានការអីនៃលែវផូងអីមោទីផូងអីឆ្រាអែល អ៝ន់អ្យាត់នាវកោរាញឞ្រាស។ គ៝ប់លែវខាន់ពាង់មានាវគ៝ប់មឞើសងើយ នអ៝ប់មានាវគ៝ប់ជានដ៝ង់។
19 ពាង់អ៝ន់គែសនាវមឞេននអ៝ប់មានាវខ្លៃលែៈនាវងាន់នើស តាៈឞើសនាវទើយឞ្រាសហ្វេងអ្វែសកោរាញឞ្រាស។ នទ្រីទឹងគ៝ប់លែៈមឞើសងក៝ចនាវមហែមហានអ្វែសលាមនតុក នតើមឞើសប៝នក្វ៝ង់យេរូឆាលឹម នហ៝មាត៝ត់តាឞ្រីអីលីរីកុន លែៈលោចជេស។
20 ឞើសនតើមនើសគ៝ប់អុចនឹងហាន់មឞើសងក៝ចនាវមហែមហានអ្វែសតានតុកឞូមោអោសវៃតាង់រាញាឞ្រាសក្រីស គៃមាគ៝ប់មោអោសជាននត៝បទើមតានតុកឞូលែៈជេសមឞើសងក៝ច។
21 គ៝ប់អុចជានតឹងកើតនាវលែៈគែសញចីសកើតនអា៖
«ឞូម៝សមោគែសឞូនុយ្សមឞើសងក៝ចនាវកោរាញឞ្រាស មរាគឹតនាល់កោរាញឞ្រាស
ជេសរីឞូម៝សអីមោអោសតាង់នាវពាង់ មរាគឹតវ៝ត់នាវពាង់»។
នាវពោល អុចហាន់តាប៝នក្វ៝ង់រោម
22 យ៝រមាគ៝ប់មឞើសងក៝ចនាវមហែមហានអ្វែសតាទឹងលែៈនតុកអីនៃ កើតនទ្រីគ៝ប់មោរូមាហាន់ជោៈខ៝ល់ខាន់អៃមៃ។
23 យើនមាអាបៃអ្យាតាអាប់ឞ្រីអ្យាគ៝ប់លែៈជេសជានទាទេ នអ៝ប់មាលែៈជ៝ៈនាម់ដ៝ង់គ៝ប់រើហាន់អាខាន់អៃមៃ។
24 នោកគ៝ប់ហាន់តាឞ្រីអេសពាញ តៃ គ៝ប់រានើមហាន់វែសខ៝ល់ខាន់អៃមៃ គៃមាគុរាម់មអាកនទ្រែលខាន់អៃមៃទូប្ល៝ត់ ជេសរីទាន់ខាន់អៃមៃកើលគ៝ប់ហាន់ជឹតឞ្រីអីនៃជឹត។
25 យើនមាអាបៃអ្យាគ៝ប់ហោមហាន់អាប៝នក្វ៝ង់យេរូឆាលឹម គៃមាកើលផូងប៝នលានកោរាញឞ្រាសតានៃប៝ត់។
26 អ៝សនោតានាវញឆីងតាឞ្រីមាឆេដោន នទ្រែលមាតាឞ្រីអាខៃ ខាន់ពាង់លែៈតឹមរាគូមព្រាក់រៀលមាលែៈនូយ្សនហ៝ម់ងាន់គៃមាកើលផូងអ៝អាចអីលែៈញឆីងតាប៝នយេរូឆាលឹម រី។
27 ខាន់ពាង់អីមោទីផូងអីឆ្រាអែល លែៈជានមាលែៈនូយ្សនហ៝ម់កើតនៃ យ៝រលាសខាន់ពាង់តឹមឞានមាហោមខានរាន៝នដាសផូងអីឆ្រាអែល ។ ផូងអីមោទីផូងអីឆ្រាអែល លែៈគែសឆ៝ៈទើននទើអ្វែសតាៈឞើសកោរាញឞ្រាសអីឞើសនតើមនើសកោរាញឞ្រាសលែៈត៝នមាផូងអីឆ្រាអែល ទើម កើតនទ្រីទីមាផូងអីមោទីផូងអីឆ្រាអែល តឹមពាៈនទើអ៝ន់មាផូងអីឆ្រាអែល ដ៝ង់។
28 លាសនទ្រីនោកគ៝ប់ជេសជានការញជុនព្រាក់អីខាន់ពាង់លែៈរាគូមអ្យា ជេសរីតៃគ៝ប់អុចហាន់តាឞ្រីអេសពាញ វែសម៝ប់ខាន់អៃមៃតាប៝នរោម ។
29 គ៝ប់គឹតងាន់ នោកគ៝ប់ហាន់អាខាន់អៃមៃ ឞ្រាសក្រីស មរាអ៝ន់នាវគែសជេងអ៝ក់ងាន់មាខាន់អៃមៃ។
30 អើអ៝សនោតានាវញឆីង តាៈឞើសនទើឞ្រាសយេឆូក្រីស អីកោរាញឞ៝ន់លែៈជាន នទ្រែលមាតាៈឞើសនាវរ៝ង់អីឞ្រាសហ្វេងអ្វែសអ៝ន់មាខាន់អៃមៃ គ៝ប់ទាន់ខាន់អៃមៃហោងាន់ អ៝ន់ខាន់អៃមៃមឞើសឆើមទាន់កោរាញឞ្រាសអ៝ន់មាគ៝ប់ នទ្រីខាន់អៃមៃជេងលាប់ញឆ្រោយ្សជានការនទ្រែលគ៝ប់។
31 អ៝ន់ខាន់អៃមៃទាន់កោរាញឞ្រាសញជ្រាង់គ៝ប់ឞើសផូងអីឆ្រាអែល អីមោញឆីងមាឞ្រាសក្រីស តាឞ្រីយូដា ទាន់ពាង់ដ៝ង់អ៝ន់ផូងអីឆ្រាអែល អីញឆីងមាឞ្រាសក្រីស តាប៝នយេរូឆាលឹម ឆ៝ៈទើនព្រាក់អ្យាអីគ៝ប់ញអោតអ៝ន់មាខាន់ពាង់។
32 ជេសរីលាសកោរាញឞ្រាសអ៝ន់ គ៝ប់ហាន់អាខាន់អៃមៃតៃនអ៝ប់មាគែសនូយ្សនហ៝ម់រាម់មអាក ជេសរីឞ៝ន់តឹមនហាវនូយ្សនហ៝ម់ឞាល់។
33 ទាន់កោរាញឞ្រាសតើមនាវដាប់មពាន់គុនទ្រែលទឹងលែៈខាន់អៃមៃ អើអ៝ន់គែសកើតនៃងាន់រ៝!