19
មព្រើនាវទើយកោរាញឞ្រាស នទ្រែលមានាវតឹមនអាប់ក៝នឞែឞ្យាប់
1 ជេសឞើសនៃគ៝ប់តាង់នតែសខោសទុតហោងាន់តាកាលើត្រោកតឹមឞានមាឞូនុយ្សទុតអ៝ក់ លាសកើតនអា៖
“អ៝ន់រានេមាកោរាញឞ្រាស!
កោរាញឞ្រាសទើមអីនាក់រាក្លាយ្សឞ៝ន់ ពាង់គែសនាវច្រេកលើបទុតក្វ៝ង់ ពាង់គែសនាវទើយទុតក្វ៝ង់
2 យ៝រលាសនាវពាង់ផាតទោយ្សជេងឆ៝ង់ ជេងទីងាន់។
ពាង់លែៈតេៈទោយ្សប៝នអីនៃអីតឹមឞានមាឞូអូរវាង់តឹរអីឞូលឺ អីជានអ៝ន់ទឹងលែៈឞូនុយ្សតានែសនតូបឹបើចយ៝រមានាវខើសក្លែរឞូអូរអីនៃ។
កោរាញឞ្រាសព្លើងតេៈទោយ្សឞូអូរអីនៃយ៝រលាសពាង់លែៈងខឹតជេសមពោលឞូនុយ្សឆើមកើលជានការមាកោរាញឞ្រាស”។
3 ជេសរីខាន់ពាង់លាសតៃ៖
“អ៝ន់រានេមាកោរាញឞ្រាស!
ញហូកអុញតាប៝នអីនៃ ជេងញហូកថុលបាបើនហ៝រ៝”។
4 មពោលកោរាញ ២៤ នុយ្ស នទ្រែលមាព្វាន់នុយ្សនទើគែសនាវរេសអីនៃ ខាន់ពាង់ពាន់អានែសឞើសនាប់កោរាញឞ្រាសអីគុតារានើលកាដាច់រី យើកមឞាសមាពាង់ទាទេលាស៖
“នាវអីនៃទីងាន់! អ៝ន់រានេមាកោរាញឞ្រាស!”
5 ជេសរីតាង់នតែសឞ៝រ់ឞើសរានើលកាដាច់អីនៃ លាសកើតនអា៖
“ទឹងលែៈឞូនុយ្សអីឆើមកើលជានការមាកោរាញឞ្រាស អីក្លាចយើកមាពាង់ នអ៝ប់មាឞូក្វ៝ង់ ឞូជេៈ
អ៝ន់រានេហ៝ម់មាពាង់”។
6 នោកនៃគ៝ប់តាង់នតែសខោសងាន់តឹមឞានមាឞូនុយ្សទុតអ៝ក់ តឹមឞានមាងគោរទាកក្វ៝ង់ តឹមឞានមានត៝រ់មីស លាសកើតនអា៖
“អ៝ន់រានេមាកោរាញឞ្រាស
យ៝រលាសកោរាញឞ្រាសអីទុតគែសនាវទើយមាទឹងលែៈនតីលនទើ ពាង់លែៈជេងកាដាច់ជេស!
7 អ៝ន់ឞ៝ន់លែវឞាល់រាម់មអាកហ៝ម់ រាម់រាហើនអ៝ន់ទុតហោ
ជេសរីរានេនាវច្រេកលើបកោរាញឞ្រាស
យ៝រលាសលែៈត៝ត់ជេសនាវតឹមរាង្លាប់ងាន់ក៝នឞែឞ្យាប់ដាសផូងអីញឆីងមាពាង់ នាវតឹមរាង្លាប់អីនៃតឹមឞានមានាវតឹមនអាប់។
ផូងអីញឆីងមាពាង់តឹមឞានមាឞូអូរអីមានអាប់ដាសក៝នឞែឞ្យាប់អីនៃលែៈជេសនទ្រាប់ឆាក់ផ្យៅដ៝ង់។
8 កោរាញឞ្រាសលែៈអ៝ន់មាឞូអូរអីនៃញឆ៝សងគូតឞ៝កអាវងលាងទុតអ្វែស
លើបច្រាតងាន់ នទ្រែលមាទុតក្ល៝ស”។
ឞ៝កអាវងលាងទុតអ្វែសនៃគែសនាវខ្លៃលាស ផូងប៝នលានកោរាញឞ្រាសជាននទើអ្វែសនើស។
9 តោងពារ់អីនៃលាសមាគ៝ប់៖ “អ៝ន់មៃញចីសហ៝ម់៖ អ្វែសមអាកងាន់មាឞូម៝សអីលែៈកោរាញឞ្រាសក្វាល់លាប់ឆោងឆាតឹមនអាប់ក៝នឞែឞ្យាប់នៃ!” ជេសរីពាង់លាសតៃមាគ៝ប់៖ “នាវងើយអ្យា ជេងនាវងើយងាន់តាៈឞើសកោរាញឞ្រាសនើម”។
10 ជេសរីគ៝ប់ពាន់អុចយើកមឞាសតាជ៝ង់តោងពារ់អីនៃ យើនមាពាង់លាសមាគ៝ប់៖ “លើយជានកើតនៃអោស យ៝រលាសគ៝ប់ជេងនើមឆើមកើលជានការនទ្រែលមៃ នអ៝ប់មានើមឆើមកើលជានការនទ្រែលផូងអ៝សនោមៃតានាវញឆីងអីមឞើសងក៝ចមាឞូនាវឞ្រាសយេឆូ ជេងកោរាញខាន់ពាង់នើមដ៝ង់។ យើកមឞាសមាកោរាញឞ្រាសហ៝ៈ! យ៝រលាសនាវមឞើសងក៝ចមាឞូនាវឞ្រាសយេឆូជេងកោរាញខាន់ពាង់នើម ជេងនាវនតើយ្សនាវងើយកោរាញឞ្រាស”។
ឞ្រាសយេឆូលែៈទើយតឹមលើស
11 ជេសរីគ៝ប់ឆៃត្រោកពើកឞ៝ង់លាហឺរ ឆៃទូមល៝ម់ឆែសងលាង តាកាលើឆែសនៃគែសនើមញច៝ពាង់ ឞូក្វាល់នើមអីនៃ«រាប់ជាប់» នអ៝ប់មា«អីងាន់»។ ពាង់ផាតទោយ្សឆ៝ង់ ពាង់តឹមលើសដាសឞូមានាវឆ៝ង់ដ៝ង់។
12 អីត្រោមមាត់ពាង់តឹមឞានមាមព្យាត់អុញ ជេសរីតាឞោកពាង់គែសអ៝ក់មោកកាដាច់។ តាឆាក់ពាង់រីគែសញចីសរាញាង្វាយជឹត គែសទូហ្វេពាង់នើមទើមគឹតនាវខ្លៃរាញាអីនៃ។
13 ឞ៝កអាវពាង់ញឆ៝សមឞែៈមហាមទាទេ។ រាញាពាង់«នាវងើយកោរាញឞ្រាស»។
14 ទឹងលែៈផូងតាហែនតាកាលើត្រោកអីនតុកកោរាញឞ្រាស ញច៝ឆែសងលាងទាទេហាន់តឹងពាង់ នអ៝ប់មាញឆ៝សងគូតឞ៝កអាវងលាងអីទុតអ្វែស អីទុតក្ល៝ស។
15 គែសទូមល៝ម់ដាវទុតឆោតលោសឞើសមឞូងពាង់រី ឆ្រែសទឹងលែៈឞ្រីទាកទើយ នាវពាង់ម៝ត់អ្វាញ់គែសនាវទើយងាន់តឹមឞានមាម៝ង់ល៝យ្ស។ ពាង់មរាជ៝តព្លៃយុងយារប៝នតានតុកញជ៝តព្លៃអីនៃ គែសនាវខ្លៃលាសពាង់តេៈទោយ្សមាទឹងលែៈឞូនុយ្សទឹងលែៈឞ្រីទាកអីនៃ តឹងមានាវអុចកោរាញឞ្រាសនើមអីទុតគែសនាវទើយមាទឹងលែៈនតីលនទើ។
16 តាឞ៝កអាវក្វ៝ង់ពាង់ញឆ៝សងគូតរី នទ្រែលមាតាតឹមឞ្លូពាង់រី គែសញចីសរាញាពាង់«កាដាច់ក្វ៝ង់រាលាវមាទឹងលែៈកាដាច់ កោរាញក្វ៝ង់រាលាវមាទឹងលែៈកោរាញ»។
17 នោកនៃគ៝ប់ឆៃទូហ្វេតោងពារ់ទ៝ក់តាកាលើនារ ពាង់នតែរទុតនតែសងាន់លាសមាទឹងលែៈឆ្យុមអីមពារ់តាកាលើត្រោក៖ “វាច់រាគូមឞាល់ហ៝ម់ មាញេតក្វ៝ង់ឆាក្វ៝ង់អីកោរាញឞ្រាសលែៈជេសនទ្រាប់
18 គៃមាឆាមលៃមពោលកាដាច់ ឆាមលៃមពោលកោរាញតាហែន ឆាមលៃមពោលអីទុតទាង់ ឆាមលៃឆែស ឆាមលៃផូងអីញច៝ឆែសអីនៃ នអ៝ប់មាឆាមលៃទឹងលែៈឞូនុយ្ស នអ៝ប់មាទឹកឞូ នអ៝ប់មាក៝នមែ នអ៝ប់មាឞូជេៈ នអ៝ប់មាឞូក្វ៝ង់”។
19 គ៝ប់ឆៃមពោមពា(ឆ្យុម)អីទុតជាញអីនៃ នទ្រែលមាឆៃមពោលកាដាច់លាមនែសនតូ នអ៝ប់មាផូងតាហែនខាន់ពាង់នើមលែៈរាគូមឞាល់ គៃមាតឹមលើសដាសនើមអីគុញច៝ឆែសងលាងអីនៃ ដាសផូងតាហែនពាង់នើមដ៝ង់។
20 មពោមពា(ឆ្យុម)អីទុតជាញនៃឞូញុប នទ្រែលមាញុបដ៝ង់ទូហ្វេឞូនុយ្សនតើយ្សងក្លាៈនាវងើយកោរាញឞ្រាសអីជាននាវខ្លៃទុតនាវនើសតានាប់មពោមពា(ឆ្យុម)អីនៃ។ ឞូនុយ្សនតើយ្សអីនៃលែវមរោសឞូនុយ្សអ៝ន់ហ្យើតមានាវខ្លៃទុតនាវអីនៃនើស ពាង់លែវហ្យើតទឹងលែៈឞូនុយ្សអីគែសនាវមឞេនមពោមពា(ឆ្យុម)អីទុតជាញ នទ្រែលមាទឹងលែៈឞូនុយ្សអីយើកមឞាសមារូបមពោមពា(ឆ្យុម)ទុតជាញអីនៃ។ ទឹងលែៈឞារហៃខាន់ពាង់អីនៃឞូងក្លាច់រេសតាងលៅអុញគែសញឆីវហីត។
21 ល៝ង់ទឹងលែៈមពោលអាបាៈរី ខឹតលែៈផ្យៅយ៝រមាដាវអីលោសឞើសមឞូងនើមអីញច៝តាឆែសរី ជេសរីទឹងលែៈឆ្យុមច៝កឆាមលៃខាន់ពាង់ទុតហើមទាទេ។